រដ្ឋមន្រ្តីផ្នែកព័ត៌មានរបស់ប្រទេសនីហ្សេរីយ៉ា (Nigeria) បានថ្លែងថា លោក Muhammadu Buhari ប្រធានាធិបតីនៃប្រទេសនីហ្សេរីយ៉ានឹងមិនការពារមន្រ្តី ឬសមាជិកមួយណានៃគណបក្សកាន់អំណាចរបស់លោក គឺគណបក្សសភាវឌ្ឍនភាពទាំងអស់គ្នា ឬ All Progressives Congress ដែលបានក្លែងបន្លំផ្នែកហិរញ្ញវត្ថុឡើយ។
ប៉ុន្តែក្នុងការជជែកតាមប្រព័ន្ធផ្សព្វផ្សាយមួយកាលពីចុងខែធ្នូ ដែលជាលើកដំបូងតាំងពីលោកបានចូលកាន់តំណែងកាលពីពាក់កណ្តាលឆ្នាំ២០១៥នោះ ប្រធានាធិបតី Buhari បានអះអាងថា គ្មានគណៈរដ្ឋមន្រ្តីរបស់លោកណាមួយពុករលួយឡើយ។ លោកបានប្រជែងពាក្យសម្តីជាមួយប្រជាជននីហ្សេរីយ៉ាណាដែលមានភស្តុតាងពីភាពមិនប្រក្រតីផ្នែកហិរញ្ញវត្ថុប្រឆាំងនឹងមន្រ្តីរបស់លោក ហើយស្នើឲ្យបង្ហាញភស្តុតាងទាំងនោះ។
សេចក្តីថ្លែងការណ៍របស់លោកបានធ្វើឡើង បន្ទាប់ពីគណបក្សប្រឆាំង គឺគណបក្សប្រជាធិបតេយ្យប្រជាជន ឬ People's Democratic Party បានទាមទារឲ្យមានការស៊ើបអង្កេតការចោទប្រកាន់លើការប្រើប្រាស់មូលនិធិសន្តិសុខខុសដោយក្រុមមន្រ្តីជាន់ខ្ពស់ក្នុងរដ្ឋបាលរបស់លោកប្រធានាធិបតី។
រដ្ឋមន្រ្តីផ្នែកព័ត៌មាន Lai Mohamed បានច្រានចោលការលើកឡើងថា ការប្រយុទ្ធប្រឆាំងនឹងអំពើពុករលួយរបស់រដ្ឋាភិបាលផ្តោតលើតែមន្រ្តីក្នុងរដ្ឋបាលមុនរបស់អតីតប្រធានាធិបតី Good Luck Jonathan ប៉ុណ្ណោះ។ លោកបានថ្លែងថា រដ្ឋាភិបាលមានភស្តុតាងជាក់ស្តែងប្រឆាំងនឹងក្រុមមន្រ្តីពីអាណត្តិមុនដែលលោកនិយាយថា បានក្លែងបន្លំមូលនិធិសាធារណៈ។
លោក Mohammed និយាយថា៖ «ការពិតនៃបញ្ហានេះ គឺថា លោកឧត្តមសេនីយ Buhariនឹងមិនលើកលែងឲ្យអ្នកណាដែលត្រូវរកឃើញឬត្រូវបានចោទប្រកាន់ថា បានប្រព្រឹត្តិអំពើពុករលួយ ទោះបីជាពួកគេជាសមាជិកនៃគណបក្សកាន់អំណាច ឬមិនមែនក៏ដោយ។ វាជារឿងធម្មតាទេបន្ទាប់ពីកាន់អំណាចអស់រយៈពេល១៦ឆ្នាំ បើសិនជាមានការស៊ើបអង្កេតណាមួយនៅថ្ងៃនេះ ឬក៏មានការប្រយុទ្ធប្រឆាំងនឹងអំពើពុករលួយណាមួយ អ្នកដែលគួរត្រូវស៊ើបអង្កតគឺអ្នកដែលបានកាន់អំណាចយូរឆ្នាំមកហើយនោះ»។
«រដ្ឋាភិបាលនឹងបញ្ចេញការពិតជាក់ស្តែងជាច្រើនដូចជាឯកសារប្រតិបត្តិការ លេខគណនី ហើយនិងចំនួនទឹកប្រាក់ដែលបានបញ្ចូលទៅក្នុងគណនីនីមួយៗ។ នេះគឺជាអ្វីដែលខ្ញុំហៅថា ការប្រយុទ្ធប្រឆាំងនឹងអំពើពុករលួយ មិនមែនត្រឹមតែជាពាក្យបង្កាច់បង្ខូចនោះទេ»។
ការប្រយុទ្ធប្រឆាំងនឹងអំពើពុករលួយជាប់គាំង
ប្រជាជននីហ្សេរីយ៉ាបានទាមទារឲ្យលោកប្រធានាធិបតី Buhari ធានាថានឹងចេញផ្សាយបញ្ជីឈ្មោះអតីតមន្រ្តីដែលបានប្រគល់ទឹកប្រាក់ដែលបានលួចមកវិញ។ លោកMohammed បានបញ្ជាក់ថា មានអតីតមន្រ្តីមួយចំនួនបានប្រគល់មកវិញនូវថវិកាដែលបានលួចនោះ ក៏ប៉ុន្តែលោកបានអះអាងថា ការចេញផ្សាយឈ្មោះរបស់ពួកគេនឹងមានផលប៉ះពាល់ដល់ការប្រយុទ្ធប្រឆាំងនឹងអំពើពុករលួយ។
លោក Mohammed និយាយថា៖ «បើប្រៀបធៀបភាគរយនៃអ្នកដែលមិនទាន់បានប្រគល់ថវិកាមកវិញ នឹងអ្នកដែលកំពុងត្រូវបានស៊ើបអង្កេត គឺពិតជាមានចំនួនស្តួចស្តើងខ្លាំងណាស់ ហើយវាដូចជាលឿនពេកក្នុងការផ្សាយបញ្ជីឈ្មោះអ្នកដែលបានប្រគល់អ្វីដែលគេបានប្លន់ ត្រឡប់មកវិញ»។
«ទី២ ដូចដែលលោកប្រធានាធិបតីបានពន្យល់ហើយ បើសិនជាមនុស្សម្នាក់បានប្រគល់ទឹកប្រាក់មកវិញក្នុងចំនួនណាមួយ ហើយអ្នកផ្សព្វផ្សាយចំនួនទឹកប្រាក់ដែលគាត់បានសងនោះ អ្នកបន្ទាប់ទៀតនឹងមិនប្រគល់ទឹកប្រាក់ដែលច្រើនជាងចំនួនដែលបានចេញផ្សាយនោះទេ។ ដូច្នេះសម្រាប់ហេតុផលយុទ្ធសាស្រ្តនិងសន្តិសុខ វាមិនល្អទេក្នុងការផ្សាយឈ្មោះអ្នកទាំងនោះ និងចំនួនទឹកប្រាក់ដែលគេបានសងនៅពេលនេះ។ តែយើងនឹងផ្សព្វផ្សាយវាក្នុងពេលវេលាសមស្របណាមួយ»។
ក្រុមអ្នករិះគន់និយាយថា ការប្រយុទ្ធប្រឆាំងនឹងអំពើពុករលួយហាក់ដូចជាជាប់គាំងផ្ទុយពីការសន្យាម្តងហើយម្តងទៀតពីរដ្ឋបាលរបស់លោកប្រធានាធិបតី។ ក៏ប៉ុន្តែ លោក Mohammed មិនយល់ស្របនឹងមតិនេះឡើយ។
លោក Mohammed និយាយថា៖ «កាលពីមុន អំពើពុករលួយត្រូវបានគេសាទរក្នុងប្រទេសនីហ្សេរីយ៉ា។ កាលពីមុន ជនដែលប្រព្រឹត្តអំពើពុករលួយត្រូវបានគេយកធ្វើជាគំរូ តាមពិតទៅពួកគេជាអ្នកបញ្ជាកិច្ចការគ្រប់យ៉ាងក្នុងប្រទេសនេះ។ ប៉ុន្តែសព្វថ្ងៃនេះ អ្វីៗទាំងអស់បានផ្លាស់ប្តូរហើយ។ នេះជាលើកទី១ហើយ ដែលប្រជាជននីហ្សេរីយ៉ាគាំទ្រការពិតដែលថាអំពើពុករលួយគឺជាអំពើអាក្រក់ហើយវាមិនគួរឲ្យសាទរឡើយ»។
លោកបន្តថា នៅក្នុងឆ្នាំថ្មីនេះ ប្រជាជននីហ្សេរីយ៉ាគួរតែរំពឹងថានឹងមានរដ្ឋាភិបាលដែលមានភាពស្មោះត្រង់ និងបេ្តជ្ញាចិត្តក្នុងការធ្វើឲ្យជីវិតរបស់ពួកគេប្រសើរឡើង ទោះបីជាមានបញ្ហាប្រឈមជាច្រើនដែលប្រទេសទាំងមូលកំពុងជួបប្រទះក៏ដោយ៕
ប្រែសម្រួលដោយ ទុំ ម្លិះ
