ប្រទេសជប៉ុនមានកេរ្តិ៍ឈ្មោះថា ជាប្រទេសដែលមានការត្រៀមខ្លួនល្អបំផុតមួយនៅលើពិភពលោក សម្រាប់ទប់ទល់នឹងគ្រោះរញ្ជួយដី។ ប៉ុន្តែបើទោះជានៅប្រទេសជប៉ុនក៏ដោយ គ្រោះរញ្ជួយដីបានបង្កឲ្យមានការខាតបង់ធំធេង និងអូសបន្លាយរយៈពេលយូរ។ យើងអាចរំឭកពីគ្រោះរញ្ជួយដីដ៏ធំមួយ ដែលបានវាយប្រហារទីក្រុង Kobe ប្រទេសជប៉ុន ក្នុងឆ្នាំ១៩៩៥។
«វាពិបាកណាស់ក្នុងការរកហេតុផលថា ហេតុអ្វីនៅប្រទេសដែលមានការអភិវឌ្ឍខ្លាំងបំផុតមួយក្នុងពិភពលោក បែរជាក្រុមពន្លត់អគ្គិភ័យមានភាពយឺតយ៉ាវ ដោយសារសេវាផ្គត់ផ្គង់ទឹកមិនគ្រប់គ្រាន់»។
កម្លាំងរញ្ជួយ៦,៩ រ៉ិចទ័របានកាត់ផ្តាច់បណ្តាញផ្គត់ផ្គង់ទឹក និងចរន្តអគ្គិសនី បំផ្លាញមហាវិថីសំខាន់មួយ និងផ្លូវដែក ហើយបានសម្លាប់មនុស្សជាង ៦.០០០នាក់។ ទីក្រុង Kobe កំពុងស្ថិតក្នុងដំណើរការផ្លាស់ប្តូរបំពង់ទឹកដែកស្មិតមានប្រវែងជិត៤.៨០០ គីឡូម៉ែត្រ ដែលបំពង់ទឹកដែកនេះធន់នឹងការរញ្ជួយដី។ លោក Hitoshi Araike ជាអនុប្រធាននៃការិយាល័យបណ្តាញចែកចាយទឹកក្នុងក្រុង Kobe ថ្លែងថា៖
«ការបំផ្លិចបំផ្លាញបង្កឡើងដោយគ្រោះរញ្ជួយដី ជាកត្តាដែលកំណត់ឲ្យយើងធ្វើដូច្នេះ គឺត្រូវផ្លាស់បំពង់ទឹកចាស់ចោល»។
លោក Araike រួមនឹងអ្នកបកប្រែភាសាមួយរូប បាននាំក្រុមអ្នកសារព័ត៌មានបរទេសចូលក្នុងរូងក្រោមដី ដើម្បីពិនិត្យមើលបណ្តាញតភ្ជាប់ដ៏ធំថ្មី ដែលអាចស្តុកទឹកទ្វេដងសម្រាប់ការប្រើប្រាស់នៅពេលចាំបាច់។
ការកសាងអាងស្តុកទឹកនេះ ចំណាយថវិកាជាង៣០០លានដុល្លារ។ លោក Araike បានបញ្ជាក់ថា ប្រព័ន្ធនេះមាន គម្របវ៉ានអាងស្តុកទឹកអាចបិទដោយស្វ័យប្រវត្តិ ដើម្បីរក្សាទឹកមិនឲ្យលេចចេញនៅពេលមានគ្រោះរញ្ជួយដី។ លោកក៏បានបង្ហាញពីភាពបត់បែននៃបំពង់ និងមុខតំណបែបថ្មី ដែលមានដៃបត់បែនអាចធន់នឹងការបែកប្រេះស្រាំបានផងដែរ។
បំពង់បែបនេះត្រូវបានគេបំពាក់ទាំងនៅការដ្ឋានបណ្តាញតទឹក និងរោងចក្រចម្រាញ់ទឹកស្អាតចេញពីទឹកកខ្វក់។ យើងបានសាកសួរលោក Araike ថាតើសេវាផ្គត់ផ្គង់ទឹកត្រូវបានផ្អាករយៈពេលប៉ុន្មានដែរ ប្រសិនបើមានគ្រោះរញ្ជួយដីដ៏ធំនៅពេលក្រោយនោះ។
លោក Hitoshi Araike បានឆ្លើយថា៖ «នៅពេលបច្ចេកវិទ្យាថ្មីនេះត្រូវបានតម្លើងរួចរាល់ហើយ ខ្ញុំសង្ឃឹមថា វានឹងមិនប៉ះពាល់ដល់សេវាផ្គត់ផ្គង់ទឹកឡើយ”។
លោកTom Banse បានសួរបញ្ជាក់ថា៖ «មិនប៉ះពាល់ទាល់តែសោះឬ»?
បណ្តាប្រទេសនៅជាយមាត់មហាសមុទ្រប៉ាស៊ីហ្វិកនៅតែចងចាំគ្រោះរញ្ជួយដីដ៏ធំ ដូចជាប្រទេសឈីលី កោះតៃវ៉ាន់ ប្រទេសចិន និងនូវែលសេឡង់ កំពុងវិនិយោគលើគម្រោងរក្សាលំនឹងពេលមានគ្រោះរញ្ជួយដី។ សម្រាប់ការស្តារឡើងវិញ គេត្រូវចំណាយពេលវេលាដ៏យូរ និងថវិកាដ៏ច្រើនសន្ធឹកសន្ធាប់ សូម្បីតែនៅកម្រិតទីក្រុង ឬថ្នាក់តំបន់ក៏ដោយ។ កង្វះខាតធនធាន ឬកង្វះការពង្រឹងក្បួនច្បាប់សំណង់អាចជាឧបសគ្គសម្រាប់បណ្តាប្រទេស ដែលមានការអភិវឌ្ឍតិចតួច តួយ៉ាងដូចជាប្រទេសបាគីស្ថាន ឬកម្ពុជាជាដើម។
ទីភ្នាក់ងារផ្គត់ផ្គង់សេវាសាធារណៈដ៏ធំមួយនៅតំបន់ឆ្នេរភាគខាងត្បូងនៃស.រ.អា. ក៏មានគោលដៅបំពាក់បច្ចេកទេស ដែលអាចទប់ទល់នឹងការរញ្ជួយដីផងដែរ ។
«យើងចង់ស្តារប្រតិបត្តិការឡើងវិញក្នុងរយៈពេល៣ទៅ៤ថ្ងៃ។ នេះគឺជាគោលបំណងរបស់យើងក្នុងបរិបទការផ្តល់សេវា»។ លោក Jim Miller ជាប្រធានផ្នែកវិស្វកម្មក្នុងក្រុង Everett នៃនាយកដ្ឋានសាធារណៈក្នុងរដ្ឋវ៉ាស៊ីនតោនថ្លែងថា៖
យើងបាននិយាយជាមួយលោក Miller ខណៈដែលក្រុមអ្នកម៉ៅការកំពុងសាងសង់ជញ្ជាំង និងពិដាន ដើម្បីការពារអគារប្រតិបត្តិការនៃរោងចក្រចម្រាញ់ទឹកស្អាតសម្រាប់ប្រើប្រាស់ ពីគ្រោះរញ្ជួយដី។ រោងចក្រនេះអាចផ្គត់ផ្គង់សេវាដល់ប្រជាជន ៦០០.០០០ នាក់នៅតំបន់ភាគខាងជើងក្រុង Seattle។
លោក Miller បាននិយាយថា ទីភ្នាក់ងារផ្គត់ផ្គង់សេវាសាធារណៈ ដែលលោកគ្រប់គ្រង បានធ្វើការវាយតម្លៃលើភាពធន់របស់អាគាររបស់ទីភ្នាក់ងារទៅនឹងគ្រោះរញ្ជួយដី និងបានកំណត់នូវកន្លែងដែលត្រូវការកែលម្អ ដើម្បីអាចទប់ទល់នឹងគ្រោះរញ្ជួយដី។ ការកែលម្អនេះ អាចត្រូវការរយៈពេលរហូតដល់២០ឆ្នាំ និងចំណាយថវិការាប់លានដុល្លារ ដើម្បីបញ្ចប់រួចរាល់។ ហើយប្រជាជនរស់នៅទីក្រុងនឹងត្រូវចំណាយលើថ្លៃទឹកប្រើប្រាស់ខ្ពស់ជាងមុន។ លោក Miller បានថ្លែងបន្តទៀតថា៖
«ប្រសិនបើយើងមិនធ្វើអ្វីនោះទេ វាគ្រាន់តែជារឿងធម្មតាដូចពីមុនមួយប៉ុណ្ណោះ ហើយអ្នកអាចរក្សាតម្លៃទឹកឲ្យនៅទាបដដែល។ ប៉ុន្តែមួយភាគធំ យើងរកឃើញថា ប្រជាជនរំពឹងលើប្រព័ន្ធ ដែលអាចពឹងផ្អែកបាន។ នៅពេលដែលប្រជាជនយល់ពីផលប្រយោជន៍វានោះ តាមការពិតទៅ អ្នកប្រើប្រាស់សេវាសាធារណៈពីទីភ្នាក់ងារយើង គឺបានជំរុញឲ្យយើងធ្វើឲ្យប្រព័ន្ធផ្គត់ផ្គង់សេវាសាធារណៈឲ្យកាន់តែមានភាពធន់ថែមទៀត»។
ក្រុមហ៊ុនផ្គត់ផ្គង់ទឹកស្អាតប្រចាំតំបន់សម្រាប់ទីក្រុង Seattle នៅពេលថ្មីៗនេះបានធ្វើការប៉ាន់ស្មានលើរយៈពេលដាច់ការផ្គត់ផ្គង់ទឹកនៅពេលមានគ្រោះរញ្ជួយដីដ៏ធំនៅតំបន់មាត់សមុទ្រ និងតំបន់ក្បែរទឹករាក់។ ការវិភាគរបស់ក្រុមហ៊ុននេះបានបង្ហាញថា គេត្រូវការចំណាយពេលរហូតដល់៦០ថ្ងៃ ដើម្បីស្តារឲ្យមានការផ្គត់ផ្គង់ទឹកសារជាថ្មីដល់អតិថិជនភាគច្រើន។
ការព្យាករណ៍នៃការកាត់ផ្តាច់ការផ្តត់ផ្គង់សេវាសំខាន់ៗសម្រាប់រយៈពេលយូរនេះ មានន័យថា ប្រជាជនត្រូវត្រៀមរស់នៅដោយផ្គត់ផ្គង់សម្រាប់ខ្លួនឯងផ្ទាល់។ ប្រធានទីភ្នាក់ងារសង្រ្គោះបន្ទាន់សហព័ន្ធ និងតាមរដ្ឋនានា ធ្លាប់បានណែនាំឲ្យប្រជាជនទុកបម្រុងម្ហូបអាហារ ទឹក ថ្នាំពេទ្យសម្រាប់រយៈពេល៣ថ្ងៃ។ បច្ចុប្បន្ននេះ រដ្ឋ Oregon និងរដ្ឋ វ៉ាស៊ីនតោន បានណែនាំប្រជាជនក្នុងតំបន់ដែលមានការរញ្ជួយដី ត្រៀមរៀបចំគ្រឿងសម្ភារៈ និងស្បៀងអាហារ សម្រាប់រយៈពេលពីរសប្ដាហ៍ បន្ទាប់ពីមានគ្រោះមហន្តរាយ៕
ប្រែសម្រួលដោយ កោះ សុគន្ធី
