សន្និសីទកំពូល G-20 របស់ប្រទេសដែលមានសេដ្ឋកិច្ចជឿនលឿនបំផុតរបស់ពិភពលោកបានបញ្ចប់កាលពីថ្ងៃសៅរ៍ដោយមានការតវ៉ាប្រឆាំងរបស់ពួកបាតុករប្រកបដោយការខឹងសម្បា ហើយនិងការយកចិត្តទុកដាក់ប្រធានាធិបតីសហរដ្ឋអាមេរិក ដូណាល់ ត្រាំ។
ភាពជោគជ័យរបស់ប្រធានាធិបតី ត្រាំ រួមមានជំនួបប្រកបដោយភាពកក់ក្តៅជាមួយប្រធានាធិបតីរុស្ស៊ី Vladimir Putin កិច្ចព្រមព្រៀងឈប់បាញ់គ្នានៅក្នុងប្រទេសស៊ីរី ហើយនិងការសន្យាបង្កើនកិច្ចព្រមព្រៀងពាណិជ្ជកម្មជាមួយចក្រភពអង់គ្លេស។
ក៏ប៉ុន្តែ សេចក្តីប្រកាសរួមចុងក្រោយរបស់សន្និសីទកំពូលបានលាតត្រដាងពីការខ្វែងគំនិតដែលនៅសេសសល់របស់មេដឹកនាំសហរដ្ឋអាមេរិកជា មួយពួកមេដឹកនាំខ្លះរបស់ G-20 ស្តីពីការផ្លាស់ប្តូរអាកាសធាតុនិងប្រតិកម្មទស្សនរបស់ពួកគេដល់គោលនយោបាយផ្តល់អាទិភាពដល់ប្រទេសអាមេរិករបស់ប្រធានាធិបតីត្រាំ ដែលត្រូវបានគេចាត់ទុកថាជានយោបាយឯកកោនិយម។ នៅក្នុងសេចក្តីប្រកាសរួម មេដឹកនាំ G-20 បាននិយាយថា ពួកអស់លោកបានព្រមព្រៀងគ្នាដើម្បីប្រយុទ្ធប្រឆាំងការគាំពារទំនិញក្នុងប្រទេស។
គម្រោងរបស់ប្រធានាធិបតីអាមេរិក ដូណាល់ ត្រាំ នៅថ្ងៃចុងក្រោយនៃសន្និសីទកំពូលរួមមានជំនួបជាបន្តបន្ទាប់នៅខាងក្រៅវេទិកាជាមួយពួកមេដឹកនាំនៃចក្រភពអង់គ្លេស ឥណ្ឌូនេស៊ី សឹង្ហបូរី ជប៉ុន និងប្រទេសចិន។
នៅឯសម័យប្រជុំហិរញ្ញវត្ថុសហគ្រិនស្រ្តី លោកប្រធានាធិបតីសហរដ្ឋអាមេរិក បានផ្តល់នូវកាយវិការសម្របសម្រួលដល់លោកស្រីអធិការបតី Angela Merkel នៃប្រទេសអាល្លឺម៉ង់ដែលធ្វើជាម្ចាស់ផ្ទះរៀបចំសន្និសីទកំពូល G-20 ដែលប្រហែលជាអ្នករិះគន់ដ៏ខ្លាំងម្នាក់ក្នុងចំណោមមេដឹកនាំ G-20 ចំពោះគោលនយោបាយស្តីពីពាណិជ្ជកម្ម និងអាកាសធាតុរបស់ប្រធានាធិបតី ត្រាំ។
លោកប្រធានាធិបតីសហរដ្ឋអាមេរិក ដូណាល់ ត្រាំ បានសរសើរលោកស្រីអធិការបតីអាល្លឺម៉ង់ Merkel ចំពោះការងារប្រទេសរបស់លោកស្រីដែលបានធ្វើក្នុងការធ្វើជាម្ចាស់ផ្ទះរៀបចំសន្និសីទកំពូលនេះ ថ្វីបើមានការតវ៉ាឥតឈប់ឈរប្រឆាំងនឹងមូលធននិយមដែលបានរាលដាលខ្លាំងនៅក្នុងទីក្រុង Hamburg កាលពីថ្ងៃសៅរ៍ហើយរួមមានការដុតរថយន្តនិងលួចយកឥវ៉ាន់ពីហាងទំនិញជាដើម៕
