តំណាងសហជីពកម្មករនិយោជិតនៅក្រុមហ៊ុនណាហ្គាវើលដ៍ (NagaWorld) បានថ្លែងនៅថ្ងៃសុក្រនេះថា សាលារាជធានីភ្នំពេញ មិនចង់ឃើញការធ្វើកូដកម្មរបស់កម្មករនិយោជិត និងស្នើឲ្យកម្មករនិយោជិត ផ្តល់ឱកាសឲ្យរដ្ឋបាលរាជធានីភ្នំពេញ មានការជជែកគ្នាជាមួយភាគីក្រុមហ៊ុនដើម្បីឈានទៅបញ្ចប់ជម្លោះពាក់ព័ន្ធនឹងការបញ្ឈប់ការងារកម្មករនិយោជិតដោយបង្ខំ។
គិតចាប់ពីចុងខែមេសាមក ក្រុមហ៊ុនណាហ្គាវើលដ៍ដែលជាសាខារបស់ក្រុមហ៊ុន NagaCorp ដែលចុះបញ្ជីនៅផ្សារហ៊ុនទីក្រុងហុងកុង បានបញ្ឈប់ការងារកម្មករនិយោជិតចំនួនជាង ១៣០០នាក់។
នៅព្រឹកថ្ងៃសុក្រនេះ សហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ បានជួបពិភាក្សាជាមួយក្រុមមន្ត្រីនៅសាលារាជធានីភ្នំពេញ និងអ្នកពាក់ព័ន្ធផ្សេងទៀតក្នុងនោះ ក៏មានមន្ត្រីនគរបាលជាន់ខ្ពស់ផងដែរ។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញាឈឹម សីថរ ប្រាប់វីអូអេនៅថ្ងៃសុក្រនេះថា បន្ទាប់ពីការប្រជុំនៅព្រឹកថ្ងៃសុក្រនេះ ពុំមានលទ្ធផលជាក់លាក់ពាក់ព័ន្ធនឹងដំណោះស្រាយសម្រាប់ជម្លោះការងារនៅក្រុមហ៊ុនណាហ្គាវើលដ៍ទេ ប៉ុន្តែសាលារាជធានី ស្នើសុំកម្មករនិយោជិតកុំឲ្យធ្វើកូដកម្មដែលគ្រោងធ្វើនៅថ្ងៃសៅរ៍ សប្តាហ៍នេះ។
«និយាយរួមទៅអត់មាននិយាយពីដំណោះស្រាយទេ និយាយរឿងតែស្នើសុំឲ្យផ្អាក ហើយទុកឱកាសឲ្យសាលាក្រុងក្នុងការទៅរកដំណោះស្រាយ ជជែកជាមួយក្រុមហ៊ុន។ហើយបើសិនជាសាលាក្រុងរកមិនបានទេ អាហ្នឹងចាំធ្វើកូដកម្មទៅ»។
មេដឹកនាំសហជីពរូបនេះឲ្យដឹងទៀតថា ខាងសហជីពមិនទាន់អាចបញ្ជាក់បានថាការធ្វើកូដកម្ម នឹងត្រូវផ្អាកនោះទេ ព្រោះអាស្រ័យលើការសម្រេចចិត្តរបស់កម្មករនិយោជិត។
បើតាមសេចក្តីប្រកាសរបស់សហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កម្មករនិយោជិតចំនួន ១៣២៩នាក់ ត្រូវបានបញ្ឈប់ពីការងារដោយបង្ខំ នៅចុងខែមេសា ឆ្នាំ២០២១ ក្រោមហេតុផលវិបត្តិកូវីដ១៩ ដោយច្រានចោលការចរចាជាមួយសហជីពអំពីនីតិវិធីពាក់ព័ន្ធផ្សេងៗតាមផ្លូវច្បាប់។
សហជីពបន្តថា ក្រុមហ៊ុនថែមទាំងជ្រើសរើសឈ្មោះកម្មករតាមការចង់បានរបស់ខ្លួន ដែលក្នុងនោះមានថ្នាក់ដឹកនាំសហជីព និងសមាជិកសហជីពភាគច្រើន ដោយមិនគោរពច្បាប់ស្តីពីការងារ និងបទដ្ឋានអន្តរជាតិ។ សហជីពលើកឡើងទៀតថា តាមរយៈការបញ្ឈប់ដោយបង្ខំនេះ កម្មករមួយចំនួនធំ ត្រូវបង្ខំចិត្តទទួលយកប្រាក់សំណងមិនត្រឹមត្រូវពីក្រុមហ៊ុន ដោយសារពួកគេមានតម្រូវការចាំបាច់ខាងហិរញ្ញវត្ថុក្នុងគ្រួសារ ហើយរហូតមកដល់ពេលនេះ មានកម្មករនិយោជិតចំនួន៣៦៥នាក់ ក្នុងចំណោមកម្មករដែលត្រូវបញ្ឈប់ជាង១៣០០នាក់នោះ កំពុងទាមទារចូលធ្វើការវិញ។
សេចក្តីប្រកាសរបស់សហជីពបានលើកឡើងថា៖ «វិវាទនេះ សហជីព បានព្យាយាមដោះស្រាយដោយសន្តិវិធី ទាំងនៅក្នុងក្រុមហ៊ុន នៅក្រសួងការងារ និងនៅក្រុមប្រឹក្សាអាជ្ញាកណ្តាល អស់រយៈពេលជាង៨ខែ នៅតែមិនមានដំណោះស្រាយ»។
សេចក្តីប្រកាសបន្ថែមថា ដោយគ្មានជម្រើសបន្តទៀត សហជីពបានធ្វើការប្រជុំជាមួយសមាជិក ហើយបោះឆ្នោតសម្ងាត់សម្រេចធ្វើកូដកម្ម ដោយមានកម្មករនិយោជិតចូលរួមចំនួន ១៦៥៣នាក់ ហើយសំឡេងគាំទ្រធ្វើកូដកម្មមានជាង ៩៧ភាគរយ ដើម្បីទាមទារដំណោះស្រាយចំនួន ៩ចំណុចធំៗ ដែលក្រុមហ៊ុនណាហ្គាវើលដ៍ មិនអនុវត្តតាមច្បាប់ស្តីពីការងារកន្លងមក។
កញ្ញា ឈឹម សីថរ ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ ថ្លែងថា ចំណុចដែលទាមទារខាងលើ រួមមានការទូទាត់ប្រាក់អតីតភាពការងារ ការប្រើប្រាស់កិច្ចសន្យាកម្មសិក្សាដែលខុសច្បាប់ ការស្នើសុំដកប្រធានផ្នែក ការស្នើសុំដំឡើងប្រាក់ឈ្នួល និងការគោរពច្បាប់ការងារ ដែលក្រុមប្រឹក្សាអាជ្ញាកណ្តាលថា ក្រុមហ៊ុនណាហ្គាវើលដ៍ បានបំពានច្បាប់ការងារ។
វីអូអេ មិនទាន់អាចទាក់ទងសុំការអធិប្បាយពីប្រធានផ្នែកធនធានមនុស្សនៃក្រុមហ៊ុនណាហ្គាវើលដ៍លោក Hein Dames បានទេ នៅថ្ងៃសុក្រនេះ។ វីអូអេ ក៏មិនអាចទាក់ទងសុំការអធិប្បាយពីអ្នកនាំពាក្យសាលារាជធានីភ្នំពេញលោក ម៉េត មាសភក្តីបានដែរ នៅថ្ងៃសុក្រដដែលនេះ។
បើតាមរបាយការណ៍ហិរញ្ញវត្ថុចុងក្រោយដែលចេញផ្សាយកាលពីកន្លងទៅ ក្រុមហ៊ុនណាហ្គាវើលដ៍ដែលចុះបញ្ជីក្នុងទីក្រុងហុងកុង បានរកប្រាក់ចំណេញប្រមាណ ១០២លានដុល្លារអាមេរិក ក្នុងឆ្នាំ២០២០ ទោះបីប្រទេសកម្ពុជា ស្ថិតក្រោមការគំរាមកំហែងនៃការរាតត្បាតពីជំងឺកូវីដ១៩ ក៏ដោយ៕
