ប្រធានាធិបតីអាមេរិកលោក Trump បានសន្យាក្នុងអំឡុងពេលយុទ្ធនាការបោះឆ្នោតប្រធានាធិបតីឆ្នាំ២០១៦របស់លោកថា លោកនឹងបញ្ចប់សង្គ្រាមអាមេរិកនៅអាហ្វហ្គានីស្ថាន។ នៅឆ្នាំនេះ កិច្ចចរចាសន្តិភាពរវាងមន្រ្តីសហរដ្ឋអាមេរិកនិងក្រុមតាលីបង់អាហ្វហ្គានីស្ថានរដាក់រដុប នៅពេលអំពើហឹង្សានៅតែបន្តឆក់យកជីវិតជនស៊ីវិលអាហ្វហ្គានីស្ថាននិងបុគ្គលិកយោធាអាមេរិក។
នៅខែកុម្ភៈឆ្នាំ២០១៩ មន្រ្តីអាមេរិកនិងមន្ត្រីតាលីបង់អាហ្វហ្គានីស្ថានបានធ្វើកិច្ចចរចាកម្រិតខ្ពស់បំផុតរបស់ពួកគេ នៅពេលដែលអ្នកតំណាងអាមេរិកលោក Zalmay Khalilzad បានជួបជាមួយសហស្ថាបនិកតាលីបង់លោក Mullah Abdul Ghani Baradar នៅរដ្ឋធានី Doha ប្រទេសកាតាជាលើកដំបូង។ ភាគីទាំងអស់សង្ឃឹមថា នឹងទទួលបានជោគជ័យ ប៉ុន្តែកិច្ចប្រជុំបានបញ្ចប់ដោយគ្មានលទ្ធផលអ្វីទាំងអស់។
អំពើហឹង្សាបានរាលដាលឡើងនៅក្នុងប្រទេសអាហ្វហ្គានីស្ថាន ដោយក្រុមបះបោរបានបដិសេធមិនប្រកាសបទឈប់បាញ់ទេរហូតដល់មានកិច្ចព្រមព្រៀងសន្តិភាពជាមួយសហរដ្ឋអាមេរិក។ កាលពីដើមខែកញ្ញា កិច្ចព្រមព្រៀងសន្តិភាពហាក់ដូចជាជិតកើតមានប៉ុន្តែអំពើហឹង្សាថ្មីនិងការស្លាប់ទាហានអាមេរិកបានធ្វើឱ្យប្រធានាធិបតីអាមេរិកលោកដូណាល់ត្រាំប្រកាសឈប់ចរចាភ្លាមៗ។ ក្នុងខែដដែលនោះ លោក Khalilzad អ្នកតំណាងអាមេរិកត្រូវបានស្នើឱ្យរាយការណ៍ព័ត៌មានចុងក្រោយប្រាប់សមាជិកសភាអាមេរិកនិងប្រជាជនអាមេរិកាំងអំពីស្ថានភាពនៃកិច្ចពិភាក្សា។លោកនិយាយថា លោកបានជម្រាបប្រធានាធិបតីច្បាស់ណាស់ថា រដ្ឋាភិបាលអាហ្វហ្កានីស្ថានត្រូវមានកៅអីក្នុងការចរចា។ តែបើពួកតាលីបង់មិនព្រម នោះគឺជាបញ្ហារបស់គេ៕
