នៅភាគខាងត្បូងប្រទេសឥណ្ឌា បាតុកម្មបានកើតមានឡើង ក្រោយពីស្រ្តីពីរនាក់ បានចូលទៅក្នុងព្រះវិហារដែលជាទីសក្ការៈបូជាដ៏ពិសិដ្ឋមួយកន្លែងរបស់អ្នកកាន់សាសនាហិណ្ឌូ ដែលនេះ ជាការបំពានទៅនឹងពួកអ្នកកាន់សាសនាហិណ្ឌូ ដែលបានរារាំងមិនឲ្យស្រ្តីចូលទៅក្នុងទីសក្ការៈបូជានេះ ចាប់តាំងពីតុលាការកំពូល បានសម្រេចបដិសេធចោលបម្រាមមួយ ដែលមានអាយុកាលរាប់សតវត្សរ៍មកនោះ។
ការណ៍ដែលស្រ្តីពីរនាក់ បានចូលទៅក្នុងព្រះវិហារដែលជាទីសក្ការៈបូជាដ៏ពិសិដ្ឋនេះ ត្រូវបានគេហៅថា ជា«ព្រឹត្តិការណ៍ប្រវត្តិសាស្រ្ត»។ ក៏ប៉ុន្តែ ក្រុមបាតុករដែលពោរពេញទៅដោយកំហឹង បានហៅព្រឹត្តិការណ៍នេះថា ជា«ការរួមគំនិតធ្វើអំពើទុច្ចរិត»មួយទៅវិញ ដែលបានបញ្ឆេះឡើងវិញនូវភាពចម្រូងចម្រាស ដែលធ្វើឲ្យមានកំហឹងចាប់តាំងពីតុលាការកំពូល បានចេញសេចក្តីសម្រេចអនុញ្ញាតិឲ្យស្រ្តី ដែលមានអាយុចន្លោះពី ១០ ឆ្នាំ ដល់ ៥០ ឆ្នាំ ឲ្យអាចចូលបួងសួងក្នុងព្រះវិហារបាននោះ។
ស្រ្តីដែលស្ថិតក្នុងវ័យជាង ៤០ ឆ្នាំទាំងពីរនាក់នេះ បានចូលទៅក្នុងព្រះវិហារ Sabarimala ដែលស្ថិតនៅលើកំពូលភ្នំ ក្នុងរដ្ឋ Kerala នៅមុនថ្ងៃរះ កាលពីថ្ងៃពុធ ទី ២ ខែមករា កន្លងទៅនេះ ដោយមានប៉ូលិសអមដំណើរជាមួយឲ្យផុតពីក្រសែភ្នែករបស់ក្រុមអ្នកកាន់សាសនាហិណ្ឌូផ្សេងទៀត និងពីកាមេរ៉ារបស់បណ្តាញទូរទស្សន៍នានា។ នារីដែលដល់អាយុមានរដូវ មិនត្រូវបានអនុញ្ញាតិ ឲ្យចូលទីសក្ការៈបូជាទេ ពីព្រោះដោយសារតែគេជឿថា ព្រះអាទិទេពមិនចូលចិត្តរឿងកាមគុណផ្លូវភេទទេ។
គ្រាដែលព័ត៌មានអំពីការចូលទៅក្នុងព្រះវិហាររបស់ស្រ្តីពីរនាក់នេះ ត្រូវបានបែកខ្ជរខ្ចាយ ក្រុមអ្នកកាន់សាសនាហិណ្ឌូដែលមានកំហឹងដោយសារតែ អ្វីដែលពួកគេហៅថា «ការបំពានទំនៀមទម្លាប់របស់ព្រះវិហារ» បានដឹកនាំបាតុកម្មនៅតាមផ្លូវនៅទូទាំងរដ្ឋ។ ក្នុងទីក្រុង Thiruvananthapuram ប៉ូលិស បានប្រើកាណុងបាញ់ទឹក និងឧស្ម័នបង្ហូរទឹកភ្នែក ដើម្បីបំបែកក្រុមបាតុករ។ ក្នុងគ្រានោះផងដែរ ក្រុមអាចារ្យបានបិទទ្វារព្រះវិហារមួយរយៈដើម្បីធ្វើពិធី«បន្សុត» ទីសក្ការៈបូជាតាមទម្លាប់ ក្រោយពីការចូលព្រះវិហាររបស់ស្រ្តីទាំងពីរនាក់នោះ។
ស្រ្តី១២នាក់ ដែលប៉ុនប៉ងចូលព្រះវិហារនោះ ក្រោយពីតុលាការកំពូលចេញសេចក្តីសម្រេចកាលពីខែកញ្ញា ឆ្នាំមុន មិនអាចចូលព្រះវិហារបានទេ ដោយពួកគេត្រូវបានក្រុមអ្នកកាន់សាសនាហិណ្ឌូដ៏សកម្ម ដែលបានបោះជំរំ នៅតាមផ្លូវទៅព្រះវិហារនោះ រារាំងពួកគេ។
ការចូលទៅក្នុងព្រះវិហាររបស់ស្រ្តីទាំងពីរនាក់នោះ មានការជួយសម្រួលពីសំណាក់រដ្ឋាភិបាលឆ្វេងនិយមរបស់រដ្ឋនេះ ដែលបាននិយាយថា ខ្លួនអនុវត្តទៅតាមសេចក្តីសម្រេចរបស់តុលាការ។
អភិបាលរដ្ឋ Kerala លោក Pinarayi Vijayan បានប្រាប់អ្នកយកព័ត៌មានថា៖
«លោកបាននិយាយយ៉ាងច្បាស់ហើយថា រដ្ឋាភិបាលនឹងផ្តល់ការការពារ បើស្រ្តីណាម្នាក់ចេញមុខប្រាប់ថា ពួកគេចង់ចូលព្រះវិហារនោះ»។
លោក Rahul Easwar ជាសកម្មជនម្នាក់ ដែលដឹកនាំការប្រយុទ្ធប្រឆាំងនឹងសេចក្តីសម្រេចរបស់តុលាការកំពូល បានហៅការចូលព្រះវិហាររបស់ស្រ្តីទាំងពីរនាក់នោះថា ជា «ឧប្បទេ្ទវហេតុពាក់កណ្តាលអាធ្រាត ដែលធ្វើឡើងដោយរដ្ឋាភិបាលមិនកាន់សាសនា»។
ព្រះវិហារ Sabarimala បានក្លាយជាចំណុចចាប់អារម្មណ៍ ចាប់តាំងពីតុលាការបានចេញសេចក្តីសម្រេចនោះមក។ គ្រាដែល ក្រុមសេរីនិយម មើលឃើញថា ការសម្រេចរបស់តុលាការថា ជាការរីកចម្រើនមួយដែលធានាដល់យុត្តិធម៌យ៉េនឌ័រនោះ អ្នកខាងប្រកាន់ទំនៀមទម្លាប់វិញ បានសច្ចាថា នឹងមិនអនុញ្ញាតិឲ្យស្រ្តីចូលព្រះវិហារទេ ដោយនិយាយថា តុលាការ មិនអាចចូលពាក់ព័ន្ធនៅក្នុងបញ្ហាជំនឿសាសនាទេ។
នៅក្នុងបទសម្ភាសន៍មួយដែលបានចាក់ផ្សាយកាលពីថ្ងៃអង្គារទី ០១ ខែមករាកន្លងទៅនេះ លោកនាយករដ្ឋមន្រ្តី Narendra Modi បាននិយាយអំពីបញ្ហាព្រះវិហារSabarimala ដោយហៅបញ្ហានេះថា ជាបញ្ហាទំនៀមទម្លាប់ មិនមែនជាបញ្ហាយ៉េនឌ័រទេ។ លោក បានចង្អុលបង្ហាញ អំពីទស្សនៈរបស់ចៅក្រមម្នាក់ ក្នុងចំណោមចៅក្រមដែលមានសមាជិក ៥រូប ដែលបាននិយាយ នៅក្នុងសេចក្តីសម្រេចរបស់លោកស្រី លោកស្រីថា តុលាការមិនត្រូវចូលពាក់ព័ន្ធនៅក្នុង«បញ្ហាជំនឿសាសនាដ៏ជ្រៅ» នោះទេ។
ភាពចម្រូងចម្រាសក្នុងរឿងព្រះវិហារ Sabarimala នេះ មានជាប់ពាក់ព័ន្ធនឹងភាពស្មុគស្មាញខាងផ្នែកនយោបាយ គ្រាដែលការបោះឆ្នោតជាតិខិតជិតមកដល់ ហើយការណ៍នេះ ទំនងជានឹងបង្កើនសន្ទុះ គ្រាដែលក្រុមអ្នកកាន់សាសនាហិណ្ឌូស្តាំនិយម សច្ចាថា នឹងពង្រីកការធ្វើបាតុកម្មនៅភាគខាងត្បូងប្រទេសឥណ្ឌា។
អ្នកវិភាគនយោបាយថ្លែងថា គណបក្សនានាដូចជា គណបក្ស Bharatiya Janata របស់លោក Modi ជាដើម មើលឃើញបញ្ហានេះ ថាជាបញ្ហាមួយទៀត ដែលធ្វើឲ្យមានការគាំទ្រសាសនាហិណ្ឌូ។ លោក P.S Sreedharan Pillai ប្រធានគណបក្ស Bharatiya Janata ប្រចាំរដ្ឋ Kerala នេះ បានប្រាប់អ្នកយកព័ត៌មានថា គណបក្ស Bharatiya Janata នឹង «គាំទ្រការតស៊ូប្រឆាំងនឹងការបំផ្លាញជំនឿសាសនា»។
បញ្ហានេះ បានបន្ទុចបង្អាក់យ៉ាងខ្លាំងដល់រដ្ឋ Kerala ដែលជារដ្ឋត្រូវបានគេចាត់ទុកថា ជារដ្ឋដែលមានការរីកចម្រើនបំផុតមួយ នៅប្រទេសឥណ្ឌា។ នៅក្នុងការជួបប្រមូលផ្តុំមួយដែលគាំទ្រដោយរដ្ឋ ស្រ្តីរាប់ពាន់នាក់ បានប្រទាក់គ្នាដូចជាច្រវ៉ាក់នៅទូទាំងរដ្ឋកាលពីថ្ងៃអង្គារទី ០១ ខែមករា ដើម្បីបង្ហាញការគាំទ្ររបស់ពួកគេចំពោះសមភាពយ៉េនឌ័រ។
តុលាការកំពូល នឹងបើកសវនការពិនិត្យមើលញ្ញត្តិ ដែលតវ៉ាជំទាស់នឹងសេចក្តីសម្រេចរបស់ខ្លួន អំពីការអនុញ្ញាតិឲ្យស្រ្តីចូលព្រះវិហារនេះ នៅមុនដំណាច់ខែមករានេះ៕
ប្រែសម្រួលដោយ អ្នកស្រី លី ម៉ូរីវ៉ាន់
