អតីតតំណាងរាស្ត្រគណបក្សសង្គ្រោះជាតិ លោក អ៊ូ ច័ន្ទរ័ត្ន បានប្រកាសនៅថ្ងៃចន្ទនេះថា «គណបក្សកែទម្រង់កម្ពុជា» នឹងក្លាយជាឈ្មោះបក្សនយោបាយថ្មីមួយ ដែលលោកបានគ្រោងបង្កើតរាប់ខែមកហើយ តាំងពីបានសុំសិទ្ធិធ្វើនយោបាយពីអាជ្ញាធរកម្ពុជាវិញមក។
លោក អ៊ូ ច័ន្ទរ័ត្ន បានប្រាប់ VOA នៅរសៀលថ្ងៃចន្ទនេះថា ក្រុមការងារលោកគ្រោងយកឯកសារក្រដាសស្នាមចាំបាច់នានា បញ្ជូនជាពាក្យស្នើសុំបើក«គណបក្សកែទម្រង់កម្ពុជា»នេះ ទៅកាន់ក្រសួងមហាផ្ទៃមិនឱ្យហួសពីសប្ដាហ៍ចុងក្រោយនៃខែមករានេះឡើយ។
ការដាច់ចិត្តបង្កើតគណបក្សនេះ ដោយសារការជាប់គាំងក្នុងចំណោមបក្សជំទាស់ដែលត្រូវបានរំលាយ ដោយក្រុមលោក សម រង្ស៊ី ត្រូវជាប់គាំងមិនអាចវិលមកកម្ពុជាបាន ហើយករណីផ្លូវច្បាប់ប្រឆាំងលោក កឹម សុខា នៅក្នុងស្រុកនេះ ក៏រកទីបញ្ចប់មិនឃើញ។ នេះបើតាមលោក ច័ន្ទរ័ត្ន។
លោកប្រាប់ VOA ថា៖ «យើងអត់មានជម្រើសអីផ្សេង យើងរង់ចាំដំណោះស្រាយបីឆ្នាំហើយ»។
សម្ពាធនៃការខិតចូលមកដល់នៃការបោះឆ្នោតឃុំសង្កាត់ឆ្នាំ២០២២ និងការបោះឆ្នោតជាតិឆ្នាំ២០២៣ ត្រូវបានលោក ច័ន្ទរ័ត្ន លើកជាហេតុផលថា ជាការចាំបាច់ក្នុងការបង្កើតបក្សថ្មីនេះ «ខ្លាចខកពេលធ្ងន់ៗទៅ»។
កញ្ញា កឹម មនោវិទ្យា កូនស្រីច្បងរបស់លោក កឹម សុខា និងជាមន្ត្រីជាន់ខ្ពស់បក្សសង្គ្រោះជាតិធ្លាប់បានថ្លែងលើបណ្ដាញសង្គម Twitter ថា បក្សប្រជាជនព្យាយាមធ្វើឱ្យមន្ត្រីថ្នាក់មធ្យមរបស់បក្សជំទាស់អស់សង្ឃឹម ហើយចេញទៅបង្កើតបក្សថ្មី ដើម្បីបង្កើតសេណារីយោបោះឆ្នោតដូចឆ្នាំ២០១៨ ដែលបក្សកាន់អំណាចឈ្នះដោយងាយ។
តែលោក អ៊ូ ច័ន្ទរ័ត្ន ថា បក្សថ្មីនេះ ដែលលោកថា នឹងមិនធ្វើប្រធានដឹកនាំនោះទេ ដោយមានមន្ត្រីបក្សជំទាស់មួយចំនួនទៀតដែលលោកមិនបញ្ចេញឈ្មោះ នឹង«មិនរណែបរណបទេ ហើយនឹងប្រកួតប្រជែងស្វិតស្វាញមែនទែន» ជាមួយបក្សកាន់អំណាចនៅការបោះឆ្នោតខាងមុខ។
គួរបញ្ជាក់ថា នេះជាបក្សនយោបាយទីបួនហើយ ដែលត្រូវបានបង្កើតដោយអតីតមន្ត្រីគណបក្សសង្គ្រោះជាតិ តាំងពីបក្សត្រូវបានរំលាយក្នុងឆ្នាំ២០១៧ ហើយមានមន្ត្រីបក្សជំទាស់១២រូបហើយ ក្នុងចំណោម១១៨រូប ដែលបានសុំសិទ្ធិរំដោះខ្លួនចេញពីបម្រាមធ្វើនយោបាយរបស់តុលាការ៕
