ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ព្រឹទ្ធសភា​រុស្ស៊ី​អនុម័ត​ដាក់​បញ្ចូល​តំបន់ ៤ នៃ​ប្រទេស​អ៊ុយក្រែន​ជា​ផ្នែក​មួយ​របស់​រុស្ស៊ី


ព្រឹទ្ធសភា​ប្រទេស​រុស្ស៊ី​បាន​អនុម័ត​នៅ​ថ្ងៃ​អង្គារ​នេះ​ដាក់​បញ្ចូល​តំបន់ ៤ នៃ​ប្រទេស​អ៊ុយក្រែន​ជា​ផ្នែក​មួយ​នៃ​ប្រទេស​រុស្ស៊ី។
ព្រឹទ្ធសភា​ប្រទេស​រុស្ស៊ី​បាន​អនុម័ត​នៅ​ថ្ងៃ​អង្គារ​នេះ​ដាក់​បញ្ចូល​តំបន់ ៤ នៃ​ប្រទេស​អ៊ុយក្រែន​ជា​ផ្នែក​មួយ​នៃ​ប្រទេស​រុស្ស៊ី។

ព្រឹទ្ធសភា​ប្រទេស​រុស្ស៊ី​បាន​អនុម័ត​នៅ​ថ្ងៃ​អង្គារ​នេះ​ដាក់​បញ្ចូល​តំបន់ ៤ នៃ​ប្រទេស​អ៊ុយក្រែន​ជា​ផ្នែក​មួយ​នៃ​ប្រទេស​រុស្ស៊ី។ តំបន់​ទាំង ៤ នោះ​គឺ​តំបន់ Donetsk តំបន់ Luhansk តំបន់ Kherson និង​តំបន់ Zaporizhzhia ដែល​ប្រព័ន្ធ​ផ្សព្វផ្សាយ​រដ្ឋ​របស់​រុស្ស៊ី​បាន​ផ្សាយ​កាលពី​ពេល​ថ្មីៗ​នេះ​ថា ប្រជាពលរដ្ឋ​ភាគ​ច្រើន​ដែល​បាន​ចូលរួម​នៅ​ក្នុង​ការ​ធ្វើ​ប្រជាមតិ​នៅ​ក្នុង​តំបន់​ទាំង​នេះ​គាំទ្រ​ឱ្យ​មាន​ការ​ដាក់​បញ្ចូល​តំបន់​ទាំង​នេះ​ជា​ផ្នែក​មួយ​របស់​រុស្ស៊ី។

ការ​ធ្វើ​ប្រជាមតិ​និង​ដំណើរការ​ដាក់​បញ្ចូល​នេះ​ត្រូវ​បាន​ប្រទេស​អ៊ុយក្រែន​និង​សម្ព័ន្ធមិត្ត​បស្ចិម​ប្រទេស​របស់​ខ្លួន​ថ្កោលទោស និង​ត្រូវ​បាន​អគ្គលេខាធិការ​អង្គការ​សហប្រជាជាតិ​លោក Antonio Guterres ហៅ​ថា​ជា «ការ​ធ្វើ​ឱ្យ​កាន់តែ​ធ្ងន់ធ្ងរ​ប្រកប​ដោយ​គ្រោះថ្នាក់» ដែល «គ្មាន​តម្លៃ​ផ្លូវ​ច្បាប់» អ្វី​ទាំងអស់។

រដ្ឋសភា​រុស្ស៊ី​បាន​ផ្ដល់​ការ​យល់ព្រម​រួច​ហើយ​ចំពោះ​ការ​ដាក់​បញ្ចូល​នេះ បន្ទាប់ពី​ប្រទេស​រុស្ស៊ី​បាន​រៀបចំ​ឱ្យ​មាន​ការ​ធ្វើ​ប្រជាមតិ​នៅ​ក្នុង​តំបន់​ទាំង ៤ ដែល​គ្រប់គ្រង​ដោយ​ទាហាន​រុស្ស៊ី​នេះ​ឡើង។

រដ្ឋាភិបាល​អ៊ុយក្រែន​បាន​បញ្ជាក់​ថា ការ​ធ្វើ​ប្រជាមតិ​នេះ​ត្រូវ​បាន​ធ្វើ​ឡើង​នៅ​ក្រោម​ស្ថានការណ៍​បង្ខិតបង្ខំ និង​មិន​តំណាង​ឱ្យ​ឆន្ទៈ​របស់​ប្រជាពលរដ្ឋ​នៃ​តំបន់​ទាំង ៤ នេះ​ទេ។

កាលពី​សប្ដាហ៍​មុន លោក Guterres បាន​និយាយ​ថា៖ «ការ​ភ្ជាប់​យក​ទឹកដី​របស់​ប្រទេស​ណា​មួយ​ដោយ​ប្រទេស​មួយ​ផ្សេង​ទៀត​តាម​រយៈ​ការ​គំរាមកំហែង​ឬ​ក៏​ការ​ប្រើ​កម្លាំង​គឺ​ជា​ការ​រំលោភ​លើ​គោលការណ៍​ធម្មនុញ្ញ​របស់​អង្គការ​សហប្រជាជាតិ​និង​ច្បាប់​អន្តរជាតិ»។

ស្រប​ពេល​ដែល​ប្រទេស​រុស្ស៊ី​បាន​ជំរុញ​ទៅ​មុខ​នូវ​ការ​ភ្ជាប់​យក​តំបន់​ទាំង​នេះ កងទ័ព​អ៊ុយក្រែន​បាន​វិវឌ្ឍ​ទៅ​មុខ​នៅ​ក្នុង​ការ​វាយបក​តបត​ទៅ​វិញ​នៅ​ក្នុង​តំបន់​នានា​ដែល​កាន់កាប់​ដោយ​រុស្ស៊ី​ក្នុង​ប្រទេស​អ៊ុយក្រែន។

ប្រធានាធិបតី​អ៊ុយក្រែន​លោក Volodymyr Zelenskyy បាន​បញ្ជាក់​នៅ​ក្នុង​សុន្ទរកថា​កាលពី​យប់​ថ្ងៃ​ចន្ទ​ថា កងទ័ព​អ៊ុយក្រែន​បាន​ដណ្ដើម​កាន់កាប់​មក​វិញ​នូវ​ក្រុង​នានា​នៅ​តាម​តំបន់​មួយ​ចំនួន៕

ព័ត៌មាន​ខ្លះ​នៅ​ក្នុង​សេចក្ដី​រាយការណ៍​នេះ​ត្រូវ​បាន​ដកស្រង់​មកពី​ទីភ្នាក់ងារ​ព័ត៌មាន Associated Press ទីភ្នាក់ងារ​ព័ត៌មាន AFP និង​ទីភ្នាក់ងារ​ព័ត៌មាន Reuters

XS
SM
MD
LG