សង្គ្រាមពាក្យសម្ដីរវាងមេដឹកនាំកម្ពុជាលោក ហ៊ុន សែន និងអតីតប្រធានគណបក្សប្រឆាំងលោក សម រង្ស៊ី បានផ្ទុះឡើងសាជាថ្មី នៅពេលលោក ហ៊ុន សែន បានចោទប្រកាន់កូនអ្នកនយោបាយជំនាន់មុនមួយរូបថាមិនស្មោះនឹងអតីតព្រះមហាក្សត្រខ្មែរ ព្រះបាទ នរោត្តម សីហនុ។
លោក ហ៊ុន សែន បានថ្លែងបញ្ជាក់ថា លោកជាអ្នកការពារព្រះរាជបល្ល័ង្ក។ នេះបើតាមការអធិប្បាយរបស់លោក ហ៊ុន សែន ដែលត្រូវបានផ្សាយបន្តផ្ទាល់តាមទំព័រហ្វេសប៊ុករបស់លោក និងតាមទូរទស្សន៍ក្នុងស្រុកនៅកម្ពុជា។
ការលើកឡើងរបស់លោក ហ៊ុន សែន អំពីភក្ដីភាពរបស់លោកចំពោះរាជានិយមនេះ កើតមានឡើងនៅពេលលោកជួបសំណេះសំណាលជាមួយប្រជារាស្ត្រខ្មែរដែលរស់នៅក្នុងតំបន់អឺរ៉ុប។ ជំនួបនោះ ធ្វើឡើងកាលពីយប់ថ្ងៃទី២៣ ខែតុលា ឆ្នាំ២០១៨ នៅទីក្រុងហ្សឺណែវ ប្រទេសស្វ៊ីស ទីដែលលោក ហ៊ុន សែន បានចូលរួមវេទិកាវិនិយោគពិភពលោកជាមួយមេដឹកនាំមកពីបណ្ដាប្រទេសចំនួន ១៦០ និងអ្នកវិនិយោគ ឬ ដៃគូសំខាន់ៗជាច្រើនផ្សេងទៀត។
លោក ហ៊ុន សែន បានថ្លែងបញ្ជាក់ពីគោលជំហរស្មោះស្ម័គ្ររបស់លោកចំពោះ ព្រះរាជបល័្លង្ក នៅចំពោះមុខពលរដ្ឋខ្មែររស់នៅប៉ែកអឺរ៉ុបយ៉ាងដូច្នេះ៖
«គេជាអ្នកដេញ ដេញ បណ្ដេញសេ្តចយើងចេញ ឯខ្ញុំជាអ្នកយាងចូលត្រឡប់មកវិញ»។
មេដឹកនាំកម្ពុជា ដែលជាអតីតទាហានខ្មែរក្រហម និងដែលបានកាន់អំណាចជានាយករដ្ឋមន្ត្រីខ្មែរអស់រយៈពេលជាងបីទសវត្សរ៍មកនោះ បានអះអាងទៀតថា លោកជាអ្នកគាំទ្រឲ្យអតីតព្រះមហាក្សត្រ ឱ្យបានឡើងគ្រងរាជ្យសាជាថ្មី ហើយថា ព្រះមហាក្សត្របច្ចុប្បន្ននេះ គឺព្រះបាទ នរោត្ត សីហមុនី ក៏ទទួលបានការគាំទ្រពីលោកផងដែរ។
«អ៊ីចឹង! ខ្ញុំបានបំពេញកាតព្វកិច្ចក្នុងឋានៈជាកូនខ្មែរ មិនមែនជាកូនអ្នកក្បត់ស្ដេចទេ។ ដឹងហើយពួកអាអ្នក កូនអាក្បត់ស្ដេចនោះ អាមួយណា»។
លោកនាយករដ្ឋមន្ត្រី ហ៊ុន សែន មិនបានថ្លែងចំៗ អំពីបុគ្គលដែលជាកូនរបស់អ្នកដែលធ្លាប់មានប្រវត្តិមិនស្មោះត្រង់នឹងព្រះរាជានោះទេ តែបុគ្គលនោះ ត្រូវគេជឿថា ទំនងជាលោក សម រង្ស៊ី ដែលជាកូនប្រុសរបស់លោក សម សារី អតីតឯកអគ្គរាជទូតកម្ពុជាប្រចាំចក្រភពអង់គ្លេស ក្នុងរបបដឹកនាំដោយអតីតព្រះមហាក្សត្រខ្មែរព្រះបាទ នរោត្តម សីហនុ។
ក្រោយការអធិប្បាយរបស់លោក ហ៊ុន សែន អំពីរឿងអ្នកក្បត់ស្ដេចនោះ លោក សម រង្ស៊ី បានផ្តល់ការអធិប្បាយលើទំព័រហ្វេសប៊ុករបស់លោក ដោយបានចោទប្រកាន់លោក ហ៊ុន សែន ថា ជាជនក្បត់ជាតិទៅវិញ។ លោក សម រង្ស៊ី បានយកដំណើរការចរចាស្វែងរកសន្តិភាពដល់កម្ពុជានៅទីក្រុងប៉ារីស ប្រទេសបារាំងមកភ្ជាប់ជាមួយនឹងការចោទប្រកាន់នេះ។
លោក សម រង្ស៊ី ដែលពេលនេះកំពុងរស់នៅដោយនិរទេសខ្លួនឯងនាប្រទេសបារាំង បានអធិប្បាយលើទំព័រហ្វេសប៊ុករបស់លោកកាលពីថ្ងៃទី២៤ ខែតុលា ឆ្នាំ២០១៨ ក្នុងន័យដើមថា៖
«មុននឹងបានចុះហត្ថលេខា លើកិច្ចព្រមព្រៀងទីក្រុងប៉ារីស ថ្ងៃ២៣ តុលា ឆ្នាំ១៩៩១ មានការឈ្លោះប្រកែកគ្នាយ៉ាងតានតឹង រវាងភាគីខ្មែរទាំង៤ដឹកនាំដោយសម្ដេចព្រះនរោត្តម សីហនុ, សឺន សាន, ខៀវ សំផន និង ហ៊ុន សែន»។
លោក សម រង្ស៊ី បានអធិប្បាយបន្ថែមថា៖
«ពេលនោះ អ្នកកាសែតអន្តរជាតិមួយរូប បានសួរទៅសម្ដេចព្រះនរោត្តម សីហនុ ថា៖ «ហេតុអ្វីបានជាព្រះអង្គសហការជាមួយលោក ខៀវ សំផន ដែលជាមេខ្មែរក្រហម ហើយជាឃាតករ? ហេតុអ្វីព្រះអង្គមិនសហការជាមួយលោក ហ៊ុន សែន វិញ ដែលមានកងទ័ពវៀតណាមនៅពីក្រោយ ដើម្បីប្រឆាំងពួកខ្មែរក្រហម?»។ សម្ដេចព្រះនរោត្តម សីហនុ បានឆ្លើយទៅអ្នកកាសែតនោះថា៖ «ខៀវ សំផន ជាឃាតករមែន តែមិនមែនជាជនក្បត់ជាតិទេ។ ឯហ៊ុន សែន វិញ ជាឃាតករផង ហើយជាជនក្បត់ជាតិផង»។
គ្រាដែលអ្នកនយោបាយខ្មែរទាំងពីររូបនេះ កំពុងបន្តវាយប្រហារគ្នាដោយពាក្យសម្ដីជាបន្តបន្ទាប់នោះ ប្រទេសកម្ពុជាត្រូវបានអ្នកវិភាគ និងអ្នកតាមដានស្ថានភាពនយោបាយនៅកម្ពុជា ទស្សន៍ទាយថា អាចនឹងប្រឈមវិបត្តិសេដ្ឋកិច្ច ប្រសិនបើប្រទេសដែលនៅពឹងផ្អែកលើជំនួយបរទេសមួយនេះ បាត់បង់ការគាំទ្រខាងពាណិជ្ជកម្មរបស់សហភាពអឺរ៉ុប គឺនៅពេលដែលសហគមន៍ប្រជាធិបតេយ្យដ៏ធំមួយនេះ ដកហូតពន្ធអនុគ្រោះលើការនាំចូលទំនិញរបស់ប្រទេសកម្ពុជាទៅក្នុងទីផ្សារសហភាពអឺរ៉ុប។ ការបាត់បង់ពន្ធអនុគ្រោះរបស់សហភាពអឺរ៉ុប អាចនឹងធ្វើឲ្យរង្គោះរង្គើដល់ឧស្សាហកម្មកាត់ដេរដែលបានផ្តល់ការងារដល់កម្មកររាប់សិបម៉ឺននាក់នៅក្នុងប្រទេសនេះ និងផលិតកម្មអង្ករដែលមានទីផ្សារសំខាន់នៅសហភាពអឺរ៉ុប។
ជាងនេះទៅទៀត បើតាមការលើកឡើងរបស់សមាគមរោងចក្រកាត់ដេរនៅកម្ពុជា ហៅកាត់ថា GMACនោះ ពលរដ្ឋខ្មែរពីរលាននាក់អាចនឹងប្រឈមផលវិបាកជាច្រើន ប្រសិនបើសហគមន៍អឺរ៉ុបផ្អាកជាបណ្ដោះអាសន្ននូវប្រពន្ធអនុគ្រោះពន្ធ ព្រោះពលរដ្ឋទាំងអស់នេះ បានពឹងផ្អែកលើកម្មករដែលកំពុងធ្វើការក្នុងឧស្សាហកម្មកាត់ដេរ។
GMAC អះអាងថា ការនាំចេញរបស់ខ្លួនជាង៤៦ភាគរយទៅទីផ្សារសហភាពអឺរ៉ុបក៏នឹងជួបហានិភ័យទៀតផង ក្នុងករណីកម្ពុជាបាត់បង់គំនិតផ្ដួចផ្ដើមពាណិជ្ជកម្មរបស់សហគមន៍ប្រជាធិបតេយ្យមួយនេះ ដែលគេស្គាល់ថា«គ្រប់មុខទំនិញទាំងអស់លើកលែងតែសព្វាវុធ» ហៅកាត់ថា EBAs នោះ។
លោក សុខ ឥសាន អ្នកនាំពាក្យគណបក្សប្រជាជនកម្ពុជា ដែលជាគណបក្សគ្រប់គ្រងប្រទេសនោះ បានប្រាប់ VOA ថា ជម្លោះនយោបាយសព្វថ្ងៃដែលបានកើតឡើងនៅកម្ពុជា គឺជាបញ្ហារវាងខ្មែរ និងខ្មែរ។
លោកមានប្រសាសន៍បន្ថែមថា សហភាពអឺរ៉ុបមិនអាចធ្វើការសម្រេចចិត្តដោយលម្អៀងខាងនយោបាយទៅរកក្រុមគណបក្សជំទាស់ដែលត្រូវបានរំលាយចោលកាលពីឆ្នាំមុននោះឡើយ។
«នយោបាយស្រុកខ្មែរ វាជារឿងខ្មែរ ហើយរឿងបរទេសបិទអា EBAs នៅ EUនោះ អាហ្នឹងជារឿងសេដ្ឋកិច្ច រឿងដោយឡែក។ ហើយបើ EU យកបញ្ហានយោបាយ ដោយសារកាន់ជើងអតីតបក្សប្រឆាំង ហើយមកធ្វើជារឿងគាបសង្កត់មកលើរាជរដ្ឋាភិបាល ខ្ញុំយល់ថា វាជាការរំលោភ លទ្ធិប្រជាធិបតេយ្យ។ ហើយថ្មីៗនេះ វាជាការរំលោភ លើស្មារតីនៃកិច្ចព្រមព្រៀងទីក្រុងប៉ារីស ដែលក្នុងចំណោម២៨ប្រទេសជាសមាជិក EU ហ្នឹង ប្រទេសជាច្រើនណាស់ដែលបានចុះហត្ថលេខាកិច្ចព្រមព្រៀងទីក្រុងប៉ារីសនេះថា ជួយស្តា និងកសាងប្រទេសកម្ពុជាឡើងវិញបាទ»។
ពាក់ព័ន្ធនឹងការផ្ចាញ់ផ្ចាលរបស់លោក សម រង្ស៊ី មកលើនាយករដ្ឋខ្មែរលោក ហ៊ុន សែន នោះ លោក សុខ ឥសាន បានកត់សម្គាល់ថា ការអធិប្បាយណាមួយរបស់លោក សម រង្ស៊ី លែងមានសុពលភាពទៀតហើយនៅកម្ពុជា ហើយលោកអះអាងថា អតីតមេដឹកនាំគណបក្សប្រឆាំងរូបនេះ នឹងជួបវាសនាចុងក្រោយដូចឪពុករបស់លោក ដែលនៅនាទីចុងក្រោយនៃជីវិតលែងបានចូលមកទឹកដីកម្ពុជា។
«នយោបាយរបស់គាត់ហ្នុង វានឹងហុចលទ្ធផលឲ្យគាត់អ៊ីចឹងហើយ ឥឡូវទីមួយរឿងចូលស្រុក វាអត់មានទេ ដល់អ៊ីចឹង ឥឡូវគាត់អាយុប៉ុន្មានហើយ ៧០ហើយ នែ៎ កើតឆ្នាំ១៩៤៩ ឥឡូវវាដល់៧០ហើយ អ៊ីចឹងទេ តើសួរថា សម រង្ស៊ី ហ្នឹង រស់ដល់ពេលណា មិនមែន១០០ឆ្នាំទេ»!
អ្នកប្រវត្តិសាស្ត្រមួយចំនួន បានឲ្យដឹងថា លោក សម សារី ដែលជាឪពុកបង្កើតរបស់លោក សម រង្ស៊ី គឺជាអ្នកការពារអធិបតេយ្យភាពជាតិកម្ពុជាយ៉ាងស្វិតស្វាញ និងធ្លាប់ជាអ្នកនយោបាយខ្មែរមួយរូបដែលធ្លាប់ទទួលបានការទុកចិត្តពីអតីតព្រះមហាក្សត្រខ្មែរព្រះបាទ នរោត្តម សីហនុ។ ឯកសារប្រវត្តិសាស្ត្រមួយចំនួន បានឲ្យដឹងថា លោក សម សារី ក្រោយមករងការចោទប្រកាន់ថា បានប្រើអំពើហិង្សាលើអ្នកបម្រើរបស់លោកនៅទីក្រុងឡុងដ៍ ក្នុងពេលលោកបំពេញតួនាទីជាឯកអគ្គរាជទូតនៅទីនោះ។ លោក សម សារី ក៏ត្រូវបានចោទប្រកាន់ថា បានឃុបឃិតជាមួយសហរដ្ឋអាមេរិក ក្នុងការរៀបចំគម្រោងផ្ដួលរំលំ ព្រះបាទ នរោត្តម សីហនុ ផងដែរ៕
