ការផ្ទុះដ៏ខ្លាំងក្លាដោយសារគ្រាប់ផ្លោងបានធ្វើឱ្យរង្គើតំបន់ Zaporizhzhia នៃប្រទេសអ៊ុយក្រែន ដែលតំបន់នេះគឺជាទីតាំងរបស់រោងចក្រថាមពលនុយក្លេអ៊ែរដ៏ធំជាងគេបំផុតរបស់ទ្វីបអឺរ៉ុប។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន AP ដែលយោងលើទីភ្នាក់ងារថាមពលបរមាណូអន្តរជាតិ (IAEA)។
ទីភ្នាក់ងារ IAEA នេះបានអំពាវនាវឱ្យមាន«វិធានការបន្ទាន់ដើម្បីជួយបង្ការកុំឱ្យមានឧបទ្ទវហេតុនុយក្លេអ៊ែរកើតឡើង» នៅក្នុងរោងចក្រថាមពលនុយក្លេអ៊ែរដែលកំពុងកាន់កាប់ដោយរុស្ស៊ីនេះ។
ការបាញ់ស្រោចខ្លាំងក្លារបស់យោធារុស្ស៊ី ដែលគ្រាន់តែថ្ងៃអាទិត្យប៉ុណ្ណោះគឺមានជិត ៤០០ គ្រាប់ ក៏បានប៉ះចំតំបន់មួយចំនួននៅភាគខាងកើតប្រទេសអ៊ុយក្រែនផងដែរ ហើយការប្រយុទ្ធគ្នាខ្លាំងក្លានៅលើសមរភូមិបានធ្វើឱ្យរង្គើតំបន់ Donetsk នៅភាគខាងកើត។ នេះបើតាមការបញ្ជាក់របស់ប្រធានាធិបតីអ៊ុយក្រែនលោក Volodymyr Zelenskyy កាលពីយប់ថ្ងៃអាទិត្យ។
លោក Rafael Mariano Grossi អគ្គនាយកទីភ្នាក់ងារ IAEA បាននិយាយថា ការផ្ទុះជាច្រើននៅជិតរោងចក្រថាមពលនុយក្លេអ៊ែរនេះកាលពីល្ងាចថ្ងៃសៅរ៍និងព្រឹកថ្ងៃអាទិត្យ បានបញ្ចប់នូវបរិយាកាសស្ងប់ស្ងាត់មួយរយៈកន្លងមកនៅជុំវិញរោងចក្រនេះ ដែលនេះគឺជាទីតាំងនៃការវាយប្រយុទ្ធគ្នារវាងកងទ័ពរុស្ស៊ីនិងកងទ័ពអ៊ុយក្រែន តាំងពីពេលដែលរុស្ស៊ីបានឈ្លានពានអ៊ុយក្រែននៅថ្ងៃទី ២៤ ខែកុម្ភៈមក។
ការវាយប្រយុទ្ធគ្នានេះបានបង្កឱ្យមានការភ័យខ្លាចថា គ្រោះមហន្តរាយនុយក្លេអ៊ែរអាចកើតឡើងជាងពេលណាៗទាំងអស់ តាំងពីពេលដែលកងទ័ពរុស្ស៊ីបានកាន់កាប់រោងចក្រនេះក្នុងអំឡុងពេលដំបូងៗនៃសង្គ្រាមនេះមក៕
គ្រាប់ផ្លោងរបស់រុស្ស៊ីផ្ទុះជិតរោងចក្រនុយក្លេអ៊ែរអ៊ុយក្រែន
រដ្ឋធានីកៀវ ប្រទេសអ៊ុយក្រែន —
