សន្និបាតអង្គការសហប្រជាជាតិកាលពីថ្ងៃពុធម្សិលមិញ បានចាប់ផ្តើមពិភាក្សាដ៏វែងពាក់ព័ន្ធនឹងការព្រាងសេចក្តីសម្រេច២ ដើម្បីស្វែងរកការបន្ធូរបន្ថយវិបត្តិមនុស្សធម៌នៅក្នុងប្រទេសអ៊ុយក្រែន ជាទីកន្លែដែលមនុស្សរាប់លាននាក់ កំពុងទន្ទឹងរង់ចាំស្បៀងអាហារ ទឹក និងថ្នាំសង្កូវ ក៏ដូចជាឱកាសដើម្បីគេចចេញដោយសុវត្ថិភាពពីប្រទេសរបស់ខ្លួនដែលកំពុងត្រូវបានឡោមព័ទ្ធដោយកងទ័ពរុស្ស៊ី។
ឯកអគ្គរដ្ឋទូតអ៊ុយក្រែនប្រចាំនៅអង្គការសហប្រជាជាតិលោក Sergiy Kyslytsya បានថ្លែងពីសង្គ្រាមរបស់រុស្ស៊ីលើប្រទេសអ៊ុយក្រែនដែលបានចាប់ផ្តើមពីថ្ងៃទី ២៤ ខែកុម្ភៈថា «ពលរដ្ឋអ៊ុយក្រែនជាច្រើនពាន់នាក់ បានបាត់បង់អាយុជីវិតក្នុងខែនេះដែលក្នុងនោះមានទាំងមនុស្សចាស់ ក្មេង បុរស ស្រ្តី ជនស៊ីវិល និងកងទ័ព។ ពួកគេបានស្លាប់ដោយសារតែការសម្រេចចិត្តរបស់រុសស្ស៊ីវាយប្រហារទៅលើអ៊ុយក្រែន វាយប្រហារលើសន្តិភាព និងវាយប្រហារលើយើងទាំងអស់គ្នា។ សង្គ្រាមរាល់ថ្ងៃរបស់រុស្ស៊ីប្រឆាំងអ៊ុយក្រែននេះ បានធ្វើឲ្យស្ថានភាពមនុស្សធម៌កាន់តែធ្ងន់ធ្ងរទៅៗ»។
អង្គការសហប្រជាជាតិ បានបញ្ជាក់ថា មិនដល់រយៈពេលមួយខែផង មានពលរដ្ឋអ៊ុយក្រែនប្រមាណ ៣ លាន ៥ សែននាក់ បានរត់គេចចេញពីប្រទេសរបស់ខ្លួនទៅកាន់ប្រទេសក្បែរខាង ហើយពលរដ្ឋប្រមាណ ៦ លាន ៥ សែននាក់ផ្សេងទៀតគ្មានទីជម្រកក្នុងប្រទេសអ៊ុយក្រែន។ អង្គការសហប្រជាជាតិ បានប៉ាន់ប្រមាណថា មនុស្សប្រមាណ ១២ លាននាក់នៅក្នុងប្រទេសអ៊ុយក្រែន ត្រូវការជំនួយមនុស្សធម៌ ហើយស្ថានភាពនេះកាន់តែយ៉ាប់យឺនជារៀងថ្ងៃ។
បណ្តារដ្ឋជាសមាជិករបស់អង្គការសហប្រជាជាតិ កំពុងតាក់តែងសេចក្តីសម្រេច ២ ដែលអំពាវនាវឲ្យមានបទឈប់បាញ់គ្នាជាបន្ទាន់មួយ ការពារជនស៊ីវិល ការពារហេដ្ឋារចនាសម្ព័ន្ធស៊ីវិលសំខាន់ៗ ការពារបុគ្គលិកផ្តល់ជំនួយ និងបុគ្គលិកពេទ្យជាដើម។
ក៏ប៉ុន្តែ មានការខ្វែងគំនិតគ្នាក្នុងខ្លឹមសារនៃសេចក្តីសម្រេចទាំង ២ នោះគឺ៖ ទីមួយ និយាយចំឈ្មោះរុស្ស៊ីថា ជាប្រទេសឈ្លានពាន និងអំពាវនាវឲ្យរុស្ស៊ីបញ្ឈប់សកម្មភាពប្រឆាំងអ៊ុយក្រែន ហើយមួយទៀតមិនបានប្រើពាក្យថា ប្រទេសឈ្លានពាន ហើយជាពិសេស ដាក់អ៊ុយក្រែនថា ជាប្រទេសដែលត្រូវបានគេវាយប្រហារ។
ប្រទេសមិកស៊ិក បារាំង រួមជាមួយអ៊ុយក្រែន ស្ថិតក្នុងចំណោមប្រទេស ២៥ ផ្សេងទៀត ដែលបានព្រាងសេចក្តីសម្រេចទី១ ដែលនិយាយចំឈ្មោះរុស្ស៊ី ហើយសេចក្តីសម្រេចនេះ មានការចូលរួមពីប្រទេសប្រមាណ ៨០ នៅក្នុងសន្និបាតរបស់អង្គការសហប្រជាជាតិ។
ចំណែកសេចក្តីសម្រេចទី ២ វិញ ដែលមិននិយាយចំឈ្មោះរុស្ស៊ីនោះ ត្រូវបានតាក់តែងឡើងដោយប្រទេសអាហ្វ្រិកខាងត្បូង។
ការពិភាក្សាកាលពីថ្ងៃពុធម្សិលមិញ មានគណៈប្រតិភូ ៦០ ប្រទេសចូលរួម ហើយការពិភាក្សានេះ នឹងត្រូវធ្វើបន្តនៅព្រឹកថ្ងៃព្រហស្បតិ៍។ ការបោះឆ្នោតសម្រេចមួយត្រូវគេរំពឹងថា នឹងកើតមានឡើងនៅបន្ទាប់មក។
បើទោះបីជាលទ្ធផលចេញមកយ៉ាងណាក្តី ក៏សេចក្តីសម្រេចនេះ ពុំមានឥទ្ធិពលផ្លូវច្បាប់ទៅលើរុស្ស៊ីនោះឡើយ ក៏ប៉ុន្តែ ដោយមានការជួយគាំទ្រយ៉ាងខ្លាំងពីអន្តរជាតិនោះ លទ្ធផលនេះ នឹងបង្ហាញពីឆន្ទៈរបស់ពិភពលោកដែលថា អរិភាពត្រូវតែបញ្ឈប់ ហើយប្រជាពលរដ្ឋត្រូវទទួលបានការជួយការពារ៕
