ប្រទេសកូរ៉េខាងជើង ទើបបាញ់សាកល្បងកាំជ្រួចមីស៊ីល២គ្រាប់បន្ថែមទៀត នៅព្រឹកថ្ងៃអង្គារនេះ។ នេះ ជាកាំជ្រួចមីស៊ីលទី៥ហើយដែលរដ្ឋាភិបាលក្រុងព្យុងយ៉ាង បានបាញ់សាកល្បង ចាប់តាំងពីចូលឆ្នាំ២០២២ នេះមក។ នេះ បើតាមការឲ្យដឹងរបស់យោធាកូរ៉េខាងត្បូង។
កាំជ្រួចមីស៊ីលដែលត្រូវបានបាញ់នៅព្រឹកថ្ងៃអង្គារនេះ ត្រូវបានបាញ់ចេញពីតំបន់កោះមួយរបស់កូរ៉េខាងជើង ហើយធ្លាក់នៅតំបន់ឆ្នេរសមុទ្រភាគខាងកើតរបស់ខ្លួន។ នេះ បើតាមការចេញផ្សាយរបស់ទីភ្នាក់ងារព័ត៌មាន Yonhap របស់កូរ៉េខាងត្បូង។
កងទ័ពកូរ៉េខាងត្បូង បានបញ្ជាក់ពីការបាញ់បង្ហោះកាំជ្រួចមីស៊ីលនេះ នៅក្នុងសារមួយមកកាន់វីអូអេ ដោយនិយាយថា អាជ្ញាធរនៅកំពុងធ្វើការវិភាគលម្អិតអំពីការបាញ់សាកល្បងនេះ។
រហូតមកទល់ឆ្នាំនេះ កូរ៉េខាងជើង បានបាញ់កាំជ្រួចមីស៊ីលចំនួន៨គ្រាប់ ក្នុងអំឡុងនៃការបាញ់បង្ហោះចំនួន៥ ដាច់ដោយឡែកពីគ្នា។ កាលពីសប្តាហ៍មុន កូរ៉េខាងជើង ក៏បានគំរាមកំហែងបន្តធ្វើការសាកល្បងកាំជ្រួចមីស៊ីលវង់ប្រតិបត្តិការឆ្ងាយ និងអាវុធនុយក្លែអ៊ែផងដែរ។
កូរ៉េខាងជើង ត្រូវបានហាមប្រាមមិនឲ្យធ្វើសកម្មភាពសាកល្បងបាញ់កាំជ្រួចមីស៊ីលបាល់លីស្ទិក រួមទាំងការបាញ់សាកល្បងក្នុងកម្រិតឆ្ងាយ ឬជិតដោយសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។
កូរ៉េខាងជើងក្នុងពេលថ្មីៗនេះ បានសម្តែងនូវការមិនសប្បាយចិត្តចំពោះអ្វីដែលខ្លួនហៅថា «នយោបាយអរិភាព»របស់សហរដ្ឋអាមេរិក។ ជាពិសេស កិច្ចសហប្រតិបត្តិការខាងយោធារវាងសហរដ្ឋអាមេរិក និងកូរ៉េខាងត្បូង។
សហរដ្ឋអាមេរិក មានកងទ័ពប្រមាណ២ម៉ឺន ៨ពាន់នាក់ ឈរជើងក្នុងប្រទេសកូរ៉េខាងត្បូង ចាប់តាំងពីក្រោយសង្គ្រាមកូរ៉េក្នុងទសវត្សរ៍១៩៥០មក ដែលបានបញ្ចប់ដោយបទឈប់បាញ់គ្នាមួយ ដោយគ្មានសន្ធិសញ្ញាសន្តិភាព។
ក្រោមការដឹកនាំរបស់ប្រធានាធិបតីអាមេរិកលោក Joe Biden រដ្ឋាភិបាលទីក្រុងវ៉ាស៊ីនតោន បានប្រកាសជាញឹកញាប់ថា ខ្លួនបើកចំហរការពិភាក្សាមួយជាមួយកូរ៉េខាងជើងដោយគ្មានលក្ខណ្ឌជាមុន។
អ្នកនាំពាក្យក្រសួងការពារជាតិអាមេរិកលោក John Kirby បានថ្លែងប្រាប់ក្រុមអ្នកសារព័ត៌មាននៅក្នុងសន្និសីទកាសែតកាលពីថ្ងៃចន្ទថា «កូរ៉េខាងជើង គ្មានបំណងធ្វើឲ្យការពិភាក្សានោះ ជឿនលឿនទៅមុខទេ»។
លោក John Kirby បានបញ្ជាក់នូវការព្រួយបារម្ភរបស់សហរដ្ឋអាមេរិកអំពីមហិច្ឆតារបស់កូរ៉េខាងជើងក្នុងការអភិវឌ្ឍន៍អាវុធនុយក្លេអ៊ែរ និងសមត្ថភាពកាំជ្រួចមីស៊ីលបាល់លីស្ទិករបស់ខ្លួន»។
លោកបន្ថែមទៀតថា «សហរដ្ឋអាមេរិក បន្តថ្កោលទោសការបាញ់សាកល្បងគ្រាប់មីស៊ីលរបស់កូរ៉េខាងជើង ហើយបានអំពាវនាវឲ្យកូរ៉េខាងជើងបញ្ឈប់នូវសកម្មភាពបង្ករហេតុនិងអនុវត្តច្បាប់អន្តរជាតិ និងសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ហើយព្យាយាមស្វែងរកដំណោះស្រាយដើម្បីបន្ធូរបន្ថយនូវភាពតានតឹង»៕
