ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ការិយាល័យ​សហ​​ចៅក្រម​ស៊ើប​អង្កេត​នៅ​សាលាក្តី​ខ្មែរ​ក្រហម​បិទ​ទ្វារ​ដោយ​ស្ងៀមស្ងាត់


រូបឯកសារ៖ ទិដ្ឋភាព​ខាង​ក្នុង​សាល​សវនាការ​ អំឡុង​ពេល​ប្រកាស​សាល​ក្រម​នៃ​សំណុំ​រឿង​០០២/០១ កាល​ពី​ខែ​សីហា ឆ្នាំ​២០១៦។ (រូបថត​ផ្តល់​ឲ្យ​ដោយ ECCC)

ការិយាល័យ​របស់​សហ​ចៅក្រម​ស៊ើប​អង្កេត​របស់​សាលាក្តី​ខ្មែរ​ក្រហម បាន​បិទទ្វា​ដោយ​ស្ងៀម​ស្ងាត់។ អ្នកជំនាញ​ផ្នែក​របប​ខ្មែរ​ក្រហម​មួយរូប បាន​ចាត់ទុក​ការបិទ​ទ្វា​ការិយាល័យ​សហ​ចៅក្រម​ស៊ើប​អង្កេត ថា​ជា​ការ​បិទបញ្ចប់​ទំព័រ​មួយ​ក្នុង​កេរ​ដំណែល​របស់​​​​សាលាក្តី​ខ្មែរក្រហម។

ការិយាល័យ​របស់​សហចៅក្រម​ស៊ើប​អង្កេត​នៃ​អង្គជំនុំ​ជម្រះ​វិសាមញ្ញ​ក្នុង​តុលាការ​កម្ពុជា (ECCC) ឬ​ហៅថា​សាលា​ក្តីខ្មែរ​ក្រហមបាន​បិទ​ទ្វារ​ជា​ស្ថាពរយ៉ាង​ស្ងៀម​ស្ងាត់​ ដែល​អ្នក​ជំនាញ​ចាត់​ទុកថា​គឺជាការ​បិទ​បញ្ចប់​ទំព័រ​មួយ​នៃ​កេរដំណែល​សាលា​ក្តី​កូន​កាត់​នេះ។

ការ​បិទ​ការិយាល័យ​សហ​ចៅក្រម​ស៊ើប​អង្កេត​របស់​សាលាក្តី​ខ្មែរក្រហមបាន​ធ្វើ​ឡើង​កាល​ពី​ថ្ងៃទី​៣០​ខែមិថុនា​ ប៉ុន្តែ​ព័ត៌មាន​មិន​ត្រូវ​បាន​ទម្លាយ​ជា​ចំហ​ចំពោះ​សាធារណៈ​នោះ​ទេ។

លោក ​នេត្យ​ ភត្រ្តា អ្នកនាំពាក្យ​សាលាក្តីខ្មែរ​ក្រហម​ បាន​ប្រាប់​VOA ​កាល​ពី​ថ្ងៃ​ច័ន្ទ​ថា​ការ​បិទ​ការិយាល័យសហចៅក្រម​ស៊ើប​អង្កេតធ្វើ​ឡើង​ បន្ទាប់​ពី​សហ​ចៅ​ក្រម​ស៊ើបអង្កេត​បាន​ចេញ​ដីកា​ដំណោះស្រាយខ្វែង​គំនិង​គ្នាជុំវិញ​ជន​សង្ស័យលោក យឹម ទិត្យ។

ភាគី​ជាតិ​គឺលោក​ចៅក្រម យូ ប៊ុនឡេង​ បាន​សម្រេច​លើក​លែង​ការ​ចោទ​ប្រកាន់​លើ​លោក យឹម ទិត្យ​ ខណៈដែល​ភាគីអន្តរជាតិ​គឺលោក​ចៅក្រម​ Michael Bohlanderបាន​សម្រេច​បន្ត​ការ​ចោទ​ប្រកាន់​ហើយ​បញ្ជូន​ទៅ​ជំនុំ​ជម្រះ។

«ការ​ប្រកាស​ដីការ​ដំណោះស្រាយ​នៅ​ពេលនោះ​ ក៏​ជា​ផ្នែក​មួយ​ឈាន​ទៅដល់​ការ​បិទ​បញ្ចប់​កិច្ចការ​របស់​សហចៅក្រម​ស៊ើប​អង្កេត​ របស់​ការិយាល័យ​សហចៅក្រម​ស៊ើប​អង្កេត​ដែរ ដោយសារ​តែ​មិន​មាន​សំណុំរឿង​ណា​ផ្សេង​ទៀត​ ដែល​ត្រូវ​ស៊ើប​អង្កេត​ នៅ​ចំពោះ​មុខ​អង្គ​ជំនុំ​ជម្រះ​វិសាមញ្ញ​ក្នុង​តុលាការ​កម្ពុជា​ទេ​ ដោយសារ​តែ​សំណុំរឿង​ដែល​មាន គឺ​មាន​តែ​សំណុំ​រឿង​បួន​តែ​ប៉ុណ្ណោះមាន​សំណុំរឿង​០១​ ០២ ០៣​ និង​០៤»។

សំណុំរឿងទាំងបួន​នោះមាន​សំណុំ​រឿង​០០១​របស់​លោក​ កាំង ហ្គេកអ៊ាវ​ ហៅ​ឌុច​ សំណុំ​រឿង​០០២​របស់​ខៀវ សំផន​ នួន ជា​ អៀង សារី និង​អៀង ធីរិទ្ធ​ សំណុំរឿង​០០៣របស់​ មាស មុត​ និង​សំណុំរឿង​០០០៤​របស់​ យឹម ទិត្យ​ អ៊ឹម ចែម​ និង​អោ អាន។

ឌុច អតីត​ប្រធាន​គុក​ទួល​ស្លែង នួន ជា អតីត​បងធំទី២​បន្ទាប់​ពី​ប៉ុលពតនិង​ខៀវ សំផនអតីត​ប្រមុខ​រដ្ឋ​សម័យ​ខ្មែរ​ក្រហម​ ត្រូវ​ផ្តាន្ទាទោស​ឲ្យជាប់​ពន្ធនាគារ​អស់មួយជីវិត។​ ដោយ​ឡែក អៀង សារី អតីតរដ្ឋ​មន្ត្រី​ការបរទេសនិង​អៀង ធីរិទ្ធ អតីត​រដ្ឋ​មន្ត្រីក្រសួង​សង្គម​កិច្ច​បាន​ស្លាប់​មុន​ការ​កាត់​ទោស​ត្រូវ​បញ្ចប់។​ ចំណែក​ឯ​សំណុំ​រឿង​០០៣​និង​០០៤​កំពុង​ស្ថិត​ក្នុង​ដំណើរ​ការ​ក្តី​ជា​បន្ត។​

លោក​ យូ ប៊ុនឡេង​ សហ​ចៅក្រម​ស៊ើប​អង្កេត​ភាគីកម្ពុជា​ បដិសេធ​ផ្តល់​ការ​អធិប្បាយ​ ទាក់​ទង​នឹង​ការ​បិទ​ការិយាល័យ​របស់​លោក​ ដោយ​បាន​បង្វែរ​សំណួរ​ទៅ​អ្នកនាំពាក្យ​សាលាក្តីខ្មែរ​ក្រហម។

​«​អ្ហូអាហ្នឹង សួរ​អ្នក​នាំពាក្យ​ទៅ​»។

នៅ​មុន​ការបិទទ្វា​ការិយាល័យ​របស់​សហ​ចៅក្រម​លោក​ឆាំង​ យុ​ ប្រធាន​មជ្ឈមណ្ឌល​ឯកសារ​កម្ពុជា​ (DC-Cam) បាន​ចាត់ទុក ការ​បិទទ្វា​ការិយាល័យ​សហចៅក្រម​ស៊ើប​អង្កេត​ ថា«​ជាការបិទបញ្ចប់​ទំព័រ​មួយ​ក្នុង​កេរ​ដំណែល​របស់សាលាក្តីខ្មែរ​ក្រហម»។

អ្នក​ជំនាញ​ខ្មែរ​ក្រហមរូប​នេះ​មិន​បាន​ធ្វើ​សេចក្តី​អត្ថាធិប្បាយ​ចំៗ​លើ​លទ្ធផល​នៃ​ការិយាល័យ​សហ​ចៅ​ក្រម​ស៊ើប​អង្កេត​នោះ​ទេ។​ ប៉ុន្តែ​លោក​លើក​ឡើង​ថា​ សាលាក្តី​ខ្មែរក្រហម«​បាន​រួម​ចំណែក​ដល់​ការ​អភិវឌ្ឍ​វិជ្ជា​ជីវៈ​របស់​ចៅក្រម មេធាវី​និង​បុគ្គលិក​ដទៃ​ទៀត» ទាំង​ភាគី​កម្ពុជា​និងភាគី​អន្តរជាតិ។​ ហើយ​សាលាក្តី​នេះ​បាន«ធ្វើ​ឲ្យ​សាធារណជន​កាន់​តែ​យល់​ដឹង​ថែម​ទៀត​អំពី​ប្រវត្តិសាស្រ្ត​ជុំវិញ​របប​ខ្មែរ​ក្រហម»។

ទោះជា​យ៉ាង​ណា​លោក​ឆាំង​ យុ ​បាន​រិះគន់អំពី​ការ​បើក​ឱកាស​តិច​តួចក្នុង​ការ​និយាយ​ស្តី ចោទ​ជា​សំណួរ​និង​ការ​ចូលរួម​សវនាការ» ប៉ុន្តែសាលាក្តី​នេះ​បាន​«គាំទ្រ​ការ​ផ្តល់​សិទ្ធិ​អំណាច​ដល់​ជន​រងគ្រោះ​និង​បាន​រួម​វិភាគ​ទាន​ដល់​ការ​យល់​ដឹង​របស់​សាធារណជនអំពី​សិទ្ធិ​មនុស្ស»។​

លោក​ ពេជ​ អង្គ មេធាវី​មួយរូប​តំណាង​កូនក្តី​ក្នុង​សំណុំរឿង​០០២​ យល់​ថា​ ការ​បិទ​ការិយាល័យ​សហចៅក្រម​ស៊ើប​អង្កេត​គឺជា​នីតិវិធី​ធម្មតា ដោយ​លោក​មិន​បាន​បក​ស្រាយ​លើ​ដំណើរ​ការ​កន្លង​មក​របស់​ការិយាល័យ​នេះ​ទេ។

ចាប់​តាំង​ពី​បាន​ដំណើរការ​តាំងពីឆ្នាំ​២០០៦​មក​ សាលាក្តី​ខ្មែរ​ក្រហម​ដែល​ធ្វើការ​កាត់​ទោស​តែ​មេដឹកនាំ​ទទួល​ខុសត្រូវ​ខ្ពស់​បំផុត​ក្នុង​សម័យ​កម្ពុជា​ប្រជាធិបតេយ្យ​ ឬ​របប​ខ្មែរក្រហម​ បាន​ធ្វើ​ការ​លើ​សំណុំរឿង​បួន​ដាក់​ដោយឡែក​ពីគ្នា។ ប៉ុន្តែ​ មាន​តែ​សំណុំ​រឿង​ពីរ​ប៉ុណ្ណោះ​ គឺ​សំណុំ​រឿង​០០១ និង​០០២​ ដែល​បាន​ដាក់​ក្នុង​ការ​ជំនុំ​ជម្រះ​ក្តី៕

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG