ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អង្គការ WHO អនុញ្ញាត​ឲ្យ​ប្រើ​ប្រាស់​ក្នុង​គ្រា​អាសន្ន​នូវ​វ៉ាក់សំាង​របស់​ AstraZeneca​ ចំនួន​២


រូបឯកសារ៖ វ៉ាក់សាំងបង្ការជំងឺកូវីដ១៩ របស់ក្រុមហ៊ុន AstraZeneca ត្រូវបានប្រើប្រាស់នៅមជ្ឈមណ្ឌលសុខភាព Wellcome ក្នុងទីក្រុង Ilford ចក្រភពអង់គ្លេស កាលពីថ្ងៃទី៥ ខែកុម្ភៈ ឆ្នាំ២០២១។

អង្គការ​សុខភាព​ពិភពលោក (WHO) បាន​ប្រកាស​កាល​ពី​ថ្ងៃ​ច័ន្ទ​ថា ​ខ្លួន​បាន​អនុញ្ញាត​ឲ្យ​ប្រើប្រាស់ក្នុង​គ្រា​អាសន្ន​នូវ​វ៉ាក់សំាង​កូវីដ១៩ ចំនួន​ពីរ​របស់​ក្រុមហ៊ុន AstraZeneca-Oxford ដែល​នេះ​ជា​សកម្មភាព​មួយដែល​នឹង​ជួយ​បង្កើន​ការ​ផ្គត់ផ្គង់​វ៉ាក់សាំង​ទូទំាង​ពិភព​លោក​ នៅ​ប៉ុន្មាន​សប្ដាហ៍​ខាង​មុខ។

អង្គការ WHO បាន​ឲ្យ​ដឹង​ថា​វ៉ាក់សំាង​ទំាង​នេះ មាន​សុវត្ថិភាព​សម្រាប់​មនុស្ស​ ដែល​មាន​អាយុ​ ១៨ ឆ្នាំ​ឡើង​ទៅ ហើយ​នឹង​ត្រូវ​បាន​ចែកចាយ​តាម​រយ:​គម្រោង​វ៉ាក់សាំង​ COVAX របស់​អង្គការ WHO ដែល​ត្រូវ​បាន​បង្កើត​ឡើង​ ដើម្បី​ចែក​ចាយ​វ៉ាក់សាំង​ដល់​ប្រទេស​ដែល​មាន​ចំណូល​ទាប និង​មធ្យម។

វ៉ាក់សាំង​ថ្មី​ទំាង​ពីរ​ដែល​ត្រូវ​បាន​អនុញ្ញាត​ឱ្យ​ប្រើ​នេះ មួយ​ត្រូវ​បាន​ផលិត​ដោយក្រុមហ៊ុន AstraZeneca-SKBio នៅ​ក្នុង​ប្រទេស​កូរ៉េខាង​ត្បូង និង​មួយ​ទៀត​ផលិត​ដោយ​វិទ្យាស្ថាន Serum នៃ​ប្រទេស​ឥណ្ឌា។ ក្រុមហ៊ុន AstraZeneca ផ្គត់ផ្គង់វ៉ាក់សាំង​ភាគ​ច្រើន​ក្នុង​គម្រោង COVAX។

ការ​អនុម័ត​នេះ ក៏​អនុញ្ញាត​ឲ្យ​ប្រទេស​ទាំង​ឡាយ​ពន្លឿន​ការ​អនុម័ត​ការ​ប្រើប្រាស់​ពី​និយ័តករ​ក្នុង​ស្រុកដើម្បី​នាំ​ចូល និង​ចែកចាយ​វ៉ាក់សាំង។​ អង្គការ WHO ចំណាយ​ពេល​មិន​ដល់​មួយ​ខែ​ទេ ក្នុង​ការ​ត្រួត​ពិនិត្យ​ទិន្នន័យ លើ​គុណភាព​ សុវត្ថិភាព និង​ប្រសិទ្ធភាព​នៃ​ថ្នាំ និង​អនុញ្ញាត​ឲ្យ​ប្រើ​វ៉ាក់សំាង​ទំាង​នេះ​ក្នុង​គ្រាអាសន្ន។​

នាយក​អង្គការ​ WHO លោក Tedros Adhanom Ghebreyesus បាន​ថ្លែង​នៅ​ក្នុង​សន្និសីទ​សារព័ត៌មាន​កាល​ពី​ថ្ងៃ​ច័ន្ទ​ថា៖ «ឥឡូវ​នេះ​ យើងបាន​ត្រៀម​រួចរាល់​គ្រប់​លក្ខខណ្ឌ​ក្នុង​ការ​ចែកចាយ​វ៉ាក់សំាង​ឲ្យ​បាន​លឿន។ ប៉ុន្តែ​យើង​ត្រូវ​តែ​ពង្រីកផលិតកម្ម​ទៀត»៕

XS
SM
MD
LG