ប្រធានាធិបតីសហរដ្ឋអាមេរិកលោក Joe Biden បាននិយាយកាលពីថ្ងៃព្រហស្បតិ៍ថា វាទំនងកាន់តែខ្លាំងឡើងណាស់ថា រុស្ស៊ីនឹងឈ្លានពានអ៊ុយក្រែនក្នុងរយៈពេលបីបួនថ្ងៃខាងមុខនេះ។
លោកប្រធានាធិបតី Biden បានប្រាប់ក្រុមអ្នកយកព័ត៌មាននៅឯសេតវិមានថា៖ «យើងមានហេតុផលជឿថា ពួកគេបានទាក់ទិននៅក្នុងកិច្ចប្រតិបត្តិការវាយប្រហារដើម្បីឲ្យមានលេសចូលក្នុងប្រទេសអ៊ុយក្រែន។ រាល់ការចង្អុលបង្ហាញដែលយើងមានគឺថា ពួកគេបានប្រុងប្រៀបចូលក្នុងប្រទេសអ៊ុយក្រែន វាយប្រហារអ៊ុយក្រែន»។
លោកប្រធានាធិបតី មានប្រសាសន៍ទៀតថា៖ «ការគិតរបស់ខ្ញុំគឺថា ការវាយប្រហារនឹងកើតមានឡើងនៅបីបួនថ្ងៃខាងមុខទៀតនេះ»។
ទោះជាយ៉ាងណាក៏ដោយ លោក Biden នៅតែជឿថា អាចមានលទ្ធភាពស្វែងរកដំណោះស្រាយខាងការទូតដែលនឹងបន្ធូរបន្ថយការព្រួយបារម្ភរបស់រុស្ស៊ីអំពីកាំជ្រួចមីស៊ីលរបស់អង្គការអូតង់ និងសមយុទ្ធហ្វឹកហាត់ខាងយោធានៅក្នុងតំបន់អឺរ៉ុបខាងកើត។ សម្ព័ន្ធមិត្តលោកខាងលិច បានច្រានចោលការទាមទារដ៏សំខាន់មួយរបស់រុស្ស៊ីដែលឲ្យអង្គការអូតង់ច្រានចោលការអនុញ្ញាតឲ្យអ៊ុយក្រែននិងរដ្ឋផ្សេងទៀតរបស់របស់អតីតសហភាពសូវៀត ក្លាយជាសមាជិករបស់អង្គការអូតង់។
សេតវិមានបានបញ្ជាក់ថា លោកប្រធានាធិបតី Biden នឹងនិយាយតាមទូរស័ព្ទជាមួយក្រុមមេដឹកនាំត្រើយម្ខាងទៀតនៃមហាសមុទ្រអាត្លង់ទិកនៅថ្ងៃសុក្រនេះអំពីការដាក់ពង្រាយកងទ័ពរបស់រុស្ស៊ីនៅតាមព្រំដែនអ៊ុយក្រែននិងការបន្តការខំប្រឹងប្រែងរបស់សហរដ្ឋអាមេរិកដើម្បីស្វែងរកការកំញ៉ើញនិងការទូត។
រដ្ឋមន្ត្រីការបរទេសអាមេរិកលោក Antony Blinken ក្រោយមកបាននិយាយដូចលោក Biden ដោយបានប្រាប់ក្រុមប្រឹក្សាសន្តិសុខអង្គការសហប្រជាជាតិថា ពិភពលោកអាចរំពឹងឃើញការវាយប្រហាររបស់រុស្ស៊ីលើអ៊ុយក្រែនក្នុងប៉ុន្មានថ្ងៃទៀតនេះ ហើយថា ព័ត៌មាននៃការស៊ើបការណ៍សម្ងាត់ ប្រាប់ឲ្យដឹងថា ការវាយប្រហារ អាចធ្វើឡើងតាមរយៈការបង្កើតជាលេសមួយ។
អ្នកនាំពាក្យក្រសួងការបរទេសសហរដ្ឋអាមេរិកលោក Ned Price បាននិយាយថា លោក Blinken បានថ្លែងនៅឯក្រុមប្រឹក្សាសន្តិសុខអង្គការសហប្រជាជាតិនៅថ្ងៃនេះដូច្នេះ ពីព្រោះ តែយើងជឿថា មធ្យោបាយដែលមានការទទួលខុសត្រូវដើម្បីដោះស្រាយវិបត្តិនេះ គឺតាមរយៈការទូតនិងការសន្ទនាគ្នា។ លោក Blinken បានស្នើជួបរដ្ឋមន្ត្រីការបរទេសរុស្ស៊ីលោក Lavrov នៅអឺរ៉ុបនៅសប្តាហ៍ក្រោយ។
លោក Price បាននិយាយទៀតថា៖ «រុស្ស៊ីបានឆ្លើយតបដោយមានពេលវេលានៃការជួបនៅចុងសប្តាហ៍ក្រោយដែលយើងសុខចិត្តទទួលយក ឲ្យតែមិនមានការបន្តឈ្លានពានរបស់រុស្ស៊ីលើអ៊ុយក្រែន។ ប្រសិនបើរុស្ស៊ីឈ្លានពានក្នុងប៉ុន្មានថ្ងៃខាងមុខទៀត វានឹងបញ្ជាក់យ៉ាងច្បាស់ថា រុស្ស៊ីមិនខ្វល់ខ្វាយអំពីការទូតទេ។ យើងនឹងបន្តសម្របសម្រួលជាមួយសម្ព័ន្ធមិត្តនិងដៃគូរបស់យើងហើយនឹងជំរុញឲ្យមានការទាក់ទងបន្ថែមទៀតជាមួយរុស្ស៊ីតាមរយៈក្រុមប្រឹក្សាអូតង់និងរុស្ស៊ី និងអង្គការសន្តិសុខនិងកិច្ចសហប្រតិបត្តិការដើម្បីអឺរ៉ុបឬ OSCE»៕
ព័ត៌មានខ្លះនៃសេចក្តីរាយការណ៍នេះដកស្រង់ពីទីភ្នាក់ងារព័ត៌មាន AP, The New York Times, AFP និង Reuters
លោកប្រធានាធិបតី Biden និយាយថា វាទំនងកាន់តែខ្លាំងណាស់ថា រុស្ស៊ីនឹងឈ្លានពានអ៊ុយក្រែន
វ៉ាស៊ីនតោននិងប្រ៊ុចសែល —
