សាលាដំបូងខេត្តកោះកុងបានសម្រេចផ្តន្ទាទោសសកម្មជនដីធ្លី១០នាក់ឱ្យជាប់ពន្ធនាគាររយៈពេល១ឆ្នាំពីបទ«ប្តឹងបរិហារបង្កាច់កេរ្តិ៍ និងបទញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម» ក្រោយមានការតវ៉ាក្នុងទំនាស់ដីធ្លីរ៉ាំរ៉ៃមួយជាមួយអ្នកជំនួញម្នាក់ក្នុងខេត្តកោះកុងដែលមានព្រំប្រទល់ជាប់ប្រទេសថៃ។ នេះបើតាមសេចក្តីប្រកាសរបស់អង្គការសិទ្ធិមនុស្សលីកាដូ និងសាច់ញាតិរបស់សកម្មជន។
នៅក្នុងការប្រកាសសាលក្រមផ្តន្ទាទោសលើសំណុំរឿងរបស់តំណាងសហគមន៍ដីធ្លី១៩៧ កាលពីរសៀលថ្ងៃអង្គារ តុលាការក៏បានបង្គាប់សកម្មជនដីធ្លីទាំង១០នាក់សងជំងឺចិត្តរួមគ្នាចំនួន៤០លានរៀល (ឬប្រមាណជា៩.៦០០ដុល្លារអាមេរិក) ឱ្យទៅលោក ហេង ហ៊ុយ ដែលគេស្គាល់ថាជាឧកញ៉ាដ៏មានឥទ្ធិពលម្នាក់ក្នុងខេត្តកោះកុង និងជាឧត្តមសេនីយ៍ពាក់ផ្កាយ២នៅក្រសួងមហាផ្ទៃ។
សកម្មជនដីធ្លីទាំង១០នាក់ដែលត្រូវបានផ្តន្ទាទោសដោយសាលាដំបូងខេត្តកោះកុងនោះ រួមមានលោក ឆាន់ ឈឿន អ្នកស្រី ដេត ហ៊ួ អ្នកស្រី អើប វី អ្នកស្រី អឹប តឹង លោក ហេង ជៃ អ្នកស្រី អ៊ិន ធូ អ្នកស្រី កើត នៅ លោក គង់ ម៉ែន លោក ពួ ហួន និងលោក សុខ ជៃ។
នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត យល់ឃើញថា សាលក្រមរបស់តុលាការខេត្តកោះកុងដែលចេញកាលពីថ្ងៃអង្គារ ជាការដាក់គំនាបបន្ថែមមកលើពលរដ្ឋដែលរងគ្រោះដែលពួកគេត្រូវបានគេរំលោភយកដីធ្លី។
លោកថ្លែងថា៖ «វាជារឿងមួយអយុត្តិធម៌សម្រាប់គាត់[ពលរដ្ឋ] ហើយជាគំនាបនិងការគំរាមកំហែងបំភិតបំភ័យសម្រាប់គាត់បន្តទៅទៀតក្នុងន័យមួយគឺមិនខិតខំស្វែងរកដំណោះស្រាយដើម្បីបញ្ចប់បញ្ហាដីធ្លី ក៏ប៉ុន្តែព្យាយាមដាក់សម្ពាធ ហើយនឹងការគំរាមកំហែង បំភិតបំភ័យគាត់ជំនួសទៅវិញ។ នេះខ្ញុំយល់ថា មិនមែនជាដំណោះស្រាយដែលល្អទេ ផ្ទុយទៅវិញវាអត់ចប់ទេព្រោះបញ្ហាទាំងអស់នេះវារ៉ាំរ៉ៃយូរមកហើយ»។
លោកជំរុញឱ្យរដ្ឋាភិបាលថ្មីនិងអាជ្ញាធរពាក់ព័ន្ធទាំងអស់គួរណាស់តែមានការដោះស្រាយតាមគោលនយោបាយរបស់រាជរដ្ឋាភិបាលដើម្បីបញ្ចប់រាល់បញ្ហាទាំងអស់នេះ ប្រសើរជាជាងការដាក់សម្ពាធបន្ថែមមកលើប្រជាពលរដ្ឋតាមរយៈប្រព័ន្ធតុលាការ។
លោក ឆាន់ ឈឿន អាយុ៤០ឆ្នាំ ដែលត្រូវបានសាលាដំបូងខេត្តកោះកុងសម្រេចផ្ដន្ទាទោសដាក់ពន្ធនាគារកាលពីថ្ងៃអង្គារ ប្រាប់វីអូអេថា ការប្រកាសសម្រេចផ្ដន្ទាទោសដាក់ពន្ធនាគាររបស់សាលាដំបូងខេត្តកោះកុងមកលើសកម្មជនដីធ្លីទាំង១០នាក់ រួមទាំងលោកម្នាក់ដែរថា ជារឿងអយុត្តិធម៌សម្រាប់លោកជាជនរងគ្រោះដែលត្រូវបានគេរំលោភយកដីធ្លី។
លោកថ្លែងថា៖ «សម្រាប់ខ្ញុំ គឺវាមិនយុត្តិធម៌ទេព្រោះដោយសារតែពួកខ្ញុំជាអ្នកជនរងគ្រោះ ហើយតុលាការគាត់នឹងកាត់ទោសឱ្យខាងខ្ញុំទាំង៩នាក់ហ្នឹងជាប់ពន្ធនាគារមួយឆ្នាំហើយនឹងបង់ទឹកប្រាក់ចំនួន ៤០លានរៀល អ៊ីចឹង។ និយាយទៅតុលាការកាត់មិនមិនមានយុត្តិធម៌ទេ ចំពោះខាងខ្ញុំជាប្រជាពលរដ្ឋ»។
លោកបន្ថែមថា កន្លងទៅ ប្រជាពលរដ្ឋ និងលោកដែលរងគ្រោះដោយសារជម្លោះដីធ្លីនេះ ធ្លាប់បានដាក់ញត្តិ និងពាក្យបណ្តឹងដើម្បីស្នើសុំដីធ្លីមកវិញទៅគ្រប់ភាគីពាក់ព័ន្ធដែរ តែគ្មាននរណាម្នាក់អើពើនោះឡើយ។
លោកនិយាយថា៖ «ខ្ញុំធ្លាប់ដាក់ញាត្តិទៅចាប់ពីសាលាឃុំទៅដល់សាលាស្រុក ពីសាលាស្រុកមកខេត្ត បន្ទាប់មកគេមិនមានការដោះស្រាយ។ អ៊ីចឹងទៅពួកខ្ញុំបានធ្វើការដាក់ញាត្តិទៅក្រសួងដែនដី ក្រសួងយុត្តិធម៌ និងសម្តេចក្រឡាហោម ស ខេង អីក៏ពួកខ្ញុំទៅដាក់ដែរ ហើយមកដល់ពេលសព្វថ្ងៃនេះគេមិនមានការដោះស្រាយអីទេ»។
ក្រោយការប្រកាសសាលក្រមរបស់តុលាការខេត្តកោះកុងកាលពីថ្ងៃអង្គារ លោកថា លោកនឹងដាក់ពាក្យប្ដឹងជំទាស់នឹងសាលក្រមនោះ ដែលលោកយល់ថា ជាការសម្រេចមិនត្រឹមត្រូវមកលើពលរដ្ឋដែលជាជនរងគ្រោះ។
ជាមួយគ្នានេះដែរ អ្នកស្រី កើត នៅ អាយុ៣៧ឆ្នាំ ពលរដ្ឋម្នាក់ទៀតដែលត្រូវបានសាលាដំបូងខេត្តកោះកុងសម្រេចផ្ដន្ទាទោសដាក់ពន្ធនាគារផងដែរនោះ ប្រាប់វីអូអេនៅថ្ងៃពុធនេះថា អ្នកស្រីរងសម្ពាធខ្លាំងពីខាងភាគីតុលាការខេត្តកោះកុងនិងថា ប្រជាពលរដ្ឋគ្រាន់តែទាមទារយកដីធ្លីរបស់ខ្លួនមកវិញ តែបែរជាមានការចាប់ខ្លួនដាក់ពន្ធនាគារទៅវិញ។
អ្នកស្រីសំណូមពរឱ្យមេដឹកនាំរដ្ឋាភិបាលថ្មី គឺលោក ហ៊ុន ម៉ាណែត ឱ្យជួយរកដំណោះស្រាយជូនប្រជាពលរដ្ឋដែលកំពុងជួបវិបត្តិបញ្ហាដីធ្លីនៅខេត្តកោះកុងនេះឱ្យបានឆាប់។
អ្នកស្រីនិយាយថា៖ «ខ្ញុំសុំសំណូមពរដល់រាជរដ្ឋាភិបាល សម្តេចនាយករដ្ឋមន្រ្តី ហ៊ុន ម៉ាណែត ដែលគាត់នឹងឡើងកាន់តំណែងថ្មីនេះខ្ញុំ ជឿជាក់ថា គាត់នឹងដោះស្រាយវិវាទដីធ្លី[ដល់]ជនរងគ្រោះដីធ្លីនៅភូមិតានី ឃុំជីខលើ ក្រុម១៩៧ គ្រួសារខ្ញុំឱ្យបានឆាប់ៗអ៊ីចឹង។ ខ្ញុំសំណូមពរចុងក្រោយមានតែសម្តេចទេ ដែលអាចដោះស្រាយដីធ្លីជូនពួកខ្ញុំបាន»។
វីអូអេពុំទាន់អាចសុំការអត្ថាធិប្បាយពីលោក វ៉ៃ ភីរម្យ អ្នកនាំពាក្យសាលាដំបូងខេត្តកោះកុងបាននៅឡើយទេ គិតត្រឹមរសៀលថ្ងៃពុធនេះ។ វីអូអេក៏មិនអាចទាក់ទងលោក ហេង ហ៊ុយ បានដែរដើម្បីសុំការអត្ថាធិប្បាយ។
ការផ្តន្ទាទោសលើសកម្មជនដីធ្លី១០នាក់ដែលមានវិវាទជាមួយលោក ហេង ហ៊ុយ កើតមានឡើង នៅពេលសកម្មជនដីធ្លី៣នាក់គឺ អ្នកស្រី ដេត ហ៊ួ លោក ហេង ជៃ និងលោក សុខ ជៃ ត្រូវបានឃុំខ្លួនក្នុងពន្ធនាគារខេត្តកោះកុងស្រាប់ទៅហើយនៅក្នុងសំណុំរឿងដាច់ដោយឡែកមួយផ្សងទៀត។ នេះបើតាមអង្គការលីកាដូ។ អ្នកទាំង៣ស្ថិតក្នុងចំណោមសកម្មជនទាំង១០នាក់នោះ ហើយពួកគេនឹងត្រូវបន្តឃុំខ្លួនក្នុងពន្ធនាគារ។
គួរបញ្ជាក់ថា ពលរដ្ឋចំនួន១៩៧គ្រួសារ មកពីឃុំជីខលើ និងជីខក្រោម ស្រុកស្រែអំបិល ខេត្តកោះកុង តែងតែមកតវ៉ាជាបន្តបន្ទាប់ស្វែងរកការអន្តរាគមន៍ពីក្រសួងរៀបចំដែនដីនគរូបនីយកម្ម និងសំណង់ និងក្រសួងស្ថាប័នរដ្ឋផ្សេងទៀតឱ្យជួយដោះស្រាយបញ្ហារឿងវិវាទដីធ្លីរបស់ពួកគេ ដែលពួកគេថា ត្រូវបានក្រុមហ៊ុនរបស់លោកឧកញ៉ា ហេង ហ៊ុយ បានរំលោភយកដីធ្លីពួកគាត់តាំងពីឆ្នាំ២០០៧៕
