ភ្ជាប់​ទៅ​គេហទំព័រ​ទាក់ទង

logo-print
ព័ត៌មាន​​ថ្មី

សហរដ្ឋ​អាមេរិក​ស្វាគមន៍​ការ​មក​ដល់​កម្ពុជា​នូវ​វ៉ាក់សាំង​ AstraZeneca សម្រាប់​បង្ការ​ជំងឺ​កូវីដ​១៩


រដ្ឋមន្ត្រីក្រសួងសុខាភិបាលលោក ម៉ម ប៊ុនហេង និងមន្ត្រីតំណាងអង្គការយូនីសេហ្វនិងអង្គការសុខភាពពិភពលោក ក្នុងពិធីទទួលវ៉ាក់សាំង​បង្ការ​ជំងឺ​កូវីដ១៩ ​របស់​ក្រុមហ៊ុន​ AstraZeneca​ នៅអាកាសយានដ្ឋានអន្តរជាតិភ្នំពេញ ថ្ងៃ​អង្គារ​ ទី​២​ ខែ​មីនា​ ឆ្នាំ​២០២១​។ (ខាន់​ សុគុំមនោ/​វីអូអេ​)

សហរដ្ឋ​អាមេរិក នៅ​ថ្ងៃ​ពុធ​នេះ បាន​ស្វាគមន៍​វ៉ាក់សាំង​បង្ការ​ជំងឺ​កូវីដ​១៩​របស់​ក្រុមហ៊ុន AstraZeneca ​ដែល​បាន​មក​ដល់​កម្ពុជា ​កាល​ពី​យប់​ថ្ងៃ​អង្គារ។

ឯកអគ្គរដ្ឋទូត​សហរដ្ឋ​អាមេរិក​ប្រចាំ​កម្ពុជា​ លោក W. Patrick Murphy បាន​និយាយ​នៅ​ក្នុង​សេចក្តី​ប្រកាស​ព័ត៌មាន​មួយ ដែល​ត្រូវ​បាន​ចេញ​ផ្សាយនៅ​ថ្ងៃ​ពុធ​នេះ​ថា សហរដ្ឋ​អាមេរិក​គាំទ្រ​ការ​ឆ្លើយតបរបស់​ប្រទេស​កម្ពុជា ចំពោះ​ការ​ឆ្លង​រាលដាល​នៃ​ជំងឺ​កូវីដ​១៩ តាមរយៈ​យន្តការ​កូវ៉ាក់​ (COVAX)។

កូវ៉ាក់គឺជាកម្មវិធីផ្ដល់វ៉ាក់សាំងបង្ការជំងឺកូវីដ១៩ ជាសកល ដែលផ្ដួចផ្ដើមឡើងដោយអង្គការសុខភាពពិភពលោក (WHO)។

ក្រោម​យន្តការ​កូវ៉ាក់ ដែល​ត្រូវ​បាន​ទទួល​ស្គាល់​ដោយ​អង្គការ​សហប្រជាជាតិ វ៉ាក់សាំង​បង្ការ​ជំងឺ​កូវីដ១៩ ឈ្មោះ AstraZeneca ចំនួន​៣២៤ ​០០០ ដូស ដែលផលិត​នៅ​ប្រទេស​ឥណ្ឌា ត្រូវ​បាន​ដឹក​ជញ្ជូន​មក​ដល់​រាជធានី​ភ្នំពេញ​នៅ​យប់ថ្ងៃ​ទី​២​ខែ​មីនា ឆ្នាំ​២០២១។

យន្តការ​កូវ៉ាក់​នឹង​ផ្តល់​ឲ្យ​កម្ពុជា​នូវ​វ៉ាក់សាំង​សរុប​ចំនួន ​១ លាន ១ ​សែន​ដូស នៅ​ត្រឹម​ដំណាច់​ខែ​ឧសភា​ខាង​មុខ។​ នេះ​បើ​យោង​តាម​ការ​ប្រកាស​រួម​គ្នា​រវាង​ក្រសួង​សុខាភិបាល​កម្ពុជា អង្គការ​យូនីសេហ្វ​ និង​អង្គការ​សុខភាព​ពិភពលោក។

​កម្ពុជា​ស្ថិត​ក្នុង​ចំណោម​ប្រទេស​ដំបូង​គេ​ក្នុង​តំបន់​ដែល​ទទួល​បាន​វ៉ាក់សាំង​បង្ការ​ជំងឺ​កូវីដ​១៩​ នេះ ​ពី​យន្តការ​កូវ៉ាក់ ដែល​ប្តេជ្ញា​ផ្តល់​វ៉ាក់សាំង​ប្រឆាំង​ជំងឺ​កូវីដ​១៩​ ដែល​មាន​ប្រសិទ្ធភាព​និង​សុវត្ថិភាព​ ដល់​បណ្តា​ប្រទេស​ ដែល​មាន​ចំណូល​ទាប​និង​មធ្យម​ចំនួន​៩២​នៅ​ទូទាំង​ពិភពលោក។

កាល​ពី​ពេល​ថ្មីៗ​នេះ សហរដ្ឋ​អាមេរិក ​បាន​ប្រកាស​ផ្តល់​ជំនួយ​ចំនួន​ ២ ពាន់​លាន​ដុល្លារ​ក្នុង​ដំណាក់​កាល​ដំបូង ជា​ការរួម​ចំណែក​ជាមួយ​យន្តការ​កូវ៉ាក់ ដើម្បី​ឆ្លើយតប​ទៅ​នឹង​ការ​ឆ្លង​រាល​ដាល​ជា​សកល​នៃ​ជំងឺ​កូវីដ​១៩​នេះ។

កន្លង​មក សហរដ្ឋ​អាមេរិក​ក៏​បាន​ផ្តល់​ជំនួយ​ជាង​ ១១ ​លាន​ដុល្លារ​ដល់​ប្រទេស​កម្ពុជា​ ដើម្បី​ជា​ការ​ឆ្លើយ​តប​ទៅ​នឹង​ការឆ្លង​រាលដាល​នៃ​ជំងឺ​កូវីដ​១៩​ និង​ដើម្បី​ជួយ​ដល់​ការ​ស្តារ​សេដ្ឋកិច្ច​ឡើង​វិញ​ក្នុង​ប្រទេស​កម្ពុជា​ផងដែរ៕

XS
SM
MD
LG