ការសម្រេចរបស់អាមេរិកកាលពីសប្តាហ៍មុនដើម្បីអនុញ្ញាតឲ្យប្រទេសវៀតណាមហោះហើរយន្ត ហោះពាណិជ្ជកម្មរបស់ខ្លួនដោយផ្ទាល់ទៅកាន់ចំណតអាកាសយាន្តដ្ឋានអាមេរិកត្រូវបានគេមើលឃើញថា ជាការបន្តនៃការធ្វើឲ្យប្រសើរឡើងនូវទំនាក់ទំនងហើយនឹងបន្ទាប់ពីសញ្ញានៃការទទួលស្គាល់អន្តរជាតិផ្សេងទៀតដល់រដ្ឋាភិបាលក្រុងហាណូយ។
ពួកអ្នកសង្កេតការណ៍និយាយថា ការបំបែកភាពទាល់ច្រកនេះបង្ហាញថា ប្រទេសសំខាន់ៗរួមទាំងសហរដ្ឋអាមេរិកបានគិតគូរប្រទេសវៀតណាមកាន់តែខ្លាំងឡើងបន្ទាប់ពីការអភិវឌ្ឍសេដ្ឋកិច្ចនិងគោលនយោបាយការបរទេសអស់រយៈពេលជាង៣ ទសវត្សរ៍ដែលរួមទាំងការធ្វើឲ្យមានតុល្យភាពនូវទំនាក់ទំនងជាមួយប្រទេសចិនដែលជាប្រទេសកុម្មុយនិស្តជិតខាងរបស់ខ្លួនដោយមិនមានការព្រួយបារម្ភពីប្រទេសលោកខាងលិច។
លោក Adam McCarty ប្រធានសេដ្ឋវិទូអង្គការសេដ្ឋកិច្ចមេគង្គក្នុងក្រុងហាណូយ បាននិយាយថា៖ «ដំណើរការមានការយឺតយ៉ាវនិងសន្សឹមៗនាំវៀតណាមត្រឡប់ចូលក្នុងសហគមន៍អន្តរជាតិវិញ។ នេះជាដំណើរការបន្តមកពីខាងវៀតណាមដែលបានស្ថិតនៅក្នុងជម្លោះប្រវត្តិសាស្រ្តអស់រយៈពេលរាប់រយឆ្នាំនៅចន្លោះមហាអំណាចធំៗ»។
រដ្ឋបាលអាកាសចរណ៍សហព័ន្ធឬ (FAA) បាននិយាយក្នុងសេចក្តីថ្លែងការណ៍កាលពីថ្ងៃទី១៤ ខែកុម្ភៈថា ការសម្រេចផ្តល់ឲ្យកម្រិតគុណភាពប្រភេទទី១របស់រដ្ឋបាលអាកាសចរណ៍សហព័ន្ធសហរដ្ឋអាមេរិកដល់វៀតណាម មានន័យថា ប្រទេសនេះ បានបំពេញទៅតាមបទដ្ឋានសុវត្ថិភាពអន្តរជាតិ។ អាកាសចរណ៍វៀតណាម អាចទទួលបានការអនុញ្ញាតនៅពេលឥឡូវនេះមកពីរដ្ឋបាលអាកាសចរណ៍សហព័ន្ធសហរដ្ឋអាមេរិកដើម្បីបើកជើងហោះហើរទៅកាន់សហរដ្ឋអាមេរិក ហើយនឹងប្រើលេខកូដជាមួយអាកាសចរណ៍អាមេរិកាំង។
គេហទំព័រព័ត៌មានរបស់កាសែត Nhan Dah ដែលជារបស់គណបក្សកុម្មុយនិស្តវៀត ណាមបានរាយការណ៍កាលពីថ្ងៃចន្ទថា ពួកមន្រ្តីវៀតណាមបានដឹងពីសារៈសំខាន់នៃទីផ្សាររបស់សហរដ្ឋអាមេរិកកាលពីឆ្នាំ២០១២ នៅពេលដែលពួកគេបានចាប់ផ្តើមធ្វើការឆ្ពោះទៅកាន់ការទទួលបានកម្រិតគុណភាពប្រភេទទី១របស់រដ្ឋបាលអាកាសចរណ៍សហព័ន្ធ ឬ(FAA)។
គេហទំព័រនោះបានរាយការណ៍ទៀតថា ពួកមន្រ្តីទាំងនោះមានគោលបំណងដោះស្រាយបញ្ហាសុវត្ថិភាពចំនួន៤៩ដែលរដ្ឋបាលអាកាសចរណ៍សហព័ន្ធ ឬ(FAA) បានរកឃើញមួយឆ្នាំក្រោយមក។
របាយការណ៍នោះ បានប្រាប់ឲ្យដឹងថា រដ្ឋបាលអាកាសចរណ៍សហព័ន្ធ ឬ (FAA) បានពិនិត្យគ្រោងការណ៍អាកាសចរណ៍របស់វៀតណាមម្តងទៀតកាលពីឆ្នាំទៅហើយបានផ្តល់ពិន្ទុខ្ពស់ស្ទើរគ្រប់វិស័យទាំងអស់។ រដ្ឋបាលអាកាសចរណ៍សហព័ន្ធ ឬ (FAA) បានរកឃើញបញ្ហាដាច់ដោយឡែកពីគ្នាចំនួន១៤ហើយមិនមែនបញ្ហាប្រព័ន្ធទេ។
ទទួលបានឋានៈកម្រិតគុណភាពទី១ពីប្រទេសដែលមានសេដ្ឋកិច្ចធំបង្អស់នៅក្នុងពិភពលោក កើតមានឡើងបន្ទាប់ពីសញ្ញានៃការទទួលស្គាល់កាន់តែកើនឡើងឯទៀត។
សហរដ្ឋអាមេរិកមានឱនភាពពាណិជ្ជកម្មចំនួន២៩,៣០០លានដុល្លារជាមួយវៀតណាមក្នុងរយៈពេល៩ខែដំបូងកាលពីឆ្នាំទៅ ក៏ប៉ុន្តែ រដ្ឋាភិបាលក្រុងវ៉ាស៊ីនតោន មិនបានចាត់ទុកថាជាបញ្ហាធំទេ។ ទោះជាយ៉ាងណាក៏ដោយ ចិននិងសហរដ្ឋអាមេរិក បាននៅជាប់គាំងក្នុងជម្លោះអំពីបញ្ហានេះមួយផ្នែកកាលពីឆ្នាំទៅពីព្រោះតែផលលើសខាងពាណិជ្ជកម្មរបស់ចិនជាមួយសហរដ្ឋអាមេរិក។
ប្រធានាធិបតីសហរដ្ឋអាមេរិក លោក ដូណាល់ ត្រាំ ដែលបានសរសើរសម្ទុះសេដ្ឋកិច្ចរបស់វៀតណាមនៅឆ្នាំ២០១៧ មានគម្រោងទៅបំពេញទស្សនកិច្ចរដ្ឋធានីហាណូយនៅសប្តាហ៍ក្រោយដើម្បីចូលរួមជំនួបលើកទី២របស់លោកជាមួយមេដឹកនាំកូរ៉េខាងជើង គីម ជុងអ៊ុន។ ភាគីទាំង២ បានជ្រើសរើសយកវៀតណាមជាម្ចាស់ផ្ទះ ពីព្រោះតែគេបានឃើញវៀតណាមជាប្រទេសអព្យាក្រិត្យតាមភូមិសាស្រ្តនយោបាយ។
លោក McCarty និយាយថា ប្រធានាធិបតីត្រាំហើយនឹងសហការីរបស់លោកដែលចូលចិត្តនយោបាយការបរទេសដោយប្រើកម្លាំងបាយ នឹងឃើញវៀតណាមមានលក្ខណៈខុសប្លែកពីប្រទេសចិនក្នុងផ្នែកពាណិជ្ជកម្ម។
លោក Tai Wan-ping ជាសាស្រ្តាចារ្យផ្នែកពាណិជ្ជកម្មអន្តរជាតិដែលមានឯកទេសប្រទេសវៀតណាមនៅឯសាកលវិទ្យាល័យ Cheng Shiu នៅកោះតៃវ៉ាន់ បាននិយាយថា៖ «ភាពជិតស្និទ្ធខាងសេដ្ឋកិច្ចនិងពាណិជ្ជកម្មរវាងវៀតណាមនិងសហរដ្ឋអាមេរិក ជានិច្ចកាលកំពុងកើនឡើង។ មួយផ្នែក មកពីវៀតណាមមានកិច្ចព្រមព្រៀងពាណិជ្ជកម្មក្នុងកម្រិតនៃការជឿនលឿន មានកម្រិតខ្ពស់បំផុត»។
ក្រុមហ៊ុនពិគ្រោះផ្តល់យោបល់ Boston Consulting Group បានប៉ាន់ស្មានថា ការវិនិយោគទុនបរទេសក្នុងការផលិតនៅវៀតណាម កំពុងធ្វើឲ្យសេដ្ឋកិច្ចរីកលូតលាស់ពី៦ទៅ៧ភាគរយចាប់តាំងពីឆ្នាំ២០១២មក។ និន្នាការនេះកំពុងធ្វើឲ្យមនុស្សវណ្ណៈថ្នាក់កណ្តាលកើនឡើងដល់ទៅប្រហែល១ភាគ៣នៃប្រជាពលរដ្ឋ៩៣លាននាក់នៅឆ្នាំក្រោយ។
ពលរដ្ឋ កំពុងចំណាយទ្រព្យសម្បត្តិថ្មីខ្លះរបស់ខ្លួនលើតម្លៃសំបុត្រយន្តហោះ។ ប្រទេសនេះបានឃើញអ្នកដំណើរចំនួន៩៤លាននាក់កាលពីឆ្នាំ២០១៧ រួមមានអ្នកដំណើរបរទេស១៣លាននាក់ ដែលកើនឡើងចំនួន១៦ភាគរយ បើប្រៀបធៀបទៅនឹងឆ្នាំ២០១៦។ ឧស្សាហកម្មអាកាសចរណ៍ស៊ីវិលក្នុងស្រុក បានកើនឡើងចំនួន១៧,៤ភាគរយក្នុងរយៈពេលជាមួយទសវត្សរ៍កន្លងមកនេះហើយសមាគមដឹកជញ្ជូនតាមអាកាសអន្តរជាតិព្យាករណ៍ថា វៀតណាមនឹងក្លាយជាទីផ្សារអាកាសចរណ៍ដែលរីកលូតលាស់ដ៏ឆាប់រហ័សទី៥របស់ពិភពលោកនៅកំណត់ឆ្នាំ២០៣៥។
ពួកអ្នកវិនិយោគទុនបរទេស ត្រូវគេរំពឹងនឹងចូលក្នុងប្រទេសវៀតណាមជាបន្តបន្ទាប់។កាលពីខែមករា វៀតណាម បានចូលរួមជាផ្លូវការក្នុងកិច្ចព្រមព្រៀងភាពជាដៃគូដ៏ធំទូលាយនិងជឿនលឿនឆ្លងមហាសមុទ្រប៉ាស៊ីហ្វិកដែលជាកិច្ចព្រមព្រៀងពាណិជ្ជកម្មសេរីដែលរួមមានសេដ្ឋកិច្ចប្រហែល១៣,៥ភាគរយរបស់ពិភពលោក។ សហភាពអឺរ៉ុប រំពឹងនឹងផ្តល់ឲ្យសច្ចានុម័តកិច្ចព្រមព្រៀងពាណិជ្ជកម្មរបស់ខ្លួនផ្ទាល់ជាមួយវៀត ណាម។
ក្នុងឋានៈជាសមាជិកមួយនៃសមាជិក១០ប្រទេសរបស់តំបន់អាស៊ីអាគ្នេយ៍ វៀតណាម ធ្វើពាណិជ្ជកម្មសេរីជាមួយចិន។ ក៏ប៉ុន្តែ ពួកអ្នកវិទ្យាសាស្រ្តនយោបាយនិយាយថា វៀតណាម បញ្ចៀសការអនុគ្រោះចំពោះប្រទេសចិន ថ្វីបើខ្លួនមានប្រព័ន្ធនយោបាយស្រដៀងគ្នាហើយការណ៍សំខាន់របស់ខ្លួនជាប្រភពធនធានវត្ថុធាតុដើម។ វៀតណាម មានជម្លោះជាមួយចិនអំពីទឹកដីអស់រាប់សតវត្សរ៍ហើយវៀតណាម ចូលចិត្តគោលនយោបាយការបរទេសជាមួយប្រទេសជាច្រើននៅពេលសព្វថ្ងៃនេះ។
លោក McCarty និយាយទៀតថា ជនជាតិវៀតណាមក្នុងសហរដ្ឋអាមេរិក នៅទីបំផុតទំនងធ្វើការហោះហើរដោយផ្ទាល់នៅពេលទេសចរណ៍អាមេរិកាំងតិចតួចទៅទស្សនាប្រទេសវៀតណាម ដោយប្រៀបធៀបទៅនឹងទេសចរណ៍ប្រទេសផ្សេងៗទៀត។ ជន ជាតិអាមេរិកាំងដើមកំណើតវៀតណាមខ្លះ ត្រឡប់ទៅទស្សនាប្រទេសវៀតណាម អ្នកខ្លះទៅវិនិយោគទុន។
វិទ្យាស្ថានគោលនយោបាយទេសន្តប្រវេសន៍ប៉ាន់ស្មានថា មានពលរដ្ឋវៀតណាម ប្រហែល១លាន៣សែននាក់រស់នៅក្នុងសហរដ្ឋអាមេរិកនៅពេលសព្វថ្ងៃនេះ ពួកគេជាច្រើនបានតាំងទីលំនៅបន្ទាប់ពីអតីតវៀតណាមខាងត្បូងដែលគាំទ្រដោយសហរដ្ឋអាមេរិក បានចាញ់សង្គ្រាមពួកកុម្មុយនិស្តវៀតណាមខាងជើងក្នុងទសវត្សរ៍១៩៧០។ទេសចរណ៍បរទេសទៅកាន់វៀតណាម បានកើនឡើងទៅដល់១៤លាន១សែននាក់ក្នុងរយៈពេល១១ខែដំបូងកាលពីឆ្នាំទៅ ដែលនាំមុខដោយទេសចរណ៍មកពីប្រទេសចិននិងកូរ៉េខាងត្បូង។
លោក សុង សេងវុន សេដ្ឋវិទូប្រចាំតំបន់នៅធនាគារឯកជន CIMB ក្នុងប្រទេសសិង្ហបុរី បាននិយាយថា៖ «មានពលរដ្ឋវៀតណាមជាច្រើនក្នុងសហរដ្ឋអាមេរិក ដូច្នេះពលរដ្ឋដ៏ច្រើននេះនឹងក្លាយជាការល្អសម្រាប់ការភ្ជាប់អាកាសចរណ៍។ គ្រប់ប្រទេសទាំងអស់នៅលើផែនដីនេះ មានអ្នកតំណាងក្នុងសហរដ្ឋអាមេរិក។ ដូច្នេះ ការណ៍នេះ ប្រាកដជាមានន័យខាងសេដ្ឋកិច្ច ពាណិជ្ជកម្មឲ្យមានការជាប់ទាក់ទងគ្នា»។
លោក តៃ និយាយទៀតថា ពួកអ្នកដំណើរនៅទីបញ្ចប់ធ្វើការហោះហើរដោយផ្ទាល់ នឹងបញ្ចៀសការឈប់សំចតនៅទីកន្លែងផ្សេងៗទៀតដូចជា ទីក្រុងហុងកុងនិងទីក្រុងតៃប៉ិ៕
ប្រែសម្រួលដោយជឹង ប៉ូជីន
