លោក ចាន់ ឧត្តម បានស្លាប់បាត់បង់ជីវិត គ្រាដែលក្រុមប្រដាប់អាវុធហាម៉ាស់ (Hamas) នៅក្នុងតំបន់ Gaza បានវាយប្រហារទ្រង់ទ្រាយធំមួយកាលពីថ្ងៃសៅរ៍លើអ៊ីស្រាអែល។ នេះបើយោងតាមសេចក្តីប្រកាសរបស់ក្រសួងការបរទេសកម្ពុជា ចុះផ្សាយកាលពីថ្ងៃអាទិត្យ និងព័ត៌មានដកស្រង់ពីបណ្តាញសង្គមហ្វេសប៊ុក។
និសិ្សតរូបនេះបានស្ថិតនៅតំបន់ Kibbutz ក្នុងប្រទេសអ៊ីស្រាអែល ដែលនៅក្បែរតំបន់ Gaza ដើម្បីសិក្សាផ្នែកពេទ្យសត្វ។ លោកទើបតែបានធ្វើដំណើរទៅតំបន់នោះរយៈពេលជាងពីរសប្តាហ៍តែប៉ុណ្ណោះ មុនពេលជីវិតរបស់លោកត្រូវបានឆក់យកទៅដោយសារការវាយប្រហាររបស់ក្រុមប្រដាប់អាវុធ Hamas។ នេះបើយោងតាមការលើកឡើងរបស់គណនីហ្វេសប៊ុកឈ្មោះ Evan Penn។
សេចក្តីប្រកាសរបស់ក្រសួងការបរទេសកម្ពុជាបានឱ្យដឹងថា ពលរដ្ឋកម្ពុជាភាគច្រើនដែលជានិស្សិតប្រមាណ ៤៥០ នាក់ កំពុងស្នាក់នៅនិងសិក្សានៅប្រទេសអ៊ីស្រាអែល។ មកទល់ពេលនេះ រាជរដ្ឋាភិបាលកម្ពុជាបានជម្លៀសនិស្សិតកម្ពុជា ៣ នាក់ពីតំបន់ដែលកំពុងមានការប្រយុទ្ធគ្នានោះ ហើយកំពុងបន្តប្រតិបត្តិការជម្លៀសពលរដ្ឋកម្ពុជាដទៃទៀតផងដែរ។
កាលពីថ្ងៃអាទិត្យ រដ្ឋាភិបាលអ៊ីស្រាអែលបានប្រកាសសង្គ្រាមជាផ្លូវការប្រឆាំងនឹងក្រុមជនសកម្មប្រយុទ្ធហាម៉ាស់ (Hamas) នៅក្នុងតំបន់ Gaza ដោយជំរុញឱ្យមានការឆ្លើយតបបែបយោធាដ៏ខ្លាំងក្លាពីអ៊ីស្រាអែលចំពោះការវាយប្រហារដ៏ភ្ញាក់ផ្អើលរបស់ក្រុមជនសកម្មប្រយុទ្ធឥស្លាមនេះលើប្រទេសអ៊ីស្រាអែល។
នាយករដ្ឋមន្ត្រីអ៊ីស្រាអែលលោក Benjamin Netanyahu បាននិយាយរួចហើយកាលពីថ្ងៃសៅរ៍ថាប្រទេសរបស់លោកកំពុងធ្វើសង្គ្រាមជាមួយនឹងក្រុមហាម៉ាស់នៅពេលដែលការវាយប្រហាររបស់ក្រុមនេះបានរីករាលដាល។ ប៉ុន្តែ ការវាយតម្លៃរបស់លោកនេះគឺគ្រាន់តែជាវោហារសាស្ត្រប៉ុណ្ណោះ ដោយការប្រកាសសង្គ្រាមផ្លូវការគឺធ្វើឡើងដោយការសម្រេចរបស់គណៈរដ្ឋមន្ត្រីរបស់លោក។
រដ្ឋាភិបាលអ៊ីស្រាអែលបានបញ្ជាក់ថា មនុស្សយ៉ាងតិចណាស់ចំនួន ៧០០ នាក់ត្រូវបានសម្លាប់នៅក្នុងប្រទេសអ៊ីស្រាអែល ដែលក្នុងនោះរួមមានទាំងទាហាន ៤៤ នាក់ផងដែរ ហើយមនុស្សជាង ១.៥០០ នាក់ទៀតបានរងរបួស។ រីឯមន្ត្រីនៅក្នុងតំបន់ Gaza វិញបាននិយាយថា មនុស្ស ជាង ៤០០ នាក់ត្រូវបានសម្លាប់នៅក្នុងតំបន់នេះ ហើយមនុស្សជិត ២.០០០ នាក់ទៀតបានរងរបួស។
មន្ត្រីអ៊ីស្រាអែលម្នាក់បាននិយាយថា យោធាបានសម្លាប់ជនសកម្មប្រយុទ្ធ ៤០០ នាក់និងបានចាប់ខ្លួនមនុស្សរាប់សិបនាក់ទៀត។
ប៉ុន្តែ ក្រុមហាម៉ាស់ក៏បានចាប់ពង្រត់ជនជាតិអ៊ីស្រាអែលក្នុងចំនួនមួយដែលមិនបញ្ជាក់ឱ្យដឹងផងដែរ ដែលមានតាំងពីស្ត្រី កុមារ និងមនុស្សវ័យចំណាស់ ហើយនឹងបង្ខាំងពួកគេសម្រាប់ការដោះដូរដែលអាចទៅរួចណាមួយជាមួយនឹងអ្នកទោសហាម៉ាស់៕
