ភ្ជាប់​ទៅ​គេហទំព័រ​ទាក់ទង

មជ្ឈមណ្ឌល​ធនធាន​ព័ត៌មាន​នៃ​ស្ថានទូត​អាមេរិក​បើក​ឲ្យ​ចូល​ជា​សាធារណៈ​


ទិដ្ឋភាព​​ក្នុង​មជ្ឈមណ្ឌល​ធនធាន​ព័ត៌មាន IRC‍ ដែល​ស្ថិត​នៅ​ក្នុង​ស្ថានទូត​សហរដ្ឋ​អាមេរិក (រូបថត​ផ្តល់​ឲ្យ​ដោយ​ស្ថានទូត​អាមេរិក)

មជ្ឈមណ្ឌល​ធនធាន​ព័ត៌មាន​នេះ​បាន​បើក​ឲ្យ​ដំណើរការ​តាំង​ពី​ឆ្នាំ​២០០៥​មក​ម្ល៉េះ ​ហើយ​មាន​សាខា​នៅ​រាជធានី​ភ្នំពេញ ​ខេត្ត​កំពង់ចាម បាត់ដំបង និង​ខេត្ត​សៀមរាប​ទៀត​ផង។

នៅ​ពី​ក្រោយ​កិច្ច​ការងារ​ការទូត​ ស្ថានទូត​អាមេរិក​បាន​បង្កើត​ជា​បណ្ណាល័យ​ដើម្បី​បម្រើ​ជូន​សាធារណជន​ក្នុង​ការ​ស្វែង​យល់​ពី​ព័ត៌មាន​នានា​ទាក់ទង​នឹង​សហរដ្ឋ​អាមេរិក​និង​បង្កើន​កម្រិត​ភាសា​អង់គ្លេស។ បណ្ណាល័យ​ទាំង​នោះ ​រួម​មាន​៥​សាខា ​ដែល​សាខា​ធំ​មាន​ទីតាំង​ស្ថិត​នៅ​ក្នុង​ស្ថានទូត​អាមេរិក​តែ​ម្តង។ សាខា​ធំ​នេះ​ហៅ​ថា «មជ្ឈមណ្ឌល​ធនធាន​ព័ត៌មាន IRC‍» ចំណែក​ឯ​សាខា​ចំនួន​បួន​ផ្សេង​ទៀត​មាន​ឈ្មោះ​ថា American Corner ដែល​ស្ថិត​នៅ​ក្នុង​ទីតាំង​ សាកលវិទ្យាល័យ​ចំនួន​៤​នៅ​ក្នុង​ប្រទេស​កម្ពុជា។​

មាន​មនុស្ស​ជា​ច្រើន​នាក់​ណាស់​តែង​គិត​ថា ស្ថានទូត​អាមេរិក​គ្រាន់​តែ​ជា​កន្លែង​ដែល​ទៅ​សុំ​ធ្វើ​ទិដ្ឋាការ ​(Visa) ឬ​ទៅ​សាក​សួរ​ព័ត៌មាន​ផ្សេងៗ​ទាក់​ទង​នឹង​ការ​ចេញ​ទៅ​សហរដ្ឋ​អាមេរិក​ប៉ុណ្ណោះ ​ប៉ុន្តែ​វា​មិន​មែន​គ្រាន់​តែ​ជា​កន្លែង​ដែល​ផ្ដល់​ព័ត៌មាន​ទាក់​ទង​នឹង​បញ្ហា​ទិដ្ឋាការ​ប៉ុណ្ណោះ​ទេ​ តែ​វា​ក៏​មាន​មជ្ឈមណ្ឌល​ធនធាន​ព័ត៌មាន​ដែល​ហៅ​កាត់​ថា ​IRC​ បើក​ជា​សាធារណៈ​ដល់​មហាជន​និង​សិស្សានុសិស្ស​ផង​ដែរ។

មជ្ឈមណ្ឌល​ធនធាន​ព័ត៌មាន​នេះ​បាន​បើក​ឲ្យ​ដំណើរការ​តាំង​ពី​ឆ្នាំ​២០០៥​មក​ម្ល៉េះ ​ដែល​វា​បាន​ផ្ដល់​ជូន​ឲ្យ​មហាជន​គ្រប់​ស្រទាប់​នូវ​ឯកសារ​ទាក់ទង​ការ​សិក្សា​ស្រាវជ្រាវ​ដោយ​ឥត​គិត​ថ្លៃ​ផង​ដែរ។

កន្លង​មក​ មជ្ឈមណ្ឌល​ធនធាន​ព័ត៌មាន​នេះ​មានការ​ពេញ​និយម​ខ្លាំង​លើ​ការ​ប្រើ​ប្រាស់​កុំព្យូទ័រ​និង​ការ​ប្រើ​ប្រាស់​អ៊ីនធឺណិត​ដោយ​ឥត​គិត​ថ្លៃ​ទៅ​កាន់​អ្នក​ប្រើប្រាស់​ ដែល​នេះ​គឺ​ជា​ការ​លើក​ឡើង​របស់​លោក​ ឃើតនី វូដស៍ (Courtney Woods) ​អ្នក​នាំ​ពាក្យ​ស្ថានទូត​អាមេរិក។

ទោះ​បី​ជា​គេ​ឃើញ​ថា ​ថ្មីៗ​នេះ​មាន​មនុស្ស​ជា​ច្រើន​នាក់​ធ្វើ​ការ​ត​ភ្ជាប់​និង​ប្រើ​ប្រាស់​ប្រព័ន្ធ​អ៊ីនធឺណិត​បាន​ដោយ​ខ្លួន​ឯង​តាម​ទូរស័ព្ទ​ដៃ​របស់​ពួក​គេ​ក៏​ដោយ​ ក៏​មជ្ឈមណ្ឌល​ធនធាន​ព័ត៌មាន​នៅ​តែ​បន្ត​បើក​ឲ្យ​សាធារណជន​មក​ប្រើ​ប្រាស់​សេវា​នៅ​ទី​នេះ។

លោក ​វូដស៍ ​និយាយ​ថា៖ «គោលបំណង​សំខាន់​ដែល​យើង​មាន ​IRC​ នេះ​គឺ​ព្រោះ​ថា​ មាន​មនុស្ស​ជា​ច្រើន​នាក់​គិត​ថា ស្ថានទូត​គឺ​ជា​កន្លែង​ដ៏​គួរ​ឲ្យ​ខ្លាច​ ហើយ​គេ​ទៅ​គឺ​ដើម្បី​តែ​ធ្វើ Visa (ទិដ្ឋាការ) ប៉ុណ្ណោះ ពួកគេ​មិន​យល់​ថា វា​មិនមែន​ជា​កន្លែង​គួរ​ឲ្យ​ខ្លាច​នោះ​ទេ»។

​លោក​បន្ត​ថា៖ «ពួក​គេ​អាច​មក​ទី​នេះ​ថ្ងៃ​ណា​មួយ​ក៏​បានដែរ​ក្នុង​មួយ​សប្ពាហ៍​ វា​គឺ​ជា​កន្លែង​សាធារណៈ»។

លោក ​វូដស៍​ បាន​ឲ្យ​ដឹង​បន្ថែម​ទៀត​ថា ​មជ្ឈមណ្ឌល​ធនធាន​ព័ត៌មាន​អាច​ជួយ​ឲ្យ​មនុស្ស​រៀន​ភាសា​អង់គ្លេស ហើយ​អាច​ជួយ​ឲ្យ​មនុស្ស​ទៅ​សិក្សា​នៅ​ឯ​សហរដ្ឋ​អាមេរិក​ ឬ​ក៏​អាច​ស្វែងរក​ការងារ​ធ្វើ​ល្អ​នៅ​ក្នុង​ប្រទេស​កម្ពុជា​ផង​ដែរ។

ភួង​ ចាន់ឌី ​ក្នុង​វ័យ​២២​ឆ្នាំ ​ដែល​ជា​និស្សិតឆ្នាំ​ទី​បួន​នៃ​វិទ្យាស្ថាន CamEd​ ​បាន​ប្រាប់​ VOA ​ថា ​នាង​មក​ប្រើ​ប្រាស់​មជ្ឈមណ្ឌល​ធនធាន​ព័ត៌មាន​នេះ​បាន​រយៈ​ពេល​ប្រហែល​ជិត​មួយ​ឆ្នាំ​ហើយ ​ក្រោយ​ពី​មាន​ការ​ណែ​នាំ​ពី​មិត្តភក្តិ​របស់​នាង។ នាង​មក​មជ្ឈមណ្ឌល​ធនធាន​ព័ត៌មាន​នេះ​ដើម្បី​សិក្សា​អំពី​ប្រវត្តិសាស្ត្រ​នៃ​សហរដ្ឋ​អាមេរិក​ និង​ធ្វើ​ការ​ស្រាវជ្រាវ​អំពី​ដំណឹង​អាហារូបករណ៍​ផង​ដែរ។

លោក​ វូដស៍ បាន​បន្ថែម​ថា មជ្ឈមណ្ឌល​ធនធាន​ព័ត៌មាន​ គឺ​មិនមែន​មាន​សិស្ស​ចូលពេញ​ជា​ប្រចាំ​នោះ​ទេ ​ប៉ុន្តែ ​«បើ​ទោះ​បី​ជា​យើង​មាន​មនុស្ស​តែ​ម្នាក់​ក៏​ដោយ ​អ្នក​នោះ​គឺ​អាច​ទទួល​បាន​ឯកសារ​ស្រាវជ្រាវ​គ្រប់​យ៉ាង​ដែល​គាត់​ចង់​បាន»។

សេវាកម្ម​ទាំង​អស់​នោះ​រួម​មាន​ គណនី​បណ្ណាល័យ​របស់​អាមេរិក ​(US Library Account) ​ដែល​បង្កើត​ឡើង​តាម​ប្រព័ន្ធ​អនឡាញ​ (អ៊ីនធឺណិត) ហើយ​អនុញ្ញាត​ឲ្យ​អាច​ខ្ចី​សៀវភៅ​បាន។ មជ្ឈមណ្ឌល​ធនធាន​ព័ត៌មាន​ក៏​អនុញ្ញាត​ឲ្យ​ធ្វើ​ការ​ខ្ចី​សៀវភៅ ​ស៊ីឌី​ ឌីវីដី​ និង​របស់​ផ្សេងៗ​ទៀត​ទៅ​ក្រៅ​បាន​ដែរ។

ហេង សុផាណែត អាយុ​២២​ឆ្នាំ​មក​ពី​វិទ្យាស្ថាន​ភាសា​បរទេស​បាន​ថ្លែង​ប្រាប់​ VOA ​ថា​នាង ​ បាន​ចូល​មក​សិក្សា​នៅ IRC នេះ​មាន​រយៈ​ពេល​ប្រហែល​មួយ​ឆ្នាំ​ហើយ។ នាង​បាន​និយាយ​ថា៖ «នៅ​ទី​នេះ​ខ្ញុំ​អាច​ខ្ចី​សៀវភៅ​ទៅ​អាន​នៅ​ផ្ទះ​បាន ​ហើយ​ខ្ញុំ​អាច​ខ្ចី​ Kindle និង​សៀវភៅ​ដែល​មាន​លក្ខណៈ​ជា​សំឡេង​ទៅ​ក្រៅ​ផង​ដែរ ​ដែល​នេះ​មិន​ដែល​មាន​ការ​ផ្តល់​ជូន​ដោយ​បណ្ណាល័យ​ផ្សេង​ទៀត​ទេ»។

មជ្ឈមណ្ឌល​ធនធាន​ព័ត៌មាន​ នេះ​មាន​ទី​តាំង​ស្ថិត​នៅ​ក្នុង​ស្ថានទូត​អាមេរិក​ ប៉ុន្តែ​វា​ក៏​មាន​សាខា​បួន​ផ្សេង​ទៀត​នៅ​ទូទាំង​ប្រទេស​កម្ពុជា​ដែល​ហៅ​ថា​ American​ Corner។​ American ​Corner ​មាន​ទី​តាំង​ស្ថិត​នៅ​សាកលវិទ្យាល័យ​បញ្ញាសាស្រ្តា​ក្នុង​រាជធានី​ភ្នំពេញ​ សាកលវិទ្យាល័យ​គ្រប់គ្រង​និង​សេដ្ឋកិច្ច​នៅ​ខេត្ត​កំពង់ចាម សាកលវិទ្យាល័យ​គ្រប់គ្រង​និង​សេដ្ឋកិច្ច​នៅ​ខេត្ត​បាត់ដំបង​ និង សាកលវិទ្យាល័យ​សៅស៍អ៊ីសថ៍អេយសៀ​ (អាស៊ី​អាគ្នេយ៍) ខេត្ត​សៀមរាម។

សាខា​ American ​Corner​ ទាំង​បួន​សាខា​នេះ​មាន​លក្ខណៈ​ដូច​គ្នា​ទៅ​នឹង​មជ្ឈមណ្ឌល​ធនធាន​ព័ត៌មាន​ ICR ប៉ុន្តែ​វា​ផ្តល់​ជូន​សេវា​នៅ​ក្នុង​ទីតាំង​ដ៏​ធំ​ទូលាយ​ដល់​សិស្សានុសិស្ស​ ហើយ​ថែម​ទាំង​ស្ថិត​នៅ​ក្នុង​ទី​តាំង​សាកល​វិទ្យាល័យ​ផង​ដែរ៕

XS
SM
MD
LG