កាលពីថ្ងៃសុក្រ ពួកតាលីបង់បានប្រកាសមិនចូលរួមការចរចានៅអាហ្វហ្គានីស្ថានរហូតដល់សហរដ្ឋអាមេរិកចុះហត្ថលេខាលើកិច្ចព្រមព្រៀងជាមួយក្រុមបះបោរស្តីពីការដកកងទ័ពបរទេសចេញពីអាហ្វហ្គានីស្ថានទាំងស្រុង។
ប្រមុខអ្នកចរចាសន្តិភាពអាមេរិកលោក Zalmay Khalilzad បានផ្អាកកិច្ចចរចាសន្តិភាពជាមួយអ្នកសម្របសម្រួលរបស់តាលីបង់នៅប្រទេសកាតា កាលពីមួយសប្តាហ៍មុនដើម្បីទុកពេលឱ្យពួកគេពិគ្រោះយោបល់ជាមួយថ្នាក់ដឹកនាំរបស់ពួកគេអំពីការកាត់បន្ថយការបះបោរហិង្សា។
ការផ្អាកជាបណ្តោះអាសន្ននេះបានកើតឡើងមួយថ្ងៃបន្ទាប់ពីក្រុមតាលីបង់បានវាយប្រហារទៅលើមូលដ្ឋានយោធា Bagram ដែលជាមូលដ្ឋានធំជាងគេគ្រប់គ្រងដោយអាមេរិកនៅភាគខាងជើងនៃរដ្ឋធានីកាប៊ុល។
ទោះយ៉ាងណា ក្រុមតាលីបង់បានបញ្ជាក់កាលពីថ្ងៃសុក្រថា ខ្លួនមិនមានចេតនាបញ្ឈប់ភាពប្រទូស្តរាយទេ លុះត្រាទទួលបានកិច្ចព្រមព្រៀងជាមួយសហរដ្ឋអាមេរិកចែងអំពីការដកកងទ័ពបរទេស។
ក្នុងនាមក្រុមអ្នកចរចាតាលីបង់ លោកSuhail Shaheen ប្រកាសថា ការចរចារវាងអាហ្វហ្កានិស្ថានអាចធ្វើបានលុះត្រាមានការចុះហត្ថលេខាលើកិច្ចព្រមព្រៀងជាមួយសហរដ្ឋអាមេរិកអំពីការដកកងទ័ពបរទេស។ប៉ុន្តែកាលពីថ្ងៃសុក្រ មន្ត្រីការពារជាតិអាមេរិកកំពូលមិនបានបង្ហាញថា ពួកគេបានរៀបចំការអនុញ្ញាតឱ្យមានការដកទ័ពចេញទាំងស្រុងនោះទេ។
លោក Mark Esper រដ្ឋមន្រ្តីក្រសួងការពារជាតិអាមេរិក បានប្រាប់ក្រុមអ្នកយកព័ត៌មាននៅក្នុងសន្និសីទកាសែតនៅក្រសួងការពារជាតិថា៖ «យើងមានបេសកកម្មនៅអាហ្វហ្គានីស្ថានដើម្បីធានាថា ទីនោះនឹងមិនក្លាយជាទីជម្រករបស់ភេរវករទៀត។ យើងនឹងរក្សាវត្តមានរហូតដល់យើងជឿជាក់ថា បេសកកម្មនោះចប់»។
លោក Khalilzad បានធ្វើទស្សនកិច្ចនៅទីក្រុងកាប៊ុលកាលពីដើមសប្តាហ៍នេះ ហើយបានពិភាក្សាជាមួយលោក Ashraf Ghani ប្រធានាធិបតីអាហ្វហ្គានីស្ថាន អ្នកនយោបាយក្រៅរដ្ឋាភិបាល និងតំណាងសង្គមស៊ីវិល៕
