ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ការតតាំង​របស់​លោក Trump ទៅ​នឹង​ការប្តឹងដកតំណែង​ប្រធានាធិបតី​របស់​លោកជា​ការសាកល្បង​រដ្ឋធម្មនុញ្ញ​របស់​អាមេរិក


រូបឯកសារ៖ ប្រធានាធិបតីអាមេរិកលោក ដូណាល់ ត្រាំ ថ្លែងទៅកាន់ក្រុមអ្នកសារព័ត៌មាននៅសេតវិមាន កាលពីថ្ងៃទី១០ ខែតុលា ឆ្នាំ២០១៩។

នៅ​ឯ​សេតវិមាន​លោក​ប្រធានាធិបតី Donald Trump ស្ថិត​ក្នុង​ស្ថានភាព​តតាំង​ដើម្បី​រារាំង​ការស៊ើបអង្កេត​ដើម្បី​ប្តឹង​ដកតំណែង​ប្រធានាធិបតី​របស់​លោក​ដែល​ដឹកនាំ​ដោយ​គណបក្ស​ប្រជាធិបតេយ្យ ដែល​នឹង​ធ្វើការ​សម្រេច​នៅក្នុង​សភា​តំណាងរាស្រ្ត​របស់​សហរដ្ឋ​អាមេរិក។

លោកប្រធានាធិបតី Donald Trump និង​សមាជិក​នៃគណបក្ស​ប្រជាធិបតេយ្យ​នៅក្នុងសភាតំណាងរាស្រ្ត​របស់សហរដ្ឋអាមេរិក ឥឡូវនេះ​កំពុង​ជាប់ពាក់ព័ន្ធ​នៅ​ក្នុង​ការជាប់គាំង​នៅក្នុង​ច្បាប់​រដ្ឋធម្មនុញ្ញ​លើ​រឿង​ប្តឹង​ដកតំណែង​របស់​ប្រធានាធិបតី។

សេតវិមានបដិសេធ​មិន​ផ្តល់​សាក្សី និង​ឯកសារ​ដែល​ខាង​គណបក្ស​ប្រជាធិបតេយ្យ​បាន​ទាមទារ​សម្រាប់​ការស៊ើបអង្កេត​លើ​រឿង​ប្តឹង​ដកតំណែង​ប្រធានាធិបតី​នេះ ដោយ​ផ្តោត​ទៅ​លើ កិច្ចសន្ទនា​តាម​ទូរស័ព្ទ​រវាង​លោក Trump ជាមួយ​លោកប្រធានាធិបតី​ប្រទេស​អ៊ុយក្រែន។ ការប៉ះទង្គិច​គ្នា​រវាង​សាខា​នីតិប្រតិបត្តិ និង​នីតិប្បញ្ញត្តិ​នេះ បាន​ចោទ​ជា​សំណួរ​សំខាន់ អំពី​អំណាច​របស់​ប្រធានាធិបតី តុល្យភាព​នៃអំណាច​ក្រោម​ច្បាប់​រដ្ឋធម្មនុញ្ញ​របស់​សហរដ្ឋ​អាមេរិក និង​ស្ថានការណ៍​លិទ្ធិ​ប្រជាធិបតេយ្យ​របស់​ សហរដ្ឋ​អាមេរិក។

នៅ​ឯ​សេតវិមាន​លោក​ប្រធានាធិបតី Donald Trump ស្ថិត​ក្នុង​ស្ថានភាព​តតាំង​ដើម្បី​រារាំង​ការស៊ើបអង្កេត​ដើម្បី​ប្តឹង​ដកតំណែង​ប្រធានាធិបតី​របស់​លោក​ដែល​ដឹកនាំ​ដោយ​គណបក្ស​ប្រជាធិបតេយ្យ ដែល​នឹង​ធ្វើការ​សម្រេច​នៅក្នុង​សភា​តំណាងរាស្រ្ត​របស់​សហរដ្ឋ​អាមេរិក។

លោក​ប្រធានាធិបតី Donald Trump ថ្លែង​ថា៖

«ប្រជាពលរដ្ឋ​យល់ ថា​វា​ជា​ការបោកប្រាស់។ ពួកគេ​កំពុង​ព្យាយាម​យក​ឈ្នះ​នៅ​ក្នុងការ​ការបោះឆ្នោត​នៅ​ឆ្នាំ ២០២០ ដោយ​ប្រើប្រាស់​ការប្តឹង​ដកតំណែង។ យើង​បាន​យក​ឈ្នះ​លើ​ការបោកប្រាស់​របស់​លោក Mueller។ នោះ​គឺ​ជា​រឿង​ធំដុំ​ដែល​មាន​រយៈពេល​ពីរ​ឆ្នាំ​កន្លះ។ យើង​បាន​ស្ងប់សុខ​ពីរបីថ្ងៃ ហើយ​ក៏ស្រាប់តែ​ពួកគេ​បង្កើត​រឿង​នេះ​ឡើង​មក។ ប៉ុន្តែ ខ្ញុំ​គិត​ថា វា​គ្រាន់តែ​ជា​ផ្នែក​មួយ​នៃ​ជីវិត​របស់​ខ្ញុំ​ប៉ុណ្ណោះ»។

ការប្រឈមមុខ​ដាក់គ្នា​កាន់តែ​កើន​ខ្លាំង​ឡើង នៅក្នុង​ប៉ុន្មាន​ថ្ងៃ​ថ្មីៗ​នេះ នៅ​ពេល​ដែល​សេតវិមាន​ដែល​គ្រប់គ្រង​ដោយ​លោក Trump បាន​ផ្ញើ​លិខិត​មួយ​ទៅ​សភា​ដោយ​ច្រានចោល​ការស៊ើបអង្កេត​ដោយ​ចោទ​ប្រកាន់​ថា​ជា​ការធ្វើ​ទុក្ខបុកម្នេញ​ដោយ​ការប្រកាន់​បក្សពួក ហើយ​បាន​បដិសេធ​មិន​សហការ។

សមាជិក​គណបក្ស​ប្រជាធិបតេយ្យ​ដូចជា​សមាជិក​សភា​តំណាងរាស្រ្ត​លោក Adam Schiff បាន​ប្តេជ្ញា​ធ្វើឲ្យ​រឿង​ប្តឹង​ដកតំណែង​ប្រធានាធិបតី​នេះ ឆ្ពោះ​ទៅ​មុខ។

លោក Adam Schiff ថ្លែង​ថា៖

«យើង​ចាត់ទុក​ថា ការខកខាន​ក្នុង​ការផ្តល់​សាក្សី និង​ការខកខាន​ក្នុងការផ្តល់​ឯកសារ​ទាំងនេះ គឺជា​ភ័ស្តុតាង​ដ៏​រឹងមាំ​បន្ថែម​ទៀត​ក្នុងការ​ធ្វើឲ្យ​រាំងស្ទះ​ដល់​មុខងារ​រដ្ឋធម្មនុញ្ញ​របស់​សភា​ដែល​ជា​សាខា​របស់​រដ្ឋាភិបាល​ដែល​មាន​អំណាច​ស្មើ​គ្នា»។

អ្នកគាំទ្រ​លោក Trump ដូចជា​សមាជិក​សភា​តំណាងរាស្រ្ត​រដ្ឋ Florida លោក Matt Gaetz បាន​ត្រៀម​ខ្លួន​រួច​ជាស្រេច​ដើម្បី​តតាំង​ជំនួស​លោក​ប្រធានាធិបតី។

លោក Matt Gaetz ថ្លែង​ថា៖

«អ្វី​ដែល​យើង​មើល​ឃើញ​នៅក្នុង​ការចោទប្រកាន់​នេះ គឺ​តុលាការ​បាយឡុកបាយឡ ហើយ​លោក Schiff កំពុង​ធ្វើ​ដូចជា មេ​បាយឡុកបាយឡ»។

តាម​អ្នកជំនាញ​ផ្នែក​ច្បាប់​លោក Paul Schiff Berman បាន​ថ្លែង​ថា ក្រោម​ច្បាប់​រដ្ឋធម្មនុញ្ញ សភា​មាន​អំណាច​ក្នុងការ​ឱ្យ​ប្រធានាធិបតី​ទទួល​ខុសត្រូវ​តាមរយៈ​ដំណើរការ​ប្តឹង​ដក​តំណែង​ប្រធានាធិបតី។

លោក Paul Schiff Berman ថ្លែង​ថា៖

«រាល់​ការ​បំពាន​អំណាច​ ឬ ការបំពាន​អំណាច​ដោយ​អាង​ថា​ខ្លួន​ជា​ប្រធានាធិបតី​អាច​ចាត់ទុក​ថា ជា​បទល្មើស​ដែល​អាច​ត្រូវ​បាន​ប្តឹង​ដកតំណែង​បាន។ រឿង​នេះ មិន​បាន​កំណត់​នៅក្នុង​រដ្ឋធម្មនុញ្ញ​ទេ ដូច្នេះ​វា​ពិត​ជា​រឿង​ដែល​ត្រូវ​វិនិច្ឆ័យ​ទៅ​តាម​ការមើល​ឃើញ និង​អាស្រ័យ​ទៅ​តាម​រឿង​នយោបាយ»។

ការសម្រេចចិត្ត​របស់​លោក Trump ក្នុងការ​មិន​សហការ​ជាមួយ​សភា​មាន​ភាពស្រដៀងគ្នា​ទៅ​នឹង​ជំហរ​របស់​លោក​ប្រធានាធិបតី Richard Nixon ក្នុង​រឿង​អាស្រូវ Watergate នៅ​ឆ្នាំ ១៩៧៤។

ប្រវត្តិវិទូ​លោកស្រី Barbara Ann Perry និយាយ​ថា ទីបំផុត​តុលាការ​ជាន់ខ្ពស់​បាន​បញ្ជា​ឲ្យ​លោក​ Nixon បញ្ចេញ​ខ្សែ​អាត់​សម្លេង​ដែល​បាន​ធ្វើ​ឱ្យ​លោក​លា​ឈប់​ពី​តំណែង។

លោកស្រី Barbara Ann Perry ថ្លែង​ថា៖

«ដូច្នេះ​ប្រធានាធិបតី​តែងតែ​ដក​ថយ ហើយ​តុលាការ ឬ សភា​ជម្រុញ​រឿង​នេះ​ខ្លាំង​ស្មើ​ដៃ​គ្នា​ទៅ​តាម​អំណាច​របស់​ពួកគេ ហើយ​ជា​ធម្មតា​ប្រធានាធិបតី​ចាញ់»។

ប៉ុន្តែលោក Paul Schiff Berman ថ្លែង​ថា លទ្ធផល​នៃ​ការ​ប្តឹង​ដក​ដំណែង​នេះ នៅតែ​ស្ថិត​ក្នុង​ភាពស្រពិចស្រពិល​នៅឡើយ ហើយ​ទី​ចុង​បញ្ចប់ អាច​ជា​អ្នកបោះឆ្នោត​ទេ ដែល​ជាអ្នកសម្រេច​លើ​រឿង​លោក​ប្រធានាធិបតី Trump នេះ នៅ​ក្នុង​ការបោះឆ្នោត​នៅ​ឆ្នាំ​ក្រោយ។

លោក Berman ថ្លែង​ថា៖

«តុលាការ​អាច​ធ្វើ​ឱ្យ​ប្រធានាធិបតី​ទទួល​ខុសត្រូវ ជាទូទៅ​លើ​បញ្ហា​គោលនយោបាយ។ ទាក់ទង​ទៅនឹង​រឿង​ដូច​នេះ ដែល​ជា​កំហុស​ផ្ទាល់ខ្លួន​រដ្ឋធម្មនុញ្ញ​សន្មត​ថា មធ្យោបាយ​តែ​មួយ​គត់​ដើម្បី​ដោះស្រាយ​នោះ គឺ​តាម​រយៈ​ការប្តឹង​ដកដំណែង ឬ តាម​រយៈ​សន្លឹក​ឆ្នោត​របស់​ប្រជាពលរដ្ឋ»។

ក៏ប៉ុន្តែក្នុង​ពេល​នេះ ប្រធានាធិបតី សភា និង​ប្រជាពលរដ្ឋ​អាមេរិកាំង ត្រៀម​ខ្លួន សម្រាប់​ការប្តឹង​ដកដំណែង​ប្រធានាធិបតី​លើក​ទី ៤ នៅ​ក្នុង​ប្រវត្តិសាស្រ្ត​សហរដ្ឋ​អាមេរិក៕

ប្រែសម្រួល​ដោយ​អ្នកស្រី លី ម៉ូរីវ៉ាន់

XS
SM
MD
LG