អនុប្រធានាធិបតីសហរដ្ឋអាមេរិក លោកស្រី Kamala Harris នឹងធ្វើដំណើរទៅទីក្រុង Munich ប្រទេសអាល្លឺម៉ង់នៅថ្ងៃព្រហស្បតិ៍នេះ ដែលនៅទីនោះ ក្រុមមន្ត្រីនិយាយថាលោកស្រី នឹងផ្តោតទៅលើការពិភាក្សាជាមួយសម្ព័ន្ធមិត្តអំពីវិបត្តិរវាងរុស្ស៊ីនិងអ៊ុយក្រែន។
នៅក្នុងប្រទេសអាល្លឺម៉ង់ លោកស្រី Harris នឹងដឹកនាំគណៈប្រតិភូសហរដ្ឋអាមេរិកនៅក្នុងសន្និសីទសន្តិសុខទីក្រុង Munich ហើយនឹងជួបជាមួយប្រធានាធិបតីអ៊ុយក្រែន លោក Volodymyr Zelenskiy អគ្គលេខាធិការនៃអង្គការអូតង់ លោកJens Stoltenberg និងមេដឹកនាំនៃប្រទេសឡេតូនី (Latvia) លីទុយអានី (Lithuania) និងប្រទេសអេស្តូនី (Estonia) ផងដែរ។
លោកស្រី Harris ថែមទាំងនឹងថ្លែងសុន្ទរកថាមួយនៅថ្ងៃសៅរ៍ដែលក្រុមមន្ត្រីរបស់រដ្ឋបាលអាមេរិកថានឹងផ្តោតទៅលើការរួបរួមគ្នាក្នុងចំណោមប្រទេសលោកខាងលិច និងសមាជិកនៃអង្គការអូតង់ ក្នុងវិស័យការទូត យោធា និងសេដ្ឋកិច្ច។
«លោកស្រីអនុប្រធានាធិបតីនឹងគូសបញ្ជាក់ថា ការរួបរួមគ្នាជាប្រភពនៃកម្លាំងដែលនឹងអនុញ្ញាតឲ្យយើងឆ្លើយតបយ៉ាងឆាប់រហ័សនិងយ៉ាងខ្លាំងក្លាចំពោះសកម្មភាពឈ្លានពានបន្ថែមរបស់រុស្ស៊ី» នេះបើតាមសម្តីរបស់មន្ត្រីជាន់ខ្ពស់ម្នាក់ ដែលបានប្រាប់អ្នកកាសែតកាលពីថ្ងៃពុធ។ មន្ត្រីរូបនោះបន្ថែមទៀតថា៖ «សុន្ទរកថារបស់លោកស្រីនឹងផ្តោតទៅលើការធានាសម្ព័ន្ធមិត្តយើងនិងដៃគូយើងអំពីការតាំងចិត្តរបស់យើង និងអំពីវិធីដើម្បីពង្រឹងអង្គការអូតង់និងសម្ព័ន្ធមិត្តយើងនៅចំពោះមុខអំពើគឃ្លើនរបស់រុស្ស៊ី។ ហើយលោកស្រីនឹងថ្លែងថាការឈ្លានពានចូលប្រទេសអ៊ុយក្រែន នឹងធ្វើឲ្យរុស្ស៊ីទន់ខ្សោយជាមុន មិនមែនរឹងមាំជាងមុននោះទេ»។
ក្រុមមន្ត្រីបាននិយាយថាគោលបំណងចម្បងនៃទស្សនកិច្ចនេះគឺដើម្បីបញ្ជាក់ថា សម័ន្ធមិត្តបស្ចិមប្រទេស យល់ស្របគ្នា ហើយផ្ញើសារយ៉ាងច្បាស់លាស់មួយប្រាប់រុស្ស៊ីអំពីមាគ៌ាឆ្ពោះទៅមុខ៕
