ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ជនរង​គ្រោះ​ទំនាស់​ដីធ្លី​មកពី​កោះកុង​និង​ជ្រោយ​ចង្វារ​តវ៉ា​នៅ​​ក្រសួង​ដែន​ដី​ នគរូប​នីយកម្ម​និង​សំណង់


ទាញ​យក​ពី​តំណភ្ជាប់​ដើម

ជនរង​គ្រោះ​ទំនាស់​ដីធ្លី​មកពី​កោះកុង​និង​ជ្រោយ​ចង្វារ​តវ៉ា​នៅ​​ក្រសួង​ដែន​ដី

ពលរដ្ឋ​១៩៧​​គ្រួសារ​ ​ឃុំជីខលើ​ ស្រុក​ស្រែ​អំបិល​ ខេត្ត​កោះកុង​​ស្វែង​អន្តរាគម​​ឲ្យ​ដោះ​ស្រាយ​ជម្លោះ​ដីធ្លី​ដ៏​រ៉ាំរ៉ៃ​របស់​ពួក​គេ​ជាមួយ​​លោក​ ហេង​ ហ៊ុយ​ ​អ្នក​ជំនួញ​និង​ជា​ម្ចាស់​ក្រុមហ៊ុន ​Heng Huy Agriculture Group។​ ក្រៅពី​នេះ​ក៏មាន​ជនរងគ្រោះ​ទំនាស់​ដីធ្លី​នៅ​ជ្រោយ​ចង្វារ​ចូលរួម​ដែរ។

ក្រុម​ប្រជា​ពលរដ្ឋ​រាប់សិប​នាក់​ក្នុង​ចំណោម​ពលរដ្ឋ​១៩៧គ្រួសារ​ ​ឃុំជីខលើ​ ស្រុក​ស្រែ​អំបិល​ ខេត្ត​កោះកុង ​បានធ្វើ​ការតវ៉ា​បួន​ថ្ងៃ​ជាប់​គ្នា​នៅ​ក្បែរ​ក្រសួង​ដែន​ដី​ នគរូប​នីយកម្ម​និង​សំណង់​ ដើម្បី​ស្វែង​អន្តរាគម​ពី​ក្រសួង​នេះ​ ឲ្យ​ដោះ​ស្រាយ​ជម្លោះ​ដីធ្លី​ដ៏​រ៉ាំរ៉ៃ​របស់​ពួក​ជា​ជាមួយ​លោក​ហេង​ ហ៊ុយ​ ជា​អ្នក​ជំនួញ​ និង​ជាម្ចាស់​ក្រុមហ៊ុន ​Heng Huy Agriculture Group។​

ក្រុម​ប្រជា​ពលរដ្ឋ​ទាំង​នេះ​អះអាងថា ​ក្រុមហ៊ុន​ Heng Huy Agriculture Group ​របស់​លោក​ហេង ហ៊ុយ ​បាន​រំលោភ​យក​ដី​របស់​ពួកគេ​ចាប់​តាំង​ពី​ឆ្នាំ​២០០៧​មក​ម្ល៉េះ​ ហើយ​ពុំ​មាន​ស្ថាប័ន​ណា​ដោះ​ស្រាយ​ឲ្យ​ពួក​គេឡើយ។

ក្រុមប្រជាពលរដ្ឋ​មក​ពីឃុំ​ជីខលើ ស្រុក​ស្រែអបិល​ បាន​ឡើង​មក​ទី​ក្រុង​ភ្នំពេញ​ដើម្បី​ធ្វើ​ការ​តវ៉ា​អំពី​ទំនាស់​ដីធ្លី​របស់​ពួក​គេចាប់​ផ្តើម​តាំងពី​ខែមិថុនា​ឆ្នាំ២០១៩​ តែ​គ្មាន​ដំណោះ​ស្រាយ។

អ្នកស្រី អ៊ិន ធូ តំណាង​ពលរដ្ឋ​១៩៧គ្រួសារ បាន​ប្រាប់ VOA ថា៖ «ប្រជាពលរដ្ឋ​ពួក​ខ្ញុំ​បាត់បង់ច្រើន មិនមែន​តែ​៩២១ហិកតា​ទេ បាត់បង់​មួយ​គ្រួសារៗ អ្នក​ខ្លះ​ទៅ ១០ហិកតា ៦​ហិកតា ៨​ហិកតា ៥​ហិកតា ៤ហិកតា»។

លោក គង់ ម៉ែន ពលរដ្ឋ​ម្នាក់​ទៀត​មក​ពី​ឃុំ​ជីខលើ ស្រុក​ស្រែ​អំបិល ខេត្ត​កោះកុង បាន​លើក​ឡើង​ថា៖ «បាន​ជា​ពួក​ខ្ញុំនៅតែ​តវ៉ា​ជា​រៀង​រហូត​អីចឹង អត់​មាន​ឈប់​ទេ»។

កាល​ពី​ថ្ងៃទី​១៩​ខែ​សីហា ​ ក្រសួង​រៀប​ចំ​ដែន​ដី​ នគរូប​នីយកម្ម និង​សំណង់​ ​បាន​ចេញ​សេចក្តី​ថ្លែង​ការណ៍​មួយដោយ​អះអាង​ថា​ «គ្មាន​ទំនាស់​ដីធ្លី​នៅទីតាំង​ដែល​ពលរដ្ឋ​កំពុង​តវ៉ា​ទេ»។​ ក្រសួង​ដដែល​បញ្ជាក់​ថា​ ខ្លួន​មិន​អាច​រក​ដំណោះជូន​ក្រុម​អ្នក​តវ៉ា​បាន​ទេ​ ហើយ​ស្នើ​ឲ្យពលរដ្ឋ​ទាំង​នេះ​ត្រឡប់​ទៅមូលដ្ឋាន​របស់​ពួក​គាត់​វិញ។​

ប៉ុន្តែ​ក្រុម​ប្រជា​ពលរដ្ឋ​នៅ​តែ​បន្តការ​តវ៉ា​ ​ទោះជា​គ្មាន​ដំណោះ​ស្រាយ​ក៏​ដោយ។​

VOA ​មិនទាន់​អាច​ទាក់​ទង​សុំការ​អធិប្បាយ​ពីលោក​ហេង ហ៊ុយ ប្រធាន​ក្រុមហ៊ុន​ Heng Huy Agriculture Group ​បាន​ទេ ​ដោយ​សារ​ទូរស័ព្ទ​លោក​រោទិ៍​គ្មាន​អ្នក​ទទួល។​

ដំណាល​គ្នានេះ​ មាន​ក្រុមប្រជា​ពលរដ្ឋ​ជាង​១០​នាក់​មកពី​តំបន់​ជ្រោយ​ចង្វារ​ រាជធានី​ភ្នំពេញ​បាន​ចេញ​មក​តវ៉ា​នៅ​ក្រសួង​ដែន​ដី​នគរូប​នីយកម្ម​និង​សំណង់ផងដែរ ទាក់ទង​នឹងទំនាស់​ដីធ្លី​ដែល​បាន​កើត​ឡើងជាង​១០​ឆ្នាំ​មុន។ ​ទំនាស់​ដីធ្លី​របស់​ពួកគេ​ជាប់​ពាក់​ព័ន្ធ​នឹង​ក្រុមហ៊ុន​វិនិយោគ​ទុន​អនិកជន​កម្ពុជា​ហៅ​កាត់​ថា​ OCIC។

លោក ជា​ សុផាត តំណាង​ពលរដ្ឋ​នៅ​តំបន់​ជ្រោយ​ចង្វារ បាន​អះ​អាង​ថា៖ «សាលាក្រុង​ឲ្យ​ខ្ញុំ១០០ការ៉េ សាលាក្រុង​យក​៥០០ការ៉េ ឲ្យ​ក្រុមហ៊ុន​៤០០​ការ៉េ។ ឥឡូវ​យើង​ខ្ញុំ​មិន​អាច​ទទួល​យក​បាន​ទេ ១០ភាគរយ ហើយ​តើ​មាន​ច្បាប់​ឯណា​ដែល​ចែង​ថា ឲ្យ​១០ភាគរយ​មក​ឲ្យ​ពួក​ខ្ញុំ​ហ្នឹង? ហើយ​អស់​លោក​យក​៥០ភាគរយ ហើយ​ក្រុមហ៊ុន ៤០ភាគរយ ឬ​ទិញ​ប៉ុន្មាន ឲ្យ​ប៉ុណ្ណឹង​វិញ?»​

តាម​ការ​អះអាង​ពីក្រុម​មន្ត្រី​សិទ្ធិ​មនុស្ស​ មាន​ករណី​ទំនាស់​ដីធ្លី​ជាច្រើន​ ដែល​មិន​ទាន់ត្រូវ​បាន​ដោះ​ស្រាយ​នៅ​តាម​បណ្តា​ខេត្តនានា​ក្នុង​ប្រទេស​កម្ពុជា។​ ​នៅ​ក្នុង​នោះ​រួម​មាន​ទំនាស់​ដីធ្លី​នៅ​ក្នុង​ខេត្ត​កោះកុង​ ខេត្ត​ព្រះ​សីហនុ​ ខេត្តក្រចេះ​ ខេត្ត​កំពង់​ចាម​ ខេត្ត​ព្រះវិហារ​ និង​រាជ​ធានី​ភ្នំពេញ​ជា​ដើម៕

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG