រដ្ឋមន្ត្រីការបរទេសសហរដ្ឋអាមេរិកលោក Antony Blinken ថ្លែងថា រដ្ឋបាលប្រធានាធិបតីលោក Joe Biden បានសម្រេចធ្វើការកំណត់ជាផ្លូវការមួយថា ទាហានរុស្ស៊ីបានប្រព្រឹត្តឧក្រិដ្ឋកម្មសង្គ្រាមនៅក្នុងប្រទេសអ៊ុយក្រែន។
លោក Blinken បានអះអាងថា ការវិនិច្ឆ័យនេះធ្វើឡើងដោយផ្អែកលើ «កិច្ចការត្រួតពិនិត្យដ៏ប្រុងប្រយ័ត្ន» មួយពីប្រភពស៊ើបការណ៍សម្ងាត់និងប្រភពសាធារណៈ ចាប់តាំងពីពេលដែលរុស្ស៊ីបានឈ្លានពានលើរុស្ស៊ីកាលពីខែកុម្ភៈមក។
មន្ត្រីការទូតជាន់ខ្ពស់របស់អាមេរិករូបនេះបានបញ្ជាក់ទៀតថា សហរដ្ឋអាមេរិកអាចចែករំលែកព័ត៌មានទាំងនេះជាមួយសម្ព័ន្ធមិត្ត ប្រទេសជាដៃគូ និងស្ថាប័នអន្តរជាតិនានា ដែលបំពេញកិច្ចការងារស៊ើបអង្កេតលើការចោទប្រកាន់អំពីឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ។
លោក Blinken បានប្រកាសបែបនេះនៅក្នុងសេចក្តីថ្លែងការណ៍មួយ ដែលត្រូវបានចេញផ្សាយនៅថ្ងៃពុធ ខណៈពេលដែលលោកកំពុងធ្វើដំណើរទៅកាន់ទីក្រុងប៊្រុចសែល ប្រទេសប៊ែលហ្សិក ជាមួយលោកប្រធានាធិបតី Biden ដើម្បីចូលរួមកិច្ចប្រជុំកំពូលបន្ទាន់មួយជាមួយនឹងបណ្ដាមេដឹកនានៃអង្គការអូតង់៕
