ប្រទេសនីហ្សេរីយ៉ាជាប្រទេសដែលមានកូនក្រមុំជាអនីតិជនច្រើនបំផុតក្នុងទ្វីបអាហ្រ្វិក។ ទម្លាប់មួយនេះពេញនិយមនៅក្នុងតំបន់ភាគខាងជើងនៃប្រទេសនេះ ដែលមានជនមូស្លីមច្រើនលើសលប់ និងជាទីដែលក្រុមអ្នកកាន់សាសនាឥស្លាមអភិរក្សនិយមជំទាស់យ៉ាងខ្លាំងក្លាចំពោះការប្រឹងប្រែងដាក់អាពាហ៍ពិពាហ៍កុមារជាអំពើឧក្រិដ្ឋ។
កុមារី Rahmatu និង កុមារី Naja'atu មិនបានស្គាល់គ្នាពីមុនមកទេកាលពីប៉ុន្មានខែមុន។ ប៉ុន្តែកាលៈទេសៈស្រដៀងគ្នាបាននាំឲ្យពួកគេជួបគ្នា។ កុមារីទាំងពីរនាក់មានអាយុ១៤ឆ្នាំ ដូចគ្នា។ កុមារី Rahmatu បាននិយាយថា៖
«ខ្ញុំត្រូវបានបង្ខំឲ្យរៀបការដែលរៀបចំរួចជាស្រេចមួយ។ នេះជាមូលហេតុដែលខ្ញុំរត់គេចខ្លួន។ ខ្ញុំមិនបានស្រឡាញ់បុរសនោះទេ ហើយខ្ញុំមិនស្គាល់គាត់ឡើយ។ ខ្ញុំថែមទាំងមិនដែលឃើញគាត់ពីមុនមកទេ។ ថ្ងៃអាពាហ៍ពិពាហ៍ត្រូវបានកំណត់ ហើយនៅយប់មុនថ្ងៃអាពាហ៍ពិពាហ៍ ខ្ញុំបានរត់គេចខ្លួនតែម្តង»។
កុមារី Rahmatu និងកុមារី Naja'atu កំពុងរស់នៅក្នុងផ្ទះសម្រាប់កុមារនៅទីក្រុង Kaduna។ ពួកគេមិនចង់ត្រឡប់ទៅភូមិរបស់ពួកគេ ដែលនៅភាគខាងជើងវិញទេ។
ក្នុងភូមិដែលស្ថិតនៅភាគខាងជើងទីក្រុង Kaduna នេះ ជាធម្មតា កុមារីត្រូវបានឲ្យរៀបការ មិនថាពួកគេចង់ឬ មិនចង់នោះទេ។ កុមារី Aisha Ahmed អាយុ១៥ឆ្នាំ និងជាភរិយាម្នាក់បាននិយាយថា៖
«បើសិនជាខ្ញុំមានជម្រើស ពួកគេគួរតែឲ្យពេលខ្ញុំមួយឆ្នាំដើម្បីបញ្ចប់ការសិក្សា ប៉ុន្តែដោយសារនេះជាអ្វីដែលឪពុកម្តាយចង់បាន ខ្ញុំមិនមានជម្រើសនោះទេ»។
កុមារីម្នាក់ទៀតគឺនាង Sahura Misbahu ជាភរិយាម្នាក់មានអាយុ១៥ឆ្នាំនិយាយថា៖
«ចា៎! ពិតណាស់អ្នកប្រាកដជាមានអារម្មណ៍រន្ធត់និង ភ័យខ្លាច។ អ្នកយំពេលធ្វើដំណើរទៅកាន់គេហដ្ឋានថ្មីដោយសារអ្នកកំពុងចាកចេញពីឪពុកម្តាយរបស់អ្នក ហើយអ្នកមិនដឹងថា គេនឹងយកអ្នកទៅទីណាទេ»។
ចំណែកកុមារី Fadilah Bello ជា ភរិយាអាយុ១៦ឆ្នាំម្នាក់ទៀតបាននិយាយថា៖
«ខ្ញុំមិនបានចាប់អារម្មណ៍រឿងនេះទេ កាលនោះ។ ខ្ញុំខ្វល់តែរឿងរបស់ខ្ញុំ។ ខ្ញុំមិនបានគិតដល់រឿងអាពាហ៍ពិពាហ៍នោះទេ រហូតដល់ពេលព្រះជាម្ចាស់តម្រូវថា វាដល់ពេលហើយ»។
កុមារី Basira Bello អាយុ១៤ឆ្នាំ នឹងរៀបការនាពេលឆាប់ៗនេះជាមួយបុរសឈ្មោះ Salihu ដែលមានអាយុច្រើនជាងនាង២០ឆ្នាំ។ នាងមានក្តីរំភើប។ ឪពុករបស់នាងរំពឹងថា នាងនឹងគោរពតាមប្រពៃណីរបស់ប្រទេសនីហ្សេរីយ៉ា។ លោក Abubakar Bello ដែលជាឪពុករបស់នាង Basira បាននិយាយថា៖
«យើងបានប្រាប់នាងគ្រប់រឿងដែលនាងគួរតែដឹងទាំងអស់ ពីព្រោះប្រសិនបើនាងមិនគោរពតាមប្តីរបស់នាង នាងធ្វើអ្វីមិនកើតទេ»។
នៅក្នុងកម្រិតសហព័ន្ធ ប្រទេសនីហ្សេរីយ៉ាបានដាក់អាពាហ៍ពិពាហ៍កុមារ ថាជាអំពើខុសច្បាប់។ ច្បាប់សិទ្ធិកុមារដែលត្រូវបានអនុម័តកាលពីឆ្នាំ២០០៣ បានចែងថា ភាគីទាំងសងខាងត្រូវតែមានអាយុយ៉ាងហោចណាស់១៨ឆ្នាំ មុននឹងរៀបអាពាហ៍ពិពាហ៍។
ប៉ុន្តែច្បាប់នោះត្រូវបានគេទុកឲ្យរដ្ឋនានាអនុម័តយល់ព្រម ហើយរដ្ឋនៅភាគខាងជើងភាគច្រើនមិនបានអនុម័តឡើយ។
មេធាវីម្នាក់និយាយថា ការត្រៀមខ្លួនរួចរាល់របស់ក្មេងស្រីម្នាក់សម្រាប់អាពាហ៍ពិពាហ៍មិនត្រូវបានកំណត់ដោយអាយុរបស់នាងឡើយ។
លោក Awwal Tesleem Shittu មកពីសមាគមមេធាវីមូស្លីមនៃប្រទេសនីហ្សេរីយ៉ាបាននិយាយថា៖
«បើសិនជាក្មេងស្រីអាយុ១៣ឆ្នាំម្នាក់ មានរាងកាយមិនល្អ ប្រហែលនាងជាមិនមានស្មារតីប្រក្រតី នាងមិនអាចធ្វើការស្វែងយល់ នាងមិនអាចបែងចែករឿងខុសនិងត្រូវ គឺនាងមិនសាកសមនឹងរៀបការទេ។ នាងមិនទាន់មានវ័យចាស់ទុំសមល្មមក្នុងការរៀបការទេ។ បើក្មេងស្រីអាយុ៩ឆ្នាំម្នាក់ មានកាយសម្បទាល្អ ស្មារតីល្អ នាងអាចរៀបការបានដោយសារតែសាសនាឥស្លាម មិនបានហាមឃាត់នោះទេ»។
សម្រាប់កុមារី Rahmatu និងកុមារី Naja'atu ពួកគេចង់បន្តរស់នៅក្នុងទីក្រុង Kaduna ដើម្បីបានសិក្សារៀនសូត្រ។ ពួកគេសង្ឃឹមថា នៅថ្ងៃណាមួយ គ្រួសាររបស់ពួកគេនឹងត្រូវបានលើកលែងទោសឲ្យពួកគេ ក្នុងការដែលពួកគេ បានរត់គេចមិនព្រមរៀបការនោះ៕
ប្រែសម្រួលដោយ ទុំ ម្លិះ
