ភ្ជាប់​ទៅ​គេហទំព័រ​ទាក់ទង

យុទ្ធនាការ​ប្រឆាំង​អំពើ​ពុករលួយ​​ចិន​នៅ​បន្ត ​ក៏ប៉ុន្តែ​អំពើ​ពុករលួយ​នៅ​តែ​មាន


រូបឯកសារ៖ បុរស​ម្នាក់​ថត​រូប​សែល​ហ្វី​ជាមួយផ្ទាំង​​រូប​ប្រធានាធិបតី​ស៊ី ជីនពិង នៅ​ឯ​ពិធី​តាំង​ពិព័រណ៍​នៅ​សារមន្ទីរ​យោធា ក្នុង​ទីក្រុង​ប៉េកាំង​កាល​ពី​ខេ​តុលា ឆ្នាំ​២០១៦។

ការ​ពង្រីក​យុទ្ធនាការ​ប្រឆាំង​អំពើ​ពុករលួយ​ដែល​ដឹក​នាំ​ដោយ​ប្រធានា​ធិបតីស៊ី ​ជីង​ពីង​ នៃ​ប្រទេស​ចិន ​បាន​ត្រូវ​គេ​ឃើញ​ពួក​មន្រ្តី​ជាង​១​លាន​៥សែននាក់​បាន​ត្រូវ​ស៊ើប​អង្កេត​ហើយ​មេដឹកនាំ​ជាន់ខ្ពស់​មួយ​ចំនួន​បាន​ធ្លាក់​ចេញ​ពី​ដំណែង​ដែរ។

ក៏ប៉ុន្តែ ថ្វីបើ​មាន​តួលេខ​ដ៏​គួរ​ឲ្យ​ភ្ញាក់​ផ្អើល​នេះ​ក៏ដោយ អំពើ​ពុករលួយ​នៅ​តែមាន ​ដូច​ដែលប្រធានាធិបតី​ស៊ី​និយាយថា ​ជា​ការ​គំរាម​កំហែង​ដ៏​ធំបំផុត​មួយ​ដល់​គណបក្ស។

ខណៈ​ដែលអាជ្ញាធរ​និយាយ​ថា ​យុទ្ធនាការ​ប្រឆាំង​អំពើ​ពុករលួយ​បាន​ឡើង​ដល់​សម្ទុះ​ខ្លាំង​បំផុតរួចទៅ​ហើយដែល​នឹង​បន្ត​នៅ​ក្នុង​ឆ្នាំ​២០១៨ អ្នក​វិភាគ​ខ្លះ​និយាយ​ថា ​យុទ្ធនាការ​ប្រឆាំង​នឹង​អំពើ​ពុករលួយ​នោះនៅមិនទាន់​ខ្លាំង​នៅ​ឡើយ។

លោក Ren Jianming ជា​អ្នក​ជំនាញ​ការ​នាំមុខ​ម្នាក់​ស្តី​ពី​អំពើ​ពុករលួយ​របស់​ចិន ​បាន​និយាយថា ​ការ​សង្កេត​ទូទៅគឺ​ថា ​ការ​ប្រយុទ្ធប្រឆាំង​អំពើ​ពុករលួយបាន​ពង្រីកកាន់​តែធំឡើង​ចាប់​តាំង​ពីប្រធានា​ធិបតី​ស៊ី ​ជីង​ពីងបាន​ក្តោប​ក្តាប់​អំណាច​ចាប់​តាំង​ពីសមាជ​គណបក្ស​កុម្មុយនិស្ត​លើក​ទី១៨​មក។

ក៏ប៉ុន្តែ ​លោក​និយាយ​ថា ​ពួកមន្រ្តី​១លាន​៥សែននាក់ដែល​ត្រូវបាន​ស៊ើបអង្កេត​គ្រាន់​តែ​ជាផ្នែកតូច​មួយ​នៃ​ពួកមន្រ្តីពុករលួយ​ប៉ុណ្ណោះ។​សមាជិក​បក្ស​កុម្មុយនិស្ត​មាន​ប្រហែល​៨៩​លាន​នាក់។

លោក Renដែល​ជា​សាស្រ្តាចារ្យ​នៅ​សាលា​គោល​នយោបាយ​សាធារណៈ​និង​ការគ្រប់​គ្រង​នៃ​សាកល​វិទ្យាល័យ Beihang និយាយ​ថា «ប្រសិន​បើ មាន​មន្រ្តី​ទាំង​នោះ​កាន់តែ​ច្រើន​ឡើង​បន្ត​ពុករលួយ ការណ៍​នេះ​មានន័យ​ថា ​យើង​ចាំបាច់​ត្រូវ​គិតអំពីថាតើ​ហេតុ​អ្វី​បាន​មាន​អំពើ​ពុករលួយបន្ទាប់​ពី​សមាជ​គណបក្ស​លើក​ទី១៨មិនទាន់​ទទួល​បានការ​បំភិត​បំភ័យ​និង​ការគំរាម​កំហែង​ល្មម​គ្រប់​គ្រាន់​នោះ។

លោក​និយាយទៀតថា ​ការណ៍​នេះ​បង្កើន​នូវ​សំណួរ​អំពី​អ្វី​ដែល​គេ​ចាំបាច់​ធ្វើ​ការ​ផ្លាស់​ប្តូរ? ​ហេតុអ្វី​បាន​ជាមាន​បញ្ហា​ដូចនេះ?ហើយ​តើ​យើង​ត្រូវ​ពិចារណា​ពី​កល ល្បិច​នៃ​ការ​ប្រឆាំង​អំពើ​ពុករលួយ​របស់​យើងឬទេ?។

ភាគ​ច្រើននៃមន្រ្តី​ជាន់​ខ្ពស់​ចំនួន​១៨​នាក់​ដែល​ត្រូវ​បាន​ស៊ើបអង្កេតនៅ​ឆ្នាំ​២០១៧ នេះ ហើយ​ខណៈ​ដែល​ការស៊ើបអង្កេត​ទាំងអស់​នោះ​បាន​ត្រូវត្រួតត្រា​មើល​ដោយ​មេដឹកនាំ​កណ្តាល​របស់​គណបក្ស​នេះ មេដឹកនាំ​ទាំង​នោះ​ភាគ​ច្រើន​បាន​កាន់ដំណែង​នៅ​ពេល​បច្ចុប្បន្ននេះ​មិន​ដល់​២ឆ្នាំ​ផងទេ។ក្នុង​ករណី​មួយ​ លោក Yu Haiyan ​បាន​រងការ​ស៊ើបអង្កេត​រយៈ​ពេល​២​ខែ​តែប៉ុណ្ណោះ ​បន្ទាប់​ពីបាន​ទទួល​ការតែងតាំង​ថ្មី​ជាអភិបាល​រង​ខេត្ត Gansu។

​មន្រ្តី​ជាន់​ខ្ពស់​ទាំងអស់​ដែល​រងការ​ស៊ើបអង្កេត​ក្នុងឆ្នាំ​២០១៦​ ​លើក​លែង​តែ​មន្រ្តី​ម្នាក់ ​បាន​ត្រូវ​តែងតាំង​ក្នុង​អាណត្តិ​ទី១​នៃ​ការ​កាន់​អំណាច​របស់​ប្រធានា​ធិបតី​ស៊ី។

​ពួក​អ្នក​វិភាគ​និយាយថា ​ករណី​ដែល​មន្រ្តី​ទាំងនេះ​បាន​ត្រូវតែងតាំង​រយៈ​ពេល​ខ្លី​មុនការ​ស៊ើបអង្កេត ​ដូចនេះវានាំឲ្យមាន​ចម្ងល់​អំពី​ការ​ជ្រើសរើស​មន្រ្តី​ទាំង​នោះ​ហើយ​នឹង​ការរាល​ដាល​នៃ​អំពើ​ពុករលួយ។

​អ្នក​វិភាគ​ខ្លះ​ជជែក​ឲ្យ​ហេតុផល​ថា ​ស្ថាន​ភាព​នេះក៏បង្ហាញ​ឲ្យ​ឃើញ​ការ​ពិត​ថា ​ប្រធានា​ធិបតីស៊ី​មិនមាន​មន្រ្តី​ដែល​មាន​សមត្ថភាព​គ្រប់​គ្រាន់​ដើម្បីបំពេញ​តួនាទី​សំខាន់​ៗ។

លោក Hu Xingdou ​ជា​សេដ្ឋ​វិទូ​និង​អ្នក​ធ្វើ​អត្ថា​ធិប្បាយ​បាន​និយាយថា ​អ្វី​ដែល​ចិន​ត្រូវការ​គឺ​ប្រព័ន្ធ​ប្រឆាំង​អំពើ​ពុករលួយ​ទំនើប​មួយ។

លោកHuបាន​និយាយ​ទៀត​ថា «គេ​ត្រូវការ​ធ្វើឲ្យមាន​ការត្រួតពិនិត្យ​និង​តម្លា ភាព​ដូចជាការផ្សព្វ​ផ្សាយ​ទ្រព្យសម្បត្តិ​របស់​ពួកមន្រ្តីហើយនិង​ការ​ប្រើប្រាស់​ហិរញ្ញវត្ថុ​សាធារណៈ​ឲ្យ​មាន​តម្លាភាព‍»។លោក​បាន​ផ្តល់​អនុសាសន៍ថា ​ថវិកា​និងការ​ចំ​ណាយ​ត្រូវ​សម្រេច​តាមរយៈ​សមាជ​ជាតិ​និង​សមាជ​ប្រជាជន​មូលដ្ឋាន​របស់​ចិន ​ហើយគេ​ត្រូវ​លើក​ទឹក​ចិត្ត​បណ្តាញ​ព័ត៌មាន​ឲ្យ​ពិនិត្យ​មើល​សកម្ម​ភាព​របស់​ពួក​មន្រ្តី។

នៅពេល​បច្ចុប្បន្ន​នេះ រឿង​ក្តី​ពុករលួយ​ទាំងអស់​ត្រូវ​បាន​ស៊ើបអង្កេត​មុនគេ​ដោយ​គណៈកម្មការ​កណ្តាល​សម្រាប់អធិការកិច្ច​ខាងពិន័យ​របស់​គណបក្ស។រហូតមក​ទល់​ពេល​នេះ ​ប្រធានា​ធិបតីស៊ី​បាន​ច្រាន​ចោល​ការអំពាវនាវ​ឲ្យមាន​ការបែងចែក​អំណាច​កាន់​តែ​ខ្លាំង​ឡើង​ ហើយ​ជាជំនួស​ទៅ​វិញ​ លោក​បាន​សង្កត់​ទៅលើ​តួនា​ទី​នាំមុខ​មួយ​ដែល​គណបក្ស​ត្រូវ​ដើរតួនាទី​នៅ​ក្នុង​ការ​ប្រយុទ្ធ​ប្រឆាំង​អំពើ​ពុក រលួយ​នេះ។

ការ​បង្កើតគណៈកម្មការ​ត្រួត​ពិនិត្យ​ថ្នាក់​ជាតិ​ដែល​គេ​រំពឹង​ទុក​មួយនៅ​ឆ្នាំ​ក្រោយ ​ត្រូវ​គេ​រំពឹង​នឹង​បន្ថែមការងារ​ដល់​មេដឹកនាំ​របស់​គណបក្ស​នៅ​ក្នុងការ​ប្រយុទ្ធ​ប្រ ឆាំង​អំពើ​ពុករលួយ។គណៈកម្ម​ការ​ដែល​មាន​គោល​បំណង​ភ្ជាប់​ការពង្រឹង​ច្បាប់​ជាមួយ​ការខំ​ប្រឹងប្រែង​ប្រឆាំង​អំពើ​ពុករលួយ​របស់​គណបក្ស ​នឹង​ត្រួតពិនិត្យ​មើលបុគ្គលិក។

​គណៈកម្មការ​ថ្មី​ត្រូវគេ​រំពឹង​នឹង​ទទួល​ខុសត្រូវ​ការត្រូត​ពិនិត្យ​ខាង​រដ្ឋ​បាល ​ការ​រារាំង​អំពើ​ពុករលួយ​និង​ឧក្រិដ្ឋ​កម្ម។

លោក Hun បាន​និយាយ​ទៀត​ថា «នៅ​ថ្ងៃ​អនាគត ​ការ​ស៊ើបអង្កេតទៅលើមន្រ្តី​ជា​ពិសេស​បន្ទាប់​ពីការ​បង្កើត​គណៈកម្មការ​ត្រួត​ពិនិត្យ​ជាតិ ​ប្រហែលកាន់​តែធ្វើ​ខ្លាំង​ឡើងៗ ហើយ​ការណ៍​នេះ អាច​ធ្វើ​ឲ្យ​ពួកមន្រ្តី​ចិន​កាន់​តែស្អាត​ស្អំ​និង​ស្មោះ ត្រង់​កាន់​តែ​ខ្លាំង​ឡើង‍»។‍

ក៏ប៉ុន្តែ ទោះ​បី​នៅពេល​ដែល​ការ​ខំ​ប្រឹងប្រែង​ដើម្បី​បង្ក្រាប​បាន​កើន​ឡើង​ក៏ដោយ ​ពួក​អ្នក​វិភាគ​និយាយ​ថា ​អ្វី​ដែលគេ​ចាំ​បាច់​ធ្វើ​ដែរ​នោះ​គឺ​ការ​ធ្វើ​កំណែ​ទម្រង់​ដ៏​សំខាន់​មួយ​ក្នុងការ​ជ្រើសរើស​មន្រ្តី​និង​ប្រព័ន្ធតែងតាំង​មន្រ្តី។

នៅពេល​បច្ចុប្បន្ននេះ ​ប្រព័ន្ធ​នេះ​ពឹងផ្អែក​យ៉ាង​ខ្លាំង​ទៅលើ​មតិ​របស់​ប្រជា​ពលរដ្ឋ ​ក៏ប៉ុន្តែ ​ដូចដែល​លោក Ren Jianmingនិយាយ គេ​ត្រូវ​ពឹង​ផ្អែកកាន់​តែ​ខ្លាំង​ឡើង​ទៅ​លើ​គោល​នយោបាយ​ខាង​សមត្ថភាព​ដែលគេ​អាច​ប្រើប្រាស់​ដើម្បី​ធ្វើ​វា​ឲ្យ​មានភាពកាន់​តែ​ងាយ​ស្រួល​ឡើង​ដើម្បីរក​ឲ្យ​ឃើញ​មន្រ្តី​ដែល​មាន​បញ្ហា។

​លោក Ren និយាយថា ​«ប្រសិន​បើ ពឹង​ផ្អែកទៅលើ​ការយល់​និងការ​វិនិច្ឆ័យ​ថ្នាក់​ដឹកនាំ​កំពូល​លើ​បុគ្គល ​ខ្ញុំ​ជឿ​ជាក់​ថា ​ការណ៍​នេះ​ប្រហែលនឹងមាន​ការ​លំបាក​ដោះស្រាយ​បញ្ហា​ការដំឡើង​បុណ្ណស័ក្ត​របស់​ពួកមន្រ្តី​នៅ​កម្រិត​ដ៏​សំខាន់​មួយ‍»។

លោក​និយាយទៀត​ថា ​ចិន​អាច​រៀន​តាមទីក្រុងហុងកុងអំពីការ​ប្រើប្រាស់​ការ​លើកលែងទោសរបស់​ទីក្រុង​ហុងកុង​សម្រាប់​ការ​ប្រព្រឹត្ត​អំពើ​ពុករលួយ​តិច​តួច។​ចំណាត់​ការ​នេះ​ជា​គន្លឹះ​មួយ​នៅ​ក្នុង​ការ​ជួយ​ទីក្រុង​ហុងកុង​ប្រែក្លាយពី​ទីក្រុង​ពុករលួយ​ខ្លាំង​បំផុតនៅ​ក្នុង​ពិភព​លោកទៅ​ជា​ទីក្រុងគ្មាន​អំពើ​ពុករលួយមួយ។

លោក Ren និយាយ​ទៀត​ថា «យើង​អាចយក​មក​ប្រើប្រាស់​នូវ​បទពិសោធន៍​ខ្លះ​កាល​ពី​អតីត​កាល រួម​ទាំង​ការ​ប្រើ​ប្រាស់​ការ​លើកលែងទោស​របស់​ក្រុង​ហុងកុង ​ដែល​អាច​ឲ្យ​យើង​ដោះស្រាយ​មន្រ្តី​ពុករលួយ​យ៉ាង​ច្រើន​ក្នុង​ទំហំ​ធំ‍»៕

ប្រែ​សម្រួល​ដោយ ​ជឹង ​ប៉ូជីន

អត្ថបទ​ទាក់ទង

XS
SM
MD
LG