មន្ត្រីជាន់ខ្ពស់ស.រ.អា.ម្នាក់បាននិយាយកាលពីថ្ងៃសុក្រថា កិច្ចឈប់បាញ់គ្នាបណ្តោះអាសន្នមួយដែលស.រ.អា.បានព្រមព្រៀងជាមួយពួកតាលីបង់នៅអាហ្គានីស្ថាន នឹងចូលជាធរមានក្នុងពេលឆាប់ៗនេះហើយនឹងតម្រូវឱ្យពួកបះបោរនេះបញ្ឈប់ការវាយប្រហារធំៗនៅទូទាំងប្រទេសអាហ្គានីស្ថានចំនួន៧ថ្ងៃ។
មន្ត្រីរូបនេះនៃរដ្ឋបាល ត្រាំ ដែលនិយាយដោយមានលក្ខខណ្ឌមិនឱ្យគេបញ្ចេញឈ្មោះ បានពិភាក្សាអំពីសចក្តីលម្អិតនៃអ្វីដែលបានត្រូវនិយាយយោងថាជាកិច្ចព្រមព្រៀងកាត់បន្ថយអំពើហិង្សា។ មន្ត្រីរូបនេះបាននិយាយប្រាប់ពួកអ្នកកាសែតដែលធ្វើដំណើរជាមួយលោករដ្ឋមន្ត្រីការបរទេសអាមេរិកាំង Mike Pompeo នៅក្នុងក្រុង Munich ថា កិច្ចព្រមព្រៀងនេះនឹងតម្រូវឱ្យពួកតាលីបង់កុំឱ្យធ្វើការវាយប្រហារបំផ្ទុះគ្រាប់បែកតាមដងផ្លូវនិងការវាយប្រហារបំផ្ទុះគ្រាប់បែកអត្តឃាត ព្រមទាំងការវាយប្រហារដោយរ៉ុកកែតប្រឆាំងនឹងពួកទាហានរដ្ឋាភិបាលអាហ្គានីស្ថាន និងក្រុមទាហានបរទេសដឹកនាំដោយស.រ.អា.។
មន្ត្រីនេះបានថ្លែងថា ប្រសិនបើពួកតាលីបង់ធ្វើតាមការសន្យារបស់ពួកគេ កិច្ចព្រមព្រៀងនេះអាចបើកផ្លូវឱ្យមានកិច្ចព្រមព្រៀងសន្តិភាពធំជាងមុនមួយដែលពួកប្រេសិតស.រ.អា. និងតាលីបង់បានធ្វើការចរចាកាលពីឆ្នាំទៅមិញ។
នៅពេលដែលមន្ត្រីអាមេរិកាំងរូបនេះប្រកែកមិនព្រមនិយាយដោយជាក់លាក់អំពីនៅពេលណាការកាត់បន្ថយអំពើហិង្សានេះនឹងចូលជាធរមាន ប្រភាពតាលីបង់អាហ្គានីស្ថាន បាននិយាយអះអាងថា រយៈពេល៧ថ្ងៃនេះនឹងចាប់ផ្តើមពីថ្ងៃទី ២២ ខែកុម្ភៈហើយកិច្ចព្រមព្រៀងសន្តិភាពនឹងត្រូវចុះហត្ថលេខានៅថ្ងៃទី២៩ ខែកុម្ភៈ។
ប្រភពពួកបះបោរនេះថ្លែងដែរថា ពួកអ្នកធានារ៉ាប់រងអន្តរជាតិដូចជាស.រ.អា., រុស្ស៊ី, ចិន, អារ៉ាប៊ីសាអូឌីត, ប៉ាគីស្ថាន, អាល្លឺម៉ង់, ន័រវែស និងប្រទេស កាតា ដែលជាប្រទេសម្ចាស់ផ្ទះរៀបចំកិច្ចចរចាជាច្រើនខែរវាងស.រ.អា. និងពួកតាលីបង់នឹងធ្វើជាកសិណសាក្សីនៅក្នុងពិធីចុះហត្ថលេខានោះ៕
