អង្គការសហប្រជាជាតិ (អ.ស.ប.) កាលពីថ្ងៃសៅរ៍បានរាយការណ៍ថា សង្គ្រាមក្នុងប្រទេសអាហ្វហ្គានីស្ថាន បានបណ្តាលឱ្យជនស៊ីវិលជាង៣,៤០០នាក់ស្លាប់និងបានធ្វើឱ្យរបួសជិត៧ពាន់នាក់ថែមទៀតក្នុងឆ្នាំ២០១៩។
បេសកកម្មជំនួយអ.ស.ប.ក្នុងប្រទេសអាហ្វហ្គានីស្ថាន ហៅកាត់ថា UNAMA បានបន្ទោសពួកតាលីបង់, ពួករដ្ឋឥស្លាម និងក្រុមជនសកម្មប្រយុទ្ធឯទៀតៗថាបានធ្វើឱ្យមនុស្សស្លាប់៤៩%។ បេសកកម្មនេះបាននិយាយថា កងកម្លាំងលម្អៀងទៅខាងរដ្ឋាភិបាលដោយមានរួមបញ្ចូលទាំងក្រុមចម្រុះដឹកនាំដោយស.រ.អា.ផងទទួលខុសត្រូវដល់ការស្លាប់របស់មនុស្សចំនួន៤៣%។ មនុស្សសល់ពីនេះបានស្លាប់ដោយឋិតនៅចន្លោះគូបដិបក្ខដែលប្រយុទ្ធគ្នានិងដោយឧប្បត្តិហេតុឯទៀតៗទាក់ទិននឹងសង្គ្រាមនេះ។
របាយការណ៍នេះមានឡើងនៅពេលដែលកិច្ចឈប់បាញ់គ្នា៧ថ្ងៃដែលបានត្រូវយល់ព្រមទៅវិញទៅមកដើម្បីកាត់បន្ថយការប្រយុទ្ធគ្នាបានចូលជាធរមានកាលពីថ្ងៃសៅរ៍សម្រាប់បើកផ្លូវឱ្យស.រ.អា.ចុះហត្ថលេខាលើកិច្ចព្រមព្រៀងសន្តិភាពមួយជាមួយពួកតាលីបង់នៅថ្ងៃទី២៩ខែកុម្ភៈ ដោយមានគោលដៅបញ្ចប់សង្គ្រាម១៨ឆ្នាំមកហើយក្នុងប្រទេសអាហ្វហ្គានីស្ថាន ដែលជាសង្គ្រាមវែងបំផុតរបស់ប្រទេសអាមេរិក។
បេសកកម្ម UNAMA បានកត់សម្គាល់នៅក្នុងសេចក្តីរាយការណ៍របស់ខ្លួនថា ចំនួនជនស៊ីវិលបានត្រូវសម្លាប់ឬត្រូវរបួសនៅក្នុងឧប្បត្តិហេតុទាក់ទិននឹងសង្គ្រាមនៅក្នុងប្រទេសអាហ្វហ្គានីស្ថាន នេះកាលពី១០ឆ្នាំកន្លងទៅនេះមានលើសពីជាងមួយសែននាក់។
លោក Tadamichi Yamamoto ប្រធានបេសកកម្ម UNAMA បានមានប្រសាសន៍ថា៖ «សឹងតែគ្មានជនស៊ីវិលណាម្នាក់នៅក្នុងប្រទេសអាហ្វហ្គានីស្ថាន គេចផុតពីផលប៉ះពាល់ដោយផ្ទាល់ដោយអំពើហិង្សាដែលកំពុងមាននេះទេ»។
លោកបានគូសបញ្ជាក់ថា៖ «ជាការចាំបាច់ដាច់ខាតដែលភាគីទាំងអស់ត្រូវក្តាប់យកឱកាសនេះដើម្បីបញ្ឈប់ការប្រយុទ្ធគ្នាពីព្រោះសន្តិភាពបានហួសកំណត់យូរមកហើយ, ជិវិតពួកជនស៊ីវិលត្រូវតែការពារហើយកំពុងមានកិច្ចខិតខំប្រឹងប្រែងដើម្បីធ្វើឱ្យមានសន្តិភាពផងដែរ»៕
