លោក John Kerry រដ្ឋមន្ត្រីការបរទេសស.រ.អា.បានប្រាប់អ្នកចូលរួមនៅសាកលវិទ្យាល័យហូជីមិញនៅប្រទេសវៀតណាមកាលពីថ្ងៃសុក្រថា ការប្តូររដ្ឋាភិបាល ស.រ.អា. ក្នុងពេលខាងមុខនេះនឹងមិនប៉ះពាល់ដល់ទំនាក់ទំនងរួមរវាងប្រទេសទាំងពីរទេ។
លោក Kerry បាននិយាយថា ប្រទេសទាំងពីរមានតម្លៃរួមដែលមិនអាចកែប្រែដោយគ្រាន់តែប្តូរថ្នាក់ដឹកនាំនោះទេ។ លោកនិយាយថា តាមសម្តីដើមថា «មិត្តភាពរបស់យើងមិនពឹងផ្អែកតាមបុគ្គល ឬបុគ្គលិកលក្ខណៈបុគ្គលរបស់ប្រធានាធិបតី ឬគណបក្សនយោបាយនោះទេ។ មិត្តភាពរបស់យើងមានឫសគល់ជាមួយផលប្រយោជន៍រួមរបស់យើង ហើយនឹងអ្វីដែលយើងព្រមព្រៀងគ្នាអំពីអនាគត»។
លោក Kerry បានកត់សម្គាល់ថា ជំហររបស់លោក ដូណាល់ ត្រាំ ប្រធានាធិបតីជាប់ឆ្នោតប្រឆាំងនឹងកិច្ចព្រមព្រៀងភាពជាដៃគូពាណិជ្ជកម្មឆ្លងមហាសមុទ្រប៉ាស៊ីហ្វិក TPP អាចធ្វើឲ្យកិច្ចព្រមព្រៀងនេះលិចលង់ ពេលលោកឡើងកាន់តំណែងនៅសប្តាហ៍ក្រោយ ប៉ុន្តែលោកបន្ថែមថា គឺបច្ចេកវិទ្យា មិនមែនកិច្ចព្រមព្រៀងពាណិជ្ជកម្មទេ ដែលនាំឲ្យបាត់បង់ការងារធ្វើនោះ៕
