ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ហេតុអ្វី​តៃវ៉ាន់​ឧបត្ថម្ភ​ម្ហូប​អាហារ ថវិកា និង​គ្រឿង​ផ្គត់ផ្គង់​សុខាភិបាល​ដល់​អ៊ុយក្រែន?


រូបឯកសារ៖ ប្រជាជន​តៃវ៉ាន់ ដើរ​តវ៉ា​តាម​ដងផ្លូវ​ប្រឆាំង​នឹង​ការឈ្លានពាន​របស់​រុស្ស៊ី​នៅ​អ៊ុយក្រែន​​ក្នុង​ទីក្រុង​តៃប៉ិ កាលពី​ថ្ងៃ​ទី១៣ ខែ​មីនា ឆ្នាំ​២០២២។
រូបឯកសារ៖ ប្រជាជន​តៃវ៉ាន់ ដើរ​តវ៉ា​តាម​ដងផ្លូវ​ប្រឆាំង​នឹង​ការឈ្លានពាន​របស់​រុស្ស៊ី​នៅ​អ៊ុយក្រែន​​ក្នុង​ទីក្រុង​តៃប៉ិ កាលពី​ថ្ងៃ​ទី១៣ ខែ​មីនា ឆ្នាំ​២០២២។

ពលរដ្ឋ​តៃវ៉ាន់​និង​រដ្ឋាភិបាល​របស់​ពួកគេ​ បាន​បញ្ជូន​ជំនួយ​ទៅកាន់​ប្រទេស​អ៊ុយក្រែន​ដែល​កំពុង​រងគ្រោះ​ដោយសារ​សង្គ្រាម​ឈ្លានពាន​របស់​រុស្ស៊ី ដើម្បី​បង្ហាញ​ក្ដី​ខ្វាយខ្វល់​អាណិត​អាសូរ​ចំពោះ​ពលរដ្ឋ​អ៊ុយក្រែន។ នេះ​បើ​តាម​ការ​បញ្ជាក់​របស់​អ្នក​វិភាគ​នានា។

អ្នក​វិភាគ​ទាំងនោះ​បាន​លើកឡើង​ថា ពលរដ្ឋ​តៃវ៉ាន់​ជាច្រើន​ខ្លាច​ថា តៃវ៉ាន់​អាច​ក្លាយជា​ទិសដៅ​បន្ទាប់​របស់​ប្រទេស​មហា​អំណាច​យោធា​មួយ។

ប្រទេស​ចិន​បាន​អះអាង​ថា តៃវ៉ាន់​គឺជា​ផ្នែក​មួយ​នៃ​ទឹកដី​របស់​ខ្លួន ហើយ​ខ្លួន​នឹង​មិន​បោះបង់​ចោល​ជម្រើស​នៃ​ការ​ប្រើ​កម្លាំង​ដើម្បី​យក​តៃវ៉ាន់​មក​ដាក់​ក្រោម​ការ​គ្រប់គ្រង​របស់​ខ្លួន​នោះទេ ប្រសិនបើ​ចាំបាច់។ ពលរដ្ឋ​តៃវ៉ាន់​ភាគច្រើន​ប្រឆាំង​នឹង​ការ​បង្រួបបង្រួម​ជា​ផ្លូវការ​ណាមួយ​ជាមួយ​នឹង​ប្រទេស​ចិន។

ជម្លោះ​រវាង​ចិន​និង​តៃវ៉ាន់​មាន​ប្រវត្តិ​តាំងពី​សម័យ​សង្គ្រាម​ស៊ីវិល​នៅ​ចិន​នៅ​ទសវត្សរ៍ ១៩៤០ មក​ម្ល៉េះ ដែល​នៅពេល​នោះ ក្រុម​អ្នក​ជាតិ​និយម​របស់​លោក Chiang Kai-shek បាន​ចាញ់​ក្រុម​កុម្មុយនីស្ត​និង​បាន​ភៀស​ខ្លួន​ទៅ​តាំង​មូលដ្ឋាន​ថ្មី​នៅ​លើ​កោះ​តៃវ៉ាន់។

ចាប់​តាំងពី​ពាក់​កណ្ដាល​ឆ្នាំ ២០២០ មក ប្រទេស​ចិន​ដែល​មាន​អំណាច​យោធា​ខ្លាំងក្លា​ជាង បាន​ធ្វើ​ការ​ហោះហើរ​យន្តហោះ​ចម្បាំង​ស្ទើរតែ​រាល់​ថ្ងៃ​លើ​ជ្រុង​មួយ​នៃ​តំបន់​កំណត់​ការពារ​ដែន​អាកាស (ADIZ) របស់​តៃវ៉ាន់។ តៃវ៉ាន់​បាន​តបត​ដោយ​ការ​បញ្ជា​ទិញ​សព្វាវុធ​ទំនើបៗ ទាំង​សព្វាវុធ​ដែល​ផលិត​ក្នុង​ទឹកដី​របស់​ខ្លួន​និង​ទាំង​សព្វាវុធ​ពី​សហរដ្ឋ​អាមេរិក។

លោក Ku Chung-hua សមាជិក​គណៈកម្មាធិការ​អចិន្ត្រៃយ៍​នៃ​អង្គការ Citizens' Congress Watch ដែល​ជា​អង្គការ​តស៊ូមតិ​នៅក្នុង​ទីក្រុង​តៃប៉ិ កោះ​តៃវ៉ាន់ បាន​និយាយ​ថា៖ «ការណ៍​ដែល​អ៊ុយក្រែន​រង​ការ​វាយ​ប្រហារ​តាម​វិធី​នេះ​និង​តាម​វិធី​ដ៏​អយុត្តិធម៌​បាន​ធ្វើ​ឱ្យ​មនុស្ស​មាន​អារម្មណ៍​អាណិតអាសូរ​ចំពោះ​អ៊ុយក្រែន។ ដូច្នេះ ពលរដ្ឋ​តៃវ៉ាន់​មាន​ឆន្ទៈ​ពេញទំហឹង​នៅក្នុង​ការ​ផ្ដល់​ជំនួយ»។

ជំនួយ​ផ្តល់​ទៅ​អ៊ុយក្រែន៖ ប្រទេស និង​អង្គការ​នានា​ដែល​បាន​ប្រកាស​ផ្តល់​ជំនួយ​ដល់​អ៊ុយក្រែន ចាប់តាំង​ពី​ការឈ្លានពាន​របស់​រុស្ស៊ី។
ជំនួយ​ផ្តល់​ទៅ​អ៊ុយក្រែន៖ ប្រទេស និង​អង្គការ​នានា​ដែល​បាន​ប្រកាស​ផ្តល់​ជំនួយ​ដល់​អ៊ុយក្រែន ចាប់តាំង​ពី​ការឈ្លានពាន​របស់​រុស្ស៊ី។

កាលពី​ថ្ងៃ​ទី ២៨ ខែ​កុម្ភៈ រដ្ឋាភិបាល​តៃវ៉ាន់​បាន​បញ្ជូន​គ្រឿង​បរិក្ខារ​សុខាភិបាល​ចំនួន ២៧ តោន ទៅកាន់​ប្រទេស​អ៊ុយក្រែន។

គិត​ត្រឹម​ថ្ងៃ​ទី ៧ ខែ​មីនា ក្រសួង​ការបរទេស​តៃវ៉ាន់​រៃ​អង្គាស​ថវិកា​បាន​ចំនួន ១០ លាន ៥ សែន​ដុល្លារ​អាមេរិក តាមរយៈ​គណនី​ធនាគារ​ពិសេស។ ការិយាល័យ​របស់​រដ្ឋាភិបាល​តៃវ៉ាន់​នៅក្នុង​ប្រទេស​ប៉ូឡូញ និង​ការិយាល័យ​ទំនាក់ទំនង​របស់​ប៉ូឡូញ​នៅ​កោះ​តៃវ៉ាន់ នឹង​សម្របសម្រួល​បញ្ជូន​ថវិកា​ទាំងនេះ​ទៅកាន់​ទីភ្នាក់ងារ​ជន​ភៀសខ្លួន​មួយ​ដែល​ទទួល​បាន​ការ​យល់ព្រម​ពី​រដ្ឋាភិបាល​ប៉ូឡូញ។

កន្លងមក ពលរដ្ឋ​តៃវ៉ាន់​ដែល​ជា​អ្នក​ផ្ដល់​ជំនួយ​ប្រហែល ១.៧៣០ នាក់ បាន​បរិច្ចាគ​នំ cookie ភួយ ម៉ាស់ ខោ​ទឹកនោម​ទារក និង​ផលិតផល​អនាម័យ​ស្ត្រី ដល់​ជន​ភៀសខ្លួន​ដោយសារ​សង្គ្រាម​នៅ​អ៊ុយក្រែន។ នេះ​បើ​តាម​ការ​បញ្ជាក់​របស់​ក្រសួង​ការបរទេស​តៃវ៉ាន់​នៅ​លើ​វេបសាយ​របស់​ខ្លួន។

ពលរដ្ឋ​ដែល​ជា​អ្នក​មាន​បំផុត​នៅ​តៃវ៉ាន់ ក្រុម​វិហារ​គ្រិស្ត​សាសនា និង​អង្គការ​តស៊ូ​មតិ​នានា​នៅ​បរទេស បាន​បរិច្ចាគ​និង​ប្រមូល​បាន​ជំនួយ​ផ្សេងៗ​បន្ថែម​ទៀត។ នេះ​បើ​យោង​តាម​សេចក្ដី​រាយការណ៍​របស់​ប្រព័ន្ធ​ផ្សព្វផ្សាយ​នានា​នៅ​តៃវ៉ាន់ ក៏​ដូចជា​អ្នក​ផ្ដល់​ជំនួយ​ផ្ទាល់។

អ្នកស្រី Joanna Lei នាយក​ប្រតិបត្តិ​នៃ​អង្គការ​ស្រាវជ្រាវ Chunghua 21st Century នៅ​តៃវ៉ាន់ បាន​បរិច្ចាគ​ជំនួយ​តាម​រយៈ​ព្រះវិហារ​គ្រិស្ត​សាសនា​ប្រូតេស្ដង់​នៅ​ទីក្រុង​តៃប៉ិ​របស់​អ្នកស្រី ដែល​ជំនួយ​នេះ​ធ្វើ​ឡើង​ដោយ​បុព្វហេតុ​មនុស្សធម៌។

អ្នកស្រី​បាន​និយាយ​ថា ព្រះវិហារ​គ្រិស្ត​សាសនា​របស់​អ្នកស្រី​បាន​សម្រេច​នៅ​ថ្ងៃ​ទី ៣ នៃ​ការ​ឈ្លានពាន​របស់​រុស្ស៊ី​លើ​អ៊ុយក្រែន​ថា​នឹង​ផ្ដល់​ជំនួយ​ជា​ទឹកប្រាក់​ចំនួន​រាប់​លាន​ដុល្លារ​តៃវ៉ាន់​ដល់​អ៊ុយក្រែន។

អ្នកស្រី​បាន​បន្ថែម​ថា ពលរដ្ឋ​តៃវ៉ាន់​មាន​ប្រវត្តិ​ផ្ដល់​ជំនួយ​ក្រោម​បុព្វហេតុ​មនុស្សធម៌​នានា ដោយ​ក្នុង​នោះ​មាន​ទាំង​ការ​ផ្ដល់​ជំនួយ​ដល់​ជន​រងគ្រោះ​នៅក្នុង​គ្រោះ​មហន្តរាយ​រលក​យក្ស​ស៊ូណាមិ​នៅ​ប្រទេស​ជប៉ុន​កាលពី​ខែ​មីនា ឆ្នាំ ២០១១ និង​ជន​រងគ្រោះ​នៅក្នុង​គ្រោះ​រញ្ជួយដី​នៅ​ភាគ​និរតី​នៃ​ប្រទេស​ចិន​កាលពី​ឆ្នាំ ២០០៨ ផងដែរ។

អ្នកស្រី Joanna Lei បាន​លើកឡើង​ទៀត​ថា ពលរដ្ឋ​តៃវ៉ាន់​ខ្លះ​បាន​ចូលរួម​ផ្ដល់​ជំនួយ ដោយសារតែ «មាន​ការ​ពិភាក្សា​ជាច្រើន​នៅ​ក្នុង​ប្រព័ន្ធ​ផ្សព្វផ្សាយ​អន្តរជាតិ​អំពី​អ៊ុយក្រែន​នៅ​ពេល​បច្ចុប្បន្ន​និង​អំពី​តៃវ៉ាន់​នៅ​ពេល​អនាគត»។

លោក Koo Kwang-ming ដែល​ជា​សកម្មជន​នយោបាយ​តៃវ៉ាន់ បាន​បរិច្ចាគ​ថវិកា​ចំនួន ១ លាន​ដុល្លារ​អាមេរិក​ដល់​ផ្នែក​មនុស្សធម៌។ នេះ​បើ​យោង​តាម​សេចក្ដី​រាយការណ៍​របស់​សារព័ត៌មាន Liberty Times នៅ​តៃវ៉ាន់។ លោក Kwang-ming បាន​បញ្ជាក់​ប្រាប់​សារព័ត៌មាន​នោះ​ថា រុស្ស៊ី​បាន​វាយ​ប្រហារ​អ៊ុយក្រែន​ដោយ​គ្មាន «ហេតុផល​ត្រឹមត្រូវ»។

ក្នុង​ចំណោម​ពលរដ្ឋ​តៃវ៉ាន់​សកម្ម​នានា​នៅ​ទីក្រុង Los Angeles រដ្ឋ California សហរដ្ឋ​អាមេរិក ក្រុម​តស៊ូ​មតិ​ចំនួន ៤ កំពុង​រៃ​អង្គាស​ជំនួយ​មនុស្សធម៌។

លោក Ken Wu អនុ​ប្រធាន​សាខា​ប្រចាំ​ទីក្រុង Los Angeles នៃ​សមាគម Formosan សម្រាប់​កិច្ចការ​សាធារណៈ (Formosan Association for Public Affairs) បាន​បរិច្ចាគ​ថវិកា​ចំនួន ១០០ ដុល្លារ​អាមេរិក​កាលពី​ថ្ងៃ​ទី ២៦ ខែ​កុម្ភៈ ហើយ​ឥឡូវ​កំពុង​ពិចារណា​បរិច្ចាគ​ថវិកា​បន្ថែម​ទៀត។

លោក Wu បាន​បញ្ជាក់​ថា អ្នក​ផ្ដល់​ជំនួយ​ដែល​ជា​ពលរដ្ឋ​តៃវ៉ាន់​នៅ​ទូទាំង​ទ្វីប​អាមេរិក​ខាងជើង​បាន​ហៅ​ការ​ឈ្លានពាន​របស់​រុស្ស៊ី​លើ​អ៊ុយក្រែន​ថា​ជា​ការ​តទល់​រវាង «ពិភពលោក​សេរី​ជាមួយ​នឹង​ប្រទេស​ចិន​និង​រុស្ស៊ី»។

លោក Wu ដែល​អង្គការ​របស់​លោក​កំពុង​បញ្ចុះបញ្ចូល​សភា​សហរដ្ឋ​អាមេរិក​ឱ្យ​ចាត់​វិធានការ​គាំទ្រ​តៃវ៉ាន់ បាន​និយាយ​ដូច្នេះ​ថា៖ «ខ្ញុំ​គិត​ថា ឥឡូវ​នេះ ប្រជាពលរដ្ឋ​តៃវ៉ាន់​លែង​ខ្លាច​ប្រទេស​ចិន​ទៀត​ហើយ»។

លោក​បាន​លើកឡើង​បន្ត​ថា៖ «ពលរដ្ឋ​តៃវ៉ាន់​មាន​ទំនុកចិត្ត​ជាងមុន​ថា ប្រសិនបើ​ពួកគេ​ងើប​ឈរ​គាំទ្រ​អ៊ុយក្រែន​នៅ​ពេល​ឥឡូវ​នេះ​និង​ជួយ​សង្គ្រោះ​អ៊ុយក្រែន ពួកគេ​នឹង​អាច​បញ្ឈប់​ភាព​គឃ្លើន​ជា​រៀង​រហូត​តែម្ដង។ នេះ​គឺជា​ពិតជា​មេរៀន​ដ៏​ល្អ​មួយ​សម្រាប់​ឱ្យ​ចិន​ឃើញ​អំពី​ការ​ខាតបង់​របស់​អ្នក​ឈ្លានពាន»។

លោក Denny Roy អ្នក​សិក្សា​ស្រាវជ្រាវ​ជាន់ខ្ពស់​នៃ​មជ្ឈមណ្ឌល East-West Center នៅ​ក្នុង​ទីក្រុង Honolulu រដ្ឋ Hawaii សហរដ្ឋ​អាមេរិក បាន​និយាយ​ថា៖ «ជា​ការពិត ប្រជាពលរដ្ឋ​តៃវ៉ាន់​មាន​អារម្មណ៍​អាណិតអាសូរ​ជា​ពិសេស​ចំពោះ​ប្រជាពលរដ្ឋ​អ៊ុយក្រែន ដោយសារ​ស្ថានភាព​របស់​ពួកគេ​មាន​លក្ខណៈ​ប្រហាក់ប្រហែល​គ្នា​ច្រើន»។

លោក​បាន​បន្ថែម​ថា៖ «តៃវ៉ាន់​ក៏​ចង់​បង្ហាញ​ថា ខ្លួន​បាន​ធ្វើ​អ្វី​ដែល​ខ្លួន​អាច​ធ្វើ​បាន​ដើម្បី​ជួយ​ប្រជាពលរដ្ឋ​នៃ​ប្រទេស​មួយ​ដែល​ត្រូវ​គេ​ឈ្លានពាន​ឱ្យ​មាន​សេរីភាព ក្រែងលោ​នៅ​ពេល​ណា​មួយ​តៃវ៉ាន់​អាច​ស្ថិត​ក្នុង​ស្ថានការណ៍​ស្រដៀង​គ្នា​នេះ​ហើយ​អង្វរ​សហគមន៍​អន្តរជាតិ​ឱ្យ​ជួយ​ប្រឆាំង​នឹង​ប្រទេស​ណា​មួយ​ដែល​ឈ្លានពាន​ខ្លួន​ដែរ»។

ហេតុផល​ដែល​ពលរដ្ឋ​តៃវ៉ាន់​គាំទ្រ​ប្រទេស​អ៊ុយក្រែន​នៅ​ពេល​ឥឡូវ​នេះ​គឺ​ដូច​ទៅ​នឹង​ហេតុផល​ដែល​តៃវ៉ាន់​អាណិតអាសូរ​ចំពោះ​ពលរដ្ឋ​ហុងកុង​ក្នុង​អំឡុងពេល​ពលដ្ឋ​ហុងកុង​តវ៉ា​ប្រឆាំង​នឹង​រដ្ឋាភិបាល​កាលពី​ឆ្នាំ ២០១៩ ដូច្នេះ​ដែរ។ នេះ​បើ​តាម​ការ​បញ្ជាក់​របស់​លោក Ku Chung-hua។ លោក​បាន​បន្ថែម​ថា នៅ​ពេល​នោះ ពលរដ្ឋ​តៃវ៉ាន់​ចង់​ការពារ​សេរីភាព​ដែល​ពួកគេ​មាន​នៅ​តៃវ៉ាន់ ហើយ​មាន​អារម្មណ៍​ថា សេរីភាព​ត្រូវ​បាន​បំផ្លាញ​នៅ​ទីក្រុង​ហុងកុង។

លោក Ku Chung-hua បាន​លើកឡើង​ថា គេ​កម្រង​ឃើញ​មាន​នរណា​ម្នាក់​នៅ​តៃវ៉ាន់​គាំទ្រ​ប្រទេស​រុស្ស៊ី​ណាស់ ហើយ​ពលរដ្ឋ​តៃវ៉ាន់​ជាច្រើន​មាន​អារម្មណ៍​គោរព​ស្ញើច​សរសើរ​ពលរដ្ឋ​អ៊ុយក្រែន​ដែល​ហ៊ាន​ប្រយុទ្ធ​តបត​ប្រឆាំង​នឹង​កង​កម្លាំង​របស់​រុស្ស៊ី។ លោក​និយាយ​ដូច្នេះ​ថា៖ «ពលរដ្ឋ​តៃវ៉ាន់​យល់​ថា ភាព​ក្លាហាន​របស់​ពលរដ្ឋ​អ៊ុយក្រែន​គឺ​គួរ​ឱ្យ​គោរព​និង​ផ្ដល់​តម្លៃ​ឱ្យ»។

ប្រទេស​ចិន​បាន​ច្រានចោល​ថា មិន​មាន​ភាព​ស្រប​គ្នា​រវាង​គោល​បំណង​របស់​ខ្លួន​ចំពោះ​តៃវ៉ាន់​និង​ការ​ធ្វើ​សង្គ្រាម​របស់​រុស្ស៊ី​នៅ​អ៊ុយក្រែន​នោះទេ។

រូបឯកសារ៖ ប្រជាជន​អ៊ុយក្រែន និង​ប្រជាជន​តៃវ៉ាន់ ចូលរួម​ក្នុង​ពិធី​បួងសួង​ឱ្យ​ចប់​សង្រ្គាម​នៅ​អ៊ុយក្រែន នៅ​ទីក្រុង​តៃប៉ិ ប្រទេស​តៃវ៉ាន់ កាលពី​ថ្ងៃទី៣ ខែមីនា ឆ្នាំ២០២២។
រូបឯកសារ៖ ប្រជាជន​អ៊ុយក្រែន និង​ប្រជាជន​តៃវ៉ាន់ ចូលរួម​ក្នុង​ពិធី​បួងសួង​ឱ្យ​ចប់​សង្រ្គាម​នៅ​អ៊ុយក្រែន នៅ​ទីក្រុង​តៃប៉ិ ប្រទេស​តៃវ៉ាន់ កាលពី​ថ្ងៃទី៣ ខែមីនា ឆ្នាំ២០២២។

រដ្ឋមន្ត្រី​ការបរទេស​ចិន​លោក Wang Yi បាន​បញ្ជាក់​នៅក្នុង​សន្និសីទ​សារព័ត៌មាន​មួយ​កាលពី​ដើម​ខែ​មីនា​ថា ស្ថានការណ៍​ទាំងពីរ​គឺ «មិន​អាច​ប្រៀបធៀប​គ្នា​បាន​នោះទេ» ដោយសារតែ​បញ្ហា​តៃវ៉ាន់​គឺជា «បញ្ហា​ផ្ទៃក្នុង»។ នេះ​បើ​យោង​តាម​សេចក្ដី​រាយការណ៍​របស់​វេបសាយ​ព័ត៌មាន China Daily របស់​រដ្ឋាភិបាល​ចិន៕

ប្រែ​សម្រួល​ដោយ​លោក ឈឹម សុមេធ

XS
SM
MD
LG