VOA ជា​បណ្តាញ​ផ្សាយ​ពហុ​ព័ត៌មាន​អន្តរជាតិ​ធំ​បង្អស់​របស់​សហរដ្ឋអាមេរិក ដែល​ផ្តល់​ព័ត៌មាន​ជិត​៥០​ភាសា ជូន​អ្នក​ស្តាប់ និង​ទស្សនិក​ជន ដែល​ទទួល​បាន​សារព័ត៌មាន​សេរី​តិចតួច ឬ មិន​បាន​ទទួល​ទាល់តែ​សោះ។ VOA ត្រូវ​បាន​បង្កើត​ឡើង​នៅ​ឆ្នាំ​១៩៤២។ VOA ប្តេជ្ញា​រាយការណ៍​ព័ត៌មាន​ឯករាជ្យ និង​ទូលំទូលាយ ហើយ​នាំ​យក​ការពិត​ជូន​ដល់​អ្នក​ស្តាប់ និង​ទស្សនិកជន។ VOA ត្រូវ​បាន​ឧបត្ថម្ភ​ថវិកា​ដោយ​ពលរដ្ឋ​អាមេរិកាំង​ដែល​បង់​ពន្ធ​ហើយ VOA ជា​ផ្នែក​មួយ​នៃ​ទីភ្នាក់ងារ​សហរដ្ឋ​អាមេរិក​សម្រាប់​បណ្តាញ​ផ្សាយ​ព័ត៌មាន​សាកល។

បេសកកម្ម​របស់ VOA និង​ឯករាជ្យភាព​ក្នុង​ការសម្រេច​អំពី​ការផ្សាយ ត្រូវ​បាន​ធានា​ការពារ​ក្នុង​ច្បាប់​ដែល​ការពារ​អ្នកយក​ព័ត៌មាន VOA ឲ្យ​ជៀស​ផុត​ពី​ឥទ្ធិពល ការ​គាបសង្កត់ និង​ការសង​សឹក​ពី​សំណាក់​មន្ត្រី​រដ្ឋាភិបាល ឬ អ្នកនយោបាយ។

ក្នុង​ឆ្នាំ​១៩៧៦ លោក​ប្រធានាធិបតី Gerald R. Ford បាន​ចុះ​ហត្ថលេខា​លើ​ធម្មនុញ្ញ VOA ដែល​ចែង​ថា៖

១. VOA នឹង​ជា​ប្រភព​ព័ត៌មាន​ដែល​ទុកចិត្តបាន និង​ផ្លូវការ​ជានិច្ចកាល។ ព័ត៌មាន​ VOA នឹង​ត្រឹមត្រូវ មិន​លំអៀង និង​ទូលំទូលាយ។

២. VOA នឹង​តំណាង​ឲ្យ​សហរដ្ឋ​អាមេរិក មិន​មែន​ឲ្យ​តែ​ផ្នែក​ណា​មួយ​នៃ​សង្គម​អាមេរិកាំង​ទេ ហេតុ​ដូច្នេះ VOAនឹង​ឆ្លុះ​បញ្ចាំង​ផ្នត់​គំនិត និង​ស្ថាប័ន​អាមេរិក ដោយ​មាន​តុល្យភាព និង​ទូលំទូលាយ​។

៣. VOA នឹង​បង្ហាញ​គោល​នយោបាយ​សហរដ្ឋ​អាមេរិក យ៉ាងច្បាស់លាស់ និង​យ៉ាង​មាន​ប្រសិទ្ធភាព ហើយ​ថែម​ទាំង​នឹង​មាន​ការពិភាក្សា និង​ការបញ្ចេញ​មតិ​ដោយ​មាន​ការទទួល​ខុសត្រូវ លើ​គោល​នយោបាយ​ទាំង​នេះ។

ក្នុង​ឆ្នាំ​១៩៩៤ សភា​សហរដ្ឋ​អាមេរិក បាន​អនុម័ត​ច្បាប់​ចែង​អំពី​ការផ្សាយ​ព័ត៌មាន​អន្តរជាតិ​របស់​សហរដ្ឋ​អាមេរិក។ ច្បាប់​នេះ ក៏​តម្រូវ​ផង​ដែរ​ថា ការងារ​របស់​អ្នកយក​ព័ត៌មានVOA គឺ​អាច​ទុក​ចិត្ត​បាន ត្រឹមត្រូវ មិន​លំអៀង ទូលំទូលាយ មាន​តុល្យភាព និង​ឆ្លុះ​បញ្ចាំង​នូវ​ភាពចម្រុះ​នៃ​វប្បធម៌ និង​សង្គម។

ក្នុង​ឆ្នាំ​២០១៦ សភា បាន​បញ្ជាក់​ជា​ថ្មី​ម្តង​ទៀត ក្នុង​ច្បាប់​អនុម័ត​ការចាយវាយ​ថវិកា​សម្រាប់​វិស័យ​ការពារ​ប្រទេស​ថា តួនាទី​ប្រមូល​ព័ត៌មាន និង​រាយការណ៍​ព័ត៌មាន ចាំបាច់​ត្រូវ​តែ​បន្ត​មាន​ឯករាជ្យ​ភាព និង​មិន​លំអៀង។

រៀងរាល់​ថ្ងៃ អ្នក​រាយការណ៍​ព័ត៌មានVOA ប្រឹងប្រែង​ធ្វើការ​ទៅ​តាម​គំរូ​នៃ​គោលការណ៍​របស់​សារព័ត៌មាន​សេរី ជូន​ពិភព​លោក។

នាយិកាបច្ចុប្បន្ន​របស់​ VOA គឺ​លោក​ស្រី​ Amada Bennett ដែល​បាន​ចាប់​ផ្តើម​ធ្វើ​ការ​នៅ​ VOAកាល​ពីខែ​មេសា​ ឆ្នាំ​២០១៦។ លោកស្រី​គឺ​ជា​នាយក​ទី​២៩​ របស់​ VOA។​ លោក​ស្រី​មាន​បទ​ពិសោធន៍វិជ្ជាជីវៈ​ខាង​កាសែត​ជា​ច្រើន​ឆ្នាំ។​

VOA

សេរីភាព​សារព័ត៌មាន មាន​សារៈសំខាន់

អំពី VOA ខេមរភាសា

ក្រុម​ផ្សាយ​ជា​ភាសា​ខ្មែររបស់​ VOA (VOA ខេមរភាសា) ផ្សាយ​ព័ត៌មាន​គ្រប់​ជ្រុងជ្រោយ​និង​ផ្សាយ​កម្ម​វិធី​ព័ត៌មាន​ច្រើន​ប្រភេទ​អំពី​ប្រទេស​កម្ពុជា​ តំបន់​អាស៊ី​អាគ្នេយ៍​ សហរដ្ឋ​អាមេរិក​ និង​ពីជុំវិញ​ពិភពលោក។​ រៀង​រាល់​ថ្ងៃ​ កម្មវិធី​វិទ្យុ​របស់​យើង​ខ្ញុំ​ផ្តល់​ជូន​ព័ត៌មាន​ថ្មីៗ​បំផុត។​ យើង​ខ្ញុំ​ក៏​ផ្សាយ​ជូន​សេចក្តី​រាយការណ៍​និង​បទ​វិភាគ​ដ៏​ស៊ី​ជម្រៅ​អំពី​នយោបាយ​អន្តរជាតិ​ សិទ្ធិ​មនុស្ស​ សេដ្ឋកិច្ច​ វិទ្យាសាស្ត្រ​និង​បច្ចេកវិទ្យា សុខាភិបាល​ ពាណិជ្ជកម្ម​ និង​កម្ម​វិធី​កម្សាន្ត​ ហើយ​និង​កម្មវិធី​រៀន​ភាសា​អង់គ្លេសផង​ដែរ។​

កម្មវិធី​វិទ្យុ​របស់ VOA ​ខេមរភាសា ចាប់​ផ្សាយ​ជា​លើក​ដំបូង​នៅ​ថ្ងៃ​ទី​១៥ ខែ​សីហា​ ឆ្នាំ​១៩៥៥។​ សព្វ​ថ្ងៃ​នេះ​ VOA ស្ថិត​ក្នុង​ចំណោមបណ្តាញ​ផ្សាយ​ព័ត៌មាន​ជា​ភាសា​ខ្មែរ​ដ៏​ធំ​បំផុត​មួយ​នៅ​លើ​ពិភពលោក។​ បន្ថែម​ពី​លើ​កម្មវិធី​ផ្សាយ​ ៩០​នាទី​តាម​វិទ្យុ​របស់​យើង​ទៅ​កាន់​ប្រទេស​កម្ពុជា​និង​តំបន់​អាស៊ី​អាគ្នេយ៍​ VOA ខ្មែរ​ ក៏​មាន​ព័ត៌មាន​ជា​វីដេអូ​ដែល​ផ្សាយ​តាម​រយៈ​ស្ថានីយ​ទូរទស្សន៍​ជា​ដៃគូ​និង​បណ្តាញ​ព័ត៌មាន​តាម​អ៊ីនធឺណិត​ជា​ដៃគូ​របស់​យើង​នៅ​ក្នុង​ប្រទេស​កម្ពុជា​ផង​ដែរ។​ VOA ខ្មែរ​ក៏​មាន​ផ្សាយ​ព័ត៌មាន​តាម​ប្រព័ន្ធ​អ៊ីនធឺណិត​និង​ទូរស័ព្ទ​ដៃ​ រួម​មាន​តាម​បណ្តាញ​សង្គម​ Facebook Twitter YouTube និង Instagram ជាដើម និង​គេហទំព័រ​ជា​ភាសា​អង់គ្លេស​ផង​ដែរ៕​