ភ្ជាប់​ទៅ​គេហទំព័រ​ទាក់ទង

logo-print
ព័ត៌មាន​​ថ្មី

ជនភៀសខ្លួន​នីហ្សេរីយ៉ា​រាប់ពាន់នាក់​ភៀសខ្លួន​ទៅ​ប្រទេស​ឆាដ​ដើម្បី​សុវត្ថិភាព


រូបឯកសារ៖ កុមារជនភៀសខ្លួននៅជំរំ Dar Es Salam នៅប្រទេសឆាដ 

ទីភ្នាក់ងារ​ជនភៀស​ខ្លួន​របស់​អង្គការ​សហ​ប្រជាជាតិ UNHCR បាន​ឲ្យ​ដឹង​ថា ជនភៀសខ្លួន​នីហ្សេរីយ៉ា​រាប់ពាន់នាក់ កំពុងតែ​ភៀសខ្លួន​ទៅ​ប្រទេសឆាដ ដើម្បី​គេច​ពី​អំពើ​ហិង្សា​ដែល​កំពុងកើន​ឡើង នៅក្នុង​ភាគឦសាន​រដ្ឋ Borno នៃ​ប្រទេស​នីហ្សេរីយ៉ា។

ការប៉ះទង្គិចគ្នាយ៉ាងខ្លាំងមួយចំនួន រវាង​កងកម្លាំងរដ្ឋាភិបាល និង​កងជីវពល​ប្រដាប់​អាវុធ​នៃ​ក្រុម​កាន់សាសនា​ឥស្លាម​ជ្រុល​និយម Boko Haram បាន​កើត​មាន​ឡើង នៅចុង​ខែធ្នូ ក្នុង​ក្រុង Baga នៃ​រដ្ឋ Borno ដែល​នៅ​ក្បែរ​ព្រំដែន​ប្រទេសឆាដ។ ទីភ្នាក់ងារ​ជនភៀសខ្លួន​របស់​អង្គការ​សហ​ប្រជាជាតិ UNHCR បាន​រាយការណ៍​ថា មាន​ជនភៀសខ្លួន​នីហ្សេរីយ៉ា ប្រមាណជា ៦.០០០ នាក់​បាន​ភៀសខ្លួន ក្នុង​រយៈ​ពេល​មួយ​ខែ​កន្លង​ទៅ​នេះ មាន​មនុស្ស​ជាច្រើន​បាន​អុំ​ទូក​ឆ្លងកាត់​បឹង​ឆាដ ដើម្បី​ទៅ​កន្លែង​មាន​សុវត្ថិភាព។

ទីភ្នាក់ងារ​ជនភៀសខ្លួន​របស់​អង្គការ​សហ​ប្រជាជាតិ បាន​ឲ្យ​ដឹង​ថា ភាគច្រើន​នៃ​ជន​ភៀស​ខ្លួន​ថ្មីៗ​នេះ គឺជា​ស្រ្តី និងកុមារ។ ពួកគេ​ជាច្រើន បាន​រៀបរាប់​អំពី​ការចង់​គេច​ចេញ​ពី​អំពើ​ហិង្សា ក្រោយពី​ទទួល​ការគំរាម​កំហែង​នូវ​ការវាយបក និង​ការបំភិត​បំភ័យ បន្ទាប់ពី​មាន​ការវាយ​ប្រហារ​ពី​សំណាក់​ពួក​កងជីវពល។

លោក Chalie Yaxley អ្នកនាំពាក្យ​នៃ​ទីភ្នាក់ងារ​ជនភៀសខ្លួន​របស់​អង្គការ​សហ​ប្រជាជាតិ​បាន​ថ្លែង​ថា អាជ្ញាធរ​នៃ​ប្រទេស​ឆាដ បាន​ស្នើ​ឲ្យ​ទីភ្នាក់ងារ​របស់​លោក​នាំ​យក​ជនភៀសខ្លួន​ទាំងនោះ ទៅ​ឲ្យ​ឆ្ងាយ​ពី​តំបន់​ព្រំដែន ដោយសារតែ​ព្រួយ​បារម្ភ​អំពី​សន្តិសុខ។ លោក​បាន​ប្រាប់ VOA ថា រហូត​មកដល់ពេលនេះ បុគ្គលិក​របស់​ទីភ្នាក់ងារ UNHCR បាន​នាំ​យក​ជនភៀសខ្លួន ប្រមាណជា ៤.២០០ នាក់ ទៅ​ជំរំ​ដែល​មាន​ស្រាប់ ដែល​មាន​ចម្ងាយ​ប្រមាណជា ៤៥ គីឡូម៉ែត្រ ពីតំបន់ព្រំដែន។

លោក Chalie Yaxley ថ្លែង​ថា៖

«ក្នុង​ពេល​ឥឡូវ​នេះ យើង​មិន​ឃើញ​មាន​សញ្ញា​ណាមួយ​បង្ហាញ​ថា ការវាយ​ប្រយុទ្ធ​គ្នា បាន​រាលដាល​ឆ្លង​ព្រំដែន​ទេ។ ក៏ប៉ុន្តែ ដូច​ដែល​ខ្ញុំ​បាន​លើក​ឡើង​អ៊ីចឹង ការវាយ​ប្រយុទ្ធ​គ្នា​ក្នុងរដ្ឋ Borno គឺ​វា​នៅតែ​ជា​រឿង​ដែល​ពិបាក​ទស្សន៍ទាយ​ខ្លាំង​ណាស់ ហើយ​ដើម្បី​ជា​វិធានការ​ប្រុងប្រយ័ត្ន ការសម្រេចមួយក៏បានធ្វើឡើង គឺ​នាំ​ជនភៀស​ខ្លួន​ទាំងនោះ​ទៅ​ឲ្យ​ឆ្ងាយ​ពី​ព្រំដែន ដើម្បី​ផ្តល់នូវអ្វីៗ ដែលពួកគេត្រូវការ និង​ធានា​សុត្ថិភាព​ដល់​ពួកគេ»។

លោក Chalie Yaxley បាន​ថ្លែង​ថា ទីភ្នាក់ងារ UNHCR កំពុងតែ​ប្រណាំង​ប្រជែង​ជាមួយ​នឹង​ពេល​វេលា ដើម្បី​ផ្តល់ជម្រក​និង​ជំនួយ​ផ្សេងៗ​ទៀត​ដល់​ជនភៀស​ខ្លួន​ដែល​ទើប​តែ​មក​ដល់។ លោក​ថ្លែង​ថា ជនភៀស​ខ្លួន​ដែល​ទើប​តែ​មក​ដល់ កំពុង​ស្នាក់នៅ​ក្នុងជម្រក ដែល​ពួកគេ​បាន​ទទួល​សម្ភារៈ​ជំនួយ ដែលរួមមាន ភួយ កន្ទេល មុង ហើយនឹងម្ហូបអាហារក្តៅៗ​ផងដែរ។

កាលពី​ពាក់កណ្តាលខែមករា​កន្លងទៅនេះ រដ្ឋាភិបាល​ប្រទេស​កាមេរូនបានបង្ខំចិត្ត​បញ្ជូន​ជនភៀសខ្លួន​នីហ្សេរីយ៉ា​ប្រមាណជា ៩.០០០ នាក់ ដែល​បាន​ភៀសខ្លួន​ពី​រដ្ឋBorno ដែល​មាន​ការវាយ​ប្រយុទ្ធគ្នា។ លោក Chalie Yaxley បាន​និយាយ​ថា ទីភ្នាក់ងារ UNHCR បាន​តាមដាន​អំពី​វាសនា​របស់​អ្នកទាំងនោះ។ លោក​បាន​ទទួល​ស្គាល់​ថា ទោះជា​យ៉ាងណាក៏ដោយ វាមាន​ការលំបាក ក្នុង​ការស្វែងរក​ព័ត៌មាន​ថា តើ​ពួកគេ​នៅ​ឯណា​ឥឡូវនេះ និង​ស្ថានភាព​របស់ពួកគេ ដោយសារតែអសន្តិសុខ ធ្វើឲ្យ​គេ​មាន​ការលំបាក​ក្នុងការ​ចេញ​ចូល​តំបន់​នោះ។

ពួក Boko Haram បានស្វះស្វែង​រកវិធី ដើម្បី​បំផ្លាញ​រដ្ឋាភិបាលនីតិរដ្ឋរបស់​ប្រទេស​នីហ្សេរីយ៉ា ហើយ​ចង់​បង្កើត​រដ្ឋាភិបាល​ដែល​ប្រតិបត្តិ​តាម​សាសនា​ឥស្លាម​មួយ​ក្រោម​ច្បាប់​មូស្លីម ដែល​ហៅ​ថា ស្ហារៀ (Shariah)៕

ប្រែសម្រួលដោយអ្នកស្រី លី ម៉ូរីវ៉ាន់

XS
SM
MD
LG