ភ្ជាប់​ទៅ​គេហទំព័រ​ទាក់ទង

logo-print
ព័ត៌មាន​​ថ្មី

មន្ត្រី​បក្ស​ប្រឆាំង​២នាក់​ទៀត សុំ​សិទ្ធិ​ធ្វើ​នយោបាយ​ឡើងវិញ​ដើម្បី​ចូលរួម​ការបោះឆ្នោត​ឃុំ​សង្កាត់​នៅ​ឆ្នាំ​ក្រោយ


រូបឯកសារ៖ លោក ប៉ុល ហំម អនុប្រធានគណបក្សសង្គ្រោះជាតិ នៅពេលសមាជគណបក្ស កាលពីថ្ងៃទី២ ខែមីនា ឆ្នាំ២០១៧។ (អូន ឆេងប៉រ/វីអូអេ)

អតីត​មន្ត្រី​ជាន់ខ្ពសគណ​បក្ស​សង្គ្រោះ​ជាតិ​២​នាក់​ទៀត ដែល​មាន​លោក ប៉ុល ហំម ផង​ដែរ បាន​ដាក់​ពាក្យ​សុំ​សិទ្ធិ​ធ្វើ​នយោ​បាយ​ឡើង​វិញ ដែល​ជា​ជំហាន​មួយ​ដើម្បី​ចូល​រួម​ការ​បោះ​ឆ្នោតក្រុម​ប្រឹក្សា​ឃុំ​សង្កាត់ ដែល​នឹង​ប្រព្រឹត្ត​ទៅនៅ​ក្នុង​ខែ​មិថុនា ឆ្នាំ​២០២២។ នេះ​បើ​យោង​តាម​លិខិត​ស្នើ​សុំ​នីតិសម្បទា​នយោបាយ​ផ្លូវ​ការ​ផ្ញើ​ទៅ​កាន់​រដ្ឋមន្ត្រី​ក្រសួង​មហាផ្ទៃ ចុះ​ថ្ងៃ​ទី​១៧ ខែ​ឧសភា។

បើ​តាម​លិខិត​សុំ​សិទ្ធិ​ធ្វើ​នយោបាយ អតីត​សមាជិក​គណបក្ស​សង្គ្រោះជាតិ លោក ប៉ុល ហំម និង​លោក ផាន់ ច័ន្ទ​សាក់ បាន​ស្នើ​សុំ​នីតិសម្បទា​នយោបាយ​ឡើង​វិញ​ ដោយ​ផ្អែក​តាម​មាត្រា៤៥​ថ្មី(ស្ទួន​មួយ)នៃ​ច្បាប់​ស្តី​ពី​គណបក្ស​នយោបាយ ដែល​បង្ក​លក្ខណៈ​ឲ្យ​អ្នក​ដែល​ត្រូវ​បាន​ហាមឃាត់​មិន​ឲ្យ​ធ្វើ​សកម្ម​ភាព​នយោបាយ​ អាច​ទទួល​បាន​នីតិសម្បទា​ធ្វើ​នយោ​បាយ​ឡើង​វិញ។

ពួកគេ​ទាំង​២​នាក់​ គឺ​ជា​បុគ្គល​ក្នុង​ចំណោម​អតីត​មន្ត្រី​គណបក្ស​សង្គ្រោះ​ជាតិ​១១៨នាក់ ដែល​ត្រូវ​បាន​កាត់​សិទ្ធិ​មិន​ឲ្យ​ធ្វើ​នយោបាយ កាល​ពី​ថ្ងៃទី​១៦ ខែ​វិច្ឆិកា ឆ្នាំ​២០១៧ ពេល​ដែល​គណបក្ស​ប្រឆាំង​ដ៏​ធំ​មួយ​នេះ ​ត្រូវ​បាន​រំលាយ​ដោយ​តុលាការ​កំពូល។

លោក ខៀវ សុភ័គ អ្នកនាំពាក្យ​ក្រសួង​មហាផ្ទៃ បាន​បញ្ជាក់​ប្រាប់​ VOA​ នៅ​ថ្ងៃ​អង្គារ​នេះថា ​ក្រសួង​មហា​ផ្ទៃ​ បាន​ទទួល​លិខិត​ស្នើ​សុំ​នីតិសម្បទា​នយោ​បាយ​ពី​សំណាក់​លោក ​ប៉ុល ហំម និងលោក ផាន់ ច័ន្ទសាក់ និង​បាន​បញ្ជូនទៅ​កាន់​រដ្ឋមន្ត្រី​ក្រសួង​មហាផ្ទៃ លោក ស ខេង ដើម្បី​អនុម័ត​បន្ត។

លោក ផាន់ ច័ន្ទសាក់ អតីត​សមាជិក​គណៈ​កម្មាធិការ​នាយក​នៃគណបក្ស​សង្គ្រោះ​ជាតិ បាន​ថ្លែង​ប្រាប់​ VOA​ ថា ​លោក​បានដាក់​ពាក្យ​សុំ​ថ្ងៃ​ទី​១៧ ខែ​ឧសភា ក្នុង​គោល​បំណង​បន្ត​អាជីព​ផ្នែក​នយោបាយ​របស់​លោក។

លោក​មាន​ប្រសាសន៍​ថា៖ «ខ្ញុំ​ដាក់​ក្នុង​គោល​បំណង​ ដើម្បី​បន្ត​អាជីព​នយោបាយ​របស់​ខ្ញុំ​ក្នុង​លម្ហប្រជាធិប​តេយ្យ​មួយ​ត​ទៅ​ទៀត ដើម្បី​កុំ​ឲ្យ​គេ​យក​សិទ្ធិ​នយោបាយ​របស់​ខ្ញុំ​ទៅ​ចង​ទុក​ចោល​រយៈពេល​ជាង​៣​ឆ្នាំ​ហើយ ដោយ​ឃើញ​ថា​ខាត​ពេល​ខាត​វេលា​ច្រើន»។

លោក​បន្ថែម​ថា ​លោក​មាន​ផែន​ការ​ចូល​រួម​ជាមួយគណបក្ស​កែទ​ម្រង់​កម្ពុជា ដែល​បង្កើត​ឡើង​ដោយ​លោក អ៊ូ ច័ន្ទរ័ត្ន អតីត​សមាជិក​ជាន់​ខ្ពស់​គណបក្ស​សង្គ្រោះ​ជាតិ ដែល​បាន​ទទួល​សិទ្ធិ​ធ្វើ​នយោបាយ​ឡើង​វិញ កាល​ពី​ពេល​កន្លង​ទៅ​។ លោក​បាន​បន្តថា ​លោក​នឹងចូលរួមការ​បោះ​ឆ្នោត​ឃុំ​សង្កាត់​ដែល​នឹង​ប្រព្រឹត្ត​ទៅ​នៅ​ថ្ងៃ​ទី​៥ ខែ​មិថុនា ឆ្នាំ​២០​២២ ដែល​ជា​ការ​បោះ​ឆ្នោត​មួយ ដើម្បី​កសាង​ការ​គាំទ្រនៅ​ថ្នាក់​មូលដ្ឋាន។

លោក ផាន់ ច័ន្ទ​សាក់ ក៏​សង្ឃឹម​ថា​ សមាជិក​ផ្សេង​ទៀត​នឹង​ចូល​រួម​ជាមួយ​គណបក្ស​កែ​ទម្រង់​កម្ពុជា ដើម្បី​ប្រកួត​ប្រជែង​គ្នា​នៅការ​បោះឆ្នោត​ឃុំ​សង្កាត់​នា​ពេល​ខាង​មុខ។

VOA​ មិន​អាច​ទាក់ទង​សុំ​យោបល់​ពី​លោក ប៉ុល ហំម អតីត​អនុ​ប្រធានគណបក្ស​សង្គ្រោះជាតិ​បាន​ទេ​នៅ​ថ្ងៃ​អង្គារ​នេះ។

គិត​មក​ត្រឹម​ពេល​នេះ អតីត​មន្ត្រី​គណ​បក្ស​សង្គ្រោះ​ជាតិ​ចំនួន​២២​រូប​ហើយ ដែល​បាន​ទទួល​សិទ្ធិ​ធ្វើ​នយោ​បាយឡើង​វិញ ក្រោយ​មាន​ការ​ស្នើ​សុំ​ទៅ​រដ្ឋមន្ត្រី​ក្រសួង​មហាផ្ទៃ។

លោក​ អ៊ូ ច័ន្ទរ័ត្ន​ អតីត​សមាជិក​ជាន់​ខ្ពស់​គណបក្ស​សង្គ្រោះជាតិ និង​ជា​ប្រធាន​គណបក្ស​កែទម្រង់កម្ពុជា​ ដែល​ទើប​នឹង​បង្កើត​ឡើង​នា​ពេល​ថ្មីៗ​នេះ ក្រោយ​ពី​លោក​ទទួល​បាន​សិទ្ធិ​ធ្វើ​នយោបាយ​ឡើង​វិញ ស្វាគមន៍​ការ​ចូលរួម​របស់​របស់​លោក ផាន់ ច័ន្ទ​សាក់ និង​ថាការ​ចូលរួម​ពី​សំណាក់​អតីត​មន្ត្រី​គណ​បក្ស​សង្គ្រោះ​ជាតិ​ជា​បន្ត​បន្ទាប់​ នឹង​ជួយ​ជ្រោម​ជ្រែង​តុល្យភាព​នៃ​ការ​ប្រកួត​ប្រជែង​ក្នុង​លម្ហ​ប្រជា​ធិប​តេយ្យ។

លោក​បញ្ជាក់​ថា៖ «ប្រកួត​ប្រជែង​នេះ យើង​គិត​ថា មិន​មែន​ស៊ី​សាច់ ហុត​ឈាម​អី​ទេ។ ប៉ុន្តែ​យើង​ចង់​ធ្វើ​ម៉េច​ឲ្យ​មាន​តុល្យភាព​អំណាច​នៅ​ក្នុង​ប្រទេស។ រវាង​គណបក្ស​កាន់​អំណាច និង​គណបក្ស​ប្រឆាំង​ហ្នឹង។ ហើយ​បើ​សិន​ជាយើង​នៅ​រាយ​ប៉ាយ យើង​មិន​ធ្វើ​អី​ទេ ខ្ញុំ​ជឿ​ថា​គណបក្ស​កាន់​អំណាច​ លោក​នឹង​កាន់​អំណាច​បន្ត​ដោយ​របៀប​ជិះ​សេះ​លែង​ដៃ​ហ្នឹង​ រាប់​សិប​ឆ្នាំ​ត​ទៅ​ទៀត​ហើយ»។

លោក អ៊ូ​ ច័ន្ទរ័ត្ន បដិសេធ​សុំ​មិន​បញ្ចេញ​យោបល់​ថា​តើ​លោក ប៉ុល ហំម នឹង​ចូលរួម​ជាមួយគណបក្ស​កែទម្រង់​ ​របស់​លោក​ឬ​យ៉ាង​ណា។ ​លោក​ទុក​ឲ្យ​លោក ប៉ុល ហំម ​ប្រកាស​ផ្ទាល់​ពី​ផែនការ​នយោបាយ​របស់​លោក​ ក្រោយ​ទទួល​បាន​សិទ្ធិ​ធ្វើ​នយោបាយ។

លោក មាស នី អ្នក​វិភាគ​សង្គម​និង​នយោបាយ​មួយ​រូប មាន​ប្រសាសន៍​ថា ​នេះ​ជាសិទ្ធិ​របស់​បុគ្គល​ក្នុង​ការ​ស្នើ​សុំ​សិទ្ធិ​ធ្វើ​នយោបាយ និង​ស្របតាម​ច្បាប់​អនុញ្ញាត​សម្រាប់​មន្ត្រី​ណា​ដែល​សុំ​សិទ្ធិ​ធ្វើ​នយោបាយ។ យ៉ាងណាក្តី លោក​បាន​បង្ហាញ​មន្ទិលអំពី​ការ​បង្កើត​គណបក្ស​ថ្មី។​

លោក​ថ្លែង​ថា៖ «សំខាន់​ត្រង់​ថា​ការ​បង្កើត​គណបក្ស​នេះ ​គឺ​ជា​ការ​បង្កើត​គណបក្ស​ គ្រាន់​តែ​បំបែក​អ្នក​ប្រជាធិប​តេយ្យ​ ឲ្យ​ទៅ​ជា​រួម​តូច​ល្អិតៗ​ទៀត ឬ​ក៏​គេ​បង្កើត​ឡើង ក៏​ប៉ុន្តែ​គេ​នៅ​តែ​ត្រៀម​លក្ខណៈ ក្នុង​ការ​ចូលរួម​ក្នុង​ចលនា​ប្រជាធិបតេយ្យ​ណា​មួយ​នៅ​ពេល​ខាង​មុខ។ នោះ​គឺ​ជា​ទិសដៅ​សំខាន់​ដែល​យើង​មិន​ទាន់​បាន​មើល​ឃើញ​នៅ​ពេល​ឥឡូវ​ទៅ»។

លោក​ មាស នី​ ​បន្ថែម​ថា​ការ​បង្កើត​គណបក្ស​តូចៗ ​អាច​មាន​ផល​អវិជ្ជមាន​ទៅ​វិញ ប្រសិន​បើ​គោល​បំណង​ចម្បង គឺ​ដើម្បី​ដណ្តើម​អំណាច​រវាង​គ្នា ជា​ជាង​ប្រជែង​នឹង​គណបក្ស​កាន់​អំណាច ឬ​រួម​សាមគ្គី​គ្នាឡើង​វិញ​នៅ​ពេល​ណា​មួយ​ខាង​មុខ។

លោក​បន្ថែម​ថា៖ «ដោយ​គ្រាន់​តែ​គណបក្ស​តូចៗ​នីមួយៗ​ចេញ​មក​ហើយ ដណ្តើម​គ្នា​ធ្វើការ​ដណ្តើម​គ្នា​យក​កន្លែង​ ដើម្បី​យក​ប្រជាប្រិយភាព​រៀង​ខ្លួន​ អាហ្នឹង​ជា​ទិដ្ឋភាព​ទូទៅគឺ​ គណបក្ស​កាន់​អំណាច​គឺ​តែ​មាន​ឱកាស​ឈ្នះ​អាណត្តិ​ត​ទៅ​ទៀត​បាទ។ ក៏​ប៉ុន្តែ​បើ​សិន​ជា​គាត់​យល់​ឃើញ​ថា​ការ​ទាមទារ​ ឬ​ការ​តស៊ូ​ដើម្បី​ប្រជាធិបតេយ្យ​តែ​ម្នាក់​ឯង​ទៅ​មិន​រួច​ទេ ត្រូវ​ការ​ទាមទារ​កម្លាំង​ធំ​ថែម​ទៀត ការ​រួម​សាមគ្គី​គ្នា​វិញ អាហ្នឹង​ជា​ដំណោះស្រាយ​មួយ​ទៀត»។

គួរ​បញ្ជាក់​ថា​ ថ្នាក់​ដឹកនាំ​គណបក្ស​សង្គ្រោះ​ជាតិ​ដែល​ទទួល​បាន​សិទ្ធិ​ធ្វើ​នយោបាយ​ឡើង​វិញ​ចុង​ក្រោយ​បង្អស់ កាល​ពី​ពាក់កណ្តាល​ខែ​ឧសភា ​រួម​មាន​លោក យ៉ែម បុញ្ញឬទ្ធិ អតីត​តំណាង​រាស្ត្រ​គណបក្ស​សង្គ្រោះ​ជាតិ​និង​ លោក​មុត ចន្ថា​ នាយក​ខុទ្ទកាល័យ​របស់​លោក​ កឹម សុខា រួម​ទាំង​មន្ត្រី​ជាន់ខ្ពស់គណបក្ស​នេះ​ចំនួន​៥​រូប​ផ្សេង​ទៀត៕

XS
SM
MD
LG