ភ្ជាប់​ទៅ​គេហទំព័រ​ទាក់ទង

រដ្ឋ​មន្ត្រី​ក្រសួង​ការបរទេសដែល​នឹង​ចាកចេញ​​សច្ចា​នឹង​និយាយ​ស្មោះ​ត្រង់​ចេញ​ពី​ចិត្ត​ក្រោយ​ពេល​លោក ​​ត្រាំ​ ស្បថ​ចូល​កាន់​តំណែង

  • Steve Herman

លោក John Kerry រដ្ឋ​មន្ត្រី​ក្រសួង​ការបរទេស​អាមេរិក​ថ្លែង​នៅ​ក្រសួង​ការបរទេស​ក្នុង​រដ្ឋ​ធានី​វ៉ាស៊ីនតោន​កាល​ពី​ថ្ងៃទី​៥ ខែមករា។

តើ​ការ​បង្ហោះ​សារ​តាម​ Twitter ​អំពី​កិច្ច​ការ​បរទេស ​ដោយ​លោក​ប្រធានាធិបតី​ជាប់​ឆ្នោត​ ​ដូណាល់​ ​ត្រាំ​ ​ចាប់​តាំង​ពី​លោក​ជាប់​ឆ្នោត​នៅ​ខែ​វិច្ឆិកា​មក ​ធ្វើ​ឲ្យ​ប៉ះ​ពាល់​ដល់​ការ​កាន់​តំណែង​របស់​រដ្ឋ​មន្ត្រី​ក្រសួង​ការបរទេស​បច្ចុប្បន្ន​ដែរ​ឬ​ទេ?

លោក​ John Kerry កាលពី​ថ្ងៃ​ទី​៥ ខែ​មករា ​កន្លង​ទៅ​ ​បាន​បដិសេធ​មិន​អត្ថាធិប្បាយ​ទៅ​លើ​អ្វី​ដែល​លោក​ហៅ​ថា ​«នយោបាយ​នៅ​នឹង​ថ្កល់​មាន​ប្រសិទ្ធភាព» ចំពោះ​អ្វី​ដែល​លោក​បាន​ហៅ​នៅ​ក្នុង​សន្និសីទ​សារព័ត៌មានមួយ​នៅ​ក្រសួង​ការបរទេស​ជាលើក​ចុង​ក្រោយ។

លោក​ Kerry មាន​ពេល​តែ​មួយ​សប្តាហ៍​ទៀត​ប៉ុណ្ណោះ​ នៅ​ក្នុង​តំណែង​របស់​លោក។ លោក​បាន​និយាយ​ថា៖ «ខ្ញុំ​នៅ​មាន​ដំណើរ​ទស្សនកិច្ច​មួយ​ចំនួន​ទៀត​ដែល​មាន​សារៈ​សំខាន់​ ​ហើយ​ខ្ញុំ​នៅ​មានកិច្ចសន្ទនា​ខ្លះ​ដែល​ខ្ញុំ​ប្រាថ្នា​ចង់​និយាយ​ក្នុង​នាម​ប្រទេស​ជាតិ​របស់​យើង។ ទាំង​នោះ​ជា​អ្វី​ដែល​យើង​នៅ​តែចង់​សម្រេច​ឲ្យ​បាន»។

លោក​បន្ថែម​ថា​ បន្ទាប់​ពី​ការ​ស្បថចូល​កាន់​ដំណែង​របស់​លោក​ ត្រាំ​ នៅ​ថ្ងៃ​ទី​២០​ ខាង​មុខ​នេះ «ខ្ញុំ​នឹង​មាន​ឱកាស​ច្រើន​ដើម្បី​និយាយ​ចេញ​អ្វី​ដែល​ខ្ញុំ​ចង់ ប្រសិនបើ​ខ្ញុំ​យល់​ថា​វា​ស័ក្តិសម​ ខ្ញុំ​នឹង​និយាយ​វា​ចេញ​មក​នៅ​ពេល​សម​រម្យ​ណា​មួយ»។

លោក Kerry បាន​ចំណាយ​ពេល​វេលា​យ៉ាង​ច្រើន​របស់​លោក​ នៅ​វេទិកា​របស់​ក្រសួង​ការ​បរទេស​នៅ​រសៀល​ថ្ងៃ​ទី​៥ ដោយ​ពន្យល់​ការពារ​អ្វី​ដែល​លោក​ចាត់​ទុក​ថា​ជា​សមិទ្ធិផល​គោល​នយោបាយ​ការបរទេស​កំពូលៗ ​ដែល​មាន​ឥទ្ធិពល​ទូលំទូលាយ​របស់​រដ្ឋាភិបាល រាប់​ចាប់​តាំង​ពី​កិច្ច​ព្រម​ព្រៀង​នុយក្លេអ៊ែរ​ជាមួយ​អ៊ីរ៉ង់ រហូត​ដល់​កិច្ច​ព្រម​ព្រៀង​ទីក្រុង​ប៉ារីស​ ស្តី​ពី​បម្រែ​បម្រួល​អាកាស​ធាតុ។

លោក​ Kerry និយាយ​ថា៖ «គ្មាន​អ្នក​ណា​ម្នាក់​អាច​ព្យាករ​ជម្រើស​ដែល​រដ្ឋបាល​បន្ទាប់​នឹង​ធ្វើ​ទេ។ ខ្ញុំ​គិត​ថា​ សំណួរ​មួយ​ដែល​មនុស្ស​ជា​ច្រើន​សួរ​នោះ​គឺ​ថា តើ​ពួក​គេ​ដឹង​ឬ​ទេ?»

លោក ត្រាំ បាន​ប្រកាស​អំពី​គោល​នយោបាយ​ស្ទើរ​តែ​រៀង​រាល់​ថ្ងៃ ដែល​គោល​នយោបាយ​មួយ​ចំនួន​ចាក​ចេញ​ឆ្ងាយ​ពី​ជំហរ​របស់​សហរដ្ឋ​អាមេរិក​បច្ចុប្បន្ន។ លោក​បាន​ប្រកាស​តាម​រយៈ​បណ្ដាញ​សង្គម​ Twitter ​ដែល​ធ្វើ​ឲ្យ​មាន​ការ​លំបាក​ដល់​មន្ត្រី​ការទូត​នៅ​ក្នុង​ប្រទេស​ និង​នៅ​បរទេស។

សារ​តាម​ Twitter របស់​លោក​ ត្រាំ​ ដែល​មាន​១៤០​តួរ​អក្សរ​ឬ​តិច​ជាង​នេះ​ គឺ​មាន​ភាព​ផ្ទុយ​ស្រឡះ​ពី​វិធី​បែប​ការិយាធិបតេយ្យ​តាម​ប្រពៃណី​ ដែល​ផ្តល់​អត្ថន័យ​អំពី​គោល​នយោបាយ​ការ​បរទេស​តាមរយៈ​សុន្ទរកថា​ដែល​ត្រូវ​បាន​សរសេរ​យ៉ាង​យក​ចិត្ត​ទុក​ដាក់​បំផុត ​នៅ​លើ​ក្រដាស​ជា​ច្រើន​ទំព័រ។

លោក Kerry ​ដែល​ធ្លាប់​ធ្វើ​ជា​ប្រធាន​គណកម្មាធិការ​ទំនាក់​ទំនង​ការ​បរទេស​របស់​ព្រឹទ្ធសភា​ អស់​រយៈ​ពេល​បួន​ឆ្នាំ​ បាន​បង្ហាញ​ក្តី​សង្ឃឹម​ថា​ «អ្នក​ដែល​គិត​គូរ​រឹងមាំ​ និង​អ្នក​ស្នេហាជាតិ»​ នឹង​ចេញ​មុខ ​ហើយ​បញ្ចេញ​គំនិត​ពួក​គេ​សម្រាប់រដ្ឋបាល​ថ្មី។

ក្នុងអត្ថាធិប្បាយ​ជា​សាធារណៈ​ម្តង​ទៀត ​អំពី​ជ័យ​ជម្នះ​ដ៏​ភ្ញាក់​ផ្អើល​របស់​លោក​ ត្រាំ​ លើ​លោក​ស្រី​ Hillary Clinton ដែល​ជា​អ្នក​កាន់​តំណែង​រដ្ឋ​មន្ត្រី​ក្រសួង​ការបរទេស​អាមេរិក​មុនលោក​នោះ​ លោក​ Kerry ​ដែល​ជា​អតីត​សមាជិក​ព្រឹទ្ធសភា​និយាយ​ថា៖ «វា​ជា​ការ​ខក​ចិត្ត​យ៉ាង​ខ្លាំង​របស់​ប្រជាជន ​ទៅ​លើ​រដ្ឋាភិបាល យ៉ាង​ច្បាស់​ក្រឡែត»។

នៅ​ពេល​សួរ​ថា​តើ​លោក​គិត​ថា​ប្រធានាធិបតី​រុស្ស៊ី​ Vladimir Putin ​បាន​លួច​ចូល​ក្នុង​ប្រព័ន្ធ​កុំព្យូទ័រ​របស់​គណៈកម្មាធិការបោះ​ឆ្នោត​ដោយ​ផ្ទាល់​នោះ​ លោក​ Kerry ​ឆ្លើយ​តប​ថា «ខ្ញុំ​ទទួល​ស្គាល់​ការ​សន្និដ្ឋាន​របស់​សហគមន៍​អ្នក​ស៊ើបអង្កេត ដែល​ថា​ការ​លួច​ចូល​នេះ​ធ្វើ​ឡើង​ដោយ​មន្ត្រី​លំដាប់​កំពូល​នៃ​រដ្ឋាភិបាល​រុស្ស៊ី»។

លោក ត្រាំ បាន​តែង​តាំង​លោក​ Rex Tillerson នៅ​ក្នុង​តំណែង​របស់​លោក​ Kerry នៅក្រសួង​ការ​បរទេស។

លោក Tillerson​ ដែល​បាន​ចំណាយ​ពេល​ក្នុង​អាជីព​ការងារ​របស់​លោក​នៅ​ឯ​ក្រុមហ៊ុន​ពហុ​ជាតិ​ដ៏​ធំ​មួយ​ ក្នុង​ឧស្សាហកម្ម​ប្រេង​និង​ឧស្ម័ន​ នឹង​ក្លាយ​ជា​ក្លាយ​ជា​រដ្ឋ​មន្ត្រី​ក្រសួង​ការបរទេស​អាមេរិក​លើក​ទី​មួយ​ ដែល​គ្មាន​បទ​ពិសោធន៍​ជា​យោធា ឬផ្នែករដ្ឋាភិបាល​ ប្រ​សិន​បើ​លោក​ត្រូវ​បាន​បោះ​ឆ្នោត​បញ្ជាក់​ដោយ​រដ្ឋ​សភា។

លោក​ Tillerson ពិត​ជា​ត្រូវ​បាន​សួរ​ដេញ​ដោល​ខ្លាំងៗ ​នៅ​ក្នុង​សវនាការ​ដែល​បញ្ជាក់​ពី​ការ​តែង​តាំង​នៅ​ថ្ងៃ​១១​ ខែ​មករា អំពី​ទំនាក់​ទំនង​របស់​លោក​ជា​មួយ​លោក​ Putin ដែល​ក្រុម​សមាជិក​សភា​ដែល​មាន​ឥទ្ធិពល​ ពី​គណបក្ស​ទាំង​ពីរ​សម្តែង​ការ​ព្រួយ​បារម្ភ​យ៉ាង​ខ្លាំង​។

ក្នុង​នាម​ជា​នាយកប្រតិបត្តិ​នៃ​ក្រុមហ៊ុន​ ExxonMobil​ លោក Tillerson ​កាល​ពី​ឆ្នាំ​២០១១ បាន​ចុះ​ហត្ថលេខា​លើ​កិច្ច​ព្រមព្រៀង​មួយ​ដែល​មាន​ទឹក​ប្រាក់​ចំនួន៣០០​ពាន់​លាន​ដុល្លារ​ ជាមួយ​ប្រទេស​រុស្ស៊ី​ ដើម្បី​បាន​សិទ្ធ​ខួង​ប្រេង​កាត​នៅ​ក្នុង​សមុទ្រអាក់ទិច។ ប៉ុន្តែ​ គម្រោង​នៃ​កិច្ច​ព្រម​ព្រៀង​នោះ​បាន​ខូច​ បន្ទាប់​ពី​ការ​ដាក់​ទណ្ឌកម្ម​ដោយ​រដ្ឋបាលលោក​ប្រធានាធិបតី​ បារ៉ាក់ អូបាម៉ា​ ទៅ​លើ​ក្រុង​មូស្គូ​បី​ឆ្នាំ​បន្ទាប់​ ដោយ​សារ​តែ​ជំហរ​របស់រដ្ឋា​ភិបាល​វិមាន​ក្រឹមឡាំង ​ប្រឆាំង​នឹង​ប្រទេស​អ៊ុយ​ក្រែន៕

ប្រែ​សម្រួល​ដោយ​ នៀម ឆេង

អត្ថបទ​ទាក់ទង

XS
SM
MD
LG