រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្ដិ នៅថ្ងៃអង្គារនេះ បានអំពាវនាវឱ្យអ្នកធុរកិច្ច ឬអ្នកប្រកបពាណិជ្ជកម្មនៅកម្ពុជា ចូលរួមការពារសិទ្ធិនិងផលប្រយោជន៍របស់អ្នកប្រើប្រាស់ ដោយអនុវត្តទៅតាមច្បាប់ដែលកម្ពុជាមាន។
លោករដ្ឋមន្ត្រីបានថ្លែងបែបនេះនៅក្នុងសន្និសីទអ្នកប្រើប្រាស់ថ្នាក់ជាតិឆ្នាំ ២០២៣ ក្រោមប្រធានបទ«ពង្រឹងសិទ្ធិអំណាចអ្នកប្រើប្រាស់ដើម្បីជំរុញការអនុវត្តដោយសុចរិតលើទីផ្សារ» ដែលធ្វើឡើងនៅរាជធានីភ្នំពេញ។
រដ្ឋមន្ត្រីក្រសួងពាណិជ្ជកម្មបានថ្លែងថា ការប្រកបធុរកិច្ចមិនសុចរិតបានបង្កផលលំបាកដល់អ្នកប្រើប្រាស់ ហើយវានៅបន្តកើតឡើងក្នុងប្រទេសកម្ពុជា។
លោកថ្លែងថា៖ «ទន្ទឹមនឹងនេះ ខ្ញុំសូមអំពាវនាវដល់អ្នកធ្វើធុរកិច្ចទាំងឡាយ ដែលមិនទាន់បានអនុវត្តនូវកាតព្វកិច្ចការពារអ្នកប្រើប្រាស់ សូមយកចិត្តទុកដាក់អនុវត្តកាតព្វកិច្ចទាំងនោះស្របតាមច្បាប់និងបទបញ្ញត្តិជាធរមានទាំងអស់គ្នា ដើម្បីរួមចំណែកជាមួយស្ថាប័នមានសមត្ថកិច្ច និងអ្នកប្រើប្រាស់ក្នុងការកសាងសង្គមយើងឱ្យមានសុខដុមនីយកម្ម និងការអភិវឌ្ឍប្រកបដោយនិរន្តរភាព» ។
លោក ប៉ាន សូរស័ក្ដិ ថ្លែងបន្ថែមថា ការដោះស្រាយបណ្តឹងរបស់អ្នកប្រើប្រាស់ពីសំណាក់អាជ្ញាធរមានសមត្ថកិច្ចនៅតែជាបញ្ហាស្មុគស្មាញនៅឡើយ ខណៈរដ្ឋាភិបាលកំពុងពង្រឹងបន្ថែមនូវកិច្ចការពារអ្នកប្រើប្រាស់។
លោកថ្លែងថា៖ «ចំពោះការស្វែងរកបទល្មើស ការទទួលនិងដោះស្រាយបណ្តឹងរបស់អ្នកប្រើប្រាស់ អាជ្ញាធរមានសមត្ថកិច្ចនៅតែជួបបញ្ហាប្រឈម និងស្មុគស្មាញនៅឡើយ»។
លោកបញ្ជាក់ទៀតថា៖ «ជាការពិតណាស់ ការដាក់ចេញនូវឯកសារគតិយុត្តិនានា ការជំរុញឱ្យមានការអនុវត្តច្បាប់ ស្តីពីកិច្ចការពារអ្នកប្រើប្រាស់បានឆ្លុះបញ្ចាំងឱ្យឃើញថា រាជរដ្ឋាភិបាលកម្ពុជាប្តេជ្ញាចិត្តយ៉ាងមុតមាំចូលរួមអនុវត្តផែនការសកម្មភាពជាយុទ្ធសាស្រ្ត សម្រាប់កិច្ចការពារអ្នកប្រើប្រាស់ឆ្នាំ ២០១៦ ដល់ ២០២៥ ដើម្បីការពារអ្នកប្រើប្រាស់»។
ប្រទេសកម្ពុជាបានអនុម័តច្បាប់ស្តីពីកិច្ចការពារអ្នកប្រើប្រាស់ ដែលត្រូវបានប្រកាស កាលពីចុងឆ្នាំ ២០១៩។ ចំណែកក្រសួងពាណិជ្ជកម្មក៏មានសេនាធិការមួយឈ្មោះថា «នាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ» ដែលជាអង្គភាពទទួលបន្ទុកលើកិច្ចការពាក់ព័ន្ធនឹងសិទ្ធិរបស់អ្នកប្រើប្រាស់។
នៅក្នុងវេទិកាស្តីពីសិទ្ធិអ្នកប្រើប្រាស់នេះ ក៏មានការចូលរួមពីមន្ត្រីរដ្ឋាភិបាលមកពីស្ថាប័នរដ្ឋផ្សេងៗ ក្នុងនោះក៏មានក្រសួងប្រៃសណីយ៍ផងដែរ ដែលទទួលបន្ទុកពិនិត្យមើលការផ្តល់សេវាអ៊ីនធឺណិតជាដើម។
លោក គង់ ផល្លៈ រដ្ឋលេខាធិការក្រសួងប្រៃសណីយ៍ និងទូរគមនាគមន៍ ដែលជាវាគ្មិននៅក្នុងកិច្ចពិភាក្សាមួយថ្លែងថា ក្រសួងបានដោះស្រាយម្តងមួយៗនូវបញ្ហាប្រឈមជាក់ស្តែងរបស់ប្រជាពលរដ្ឋ ទាក់ទងនឹងសេវាអ៊ីនធឺណិត និងបញ្ហាទូរសព្ទមិនមានសេវាប្រើប្រាស់ជាដើម។
លោកថ្លែងថា៖ «ដូចបញ្ហាអត់សេវា អត់អីអ៊ីចឹង គឺយើងពង្រឹងការរៀបចំ អនុក្រឹត្យស្តីពីការប្រើប្រាស់ហេដ្ឋារចនាសម្ព័ន្ធរួម។ ឥឡូវហ្នឹងយើងដល់កិច្ចពិភាក្សាជាមួយក្រសួងយុត្តិធម៌ហើយពីទោសបញ្ញត្តិ ហើយយើងគិតថា អនុក្រឹត្យនេះនឹងចេញលឿន។ អ៊ីចឹងការៀបចំបណ្តាញហេដ្ឋារចនាសម្ព័ន្ធ ទូរគមនាគមន៍ដែលយើងបានលើកពីដើមថា Building infrastructure [កសាងហេដ្ឋារចនាសម្ព័ន្ធ] សម្រាប់វិស័យហ្នឹង វាកាន់តែទៅលឿនឡើង»។
លោកបន្ថែមថា ពាក់ព័ន្ធសេវាអ៊ីនធឺណិតនៅក្នុងបុរីវិញ គឺត្រូវឱ្យមានប្រតិបត្តិករទូរគមនាគមន៍យ៉ាងហោចណាស់ចំនួន ៣ ដើម្បីអាចប្រកួតប្រជែងគ្នាឱ្យមានសេវាគ្រប់គ្រាន់ ព្រោះនៅពេលណាដែលបុរីមួយចុះកិច្ចសន្យាដាច់មុខជាមួយប្រតិបត្តិករតែមួយ នោះវាជាការបំពានគោលការណ៍ និងច្បាប់ប្រកួតប្រជែងទាំងស្រុង។ ដូច្នេះលោកជំរុញឱ្យប្រជាពលរដ្ឋប្តឹងមកនិយ័តករទូរគមនាគមន៍ ឬប្តឹងមកក្រសួងប្រៃសណីយ៍ ដើម្បីដោះស្រាយបញ្ហានានា។
លោកថ្លែងថា៖ «អ៊ីចឹងបើសិនជាបុរីណាដែលមានសិទ្ធិផ្តាច់មុខហើយ ហើយនៅតែអត់ឱ្យគេចូល ខ្ញុំថា ប្តឹងមកក្រសួងប្រៃសណីយ៍មក ដើម្បីឱ្យក្រុមការងារយើងចុះអន្តរាគមន៍ធ្វើម៉េចរុញឱ្យមានសេវាក្នុងបុរី»។
នៅក្នុងវេទិកានោះ រដ្ឋមន្ត្រីក្រសួងពាណិជ្ជកម្មក៏បានលើកទឹកចិត្តដល់អ្នកប្រើប្រាស់រួមគ្នាបង្កើតសមាគមអ្នកប្រើប្រាស់តាមវិស័យស្របទៅតាមច្បាប់ ដើម្បីធ្វើជាតំណាងការពារសិទ្ធិ និងផលប្រយោជន៍ស្របច្បាប់ឱ្យសមាជិករបស់ខ្លួន និងជួយរាយការណ៍អំពីធុរកិច្ចទាំងឡាយណា ដែលប្រព្រឹត្តសកម្មភាពមិនសុចរិតក្នុងធុរកិច្ច៕
