អាជ្ញាធរកូរ៉េខាងត្បូង កំពុងស៊ើបអង្កេតអំពីការស្លាប់មនុស្ស២នាក់ ដែលអ្នកទាំង២នោះមានជំងឺប្រចាំកាយ ហើយដែលបានស្លាប់តែប៉ុន្មានថ្ងៃ បន្ទាប់ពីបានចាក់វ៉ាក់សាំងរបស់ក្រុមហ៊ុន AstraZeneca។ នេះតាមសេចក្តីរាយការណ៍របស់ទីភ្នាក់ងារព័ត៌មាន Reuters។
ក្រុមហ៊ុន AstraZeneca បានបញ្ជាក់ថា ខ្លួនបានដឹងពីការស៊ើបអង្កេតដោយទីភ្នាក់ងារប្រយុទ្ធនឹងជំងឺឆ្លងកូរ៉េ ឬ KDCA ក៏ប៉ុន្តែថា សុវត្ថិភាពនៃវ៉ាក់សាំង AstraZeneca បានត្រូវសិក្សាយ៉ាងទូលំទូលាយនៅក្នុងការសាកល្បងដោយមានទិន្នន័យបានបញ្ជាក់ថា វ៉ាក់សាំងនេះជាទូទៅមានសុវត្ថិភាព។
អ្នកស្រី Jeong Eun-kyeong នាយក KDCA បានប្រាប់សន្និសីទកាសែតថា៖ «KDCA កំពុងស្រាវជ្រាវជាមួយអាជ្ញាធរមូលដ្ឋានដែលពាក់ព័ន្ធ ដើម្បីបញ្ជាក់ថា តើមានជាប់ទាក់ទិននឹងការចាក់វ៉ាក់សាំងដែរ ឬយ៉ាងណា»។
អ្នកជំងឺអាយុ៦៣ឆ្នាំម្នាក់ដែលស្ថិតនៅកន្លែងថែទាំមនុស្សចាស់ដែលមានជំងឺខួរក្បាល បានចេញរោគសញ្ញាដែលរួមមានគ្រុនក្តៅខ្លាំង បន្ទាប់ពីចាក់វ៉ាក់សាំងកាលពី៤ថ្ងៃមុននោះ។ បុរសនេះ បានត្រូវគេដឹកទៅមន្ទីរពេទ្យកាលពីថ្ងៃអង្គារ ក៏ប៉ុន្តែបានស្លាប់ បន្ទាប់ពីបានបង្ហាញរោគសញ្ញាឈាមមានជាតិពុល និងរលាកសួត។
អ្នកជំងឺនៅកន្លែងថែទាំមនុស្សចាស់ម្នាក់ទៀតមានអាយុខ្ទង់៥០ឆ្នាំប្លាយដែលមានជំងឺបេះដូងនិងទឹកនោមផ្អែម បានស្លាប់កាលពីថ្ងៃពុធ បន្ទាប់ពីគាំងបេះដូង ក្រោយពីបានទទួលការចាក់វ៉ាក់សាំងកាលពីមួយថ្ងៃមុន។
មជ្ឈមណ្ឌល KDCA បានបញ្ជាក់ថា មានមនុស្ស២០៧នាក់ ដែលមានប្រតិកម្មក្រោយបានទទួលការចាក់វ៉ាក់សាំងកូវីដ១៩ ដោយ៣ករណីមានប្រតិកម្មអាល្លែកហ្ស៊ីយ៉ាងខ្លាំង៕
