ប្រធានាធិបតីរុស្ស៊ីលោក Vladimir Putin បានប្រកាសប្រើច្បាប់អាជ្ញាសឹកនៅក្នុងតំបន់ ៤ របស់ប្រទេសអ៊ុយក្រែន ដែលផ្នែកខ្លះនៃតំបន់ទាំងនេះស្ថិតនៅក្រោមការគ្រប់គ្រងរបស់កងទ័ពរុស្ស៊ី ស្របពេលដែលកងទ័ពអ៊ុយក្រែនកំពុងបន្តការប្រយុទ្ធរបស់ខ្លួនដើម្បីរំដោះទឹកដីដែលកាន់កាប់ដោយរុស្ស៊ីនៅផ្នែកខាងកើតអ៊ុយក្រែន។
លោក Putin បាននិយាយនៅក្នុងកិច្ចប្រជុំតាមអនឡាញមួយជាមួយក្រុមប្រឹក្សាសន្តិសុខរុស្ស៊ីកាលពីថ្ងៃពុធម្សិលមិញថា លោកបានចុះហត្ថលេខាលើក្រឹត្យមួយដោយប្រកាសដាក់ឱ្យប្រើប្រាស់នូវច្បាប់អាជ្ញាសឹកនៅក្នុងតំបន់ Donetsk តំបន់ Luhansk តំបន់ Kherson និងតំបន់ Zaporizhzhia របស់ប្រទេសអ៊ុយក្រែន ដែលតំបន់ទាំងនេះត្រូវបានរុស្ស៊ីភ្ជាប់យកដោយខុសច្បាប់កាលពីខែកញ្ញា។
លោក Putin មិនបានបញ្ជាក់លម្អិតអំពីវិធានការដែលត្រូវប្រកាន់យកនៅក្រោមច្បាប់អាជ្ញាសឹកនេះទេ ប៉ុន្តែបានលើកឡើងថា បទបញ្ជារបស់លោកនឹងត្រូវចូលជាធរមានចាប់ពីពាក់កណ្តាលអធ្រាត្រថ្ងៃព្រហស្បតិ៍នេះតទៅ។ ក្រឹត្យដែលចេញដោយលោក Putin នេះនឹងផ្តល់ពេល ៣ ថ្ងៃដល់ទីភ្នាក់ងារអនុវត្តច្បាប់នានាដើម្បីដាក់សំណើជាក់លាក់។
វិធានការរបស់លោក Putin នេះបានធ្វើឡើង បន្ទាប់ពីលោក Vladimir Saldo ដែលជាមេដឹកនាំតំបន់ Kherson ដែលត្រូវបានលើកបន្តុបដោយរុស្ស៊ី បាននិយាយថា ខ្លួនបានចាប់ផ្តើមជម្លៀសជនស៊ីវិលរាប់ម៉ឺននាក់និងមន្ត្រីដែលរដ្ឋាភិបាលរុស្ស៊ីបានតែងតាំង នៅចំពេលដែលកំពុងប្រឈមនឹងការវាយប្រហាររុលចូលមកកាន់តែខ្លាំងរបស់កងទ័ពអ៊ុយក្រែន។
លោក Saldo បានបញ្ជាក់កាលពីថ្ងៃពុធថា ប្រជាពលរដ្ឋប្រមាណជាង ៥.០០០ នាក់បានចាកចេញពីតំបន់ Kherson នៅក្នុងរយៈពេល ២ ថ្ងៃកន្លងមកនេះ។
លោក Andriy Yermak ប្រធានខុទ្ទកាល័យប្រធានាធិបតីអ៊ុយក្រែនបាននិយាយកាលពីថ្ងៃពុធថា រដ្ឋាភិបាលរុស្ស៊ី «កំពុងព្យាយាមបំភ័យប្រជាពលរដ្ឋនៅក្នុងតំបន់ Khersonដោយផ្សព្វផ្សាយសារក្លែងក្លាយថា កងទ័ពអ៊ុយក្រែនបាញ់ផ្លោងដាក់ទីក្រុងនេះ និងបានធ្វើការឃោសនាបោកប្រាស់ដោយបង្ហាញអំពីការជម្លៀសប្រជាពលរដ្ឋ»៕
អ្នកស្រី Margaret Besheer អ្នកឆ្លើយឆ្លងព័ត៌មានរបស់ VOA ប្រចាំអង្គការសហប្រជាជាតិ រួមចំណែកនៅក្នុងសេចក្ដីរាយការណ៍នេះ។
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារព័ត៌មាន Associated Press ទីភ្នាក់ងារព័ត៌មាន AFP និងទីភ្នាក់ងារព័ត៌មាន Reuters។
លោក Putin ប្រកាសប្រើច្បាប់អាជ្ញាសឹកក្នុងតំបន់ ៤ របស់អ៊ុយក្រែនដែលរុស្ស៊ីបានភ្ជាប់យក
