លោក ថាច់ សេដ្ឋា អតីតសមាជិកព្រឹទ្ធសភាគណបក្សសង្រ្គោះជាតិ ត្រូវបានផ្តល់នីតិសម្បទាឲ្យធ្វើនយោបាយឡើងវិញ ខណៈលោកកំពុងបន្តប្រឈមនឹងបទចោទប្រកាន់រួមគំនិតក្បត់និងញុះញង់ឲ្យមានចលាចល។
លោក ថាច់ សេដ្ឋា មន្ត្រីជាន់ខ្ពស់ម្នាក់របស់បក្សប្រឆាំងនិងជាប្រធានសហគមន៍ខ្មែរកម្ពុជាក្រោម ជាមនុស្សម្នាក់ក្នុងចំណោមមនុស្ស១១៨នាក់ ដែលត្រូវបានកាត់សិទ្ធិមិនឲ្យធ្វើនយោបាយរយៈពេល៥ឆ្នាំ ចាប់ពីថ្ងៃទី១៦ ខែវិច្ឆិកា ឆ្នាំ២០១៧ គ្រាដែលគណបក្សប្រឆាំងត្រូវបានរំលាយចោលដោយតុលាការកំពូល។
ព្រះរាជក្រឹត្យចុះថ្ងៃទី១២ ខែមេសា ឲ្យដឹងពីការផ្តល់សិទ្ធិធ្វើនយោបាយឡើងវិញដល់លោក ថាច់ សេដ្ឋា។
លោក ខៀវ សុភ័គ អ្នកនាំពាក្យក្រសួងមហាផ្ទៃ ប្រាប់VOAថាលោក ថាច់ សេដ្ឋា បានដាក់ពាក្យស្នើសុំធ្វើនយោបាយឡើងវិញ ដែលទទួលបានការយល់ព្រមពីរដ្ឋមន្ត្រីក្រសួងមហាផ្ទៃ ហើយព្រះមហាក្សត្របានព្រះរាជទានផ្តល់នីតិសម្បទាសិទ្ធិធ្វើនយោបាយដល់លោក តាមព្រះរាជក្រឹត្យដែលត្រូវបានផ្សព្វផ្សាយដល់សារព័ត៌មានក្នុងស្រុកកាលពីថ្ងៃច័ន្ទ។
លោក ថាច់ សេដ្ឋា ប្រាប់VOA នៅរសៀលថ្ងៃអង្គារនេះថាលោកមិនទាន់ទទួលបានព្រះរាជក្រឹត្យរបស់ព្រះមហាក្សត្រជាផ្លូវការនៅឡើយទេ ដោយឃើញតែតាមព័ត៌មាន។ លោកបានបដិសេធមិនអធិប្បាយនាពេលនេះទាក់ទងនឹងសំណួរថាតើលោកមានគម្រោងបង្កើតគណបក្សនយោបាយថ្មី និងបណ្តឹងប្រឆាំងរូបលោក ដែលកំពុងស្ថិតក្នុងដៃតុលាការរាជធានីភ្នំពេញ។
លោកបានថ្លែងថា៖ «ដូចខ្ញុំបានជម្រាបអញ្ចឹង ខ្ញុំសូមអត់ទាន់ឆ្លើយអីទាំងអស់នៅពេលមិនទាន់បានព្រះរាជក្រឹត្យមក ខ្ញុំសូមមិនធ្វើការអត្ថាធិប្បាយអីទេ។ ខ្ញុំថាមិនយូរទេ បើសិនជាមានរាជក្រឹត្យអីច្បាស់លាស់ ខ្ញុំនឹងជម្រាបជូន»។
កាលពីថ្ងៃទី២៦ ខែវិច្ឆិកា ឆ្នាំ២០២០ នៅមុខសាលាដំបូងរាជធានីភ្នំពេញ លោក ថាច់ សេដ្ឋាបានថ្លែងប្រាប់ក្រុមអ្នកសារព័ត៌មានថាលោកមិនដឹងពីហេតុផលជាក់លាក់ណាមួយដែលនាំឲ្យលោកស្ថិតនៅក្រោមបទចោទប្រកាន់ញុះញង់និងសមគំនិតក្បត់នោះទេ។ ការចោទប្រកាន់នោះពាក់ព័ន្ធនឹងការប្រកាសធ្វើមាតុភូមិនិវត្តន៍របស់លោកសម រង្ស៊ី មេដឹកនាំបក្សប្រឆាំងនៅក្រៅប្រទេស កាលពីឆ្នាំ២០១៩។ សំណុំរឿងរបស់លោកកំពុងបន្តក្នុងនីតិវិធីរបស់តុលាការ ខណៈជំងឺកូវីដ១៩ បានបង្កជាឧបសគ្គនៃដំណើរការសំណុំរឿងនេះ។
លោកមានប្រសាសន៍កាលនោះថា៖ «ដើម្បីបង្ហាញពីភាពស្អាតស្អំរបស់យើង មិនមែនជាមនុស្សសមគំនិត។ សមគំនិតក្បត់ហ្នឹង មិនដឹងសមគំនិតក្បត់នរណាទៀត។ អត់ដឹងក្បត់នរណា។ រួមគំនិតក្បត់ជាតិសាសន៍ឯង? អញ្ចឹងយើងអត់ដឹងយើងសមគំនិតជាមួយនរណាគេ។ មកនេះ មកទាំងអត់ដឹងថា ខ្ញុំមានទោសអី ខុសអីទៅទៀត»។
លោក អ៊ូ ច័ន្ទរ័ត្ន អតីតមន្ត្រីគណបក្សសង្គ្រោះជាតិមួយរូប និងត្រូវបានផ្តល់សិទ្ធិធ្វើនយោបាយឡើងវិញ ហើយបង្កើតគណបក្សមួយ មានប្រសាសន៍ថាការស្នើសុំសិទ្ធិនយោបាយឡើងវិញពីសំណាក់អតីតសមាជិកគណបក្សសង្រ្គោះជាតិ គឺ ដោយសារតែការពុំមានជម្រើសអ្វីដែលប្រសើរជាងនេះ ស្របពេលមិនទាន់មានគោលជំហរជជែកពិភាក្សាដើម្បីស្តាលម្ហប្រជាធិបតេយ្យនៅកម្ពុជាឡើងវិញ។
លោកមានប្រសាសន៍ថា៖ «ខ្ញុំស្វាគមន៍ ពីព្រោះមិនមានជម្រើសអ្វី ព្រោះយើងដើរដល់ផ្លូវមួយដែលទ័លហើយ។ ក្រៅពីស្នើសិទ្ធិធ្វើនយោបាយហ្នឹង មិនមានសិទ្ធិអីទេ។ បើយើងចង់ធ្វើនយោបាយតទៅទៀត ចង់ស្តាលទ្ធិប្រជាធិបតេយ្យឡើងវិញនោះ មានតែជម្រើសមួយហ្នឹងទេ»។
លោកបន្តថាលោកមានជំនឿថានៅពេលបុគ្គលណាម្នាក់ទទួលបាននីតិសម្បទាធ្វើសកម្មភាពនយោបាយឡើងវិញ បទចោទប្រកាន់ដទៃទៀតប្រឆាំងនឹងបុគ្គលនោះ ត្រូវតែទម្លាក់ចោល បើមិនដូច្នេះនឹងបង្កជាការប៉ះពាល់មកលើសិទ្ធិធ្វើនយោបាយពេញលេញ។
លោក អ៊ូ ច័ន្ទរ័ត្ន បន្ថែមថាទាំងអ្នកទទួលបាននីតិសម្បទាធ្វើនយោបាយឡើងវិញ និងអ្នកមិនទាន់ទទួលបាន គួរប្រកាន់យកនូវ«ស្មារតីរួបរួមគ្នា» ដើម្បីអាចប្រកួតប្រជែងនឹងគណបក្សកាន់អំណាច។
លោក មាស នី អ្នកវិភាគសង្គម មានប្រសាសន៍ថាការកៀរគរយកសំឡេងគាំទ្រពីពលរដ្ឋជារឿងសំខាន់ ប្រសិនបើបុគ្គលនេះឈានចូលឆាកនយោបាយឡើងវិញតាមរយៈការបង្កើតគណបក្សថ្មី ឬចូលរួមក្នុងគណបក្សណាមួយ។ លោកយល់ឃើញថាការផ្តល់សិទ្ធិសេរីភាពនយោបាយគឺស្របនឹងគោលការណ៍ចែងនៅក្នុងច្បាប់កម្ពុជា ប៉ុន្តែលោកបារម្ភអំពីការបន្តតាមដានលើសកម្មភាពរបស់ពួកគេ។
លោកបញ្ជាក់ថា៖ «វាមិនសំខាន់អ្វីពីរឿងលម្ហនយោបាយមានឬមិនមានទេ ពីព្រោះបើសិនជាការចាកចេញមកហើយ ប៉ុន្តែការរឹតត្បិត ការតាមដាន ការតាមពិនិត្យសកម្មភាពរបស់បុគ្គល នៅតែមានបន្តទៅនោះ អាហ្នឹងលម្ហក៏មិនអាចនឹងមានតទៅទៀតដែរបាទ»។
អ្នកវិភាគសង្គមរូបនេះបានលើកឡើងបន្តថាការដោះស្រាយពីបទចោទប្រកាន់ដទៃទៀតជារឿងសំខាន់ផងដែរ ប្រសិនបើបុគ្គលទើបទទួលបាននីតិសម្បទា សម្រេចចិត្តចូលធ្វើនយោបាយឡើងវិញ។
រហូតមកដល់ថ្ងៃទី១៣ ខែមេសានេះ លោក ថាច់ សេដ្ឋា ជាអ្នកនយោបាយទី១៥ ដែលទទួលបាននីតិសម្បទាដើម្បីធ្វើនយោបាយឡើងវិញ។ អ្នកផ្សេងទៀត រួមមានលោក គង់ គាំ លោក គង់ បូរ៉ា លោក ស៊ីម សុវណ្ណនី លោក រៀល ខេមរិន្ទ លោក អ៊ូ ច័ន្ទរ័ត្ន លោកស្រី ទេព សុទ្ធី លោក កង គឹមហាក់ លោក ជីវ កត្តា លោក ច័ន្ទ សិលា លោក សុន ឆ័យ លោក តាវ គឹមឈន លោក វ៉ា សាម៉ុន លោក ស៊ុន សុភ័ក្រ និងលោកស្រី លី ស្រីវីណា។ ពួកគេមួយចំនួនបានបង្កើតគណបក្សនយោបាយថ្មី ក្រោយទទួលបានសិទ្ធិធ្វើនយោបាយឡើងវិញ៕
