ក្រសួងការបរទេសសហរដ្ឋអាមេរិកបានបញ្ជាក់កាលពីថ្ងៃព្រហស្បតិ៍ម្សិលមិញថា រដ្ឋាភិបាលរុស្ស៊ីបានបណ្តេញអនុប្រធានបេសកកម្មការទូតសហរដ្ឋអាមេរិកប្រចាំនៅប្រទេសរុស្ស៊ីលោក Bart Gorman ចេញពីប្រទេស។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
ការបណ្ដេញចេញនេះបានធ្វើឡើង នៅចំពេលដែលមានភាពតានតឹងរវាងរុស្ស៊ីនិងក្រុមបស្ចិមប្រទេសរឿងលទ្ធភាពដែលរុស្ស៊ីអាចឈ្លានពានប្រទេសអ៊ុយក្រែន ហើយគេនៅមិនទាន់ដឹងច្បាស់នៅឡើយទេថាតើរុស្ស៊ីធ្វើការបណ្ដេញនេះក្រោមហេតុផលអ្វីនោះ។
ក្រសួងការបរទេសសហរដ្ឋអាមេរិកបានព្រមានថា សហរដ្ឋអាមេរិកនឹងចាត់វិធានការតបតទៅវិញ។
អ្នកនាំពាក្យក្រសួងការបរទេសអាមេរិកបានបញ្ជាក់ថា៖ «សកម្មភាពរបស់រុស្ស៊ីប្រឆាំងនឹងអនុប្រធានបេសកកម្មការទូតរបស់សហរដ្ឋអាមេរិកនេះគឺជារឿងមិនត្រឹមត្រូវ។ សហរដ្ឋអាមេរិកចាត់ទុកករណីនេះថាជាវិធានការដែលធ្វើឲ្យកាន់តែតានតឹងឡើង និងកំពុងពិចារណាចាត់វិធានការឆ្លើយតបទៅវិញ»៕
