កាលពីថ្ងៃអាទិត្យ រដ្ឋាភិបាលអ៊ីស្រាអែលបានប្រកាសសង្គ្រាមជាផ្លូវការប្រឆាំងនឹងក្រុមជនសកម្មប្រយុទ្ធហាម៉ាស់ (Hamas) នៅក្នុងតំបន់ Gaza ដោយជំរុញឱ្យមានការឆ្លើយតបបែបយោធាដ៏ខ្លាំងក្លាពីអ៊ីស្រាអែលចំពោះការវាយប្រហារដ៏ភ្ញាក់ផ្អើលរបស់ក្រុមជនសកម្មប្រយុទ្ធឥស្លាមនេះលើប្រទេសអ៊ីស្រាអែល។
នាយករដ្ឋមន្ត្រីអ៊ីស្រាអែលលោក Benjamin Netanyahu បាននិយាយរួចហើយកាលពីថ្ងៃសៅរ៍ថាប្រទេសរបស់លោកកំពុងធ្វើសង្គ្រាមជាមួយនឹងក្រុមហាម៉ាស់នៅពេលដែលការវាយប្រហាររបស់ក្រុមនេះបានរីករាលដាល។ ប៉ុន្តែ ការវាយតម្លៃរបស់លោកនេះគឺគ្រាន់តែជាវោហារសាស្ត្រប៉ុណ្ណោះ ដោយការប្រកាសសង្គ្រាមផ្លូវការគឺធ្វើឡើងដោយការសម្រេចរបស់គណៈរដ្ឋមន្ត្រីរបស់លោក។
នៅមុនការបោះឆ្នោតរបស់គណៈរដ្ឋមន្ត្រី លោក Netanyahu បានប្រកាសថា អ៊ីស្រាអែលនឹង «ធ្វើការសងសឹកយ៉ាងខ្លាំងក្លា» ប្រឆាំងនឹងក្រុមហាម៉ាស់ បើទោះបីជាទាហានអ៊ីស្រាអែលបានប្រយុទ្ធនឹងក្រុមយុទ្ធជនហាម៉ាស់កាលពីថ្ងៃអាទិត្យនៅតាមដងផ្លូវនៅភាគខាងត្បូងអ៊ីស្រាអែលនិងបានចាប់ផ្ដើមវាយប្រហារតាមអាកាសបែបសងសឹកដោយបានបំផ្លិចបំផ្លាញអគារនានានៅក្នុងតំបន់ Gaza រួចហើយក៏ដោយ។
ប៉ុន្តែ គេនៅមិនទាន់ច្បាស់ទេថាតើការឆ្លើយតបថ្មីរបស់អ៊ីស្រាអែលនេះនឹងជះលទ្ធផលបែបណា។ អ្នកវិភាគមួយចំនួនអំពីតំបន់មជ្ឈិមបូព៌ាបានលើកឡើងថា អ៊ីស្រាអែលអាចធ្វើការវាយប្រហារតាមផ្លូវគោកចូលក្នុងតំបន់ Gaza ដែលនឹងធ្វើឱ្យសង្គ្រាមនេះកាន់តែរីករាលដាលបន្ថែមទៀត។
មិនថាការឆ្លើយតបបែបណានោះទេ លោក Netanyahu បានព្រមានថា៖ «សង្គ្រាមនេះនឹងចំណាយពេលហើយវានឹងជាសង្គ្រាមដ៏លំបាក»។
លោកឧត្តមសេនីយ៍ទោ Ghassan Alian ដែលជាមន្ត្រីកងកម្លាំងការពារជាតិអ៊ីស្រាអែលដ៏សំខាន់មួយរូប បាននិយាយថា ក្រុមហាម៉ាស់ «បានបើកផ្លូវនរក» តាមរយៈការវាយប្រហារដ៏ភ្ញាក់ផ្អើលរបស់ខ្លួន ហើយ «នឹងទទួលខុសត្រូវនិងទទួលរងនូវផលវិបាកសម្រាប់ទង្វើរបស់ខ្លួន»។
រដ្ឋាភិបាលអ៊ីស្រាអែលបានបញ្ជាក់ថា មនុស្សយ៉ាងតិច ៧០០ នាក់ត្រូវបានសម្លាប់នៅក្នុងប្រទេសអ៊ីស្រាអែល ដែលក្នុងនោះរួមមានទាំងទាហាន ៤៤ នាក់ផងដែរ ហើយមនុស្សជាង ១.៥០០ នាក់ទៀតបានរងរបួស។ រីឯមន្ត្រីនៅក្នុងតំបន់ Gaza វិញបាននិយាយថា មនុស្ស ជាង ៤០០ នាក់ត្រូវបានសម្លាប់នៅក្នុងតំបន់នេះ ហើយមនុស្សជិត ២.០០០ នាក់ទៀតបានរងរបួស។
មន្ត្រីអ៊ីស្រាអែលម្នាក់បាននិយាយថា យោធាបានសម្លាប់ជនសកម្មប្រយុទ្ធ ៤០០ នាក់និងបានចាប់ខ្លួនមនុស្សរាប់សិបនាក់ទៀត។
ប៉ុន្តែ ក្រុមហាម៉ាស់ក៏បានចាប់ពង្រត់ជនជាតិអ៊ីស្រាអែលក្នុងចំនួនមួយដែលមិនបញ្ជាក់ឱ្យដឹងផងដែរ ដែលមានតាំងពីស្ត្រី កុមារ និងមនុស្សវ័យចំណាស់ ហើយនឹងបង្ខាំងពួកគេសម្រាប់ការដោះដូរដែលអាចទៅរួចណាមួយជាមួយនឹងអ្នកទោសហាម៉ាស់៕
