ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

បទសម្ភាសន៍ VOA៖ លោក Alan Lowenthal សមាជិក​សភា​អាមេរិកាំង​ថ្លែង​អំពី​ការរឹតបន្តឹង​សេរីភាព​អង្គការ​និង​សារព័ត៌មាន​ឯករាជ្យ​នៅ​កម្ពុជា


រូបឯកសារ៖ លោក ​Alan Lowenthal ​សមាជិក​ម្នាក់​នៃ​គណ:កម្មការ​សិទ្ធិមនុស្ស​នៃ​សភា​ស.រ.អា​ Tom Lantos ផ្តល់​បទ​សម្ភាសន៍​ឲ្យ​លោក​ សុខ ខេមរា នៃ VOA ​អំពី​បញ្ហា​សិទ្ធិមនុស្ស​នៅ​កម្ពុជា នៅ​រដ្ឋធានី​វ៉ាស៊ីនតោន កាល​ពី​ថ្ងៃ​ព្រហស្បតិ៍​ ថ្ងៃ​ទី​៨ ខែធ្នូ ឆ្នាំ​២០១៦។ (VOA Khmer)
រូបឯកសារ៖ លោក ​Alan Lowenthal ​សមាជិក​ម្នាក់​នៃ​គណ:កម្មការ​សិទ្ធិមនុស្ស​នៃ​សភា​ស.រ.អា​ Tom Lantos ផ្តល់​បទ​សម្ភាសន៍​ឲ្យ​លោក​ សុខ ខេមរា នៃ VOA ​អំពី​បញ្ហា​សិទ្ធិមនុស្ស​នៅ​កម្ពុជា នៅ​រដ្ឋធានី​វ៉ាស៊ីនតោន កាល​ពី​ថ្ងៃ​ព្រហស្បតិ៍​ ថ្ងៃ​ទី​៨ ខែធ្នូ ឆ្នាំ​២០១៦។ (VOA Khmer)

លោក សុខ ខេមរា នៃ VOA បាន​សម្ភាស​លោក​សមាជិក​សភា Alan Lowenthal អំពី​ដំណើរការ​ឈាន​ទៅ​រក​ការបោះឆ្នោត​ជាតិ​ឆ្នាំ ២០១៨។

កំណត់និពន្ធ៖ ក្នុង​ពេល​មាន​ភាពតានតឹង​ផ្នែក​នយោបាយ​នៅ​កម្ពុជា ដែល​គេ​បាន​ឃើញ​ថា រដ្ឋាភិបាល​លោក​នាយក​រដ្ឋមន្ត្រី​ហ៊ុន សែន បាន​បិទ​សារព័ត៌មាន​សេរី តម្រង់​គោលដៅ​ទៅ​ជន​បរទេស​ដែល​រដ្ឋាភិបាល​អះអាង​ថា ប្រឆាំង​នឹង​រដ្ឋាភិបាល ហើយនឹង​ការចាប់ខ្លួន​មេដឹកនាំ​គណបក្ស​ជំទាស់​ផង​នោះ លោក សុខ ខេមរា នៃ VOA បាន​សម្ភាស​លោក​សមាជិក​សភា Alan Lowenthal អំពី​ដំណើរការ​ឈាន​ទៅ​រក​ការបោះឆ្នោត​ជាតិ​ឆ្នាំ ២០១៨។ កាលពី​ឆ្នាំ​ទៅ​លោក Alan Lowenthal តំណាង​ឲ្យ​ពលរដ្ឋ​ក្នុង​រដ្ឋកាលីហ្វ័រញ៉ា ​(California) ដែល​រួម​បញ្ចូល​ទាំង​ទីក្រុង​ឡុងប៊ិច (Long Beach) មាន​ពលរដ្ឋ​ខ្មែរ​រស់នៅ​យ៉ាងច្រើន​ផងនោះ​បាន​បង្កើត​គណៈកម្មាធិការ​សភា​ដើម្បី​ពិនិត្យ​តាមដាន​ស្ថានការណ៍​នៅ​កម្ពុជា (Congressional​ Focus on ​Cambodia)​ ដើម្បី​ប្រមូល​សមាជិក​សភា​អាមេរិកាំង​ដ៏ទៃទៀត​ឲ្យ​ចាប់អារម្មណ៍​អំពី​នយោបាយ​កម្ពុជា។

VOA៖ ដូច​ដែល​លោក​បាន​ដឹង​ហើយ​ថា នាយក​រដ្ឋមន្រ្តី​កម្ពុជា​បាន​សម្រេច​ចិត្ត​បណ្តេញ​អង្គការ​វិទ្យាស្ថាន​ជាតិ​ប្រជាធិបតេយ្យ ​(NDI) ​ចេញពី​ប្រទេស​កម្ពុជា​ដោយ​ចោទ​ប្រកាន់​ថា អង្គការ​នេះ​មិន​បាន​គោរព​តាម​ច្បាប់​នៃ​ប្រទេស​កម្ពុជា ក៏​ដូចជា​ភ្នាក់ងារ​កាសែត​ភាសា​អង់គ្លេស​ឯករាជ្យ The Cambodia Daily។ អីចឹង តើ​លោក​មាន​ប្រតិកម្ម​យ៉ាងណា​ដែរ?

Alan Lowenthal៖ បាទ ខ្ញុំ​ធ្វើជា​សហ​ប្រធាន​ជាមួយនឹង​លោក​សមាជិក​សភា​ Chabot នៃ​គណៈកម្មាធិការសភាដើម្បី​ពិនិត្យតាម​ដានស្ថានការណ៍​នៅ​កម្ពុជា (Congressional ​Focus on​ Cambodia) ហើយ​កាល​ពី​ម្សិលមិញ​ (ថ្ងៃទី២៤ ខែសីហា)​ យើង​បាន​ចេញ​សេចក្តី​ថ្លែងការណ៍​រួម​មួយ​ថ្កោលទោស​ទង្វើ​របស់​រដ្ឋាភិបាល​ប្រឆាំងនឹង​អង្គការ​មិនមែន​រដ្ឋាភិបាល​ ស្ថានីយ​វិទ្យុ កាសែត ការវាយ​ប្រហារ​វិទ្យុ​អាស៊ី​សេរី​ គំរាម​កំហែង​ពួកគេ​និង​វិទ្យុ​សំឡេង​សហរដ្ឋ​អាមេរិក VOA ​គំរាម​កំហែង​កាសែត ​The Cambodia​ Daily ​ជាមួយ​នឹង​វិក្កយបត្រ​ពន្ធ និង​ការបណ្តេញ​អង្គការ​វិទ្យាស្ថាន​ជាតិ​ប្រជាធិបតេយ្យ ​(NDI)។ ទាំងអស់នេះ​ជាផ្នែក​មួយ​នៃ​ការវាយ​ប្រហារ​ដោយ​រដ្ឋាភិបាល​លោក​ហ៊ុន សែន​ ដើម្បី​ធានា​មិន​ឲ្យ​មាន​ការបោះឆ្នោត​ដោយ​សេរី និង​យុត្តិធម៌​នៅ​ឆ្នាំ​ក្រោយ​ទេ ​និង​ដើម្បី​បំបិទ​មាត់​អ្នករិះគន់​ទាំងអស់​ដែល​ប្រឆាំង​នឹង​រដ្ឋាភិបាល។

VOA៖ លោក​បាន​អំពាវនាវ​ឲ្យ​សហគមន៍​អន្តរជាតិ​មាន​វិធានការ​ចំពោះ​ប្រទេស​កម្ពុជា។ តើ​ពួកគេ​អាច​ធ្វើ​អ្វី​បាន?

Alan Lowenthal៖ ខ្ញុំ​គិត​ថា​អ្វី​មួយ​ដែល​សហគមន៍​អន្តរជាតិ​ ត្រូវតែ​ចេញមុខ​ធ្វើ​ដំបូង​នោះ​គឺ​បង្កើន​ការ​យល់ដឹង​អំពី​កិច្ច​ព្រមព្រៀង​ដែល​រដ្ឋាភិបាល​កម្ពុជា​បាន​សន្យា​កាលពី​ឆ្នាំ​២០១៣​ ដើម្បី​រៀបចំ​ការបោះ​ឆ្នោត​ដោយ​សេរីនិង​យុត្តិធម៌​ក្នុង​ឆ្នាំ២០១៨​នោះ ​កំពុងតែ​ស្ថិត​ក្រោម​ការគំរាម​កំហែង​ ដោយសារ​រដ្ឋាភិបាល​មាន​បំណង​ចង់​បំបិទ​មាត់​អ្នក​រិះគន់​ទាំងអស់​ដែល​ប្រឆាំង​នឹង​រដ្ឋាភិបាល។​ ដូច្នេះ​សហគមន៍​អន្តរជាតិ​ត្រូវតែ​បង្កើន​ការថ្កោលទោស​ចំពោះ​ទង្វើ​ប្រឆាំង​នឹង​លទ្ធិ​ប្រជាធិបតេយ្យ​របស់​រដ្ឋាភិបាល​លោក​ហ៊ុន សែន។​ សហរដ្ឋ​អាមេរិក​ ត្រូវតែ​ពិចារណា​ថា តើ​គួរតែ​ចាប់ផ្តើម​ផ្អាក​ការផ្តល់​ជំនួយ​ឲ្យ​កម្ពុជា​រហូត​ទាល់​តែ​កម្ពុជា​គោរព​កាតព្វកិច្ច​របស់​ខ្លួន ឬ យ៉ាងណា។

VOA៖ តើ​មាន​ផលវិបាក​សំខាន់ៗ​អ្វី​ខ្លះ​ចំពោះ​ការវិវត្ត​ថ្មីៗ​សម្រាប់​លទ្ធិប្រជាធិបតេយ្យ​ក្នុង​ប្រទេស​កម្ពុជា?

Alan Lowenthal៖ នេះ គឺ​ជា​ល្បែង​ដែល​វា​មាន​ការវាយប្រហារ​ពិតប្រាកដ​លើ​ស្ថាប័ន គាំទ្រ​សេរីភាព​នានា។ កម្ពុជា​មិន​អាច​មាន​ការ​បោះឆ្នោត​ដោយ​សេរី និង​យុត្តិធម៌​បាន​ទេ​បើសិនជា​អង្គការ​មិនមែន​រដ្ឋាភិបាល​ដែល​លើក​ស្ទួយ​លទ្ធិ​ប្រជាធិបតេយ្យ​ទាំងនោះ​ និង​កាសែត​ដែល​រាយ​ការណ៍​អំពី​អ្វី​ដែល​កំពុង​កើតឡើង​ពិតៗ​ក្នុង​ប្រទេស​កម្ពុជា​ ត្រូវ​បាន​គេ​បំបិទ​សំឡេង។ វា​បាន​បញ្ជូន​សារ​មួយ​ដ៏​គួរ​ឲ្យ​ខ្លាច​ទៅ​កាន់​ពិភពលោក​ថា កម្ពុជា​នឹង​មិន​គោរព​តាម​កាតព្វកិច្ច​របស់​ខ្លួន​ឡើយ។ ខ្ញុំ​គិត​ថា ពិភពលោក​ត្រូវតែ​ថ្កោលទោស​ចំៗ​និង​ខ្លាំងៗ​ចំពោះ​ទង្វើ​ដែល​កំពុង​កើត​មាន​ក្នុង​ប្រទេស​កម្ពុជា​នេះ។

VOA៖ រដ្ឋាភិបាល​ក៏​បាន​តម្រង់​ទៅ​ស្ថានីយ​វិទ្យុ​ក្នុង​ស្រុក​ជាច្រើន​ដែរ។ តើ​លោក​គិត​យ៉ាង​ណា?

Alan Lowenthal៖ នេះ​គ្រាន់តែ​ជា​គំរូ​មួយ​របស់​រដ្ឋាភិបាល​ក្នុង​ការបង្កើន​ការព្យាយាម​ពេល​នេះ ដើម្បី​លុបបំបាត់​សារព័ត៌មាន​សេរី​ លុបបំបាត់​ការរិះគន់​រដ្ឋាភិបាល​ លុបបំបាត់​ការជួយ​ឲ្យ​ប្រជាជន​យល់​អំពី​សិទ្ធិ​ក្នុងការ​បោះឆ្នោត។ យើង​មិន​បាច់​ឆ្ងល់​ទេ​ថា​រដ្ឋាភិបាល​បច្ចុប្បន្ន​លែង​នៅ​ស្ងៀម​ទៀត​ហើយ​ ហើយ​ពិត​ជា​ចង់​រឹត​បន្តឹង​សេរីភាព​ក្នុងការ​បញ្ចេញមតិ​ទាំងអស់​ក្នុង​ប្រទេស​កម្ពុជា ​ហើយ​សហរដ្ឋ​អាមេរិក​គួរតែ​បង្កើន​ការថ្កោលទោស​កម្ពុជា​ឲ្យ​តឹងតែង។ យើង​នឹង​សង្ឃឹម​ថា​សភា​ទាំងមូល​នឹង​ធ្វើ​បែប​នោះ ហើយ​យើង​នឹង​ស្នើ​ឲ្យ​រដ្ឋបាល​ធ្វើ​អ្វីៗ​ខ្លាំងជាង​មុន។

VOA៖ តើ​ទំនាក់ទំនង​រវាង​សហរដ្ឋ​អាមេរិក​នឹង​កម្ពុជា​អាច​ប៉ះពាល់​ដែរ​ឬ​ទេ?

Alan Lowenthal៖ ខ្ញុំ​គិត​ថា​អ្វី​ដែល​យើង​ទាមទារ​មុន​គេ​នោះ គឺ​មិន​ឲ្យ​មាន​ការចោទ​ប្រកាន់​បែប​ប្រឌិត ការចោទប្រកាន់​រឿង​ពន្ធដា​ប្រឆាំងនឹង​កាសែត​The Cambodia Daily វិទ្យុ​អាស៊ី​សេរី ​និង​សំឡេង​សហរដ្ឋ​អាមេរិក។ យើង​ចាំ​បាច់ត្រូវ​តែ​ទាមទារ​ចម្លើយ​ពី​រដ្ឋាភិបាល​កម្ពុជា​ថា នេះ​គឺ​ជា​ការរំលោភ​ច្បាប់​អន្តរជាតិ។ កាលពី​ឆ្នាំ​មុន​ខ្ញុំ​គិត​ថា​ យើង​បាន​កាត់​ជំនួយ​ដែល​ផ្តល់​ឲ្យ​កម្ពុជា​ចំនួន​៥ភាគរយ។ ខ្ញុំ​គិត​ថា​យើង​ត្រូវតែ​ចាប់ផ្តើម​មើល​លើ​បញ្ហា​នេះ ហើយ​ចាប់ផ្តើម​ដាក់​សម្ពាធ​សេដ្ឋកិច្ច​លើ​កម្ពុជា​ឲ្យ​កាន់​តែ​ខ្លាំង​ថែម​ទៀត។

VOA៖ តើ​លោក​មាន​សារ​អ្វី​ទៅ​កាន់​ប្រជាជន​កម្ពុជា​នៅ​ក្នុង​ពេល​នេះ?

Alan Lowenthal៖ បាទ សម្រាប់​ប្រជាជន​កម្ពុជា និង​អ្នក​ដែល​ក្រោកឈរ​ការពារ​លទ្ធិ​ប្រជាធិបតេយ្យ និង​ការពារ​ការបោះឆ្នោត​ដោយ​សេរី និង​យុត្តិធម៌ យើង​សូម​សរសើរ​អ្នកទាំងនោះ។ យើង​កោតសរសើរ​ដែល​អ្នក​ក្រោកឈរ​ដើម្បី​សេរីភាព​និង​លទ្ធិ​ប្រជាធិបតេយ្យ​ក្នុង​ប្រទេស​កម្ពុជា។ ចំណែក​សារ​ទៅ​កាន់​រដ្ឋាភិបាល​កម្ពុជា​វិញ​ យើង​កំពុង​ឃ្លាំមើល​ជា​ជាង​ពេលណា​ទាំងអស់។ ការផ្តោត​ជា​សំខាន់​ពេល​នេះ គឺ​គេ​ផ្តោត​លើ​កម្ពុជា ហើយ​រដ្ឋាភិបាល​ស.រ.អា កំពុង​ឃ្លាំមើល​ប្រទេស​កម្ពុជា ហើយ​ប្រទេស​កម្ពុជា​នឹង​ចេញ​ពី​ទំព័រ​ក្រោយ មក​ទំព័រ​មុខ​ហើយ។ យើង​នឹង​បន្ត​ឃ្លាំមើល​អ្វី​ដែល​កំពុង​កើត​ឡើង៕

អត្ថបទ​ទាក់ទង

XS
SM
MD
LG