គណបក្សនយោបាយដែលបានសម្រេចចូលរួមការបោះឆ្នោតក្រុមប្រឹក្សាឃុំសង្កាត់ បានប្រតិកម្មផ្ទុយគ្នាលើការកំណត់ពេលនៃការជូនដំណឹងដើម្បីបានចេញទៅឃោសនាកៀរគរសំឡេងគាំទ្រអ្នកបោះឆ្នោតតាមឃុំសង្កាត់ ដោយគណបក្សខ្លះទាមទារឱ្យគណៈកម្មការឃុំសង្កាត់រៀបចំការបោះឆ្នោត ឬហៅកាត់ថា(គឃ.សប) បន្ថែមពេលវេលាសម្រាប់ការជូនដំណឹងដល់គណបក្សដែលបច្ចុប្បន្នមានតែ៣ថ្ងៃ ខណៈបក្សមួយចំនួនមិនបង្ហាញការជំទាស់។
ការបោះឆ្នោតជ្រើសរើសថ្នាក់ដឹកនាំមូលដ្ឋាន ត្រូវបានគ្រោងធ្វើនៅថ្ងៃទី៥ ខែមិថុនា ឆ្នាំ២០២២ ដោយមានគណបក្សនយោបាយយ៉ាងហោចណាស់១៧គណបក្សចូលរួម។
អ្នកនាំពាក្យគណបក្សប្រជាធិបតេយ្យមូលដ្ឋានលោក ឡឹក សុធារ ស្នើទៅគណៈកម្មការឃុំសង្កាត់រៀបចំការបោះឆ្នោត ពន្លឿនការជូនដំណឹងនៃការបែងចែកពេលវេលា និងថ្ងៃឃោសនាបោះឆ្នោតដល់គណបក្សទាំងអស់ឱ្យបានលឿនបន្តិច ពោលគឺគណៈកម្មការឃុំ គួរប្រាប់មកគណបក្សយ៉ាងតិច៧ថ្ងៃ មុនពេលគណៈកម្មការសម្រេចថា គណបក្សអាចឃោសនានៅពេលវេលាជាក់លាក់ណាមួយនោះ។
លោកថ្លែងថា៖ «រឿងនេះ វាពិតជាជិះឥទ្ធិពល និងមានការលំបាក ដល់គណបក្សនយោបាយក្នុងការរៀបចំផែនការហែ និងផែនការចុះជួយ។ ផែនការរៀបចំនោះ គឺបើសិនជាយើងដឹងយឺតពេល ហើយឧទាហរណ៏ថា គណបក្សមួយនឹងចុះហែនៅថ្ងៃដំបូង ដូច្នេះវានឹងមានការលំបាក ពីព្រោះថាត្រូវកៀរគរកម្លាំង ធ្វើផែនការចលនាធនធានជាដើម រួមទាំងការគាំទ្រ ពីថ្នាក់ដឹកនាំ ពីព្រោះពេលវេលារបស់ថ្នាក់ដឹកនាំ ក៏មិនច្បាស់ថា អាចទៅជួយឃុំណាបាន...»។
យ៉ាងណាក៏ដោយ នៅក្នុងបទបញ្ជា និងនីតិវិធីសម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥រៀបចំដោយគ.ជ.ប គណបក្សនយោបាយទាំងអស់ត្រូវបានកំណត់ឱ្យជូនដំណឹងទៅគណៈកម្មការឃុំសង្កាត់រៀបចំការបោះឆ្នោត យ៉ាងហោចឱ្យបានមុន៣ថ្ងៃ អំពីថ្ងៃ ពេលវេលា និងទីកន្លែងសម្រាប់ការហែក្បួនឃោសនា។
បេក្ខជនឈរឈ្មោះជាមេឃុំលេខរៀងទី២ របស់គណបក្សប្រជាធិបតេយ្យមូលដ្ឋាននៅក្នុងឃុំព្រែកស្តី ស្រុកកោះធំ ខេត្តកណ្តាល អ្នកស្រី សែម សុផល លើកឡើងអំពីបញ្ហាប្រឈមជុំវិញការកំណត់កាលបរិច្ឆេទ និងទីតាំងសម្រាប់ការឃោសនាបោះឆ្នោត។
អ្នកស្រីបានស្នើទៅគណៈកម្មការឃុំសង្កាត់រៀបចំការបោះឆ្នោត ពន្លឿនការកំណត់បែងចែកថ្ងៃឃោសនាបោះឆ្នោតដល់គណបក្សទាំងអស់ឱ្យបានលឿនបន្តិច ដើម្បីឱ្យគណបក្សមានពេលវេលាគ្រប់គ្រាន់ក្នុងការរៀបចំដំណើរការនៃការឃោសនានោះ។
អ្នកស្រីថ្លែងថា៖«ខ្ញុំចង់ឱ្យមានការពន្លឿនឆាប់បន្តិច [ព្រោះ]ពេលហ្នឹងយើងត្រូវការមមារញឹក រៀបចំអីអត់ទាន់»។
ឆ្លើយតបទៅនឹងការទាមទាររបស់គណបក្សប្រជាធិបតេយ្យមូលដ្ឋាន ប្រធានគណៈកម្មការរៀបចំការបោះឆ្នោតឃុំព្រែកស្តី លោក លោក ប៉ិច សេងគី និយាយថា គណៈកម្មការរាជធានីខេត្តរៀបចំការបោះឆ្នោត មិនទាន់អនុញ្ញាតឱ្យគណៈកម្មការឃុំទទួលពាក្យ និងសំណើរបស់គណបក្សក្នុងការកំណត់ថ្ងៃឃោសនាបោះឆ្នោតនោះទេ។
ប៉ុន្តែលោកអះអាងថា គណៈកម្មការឃុំព្រែកស្តី នឹងធ្វើការបែងចែកពេលវេលាឃោសនាសម្រាប់គណបក្សទាំងអស់នៅថ្ងៃទី១៧ ខែឧសភានេះ ហើយគណបក្សនីមួយៗ អាចធ្វើការឃោសនាបាន២ដងប៉ុណ្ណោះ ក្នុងរយៈពេល១៤ថ្ងៃនៃយុទ្ធការឃោសនានោះ។
លោកប្រាប់វីអូអេនៅថ្ងៃព្រហស្បតិ៍នេះថា៖«អ៊ីចឹងការលើកពេលដើម្បីចែកពេលវេលាឃោសនាហ្នឹង គឺមកប្រជុំនៅថ្ងៃ១៧វិញ ដើម្បីសម្រេចចុងក្រោយនៃកាលបរិច្ឆេទ ដើម្បីឱ្យឃោសនា»។
ដោយឡែក គណបក្សផ្សេងទៀត យល់ស្របតាមនីតិវិធីនៃការបែងចែងពេលវេលារបស់គណៈកម្មាការរៀបចំការបោះឆ្នោត ពាក់ព័ន្ធដំណើរការឃោសនារកសំឡេងឆ្នោតរបស់គណបក្សនយោបាយនីមួយៗនៅតាមឃុំសង្កាត់នោះ។
ប្រធានគណបក្សកម្ពុជានិយម លោក យ៉ែម បុញ្ញឫទ្ធិ ថ្លែងថា ការកំណត់ពេលវេលាជូនដំណឹង ដើម្បីធ្វើការបែងចែកថ្ងៃសម្រាប់ឃោសនារកសំឡេងឆ្នោតតាមឃុំសង្កាត់ គឺអាចទទួលយកបានសម្រាប់គណបក្សរបស់លោក។
លោកនិយាយថា៖ «ដូច្នេះយើង [គណបក្ស]កម្ពុជានិយមយល់ឃើញថា ពេលវេលាគ្រប់គ្រាន់ សមល្មមក្នុងការរៀបចំយុទ្ធនាការឃោសនានោះឱ្យមានប្រសិទ្ធភាព»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ប្រាប់វីអូអេនៅថ្ងៃព្រហស្បតិ៍នេះថា គណបក្សប្រជាជនកម្ពុជា ដែលជាគណបក្សគ្រប់គ្រងប្រទេស មិនមានការជំទាស់នឹងដំណើរការបែងចែកពេលវេលាឃោសនា ដែលកំណត់ដោយ ស្ថាប័នរៀបចំការបោះឆ្នោត គ.ជ.បនោះទេ។
អគ្គលេខាធិការរងនៃគណៈកម្មាធិការជាតិរៀបចំការបោះឆ្នោត (គ.ជ.ប.) លោក សោម សូរីដា និយាយថាការហែក្បួននៅតាមឃុំសង្កាត់គឺ គណបក្សទាំងអស់ត្រូវជូនដំណឹងទៅគណៈកម្មាការឃុំសង្កាត់ យ៉ាងហោច៣ថ្ងៃ មុនថ្ងៃចេញធ្វើយុទ្ធនាការឃោសនា ដើម្បីបើកផ្លូវឱ្យអាជ្ញាធរមូលដ្ឋាន មានភាពងាយស្រួលក្នុងការរៀបចំសណ្តាប់ធ្នាប់ និងសន្តិសុខតាមឃុំសង្កាត់ជូនគណបក្សទាំងអស់។
បើតាមលោកសោម សូរីដា គណបក្សទាំងអស់ អាចរៀបចំឯកសារដូចជាសេចក្តីជូនដំណឹង និងកម្មវិធីហែក្បួនរបស់ខ្លួនទុកជាមុន ហើយប្រសិនបើគណបក្សណាដាក់បានមុន នោះគណៈកម្មការឃុំសង្កាត់រៀបចំការបោះឆ្នោត នឹងសម្រេចឱ្យមុន។ ប៉ុន្តែបើសិនដាក់ចំថ្ងៃតែមួយ នោះគណៈកម្មការឃុំសង្កាត់រៀបចំការបោះឆ្នោត នឹងបែងចែងម៉ោងហែខុសគ្នា ដើម្បីបញ្ចៀសបញ្ហាណាមួយកើតឡើងក្នុងឃុំសង្កាត់នោះ។
លោកនិយាយថា៖ «ពូចង់បញ្ជាក់ឡើងវិញថាថ្ងៃទី២១ ខែឧសភា គឺជាថ្ងៃចាប់ផ្តើមនៃយុទ្ធនាការឃោសនាបោះ ឆ្នោត អ៊ីចឹងគណបក្សនយោបាយអាចរៀបចំទុកជាមុន [គឺ]នៅមុនថ្ងៃទី២១ បានន័យថា អាចនៅក្នុងថ្ងៃទី២០ ថ្ងៃទី១៩ ថ្ងៃទី១៨ហ្នឹង អាចមានកម្មវិធី ដើម្បីជម្រាបជូនទៅគណៈកម្មការឃុំសង្កាត់រៀបចំការបោះឆ្នោត។ អ៊ីចឹងទេ អ្វីដែលយើងធ្លាប់អនុវត្តកន្លងមក មុនហែក្បូននៅកន្លែងណា ត្រូវតែជូនដំណឹងយ៉ាងតិច៣ថ្ងៃ ដើម្បីឱ្យគណៈកម្មការរៀបចំការបោះឆ្នោតបានដឹងដើម្បីចាត់វិធានការ ហើយការងារសន្តិសុខសណ្តាប់ធ្នាប់ ជាមួយអាជ្ញាធរ»។
លោកបន្ថែមថា៖ «តាមពិតកម្មវិធីជាទូទៅរបស់គណបក្សនយោបាយលោកមានហើយ ហើយនៅក្នុងបទបញ្ជានឹងនីតិវិធីរបស់គ.ជ.ប ក៏បានកំណត់ដើម្បីឱ្យគណៈកម្មការឃុំសង្កាត់រៀបចំការបោះឆ្នោតទទួលពាក្យសុំហែក្បួនរបស់គណបក្សនយោបាយ ឬទទួលការជូនដំណឹងរបស់គណបក្សនយោបាយអំពីការហែក្បួន»។
គួរបញ្ជាក់ថា គណបក្សនយោបាយនីមួយៗនឹងមានពេល១៤ថ្ងៃដើម្បីធ្វើយុទ្ធនាការឃោសនាបោះឆ្នោតនៅតាមឃុំសង្កាត់ ដែលនឹងចាប់ផ្តើមពីថ្ងៃទី២១ ខែឧសភា ដល់ថ្ងៃទី០៣ ខែមិថុនា។ ចំណែកថ្ងៃបោះឆ្នោតក្រុមប្រឹក្សាឃុំសង្កាត់នឹងធ្វើឡើងនៅថ្ងៃទី៥ ខែមិថុនាខាងមុខ ដោយអ្នកបោះឆ្នោតនឹងផ្តល់ឱកាសឱ្យជ្រើសរើសក្រុមប្រឹក្សាសរុបទាំងអស់ជាង១១.០០០នាក់ នៅតាមឃុំសង្កាត់សរុបចំនួន១.៦៥២ ដែលមានគណបក្សចូលរួមប្រកួតប្រជែងចំនួន១៧គណបក្ស។
អ្នកសម្របសម្រួលផ្នែកអង្កេតនិងតស៊ូមតិនៃអង្គការខុមហ្វ្រែលដែលឃ្លាំមើលកិច្ចការបោះឆ្នោត លោក កន សាវាង្ស ថ្លែងថា ការជូនដំណឹងក្នុងការហែក្បូនរបស់គណបក្សនីមួយៗ គឺជារឿងសំខាន់ ហើយគណបក្សទាំងអស់យ៉ាងហោចណាស់ត្រូវជូនដំណឹងទៅគណៈកម្មាការឃុំសង្កាត់រៀបចំការបោះឆ្នោតឱ្យបាន៣ថ្ងៃមុនថ្ងៃឃោសនា ដើម្បីឱ្យងាយស្រួលសម្របសម្រួល រៀបចំសណ្តាប់ធ្នាប់ និងរក្សាសន្តិសុខក្នុងឃុំសង្កាត់ទាំងនោះ៕
