នៅក្នុងសារពិសេសមួយដែលចេញផ្សាយនៅថ្ងៃអង្គារ លោកនាយករដ្ឋមន្រ្តី ហ៊ុន ម៉ាណែត បានអំពាវនាវឱ្យប្រជាពលរដ្ឋនិងនិស្សិតខ្មែរទាំងអស់ដែលកំពុងស្ថិតក្នុងប្រទេសអ៊ីស្រាអែល ស្តាប់តាមការណែនាំរបស់រដ្ឋាភិបាលអ៊ីស្រាអែល ខណៈលោករំពឹងថា ជម្លោះប្រដាប់អាវុធនេះនឹងបញ្ចប់ឆាប់ៗ។
លោកថ្លែងថា៖ «ខ្ញុំសង្ឃឹមថាការប្រយុទ្ធគ្នានឹងបញ្ចប់នាពេលឆាប់ៗខាងមុខ តាមរយៈការរកដំណោះស្រាយចរចាគ្នាជាជាងការប្រើប្រាស់អាវុធ និងការដោះលែងជនស៊ីវិល និងអ្នកចំណាត់ខ្មាំងទាំងអស់ដោយសុវត្ថិភាព»។
លោកនាយករដ្ឋមន្ត្រី ហ៊ុន ម៉ាណែត អះអាងថា ប្រជាជន ក៏ដូចជានិស្សិតខ្មែរចំនួន៣២៣នាក់ក្នុងចំណោម៤៥៤នាក់នៅប្រទេសអ៊ីស្រាអែលត្រូវបានជម្លៀសមកកាន់កន្លែងមានសុវត្ថិភាព។
បើតាមលោក ហ៊ុន ម៉ាណែត រដ្ឋាភិបាលកម្ពុជាយកចិត្តដាក់ខ្ពស់លើសុវត្ថិភាពរបស់ប្រជាពលរដ្ឋខ្មែរនៅទីនោះ ខណៈរដ្ឋាភិបាលកំពុងតែធ្វើការដើម្បីជម្លៀសប្រជាពលរដ្ឋដែលនៅសេសសល់។
នៅថ្ងៃអង្គារនេះផងដែរ លោក ហ៊ុន ម៉ាណែត ក៏បានថ្លែងក្នុងពិធីប្រកាសដាក់ឱ្យដំណើរការជាផ្លូវការនៃយុទ្ធសាស្ត្រជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធ ឆ្នាំ២០២៣-២០២៨ ថា សុវត្ថិភាពរបស់ប្រជាពលរដ្ឋខ្មែរនៅប្រទេសអ៊ីស្រាអែល គឺជា«អាទិភាពធំបំផុតរបស់រាជរដ្ឋាភិបាល» ដែលអាជ្ញាធរកម្ពុជាបានខិតខំបន្តជាប់ជាប្រចាំទាំងយប់ទាំងថ្ងៃ ដើម្បីធានា និងសហការជាមួយអាជ្ញាធរអ៊ីស្រាអែល ដើម្បីធ្វើយ៉ាងណាឱ្យប្រជាពលរដ្ឋទទួលបានការការពារនិងសុវត្ថិភាព។
កាលពីថ្ងៃសៅរ៍ ទី៧ ខែតុលា ឆ្នាំ២០២៣ ក្រុមជនសកម្មប្រយុទ្ធហាម៉ាស់ (Hamas) បានបើកការវាយប្រហារទ្រង់ទ្រាយធំ ដែលបានប្រើកាំជ្រួចផ្លោងជាច្រើនបាញ់ទៅលើទីក្រុងនានាក្នុងប្រទេសអ៊ីស្រាអែល ហើយបានសម្លាប់ជនស៊ីវិលជាច្រើននាក់។ វាជាការវាយឆ្មក់ធំបំផុតក្នុងពេល៥០ឆ្នាំលើប្រទេសអ៊ីស្រាអែល។ គេមិនទាន់ដឹងនៅឡើយទេថាតើការផ្ទុះអាវុធមួយនេះនឹងបន្តអូសបន្លាយដល់ពេលណា ខណៈរដ្ឋាភិបាលអ៊ីស្រាអែលបានដាក់ផែនការសងសឹកយ៉ាងខ្លាំងក្លាទៅលើក្រុមជនសកម្មប្រយុទ្ធហាម៉ាស់។
ការវាយប្រហារនោះក៏បណ្តាលឱ្យនិស្សិតខ្មែរម្នាក់ លោក ចាន់ ឧត្តម អាយុ២៤ឆ្នាំ ដែលរៀនផ្នែកវេជ្ជសាស្រ្តសត្វ និងទើបទៅសិក្សាបាន២សប្តាហ៍ ស្លាប់ គ្រាដែលក្រុមប្រដាប់អាវុធហាម៉ាស់ (Hamas) នៅក្នុងតំបន់ Gaza បានវាយប្រហារទ្រង់ទ្រាយធំមួយកាលពីថ្ងៃសៅរ៍លើអ៊ីស្រាអែល។ នេះបើតាមក្រសួងការបរទេសកម្ពុជា។
លោក ស៊ុំ ភិរុណ និស្សិតចុះកម្មសិក្សាផ្នែកកសិកម្មនៅប្រទេសអ៊ីស្រាអែល បានបង្ហោះសារនៅលើបណ្តាញសង្គមហ្វេសប៊ុករបស់លោកកាលពីថ្ងៃទី៩ ខែតុលា ថា លោករស់នៅតំបន់ Karmia ដែលមានព្រំប្រទល់ជាប់តំបន់ Gaza ទីដែលមានការផ្ទុះអាវុធ ប៉ុន្តែនៅពេលនេះលោកត្រូវបានជម្លៀសមកកាន់កន្លែងមានសុវត្ថិភាពហើយ។
លោក ស៊ុំ ភិរុណ ថ្លែងថា៖ «ខ្ញុំបាទនិងនិស្សិតខ្មែរដទៃទៀតសូមស្នើទៅរាជរដ្ឋាភិបាលជាពិសេស សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជាជួយសម្រួល និងបញ្ជូនពួកខ្ញុំជានិស្សិតខ្មែរទាំងអស់ទៅកាន់មាតុប្រទេសវិញផង ព្រោះពួកខ្ញុំមានភាពភ័យខ្លាច និងធ្លាប់រស់នៅក្នុងម្លប់សន្តិភាព មិនធ្លាប់មានសង្រ្គាមពីមុនមក»។
កាលពីថ្ងៃចន្ទ នៅក្នុងពិធីមួយ លោក ហ៊ុន សែន អតីតនាយករដ្ឋមន្ត្រីកម្ពុជាបានថ្លែងថា រដ្ឋាភិបាលកម្ពុជាមិនអាចបញ្ជូនយន្តហោះទៅដឹកប្រជាជនកម្ពុជានៅទីនោះឡើយ ប្រសិនបើមិនមានការអនុញ្ញាត ឬក៏សំណូមពរពីរដ្ឋាភិបាលអ៊ីស្រាអែល។
លោកថ្លែងថា៖ «ប្រសិនបើរដ្ឋាភិបាលអ៊ីស្រាអែលមិនតម្រូវឱ្យយើងចាកចេញទេ យើងកុំចាកចេញរត់ចោលប្រជាជនអ៊ីស្រាអែល។ ប្រសិនបើរត់ចោលប្រជាជនអ៊ីស្រាអែលក្នុងពេលដែលប្រជាជនអ៊ីស្រាអែលជួបការលំបាក ថ្ងៃក្រោយកុំចាំបាច់សុំទៅរៀន ឬសុំទៅធ្វើការនៅប្រទេសអ៊ីស្រាអែលតទៅទៀត»។
យោងតាមការចុះផ្សាយរបស់កាសែត Bangkok Post របស់ថៃ កាលពីថ្ងៃទី៩ ខែតុលា រដ្ឋាភិបាលថៃកំពុងតែធ្វើការជាមួយដៃគូពាក់ព័ន្ធ ដើម្បីជម្លៀសប្រជាជនរបស់ខ្លួនចេញពីប្រទេសអ៊ីស្រាអែលមកកាន់ប្រទេសថៃវិញ ខណៈមានសេចក្តីរាយការណ៍ថា ជនជាតិថៃ១៨នាក់បានស្លាប់។
កាសែត Bangkok Post បានស្រង់សម្តីរបស់លោក Jakkapong Sangmanee អនុរដ្ឋមន្ត្រីការបរទេសថៃក្នុងន័យដើមថា៖ «យើងកំពុងតែសម្របសម្រួលជាមួយប្រទេសទាំងឡាយដែលមានទំនាក់ទំនងជាមួយប្រទេសអ៊ីស្រាអែល ដើម្បីចរចាជម្លៀសពួកគេ»។
ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជា លោក គិន ភា ថ្លែងថា ការជម្លៀសប្រជាជនកម្ពុជាពីតំបន់គ្រោះថ្នាក់ទៅកន្លែងមានសុវត្ថិភាពជាការចាំបាច់។ លោកបន្ថែមបើគ្មានការរីករាលដាលសង្គ្រាមទេ ការបញ្ជូនយន្តហោះទៅដឹកសិស្សនិស្សិតខ្មែរមកកម្ពុជាពីអ៊ីស្រាអែលវិញ ក៏មិនមានភាពចាំបាច់នោះដែរ។
លោកប្រាប់វីអូអេថា៖ «យើងមិនមានភាពចាំបាច់ក្នុងការបញ្ជូននិស្សិតយើងត្រឡប់មកកម្ពុជាវិញទេ ពីព្រោះខ្ញុំជឿជាក់ថា សង្គ្រាមនេះវាមិនអាចរីករាលដាលទូទាំងប្រទេសអ៊ីស្រាអែលទេ គឺអាចថាជាតំបន់ព្រំដែនដែលជាតំបន់ក្តៅហ្នឹង»។
លោក គិន ភា បញ្ជាក់ថាជម្លោះរវាងអ៊ីស្រាអែល និងក្រុមហាម៉ាស់ជារឿងច្រំដែល ហើយពិបាកនឹងរកច្រកចេញ ដោយសារតែវាមានការពាក់ព័ន្ធនឹងជំនឿសាសនាផងដែរ៕
