ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អាជ្ញាធរ​ខណ្ឌ​មាន​ជ័យ​បង្ខំ​អ្នក​កាសែត​ឲ្យ​លុប​ចោល​រូបភាព​នៃ​ការ​វាយ​កម្ទេច​ផ្ទះ​របស់​ពលរដ្ឋ​នៅ​បឹង​ទំពុន


ប្រជាពលរដ្ឋនៅបឹងទំពុន រាជធានី​ភ្នំពេញ ឈរមើលតំបន់ផ្ទះរបស់ពួកគេត្រូវបានវាយកម្ទេចដោយអាជ្ញាធរខណ្ឌមានជ័យ កាលពីថ្ងៃសុក្រ ទី១៣ ខែសីហា ឆ្នាំ២០២១។ (លាស់ លីបលីប/វីអូអេ)

កម្លាំង​សន្តិ​សុខ​ចម្រុះ​រាប់​សិប​នាក់ នៅ​ថ្ងៃ​សុក្រ​នេះ បាន​បន្ត​វាយ​កម្ទេច​ផ្ទះ​របស់​ប្រជាពលរដ្ឋ​នៅ​តំបន់​បឹង​ទំពុន​ក្នុង​ខណ្ឌ​មានជ័យ ដោយ​មាន​ការ​ឃ្លាំ​មើល​ការ​ថត​រូប​ភាព និង​វីដេអូ​របស់​អ្នក​សារព័ត៌មាន​យ៉ាង​តឹង​រ៉ឹង។ អ្នក​សារ​ព័ត៌​មាន​២​នាក់​ដែល​បាន​ចុះ​ទៅ​យក​ព័ត៌មាន​អំពី​ការ​វាយ​កម្ទេច​ផ្ទះ​របស់​ប្រជាពលរដ្ឋ ត្រូវ​បាន​អាជ្ញា​ធរ​ខណ្ឌ​មាន​ជ័យគំរាម​មិន​ឲ្យ​ផ្តិត​យក​សកម្មភាព​វាយ​កម្ទេច​ផ្ទះ និង​ការ​តវ៉ា​របស់​ប្រជាពល​រដ្ឋ ដោយ​បង្ខំ​ឲ្យ​លុប​ចោល​រូបភាព​ទាំង​នោះ។

កាល​ពី​ព្រឹក​ថ្ងៃ​សុក្រ ទី​១៣ ខែ​សីហា កម្លាំង​ចម្រុះ​រាប់​សិប​នាក់ បាន​ប្រើ​គ្រឿង​ចក្រ​វាយ​កម្ទេច​ផ្ទះ​របស់​ប្រជា​ពលរដ្ឋ ដែល​អាជ្ញាធរ​ចោទ​ថា​រស់​នៅ​ខុស​ច្បាប់​ក្នុង​តំបន់​បឹង​ទំពុន។ ពួកគេ​ត្រូវ​បាន​បង្ខំ​ឲ្យ​ចេញ​ពី​ផ្ទះ តាម​ការ​កំណត់​រយៈ​ពេល​មួយ​សប្តាហ៍​របស់​អាជ្ញាធរ​ឲ្យ​ពលរដ្ឋ​រុះ​រើ​ចេញ។

កម្លាំង​សន្តិសុខ​ប្រមាណ២០​នាក់​បាន​មក​រារាំង​ប្រជា​ពលរដ្ឋ និង​អ្នក​សារ​ព័ត៌​មាន​មិន​ឲ្យ​យក​ព័ត៌​មាន និងថត​រូប​នោះ​ទេ។ នៅ​វេលា​ម៉ោង​៩​និង​១០នាទី កម្លាំង​បាន​បណ្តេញ​អ្នក​សារព័ត៌​មាន​ពីរ​នាក់​ចេញ​ក្នុង​នោះ​មាន​អ្នក​សារ​ព័ត៌​មាន​វីអូអេ​ផង​ដែរ និ​ង​បាន​ដក​យក​បណ្ណ​សារព័ត៌​មាន​របស់​អ្នក​កាសែត​ម្នាក់។

លោក អាន វិចិត្រ អ្នក​យក​ព័ត៌​មាន​របស់​ខេមបូចា បាន​ប្រាប់​VOA​ថា​លោក​ត្រូវ​បាន​កម្លាំង​សមត្ថកិច្ច ចម្រុះ​ខណ្ឌ​មាន​ជ័យ​ហាម​មិន​ឲ្យ​ផ្តិត​យក​រូប​ភាព​នៃ​ការ​តវ៉ា​របស់​ប្រជាពលរដ្ឋ ហើយថែម​ទាំង​បាន​ដក​យក​បណ្ណ​សារ​ព័ត៌​មាន​សម្គាល់​ខ្លួន​របស់​លោក​និង«បង្ខំ»​រូប​លោក​ឲ្យ​ចាក​ចេញ​ពី​កន្លែង​នោះ។ លោក​បន្ត​ថា​សមត្ថកិច្ច​បាន​ព្រមាន​ថា​នឹង​មាន​វិធាន​ការ​ផ្សេង​ទៀត ប្រសិន​បើ​លោក​នៅ​តែ​មិន​ចេញ​ពី​តំបន់​នោះ។

លោក​ថ្លែង​ថា៖ «បើ​យើង​និយាយ​មែន​ទែន [កង​កម្លាំង​]ខណ្ឌ​តែ​ម្តង គាត់​រោម​[ព័ទ្ធ​]យើង​ជិត ហើយ​គាត់​បាន​មក​សួរ​នាំ​យើង។ មក​សួរ​នាំ​ថា​មក​ពី​ខាង​អី ខាង​ណា​អញ្ចឹង​ទៅ។ ហើយ​ស្នើ​ឲ្យ​យើង​លុប​រូប​ដែល​ខ្ញុំ​បាន​ប្រាប់​គាត់​ថា​យើងមក​ពី​ស្ថាប័ន​សារ​ព័ត៌មាន​ហើយ​គាត់​ស្នើ​សុំ​មើល​កាត​មើល​អី​[ផ្សេងៗ]​អញ្ចឹង​ទៅ។ យើង​ក៏​បាន​បង្ហាញ​កាត ហើយ​គាត់​ក៏​បាន​ថត​រូប​ថត​អី​ហើយ​ក៏​ឲ្យ​យើង​លុប​រូប​ចេញ លក្ខណៈ​ដែល​យើង​អត់​ទាន់​បាន​ថត​មា​ន​រូប​ភាពអី​ផង​[ហើយ]​មាន​អ្នក​បញ្ជា​មក​ពីក្រោយ​[តាម​អាយកូម​]​ឲ្យ​ដក​កាតយើង​រក្សា​ទុក ហើយ​អញ្ចឹង​ក៏មាន​អ្នកដក​...គេ​ក៏​បាន​ប្រាប់​ដែរ​ថា​យើង​ធ្វើ​តាម​គេ​[សមត្ថកិច្ច] យើង​នឹង​មិន​មាន​បញ្ហា​អ្វី​នោះ​ទេ»។

លោក អាន វិចិត្រ ចាត់​ទុក​ថា​នេះ​ជា​«ការ​គំរាម​កំហែង​ដ៏​ធ្ងន់ធ្ងរ» មកលើ​អ្នក​សារ​ព័ត៌មាន​ក្នុង​ការ​បំពេញ​ការងារ​តាម​វិជ្ជា​ជីវៈ​សារ​ព័ត៌​មាន។

លោក​បញ្ជាក់​ថា​៖ «ខ្ញុំ​ម្នាក់​ហើយ​ខាង​វីអូអេ​ម្នាក់​ដែល​បាន​ចុះ​ទៅ​ដែរ ហើយ​ត្រូវ​បាន​អាជ្ញាធរ​ឲ្យ​លុប ឬគាប​សង្កត់​ឲ្យ​លុប​រូបភា​ព​ដូច​គ្នា គំរាម​កំហែង​ឲ្យ​លុប​រូបភាព​ចេញ​ពី​កាមេរ៉ា ឬ​ទូរស័ព្ទ​ក៏ដូច​គ្នា​ហើយ​មិនអញ្ចឹង​គេ គេ​នឹង​មាន​ចំណាត់​ការ​មក​លើ​យើង»។

ប្រជាពលរដ្ឋ​ឈរ​មើល​សមត្ថកិច្ច​ប្រើ​គ្រឿង​ចក្រ​វាយ​កម្ទេច​ផ្ទះ​ថ្ម​របស់​ប្រជាពលរដ្ឋ​ នៅ​តំបន់​ជាប់​អាង​ស្តុក​ទឹក​បឹង​ទំពុន ក្នុង​សង្កាត់​បឹងទំពុន ខណ្ឌ​មានជ័យ នៅ​ថ្ងៃទី១១ ខែ​សីហា ឆ្នាំ​២០២១។ (លាស់ លីបលីប/វីអូអេ)
ប្រជាពលរដ្ឋ​ឈរ​មើល​សមត្ថកិច្ច​ប្រើ​គ្រឿង​ចក្រ​វាយ​កម្ទេច​ផ្ទះ​ថ្ម​របស់​ប្រជាពលរដ្ឋ​ នៅ​តំបន់​ជាប់​អាង​ស្តុក​ទឹក​បឹង​ទំពុន ក្នុង​សង្កាត់​បឹងទំពុន ខណ្ឌ​មានជ័យ នៅ​ថ្ងៃទី១១ ខែ​សីហា ឆ្នាំ​២០២១។ (លាស់ លីបលីប/វីអូអេ)

លោក អ៊ិត សូធឿត នាយក​ផ្នែក​ប្រព័ន្ធ​ផ្សព្វផ្សាយ​នៃ​មជ្ឈ​មណ្ឌល​កម្ពុជា​ដើម្បី​ប្រព័ន្ធ​ផ្សព្វផ្សាយ​ឯក​រាជ្យ ហៅ​កាត់​ថា​ CCIM បាន​ថ្លែង​ប្រាប់​ VOA​ ថា​នេះ​ជា​«ការ​គំរាម​កំហែង រឹត​ត្បិត​សេរី​ភាព​ដ៏​ធ្ងន់​ធ្ងរ»​មក​លើ​អ្នក​សារ​ព័ត៌​មាន ហើយ​វាក៏​ជា​សញ្ញា​មួយ​«កាន់​តែ​អាក្រក់» ដែល​មិន​គួរ​កើត​ឡើង​លើ​អ្នក​សារព័ត៌មាន។

លោក​ថ្លែង​ថា៖ «ក្នុង​ករណី​នេះ​ដូច​ឃើញ​អ្នក​សារព័ត៌​មាន​ព្រឹក​មិញ …. គឺ​នៅ​ថត​ផ្តិត​រូប​ភាព​នេះ​ពី​ចម្ងាយ អញ្ចឹង​វា​ហាក់​បី​ដូច​ជា​មិន​មាន​អ្វី​រារាំង​ដល់​ការ​អនុវត្ត​ច្បាប់​របស់​ពួ​ក​គាត់​ទេ។ ហើយ​គាត់​នៅ​តែ​មក​តាម​យាយីអ្នក​សារព័ត៌មាន​មិន​ឲ្យ​ថត ហើយ​គាត់​ថត​បាន​ហើយ​ហ្នឹង តម្រូវ​ឲ្យ​លុប​ទាំង​មួយ​ពីរ​បី​ហ្នឹង។ ខ្ញុំ​គិត​ថា​បែប​នេះ​ជា​សញ្ញា​ដ៏​អាក្រក់​មួយ​សម្រាប់​វិជ្ជាជីវៈ ក៏​ដូច​ជា​វិស័យ​សារ​ព័ត៌​មាន​នៅ​ក្នុង​ប្រទេស​កម្ពុជា​យើង»។

លោក អ៊ិត សូធឿត បន្តថា​ក្រសួង​ព័ត៌​មាន​បានបង្កើត​គណៈកម្មការ​ក្រម​សីល​ធម៌​វិជ្ជា​ជីវៈ​សារព័ត៌មាន ដើម្បីចង់​លើក​កម្ពស់​វិជ្ជាជីវៈ​របស់​អ្នក​សារព័ត៌​មាន និង​ក្រម​សីលធម៌​សារព័ត៌មាន ប៉ុន្តែ​អាជ្ញាធរ​ហាក់​បី​ដូច​ជា​មិន​យល់​អំពី​តួនាទី និង​បាន​ផ្តល់​តម្លៃ​ដល់​អ្នក​សារព័ត៌​មាន។

លោក​បន្ត​ថា៖ «អាជ្ញាធរ​មាន​ការ​រឹត​ត្បិត​អញ្ចឹង​វា​ហាក់​បីដូច​ជា​ផ្ទុយ​គ្នាជាមួយ​ក្រសួង​ព័ត៌​មាន​ដែល​ជា​សកម្មភាព​គាត់​កំពុង​តែ​ព្យាយាម​លើក​កម្ពស់​វិជ្ជាជីវៈ​[សា​រព័ត៌​មាន]​ដ៏​សំខាន់​មួយ​នេះ»។

លោក​ជំរុញ​ឲ្យ​ក្រសួង​ព័ត៌មាន​និង​អាជ្ញាធរ​ពាក់​ព័ន្ធ​គួរ​តែ​ជជែក​គ្នា​ឡើង​វិញ​ឲ្យ​យល់​អំពី​តួនាទី​របស់​អ្នក​សារ​ព័ត៌មាន។

រូបឯកសារ៖ ក្រុម​ប៉ូលិស​បង្ក្រាប​កុបកម្ម​ហាមឃាត់​អ្នក​កាសែត​មិន​ឲ្យ​ចូល​ទៅ​កាន់​ផ្លូវ​ធំ​នៅ​ក្បែរ​ទីស្នាក់ការ​គណបក្ស​សង្គ្រោះជាតិ ដែល​ស្ថិត​នៅ​ជាយ​រាជធានី​ភ្នំពេញ ថ្ងៃទី៣០ ខែឧសភា ឆ្នាំ២០១៦។
រូបឯកសារ៖ ក្រុម​ប៉ូលិស​បង្ក្រាប​កុបកម្ម​ហាមឃាត់​អ្នក​កាសែត​មិន​ឲ្យ​ចូល​ទៅ​កាន់​ផ្លូវ​ធំ​នៅ​ក្បែរ​ទីស្នាក់ការ​គណបក្ស​សង្គ្រោះជាតិ ដែល​ស្ថិត​នៅ​ជាយ​រាជធានី​ភ្នំពេញ ថ្ងៃទី៣០ ខែឧសភា ឆ្នាំ២០១៦។

នៅ​ពេល​ទាក់​ទង​ទៅ​កាល​ពី​ព្រឹក​ថ្ងៃ​សុក្រ លោក មាស សុភ័ណ្ឌ អ្នក​នាំ​ពាក្យ​ក្រសួង​ព័ត៌មាន​បាន​ប្រាប់ ​VOA​ ថា​ លោក​មិន​ទាន់​ទទួល​បា​ន​ព័ត៌មាន​ទាក់ទង​នឹង​ការ​ហាម​ឃាត់ និង​លុប​ចោល​រូបភាព​និង​វីដេអូ​របស់​អ្នក​សារព័ត៌​មាន​នោះ​ទេ ហើយ​លោក​សុំ​ពេល​ពិនិត្យ​មើល​ព័ត៌មាន​ជា​មុន​សិន។

លោក​ថ្លែង​ថា៖ «...ដោយ​សារ ខ្ញុំ​កំពុងតែ​រង់​ចាំ​ការ​ផ្តល់​ព័ត៌មាន​ពី​ខាង...មន្ទីរ​ព័ត៌​មាន​រាជ​ធានី។ អញ្ចឹង​ខ្ញុំ​មិន​ទទួល​បាន​ព័ត៌មាន​នេះ​ទេ​អញ្ចឹង​ចាំ​កន្លះ​ម៉ោង ឬ​មួយ​ម៉ោង​ទៀត​...»។

VOA ​ក៏​បាន​ទាក់​ទង​ទៅ​លោក មាស សុភ័ណ្ឌ ម្តង​ទៀត​លោក​សុំ​មិន​អត្ថាធិប្បាយ ដោយ​ស្នើ​ឲ្យ​សួរ​ទៅ​ខាង​អាជ្ញាធរ​ខណ្ឌ​មាន​ជ័យ​វិញ។

លោក​បញ្ជាក់​ថា៖ «អញ្ចេះ! រឿង​ហ្នឹង​សូម​ទៅ​សួរ​នាំ​អាជ្ញាធរដែល​ហាម​ឃាត់​ហ្នឹង​ណាស់!»

VOA ​មិន​អាច​សុំ​ការ​ឆ្លើយ​តប​ពី​អភិបាល​ខណ្ឌ​មាន​ជ័យ លោក ពេជ្រ កែវមុនី បានទេ​នៅ​ថ្ងៃ​សុក្រ​នេះ។ ចំណែក​អភិបាល​រង​ខណ្ឌ លោក ឡុង ង៉ែត បាន​លើក​ទូរស័ព្ទ រួចចុច​កាត់​ផ្តាច់ ពេល​ដឹង​ថា​អ្នក​សារព័ត៌មាន​វីអូអេ​ហៅ​ទូរ​ស័ព្ទ​ទៅ។

ទាក់​ទង​នឹង​ការ​បង្ខំ​ឲ្យ​អ្នក​សារព័ត៌មាន​លុប​ចោល​រូបភាព សមាគម​សម្ព័ន្ធ​អ្នកសារព័ត៌មាន​កម្ពុជា​ហៅ​កាត់ថាខេមបូចា ក៏បាន​ចេញ​សេច​ក្ដីថ្លែង​ការណ៍​«ថ្កោល​ទោស»​ចំពោះ​ទង្វើ​អាជ្ញាធរ​ខណ្ឌ​មានជ័យ។

លោក ណុប វី នាយក​ប្រតិបត្តិ​សមាគម​ខេមបូចា បាន​ថ្លែង​ក្នុង​សេច​ក្ដី​ថ្លែង​ការណ៍​ថា៖ «ការ​ដក​បណ្ណ​អ្នក​សារព័ត៌មាន ការ​គំរាម​កំហែង ការ​រារាំង​មិន​អនុញ្ញាត​ឲ្យ​ពួក​គាត់​បំពេញ​តួនាទី​ភារកិច្ច​បាន​ជា​ការ​រំលោភ​បំពាន​ធ្ងន់ធ្ងរ​ទៅ​ដល់​សេរីភាព​សារព័ត៌មាន ទៅ​ដល់​សិទ្ធិ​របស់​អ្នក​សារព័ត៌មាន​ហើយ​ជា​ការ​រំលោភ​ដល់​សិទ្ធិ​របស់​ប្រជាពលរដ្ឋ គឺ​សិទ្ធិ​ទទួល​បាន​ព័ត៌មាន»។

លោក​បានអំពាវ​នាវ​ដល់​អាជ្ញាធរ​ឲ្យ​បញ្ឈប់​សកម្ម​ភាព​រារាំង ការ​ធ្វើ​ទុក្ខ​បុក​ម្នេញ ការ​គំរាម​កំហែង​មក​លើ​អ្នក​សារ​ព័ត៌​មាន​ជា​បន្ទាន់ ហើយ​ផ្ដល់​ការ​សហការ​គ្នា​និង​ការ​គោរព​ទៅ​ដល់​ការ​អនុវត្ត​តួនាទី​របស់​អ្នក​សារព័ត៌​មាន។

អាជ្ញាធរ​ប្រើ​គ្រឿង​ចក្រ​វាយ​កម្ទេច​ផ្ទះ​ថ្ម​របស់​ប្រជាពលរដ្ឋ នៅ​តំបន់​ជាប់​អាង​ស្តុក​ទឹក​បឹង​ទំពុន ក្នុង​សង្កាត់​បឹង​ទំពុន ខណ្ឌ​មានជ័យ នៅ​ថ្ងៃទី១១ ខែសីហា ឆ្នាំ២០២១។ (លាស់ លីបលីប/វីអូអេ)
អាជ្ញាធរ​ប្រើ​គ្រឿង​ចក្រ​វាយ​កម្ទេច​ផ្ទះ​ថ្ម​របស់​ប្រជាពលរដ្ឋ នៅ​តំបន់​ជាប់​អាង​ស្តុក​ទឹក​បឹង​ទំពុន ក្នុង​សង្កាត់​បឹង​ទំពុន ខណ្ឌ​មានជ័យ នៅ​ថ្ងៃទី១១ ខែសីហា ឆ្នាំ២០២១។ (លាស់ លីបលីប/វីអូអេ)

កាល​ពី​ព្រឹក​ថ្ងៃ​សុក្រ ប្រជាពលរ​ដ្ឋ​ប្រមាណ៣០​នាក់បាន​នាំគ្នា​ទ្រ​ហោយំ និង​សុំ​អង្វរ​ឲ្យ​មាន​ដំណោះ​ស្រាយសមរម្យ។

អ្នកស្រី ស៊ុម ចាន់ថា អាយុ​៦៤​ឆ្នាំ​ដែល​ជា​ពលរដ្ឋ​ម្នាក់​ដែល​មាន​ដី​នៅ​កន្លែង​កើត​ហេតុ​នេះ បាន​ប្រាប់​អ្នក​សារព័ត៌​មាន​មុន​ពេល​អាជ្ញាធរ​វាយ​កម្ទេច​ផ្ទះ​ថា​អ្នកស្រី​នៅ​តែ​ទាម​ទារ​និង​ចង់​បាន​ដំណោះស្រាយ​មួយ​សម​រម្យ ដោយអះអាង​ថា​អ្នកស្រី​បា​ន​កាន់​កាប់​ដី​នេះ​ស្រប​ច្បាប់​ច្រើន​ឆ្នាំ​មក​ហើយ និង​មាន​ឯក​សារ​គ្រប់​គ្រាន់។

អ្នកស្រី​ថ្លែង​ថា៖ «ប្រសិន​បើ​ជា​មិន​មាន​ដំណោះ​ស្រាយ​ឲ្យ​ពួក​ខ្ញុំ​ពួក​ខ្ញុំ​នឹង​តវ៉ា​រហូត ពីព្រោះ​ខ្ញុំ​មាន​លិខិត​ស្នាម​របស់​ខ្ញុំ​គ្រប់​គ្រាន់ អត់​មាន​ខ្វះ​អី​នោះ​ទេ។ ទោះ​បី​យ៉ាង​ណា​ក៏​ដោយ ខ្ញុំ​តវ៉ា​រហូត​ទាល់​តែ​មាន​ដំណោះ​ស្រាយ​ឲ្យ​ពួក​ខ្ញុំ»។

គួរ​បញ្ជាក់​ថា​កាល​ពី​ថ្ងៃ​ទី​៦ ខែ​សីហា អាជ្ញាធរ​ខណ្ឌ​មាន​ជ័យ​រាជធានី​ភ្នំពេញ​បាន​ចេញ​លិខិត​ឲ្យ​ប្រជា​ពលរដ្ឋ​រស់​នៅ​តំបន់​ជាប់​អាង​ស្តុក​ទឹក​បឹង​ទំពុន​រុះរើ​ផ្ទះចេញ ដោយ​ទុក​រយៈ​ពេល​១​សប្តាហ៍​ដែល​ពលរដ្ឋ​អះអាង​មិន​មាន​ការ​ផ្តល់​សំណង​អ្វី​នោះ​ទេ។ អាជ្ញាធរ​ក៏​ព្រមាន​ចាត់​វិធាន​ការ​ច្បាប់ និង​រដ្ឋ​បាល​លើ​ប្រជាពលរដ្ឋ​ផង​ដែរ ប្រសិន​បើ​ពួកគេ​មិន​ព្រម​ចាក​ចេញ។ ការ​ឲ្យ​រុះ​រើ​ផ្ទះ​នេះ​ធ្វើឲ្យ​ប្រជាពលរដ្ឋ​មួយ​ចំនួន​អះអាង​ថា​ពួកគេ​មាន​ការ​លំបាក​យ៉ាង​ខ្លាំង​ទៅ​រក​ទី​តាំង​ថ្មីរស់​នៅខណៈ​ពួកគេ​មាន​ការខ្វះ​ខាត​ផ្នែកសេដ្ឋ​កិច្ច​ក្នុង​ពេល​វិបត្តិ​កូវីដ​១៩៕

XS
SM
MD
LG