ក្រុមអ្នកវិទ្យាសាស្ត្រកំពុងតាមដានស្ថានីយ៍អវកាសចិនមួយដែលត្រូវបានគេរំពឹងថា នឹងធ្លាក់មកលើភពផែនដីនាចុងសប្តាហ៍។ នេះជាវត្ថុធំបំផុតធ្វើដោយមនុស្សហើយធ្លាក់ចូលមកក្នុងបរិយាកាសផែនដីក្នុងមួយទសវត្សរ៍នេះ។
លោក Holger Krag ប្រធានការិយាល័យទីភ្នាក់ងារអវកាសអឺរ៉ុបផ្នែកតាមដានវត្ថុធ្លាក់ពីអាវកាសមកលើផែនដី និយាយថា ស្ថានីយ៍អវកាស Tiangong-1 របស់ចិនទំនងជានឹងធ្លាក់មកផែនដីនៅថ្ងៃអាទិត្យ។ លោក Krag បាននិយាយថា នៅមិនទាន់ច្បាស់នៅឡើយថា តើស្ថានីយ៍អវកាសនឹងធ្លាក់មកចុះភពផែនដី ប៉ុន្ដែបាននិយាយថា ទំនងជានឹងមិនមាននរណាម្នាក់រងរបួសទេ បើវាធ្លាក់មកភពផែនដីមែននោះ។
លោកឲ្យដឹងថា តាម បទពិសោធនិងតាមទ្រឹស្ដី វត្ថុធំដូច្នេះ ដែលធម្មតានៅសល់ចន្លោះពី២០ទៅ៤០ភាគរយនៃទំហំដើមរបស់វា ដែលមានទម្ងន់៨តោនកន្លះ នោះនឹងអាចមកដល់ផែនដីវិញ ហើយបន្ទាប់មកអាចត្រូវបានរកឃើញនៅលើដីនេះបើតាមការសន្មត់។ ប៉ុន្តែគ្រោះថ្នាក់បណ្តាលមកពីបំណែកមួយក្នុងចំណោមបំណែកទាំងនេះទំនងជានឹងមានតិចណាស់គឺកម្រដូចមនុស្ស ដែលត្រូវដូចរន្ទះពីរដងក្នុងមួយឆ្នាំ។
មន្ទីរពិសោធន៍អវកាសដំបូងរបស់ចិន Tiangong-1 ត្រូវបានដាក់ឱ្យដំណើរការនៅឆ្នាំ២០១១ សម្រាប់ជាកន្លែងសាកល្បងសមត្ថភាពចតដោយយានអវកាសចិនផ្សេងទៀតនិងដើម្បីសិក្សាលទ្ធភាពកសាងស្ថានីយ៍អវកាសអចិន្ត្រៃយ៍ធំជាងនេះ នៅឆ្នាំ ២០២៣។
លោក Krag និយាយថា យានទម្ងន់៨តោនកន្លះនេះនឹងចូលក្នុងបរិយាកាសក្នុងល្បឿន២៧ពាន់គីឡូម៉ែត្រក្នុងមួយម៉ោង។ តំបន់ដែលស្ថានីយ៍នេះធ្លាក់គឺនៅមហាសមុទ្រ៕
