ភ្ជាប់​ទៅ​គេហទំព័រ​ទាក់ទង

ទស្សនកិច្ច​ក្នុង​តំបន់​របស់​បេសកជន​ស.រ.អា.​ផ្តោត​លើ​កិច្ច​ព្រមព្រៀង​អាវុធ​នុយក្លេអ៊ែរ​កូរ៉េ​ខាង​ជើង


លោក Sydney Seiler បេសកជន​ពិ​សេសេ​របស់​សហរដ្ឋ​អាមេរិក​​​សម្រាប់​​ការ​ចរចា​៦​ភាគី ថ្លែង​ទៅកាន់​អ្នកសារព័ត៌មាន​ក្រោយ​ជួបប្រជុំ​ជាមួយ​មន្ត្រីជាន់​ខ្ពស់​កូរ៉េ​ខាង​ត្បូង​ ​នៅក្រុសួង​ការបរទេស​នៃទីក្រុង​សេអ៊ូល ប្រទេស​កូរ៉េខាង​ត្បូង​ កាលពីថ្ងៃទី២៧ ខែកក្កដា ឆ្នាំ២០១៥។

បេសកជន​ពិ​សេសេ​របស់​សហរដ្ឋ​អាមេរិក​សម្រាប់ការ​ចរចា​៦​ភាគី ​នឹង​ជួបប្រជុំ​នៅ​សប្តាហ៍​នេះ​ជាមួយ​ក្រុម​មន្រ្តី​នៅ​ក្នុង​ប្រទេស​កូរ៉េខាង​ជើង ​ចិន​ និង​ជប៉ុន ​ដើម្បី​ពិភាក្សា​ការ​ចាប់​ផ្តើម​ការ​ចរចា​ដែល​បាន​ជាប់​គាំង​ជាយូរយា​ណាស់​មក​ហើយ​ឡើង​វិញ។ ​នេះ ​ជា​ដំណើរ​បំពេញ​ទស្សន​កិច្ចខាង​ការទូត​កម្រិត​ខ្ពស់​បែប​នេះ​ជា​លើក​ទី​មួយ​ទៅ​កាន់​តំបន់​នោះ ​ចាប់​តាំង​ពី​កិច្ច​ព្រម​ព្រៀង​នុយក្លេអ៊ែរ​របស់​អ៊ី​រ៉ង់​បាន​ត្រូវ​ប្រកាស។

កាល​ពី​ថ្ងៃ​ចន្ទ ​បន្ទាប់​ពី​ជំនួបជាមួយ​មន្រ្តី​ក្នុង​រដ្ឋ​ធានី​សេអ៊ូល ​លោក Sydney Seiler បេសកជន​ពិសេស​របស់​សហរដ្ឋ​អាមេរិកសម្រាប់​ការ​ចរចា​៦​ភាគី ​បាន​មាន​ប្រសាសន៍​ថា ​សហរដ្ឋ​អាមេរិក​ប្រុងប្រៀប​ខ្លួន​រួច​ជា​ស្រេច​ហើយ​ដើម្បី​បញ្ចូល​រដ្ឋាភិបាល​ទីក្រុង​ព្យូងយ៉ាង​នៅ​ក្នុង​របៀប​តែ​មួយ​ដែល​ខ្លួន​បាន​ជួយ​សម្រុះ​សម្រួល​ឲ្យ​មាន​កិច្ច​ព្រម​ព្រៀង​ជាមួយ​អ៊ីរ៉ង់​ ដើម្បី​កម្រិត​សមត្ថភាព​នុយក្លេអ៊ែរ​របស់​រដ្ឋាភិបាល​អ៊ីរ៉ង់​នៅ​ក្នុង​ការ​ដោះ​ដូរ​ការដាក់​ទណ្ឌកម្ម។

លោក Seiler មាន​ប្រសាសន៍​បន្ត​ទៀត​ថា៖ «ការ​ជឿន​លឿន​កាល​ពី​ពេល​ថ្មីៗ​នេះ​នៅ​ក្នុង​ការ​ខំ​ប្រឹង​ប្រែង​របស់​យើងដើម្បី​ធ្វើ​ឲ្យ​អ៊ីរ៉ង់​គ្មាន​អាវុធ​នុយក្លេអ៊ែរ​ បាន​ផ្តល់​គំរូ​ដ៏​ល្អ​បំផុត​មួយ​ពី​ភាព​បត់​បែន​និង​សុឆន្ទៈ​របស់​សហរដ្ឋ​អាមេរិកដើម្បី​ចូលរួម​ជាមួយ​ប្រទេស​ផ្សេង​ៗ​ទៀត​ដែល​យើង​មាន​ការ​ខ្វែងគំនិត​គ្នា​ជាយូរយា​ណាស់​មក​ហើយ។

មន្រ្តី​ខ្លះ​នៅ​ក្នុង​តំបន់ ​បាន​សម្តែង​នូវ​សេចក្តី​សង្ឃឹម​ថា​ កិច្ច​ព្រម​ព្រៀង​របស់អ៊ីរ៉ង់ ​អាច​ធ្វើ​ជា​កាតាលីករ​មួយ​ដើម្បី​ចាប់​ផ្តើម​ការចរចា​អន្តរជាតិ​ឡើង​វិញដើម្បី​បញ្ចប់​កម្មវិធី​អាវុធ​នុយក្លេអ៊ែ​ររបស់​កូរ៉េខាង​ជើង។ នៅ​ឆ្នាំ​២០០៩ ​រដ្ឋាភិបាល​ទីក្រុង​ព្យូង​យ៉ាង ​បាន​ផ្អាក​ការចរចាទាំង​នោះ​ជាមួយ​រដ្ឋាភិបាល​ទីក្រុង​សេអ៊ូល ​វ៉ាស៊ីន​តោន ​តូក្យូ ​ប៉េកាំង​និង​រដ្ឋាភិបាល​ទីក្រុង​មូស្គូ៕

XS
SM
MD
LG