អង្គការឃ្លាំមើលសិទ្ធិមនុស្ស (Human Rights Watch) ដែលមានមូលដ្ឋាននៅសហរដ្ឋអាមេរិក នៅថ្ងៃអង្គារនេះ បានរិះគន់ការរឹតត្បិតសេរីភាពនៃការប្រមូលផ្តុំ និងសេរីភាពសារព័ត៌មាន អំឡុងពេលកូដកម្មរបស់បុគ្គលិកកម្មករក្រុមហ៊ុនណាហ្គាវើលដ៍ (NagaWorld)។
គិតត្រឹមថ្ងៃអង្គារនេះ កម្មករនិយោជិតរបស់ក្រុមហ៊ុនណាហ្គាវើលដ៍ បានបន្តធ្វើកូដកម្ម ខណៈភាគីតំណាងឲ្យកម្មករ ក្រុមហ៊ុន និងមន្ត្រីសាលារាជធានីភ្នំពេញ បានបន្តជួបពិភាក្សាគ្នាដើម្បីស្វែងរកដំណោះស្រាយឈានទៅរកការស្រុះស្រួលគ្នាក្នុងវិវាទការងារនៅក្រុមហ៊ុនណាហ្គាវើលដ៍ដែលអូសបន្លាយពេលមកជិតមួយឆ្នាំ។
នៅក្នុងសេចក្តីថ្លែងការណ៍ចុះនៅថ្ងៃអង្គារនេះ នាយករងអង្គការឃ្លាំមើលសិទ្ធិមនុស្ស (Human Rights Watch) ទទួលបន្ទុកកិច្ចការតំបន់អាស៊ី គឺលោក Phil Robertson បានលើកឡើងជាភាសាអង់គ្លេស និងត្រូវបានប្រែសម្រួលជាខេមរភាសាថា៖
«រដ្ឋាភិបាលកម្ពុជា គួរបញ្ឈប់ការប្រើកម្លាំងដ៏គឃ្លើន និងមិនអាចទទួលយកបានដើម្បីបង្ខាំងមិនឱ្យបុគ្គលិកកម្មករនៃក្រុមហ៊ុនណាហ្គាវើលដ៍ប្រើប្រាស់សិទ្ធិរបស់ពួកគេក្នុងការធ្វើកូដកម្មអហិង្សានៅទីក្រុងភ្នំពេញ។ ការបៀតបៀនពីសំណាក់អាជ្ញាធរមកលើក្រុមកូដករតាមដងផ្លូវ ជំរុញដោយដីកាចេញយ៉ាងប្រញាប់ប្រញាល់ពីតុលាការដែលស្ថិតក្រោមឥទ្ធិពលអ្នកនយោបាយ និងដែលមិនត្រូវការពេលវេលាដើម្បីវែកញែកបញ្ហាឲ្យបានច្បាស់លាស់នោះ គឺបង្ហាញពីទំហំនៃការត្រៀមរៀបចំរបស់រដ្ឋាភិបាលក្នុងការបំបិទសិទ្ធិរបស់បុគ្គលិកកាស៊ីណូទាំងនោះ»។
អ្នកជំនាញសិទ្ធិមនុស្សរូបនេះ បានបន្តថា៖ «សេរីភាពមូលដ្ឋាន ដូចជាសេរីភាពនៅក្នុងការប្រមូលផ្តុំ សេរីភាពក្នុងការតវ៉ាទាមទារជាសមូហភាព និងសេរីភាពក្នុងការធ្វើកូដកម្ម ត្រូវបានរងការគំរាមកំហែងពីសកម្មភាព ដែលមិនអាចទទួលយកបានពីសំណាក់រដ្ឋាភិបាលកម្ពុជាដើម្បីបង្អាក់កូដកម្មរបស់បុគ្គលិកក្រុមហ៊ុនណាហ្គាវើលដ៍»។
រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈលោក ហេង សួរ បានឆ្លើយតបវីអូអេតាមប្រព័ន្ធផ្ញើសារ WhatsApp នៅថ្ងៃអង្គារនេះ ដោយសំដៅទៅលើសេចក្តីថ្លែងការណ៍របស់អង្គការឃ្លាំមើលសិទ្ធិមនុស្ស ក្នុងន័យដើមថា៖
«នោះ គឺជាសិទ្ធិសេរីភាពនៃការយល់ឃើញរបស់អង្គការទាំងនោះ។ អាជ្ញាធរ និងក្រសួងគាំទ្រការធ្វើសកម្មភាពណាមួយដែលស្របច្បាប់។ ដរាបណាវាជាសកម្មភាពស្របច្បាប់ គ្មានអ្នកណាម្នាក់ ត្រូវបានហាមឃាត់នោះទេ»។
មន្ត្រីជាន់ខ្ពស់ក្រសួងការងាររូបនេះ ថ្លែងទៀតថា គិតចាប់ពីថ្ងៃទី ៥ ខែធ្នូនេះ គោលជំហររបស់ក្រសួង គឺបន្តខិតខំសម្របសម្រួលករណីវិវាទខាងលើបន្តទៀត ស្របតាមច្បាប់ និងនីតិវិធីដែលមានជាធរមាន។
លោក ហេង សួរបន្ថែមថា ប្រសិនបើមានការទាមទារអ្វីដែលលើសពីច្បាប់ គឺក្រសួង និងអាជ្ញាធរពាក់ព័ន្ធ មានតួនាទីបានត្រឹមពាំនាំយកសំណើ និងសុំឲ្យក្រុមហ៊ុនយកសំណើនោះទៅពិចារណា។ ហើយប្រសិនជាចំណុចដែលក្រុមហ៊ុនខុស គឺក្រសួងមិនដែលរួញរា នឹងដាក់កំហិតឲ្យក្រុមហ៊ុនទទួលនោះឡើយ។
អភិបាលរងរាជធានីភ្នំពេញលោក កើត ឆែ បានប្រាប់វីអូអេនៅថ្ងៃអង្គារនេះថា លោកមិនទាន់បានឃើញសេចក្តីថ្លែងការណ៍ពីអង្គការឃ្លាំមើលសិទ្ធិមនុស្សនោះទេ ប៉ុន្តែ លោក បានស្នើឲ្យអ្នកសារព័ត៌មានទៅពិនិត្យមើលទិដ្ឋភាពជាក់ស្តែងនៅទីតាំងកូដកម្ម។
លោកបានថ្លែងថា៖ «សុំអញ្ជើញទៅមើល! យើងអត់មានបិទអ្នកកាសែត បិទអីទេ។សុំអញ្ជើញទៅមើលបន្តិចទៅ។ ហើយនៅពេលយើងទៅមើលហើយ វាយតម្លៃខ្លួនឯងតែម្តងទៅ»។
សេចក្តីថ្លែងការណ៍ពីអង្គការឃ្លាំមើលសិទ្ធិមនុស្ស ត្រូវបានធ្វើឡើង ស្របពេលកូដកម្មបានបន្ត ហើយតំណាងសហជីពកម្មករនិយោជិត ឬបុគ្គលិកក្រុមហ៊ុនណាហ្គាវើលដ៍ចូលរួមជាមួយតំណាងពីភាគីពាក់ព័ន្ធផ្សេងៗក្នុងកិច្ចប្រជុំស្តីពីការដោះស្រាយវិវាទការងារជាមួយក្រុមហ៊ុនណាហ្គាវើលដ៍ នៅថ្ងៃអង្គារនេះ។ គេមិនទាន់ដឹងពីលទ្ធផលនៃកិច្ចប្រជុំនេះ យ៉ាងណានោះទេ គិតត្រឹមរសៀលថ្ងៃអង្គារនេះ។
កាលពីថ្ងៃចន្ទកន្លងទៅនេះ កម្មករនិយោជិតនៃក្រុមហ៊ុនណាហ្គាវើលដ៍ប្រមាណ១៥០០នាក់ បានចេញមកធ្វើកូដកម្មលើកទីបី ដើម្បីទាមទារការទូទាត់សំណងចំពោះការបញ្ឈប់ពីការងារដោយគ្មានសំណងសមរម្យ និងការវិលត្រឡប់ចូលបំពេញការងារវិញ។ នេះ បើតាមការបញ្ជាក់ពីសហជីពនៅក្រុមហ៊ុនណាហ្គាវើលដ៍។
បើតាមសេចក្តីថ្លែងការណ៍រួមរបស់អង្គការសង្គមស៊ីវិលប្រមាណ៦០ កាលពីថ្ងៃទី១៨ ខែធ្នូ ឆ្នាំ២០២១ កម្មករនិយោជិតរបស់ក្រុមហ៊ុនណាហ្គាវើលដ៍ជាង១៣០០នាក់ ព្រមទាំងសមាជិករបស់សហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ បានចាប់ផ្តើមធ្វើកូដកម្មទាមទារឲ្យក្រុមហ៊ុនទទួលយកកម្មករនិយោជិតចំនួន ៣៦៥នាក់ ក្នុងចំណោមកម្មករនិយោជិត១៣២៩នាក់ ដែលត្រូវបានបញ្ឈប់ពីការងាររួមគ្នាដោយបង្ខំតាំងពីខែមេសា ឆ្នាំ២០២១។
បុគ្គលិកមួយចំនួនរបស់ក្រុមហ៊ុនកាស៊ីណូណាហ្គាវើលដ៍ដែលមានឈ្មោះត្រូវកាត់ចេញពីការងារនៅកាស៊ីណូណាហ្គាវើលដ៍ បានចោទថ្នាក់ដឹកនាំក្រុមហ៊ុនបច្ចុប្បន្នថា កំពុងរំលោភសិទ្ធិការងារ ខណៈមានការរៀបចំគម្រោងកាត់បុគ្គលិកដែលគ្មានកំហុស។
វិវាទការងាររបស់ក្រុមហ៊ុនណាហ្គាវើលដ៍ដែលបានអូសបន្លាយមកដល់ពេលនេះ កើតមានឡើងក្រោយការជូនដំណឹងរបស់ក្រុមហ៊ុនទៅកាន់បុគ្គលិកកាលពីថ្ងៃទី៨ ខែមេសា ឆ្នាំ២០២១ ថា ក្រុមហ៊ុនចាប់ផ្តើមផែនការរៀបចំរចនាសម្ព័ន្ធផ្ទៃក្នុងដែលពាក់ព័ន្ធនឹងជំហានមួយចំនួនដែលរួមមានផែនការកាត់បន្ថយបុគ្គលិកតាមរយៈការបញ្ចប់កិច្ចសន្យាការងារដោយការព្រមព្រៀងគ្នា៕
