របាយការណ៍ថ្មីមួយដែលសិក្សាដោយអង្គការលីកាដូ និងអង្គការសមធម៌កម្ពុជាបានរកឃើញថា អ្នកខ្ចីប្រាក់ភាគច្រើនគឺ«ជាប់ជំពាក់បំណុលច្រើនលើសលប់» ហើយក៏មានករណីលក់ដីដើម្បីសងបំណុលផងដែរ។
របាយការណ៍ដែលចេញផ្សាយនៅថ្ងៃអង្គារនេះមានចំណងជើងថា ហានិភ័យនៃបំណុល៖ ការសិក្សាស្រាវជ្រាវបែបបរិមាណនៃអ្នកជាប់ជំពាក់កម្ចីខ្នាតតូចនៅខេត្តកំពង់ស្ពឺ។ របាយការណ៍នេះស្ទង់មតិទៅលើប្រជាពលរដ្ឋចំនួន៧១៧ខ្នងផ្ទះនៅក្នុងខេត្តកំពង់ស្ពឺ កាលពីដើមឆ្នាំ២០២២។
បើតាមរបាយការណ៍នេះ អ្នកខ្ចីប្រាក់ជាង២/៣«យល់ស្របទាំងស្រុង» ឬ«យល់ស្រប»ថា គ្រួសាររបស់ពួកគេជំពាក់បំណុលច្រើនពេក។ អ្នកខ្ចីជាង២៧%កំពុងចំណាយប្រាក់ចំណូលរបស់ពួកគេជាង៧០%លើការបង់សងបំណុល ជារៀងរាល់ខែ។
របាយការណ៍នេះបានប៉ាន់ប្រមាណថា ប្រជាពលរដ្ឋខ្មែរជាង១៦៧.០០០នាក់នៅទូទាំងប្រទេសបានលក់ដី ដោយសារភាពជាប់ជំពាក់បំណុលក្នុងរយៈពេល៥ឆ្នាំចុងក្រោយ។
បើតាមសេចក្តីប្រកាសព័ត៌មានរបស់អង្គការទាំងពីរចេញផ្សាយនាថ្ងៃអង្គារនេះ ការសិក្សាស្រាវជ្រាវនេះបង្ហាញថា ការរីករាលដាលនៃភាពជំពាក់បំណុលច្រើនលើសលប់បាននាំឱ្យមានការរំលោភសិទ្ធិមនុស្សធ្ងន់ធ្ងរជាច្រើន រួមមានភាពអត់ឃ្លាន ពលកម្មកុមារ និងការលក់ដីដោយបង្ខំជាដើមនៅទូទាំងខេត្តកំពង់ស្ពឺ។
សេចក្តីប្រកាសព័ត៌មានបន្ថែមថា៖ «អ្នកខ្ចីប្រាក់កំពុងធ្វើការលះបង់ដោយមិនសមស្របជាច្រើន ដើម្បីបង់សងកម្ចីដែលតម្រូវឱ្យដាក់ធានានូវបណ្ណកម្មសិទ្ធិដីធ្លីដ៏ច្រើនលើសលប់ ហើយជារឿយៗវាតែងតែលើសពីប្រាក់ចំណូលនិងសមត្ថភាពរបស់អ្នកខ្ចីក្នុងការបង់សង»។
អ្នកស្រី ពីឡូក ណាលី នាយិកាទទួលបន្ទុកកិច្ចការក្រៅតំបន់នៃអង្គការលីកាដូ ថ្លែងក្នុងសេចក្តីប្រកាសព័ត៌មានថា៖ «ការស្រាវជ្រាវនេះផ្ដល់នូវភស្តុតាងបន្ថែមទៀតថា ការរំលោភសិទ្ធិមនុស្សគឺកំពុងកើតឡើងជាញឹកញាប់និងជាលក្ខណៈប្រព័ន្ធនៅក្នុងវិស័យឥណទានខ្នាតតូចនៅកម្ពុជា»។
អ្នកស្រីបន្ថែមថា ប្រជាពលរដ្ឋអ្នកខ្ចីប្រាក់មិនមានពេលវេលាសម្រាប់ការពន្យារពេលទៀតនោះទេ ហើយពួកគេត្រូវការការអនុគ្រោះបំណុលបន្ទាន់សម្រាប់អ្នកជាប់ជំពាក់បំណុលច្រើនលើសលប់ជាងគេ ដើម្បីទប់ស្កាត់វិបត្តិសិទ្ធិមនុស្សនេះកុំឱ្យធ្ងន់ធ្ងរបន្ថែមទៀត។
បើតាមរបាយការណ៍ ប្រជាពលរដ្ឋតាមខ្នងផ្ទះជាង៩២% ត្រូវបានតម្រូវឱ្យដាក់បណ្ណកម្មសិទ្ធិដីធ្លីយ៉ាងតិចមួយដើម្បីវាយតម្លៃពីកម្ចីឥណទានខ្នាតតូចមួយ។ របាយការណ៍បន្ថែមថា ប្រជាពលរដ្ឋតាមខ្នងផ្ទះ៦,១% នៃចំនួនខ្នងផ្ទះសរុបជាង៧០០ ដែលត្រូវបានសម្ភាស បានលក់ដីដើម្បីសងបំណុល។
ពលកម្មកុមារ និងកុមារបោះបង់ការសិក្សាដោយសារបំណុលគ្រឹះស្ថានមីក្រូហិរញ្ញវត្ថុ ឬធនាគារ គឺកើតឡើងញឹកញាប់ខ្លាំង។ ប្រមាណជា៣%នៃប្រជាពលរដ្ឋតាមខ្នងផ្ទះបានឱ្យកូនបោះបង់ការសិក្សា ដោយសារតែកម្ចីមីក្រូហិរញ្ញវត្ថុ ឬធនាគារ ដោយកុមារជាច្រើនត្រូវទៅធ្វើការជួយរកប្រាក់ ដើម្បីបង់សងកម្ចីទាំងនោះវិញ។ នេះបើតាមរបាយការណ៍។ អ្នកផ្ដល់បទសម្ភាសន៍ជិត១/៥ (១៨,៣%) បរិភោគអាហារតិចជាងមុនក្រោយពេលយកកម្ចីពីគ្រឹះស្ថានមីក្រូហិរញ្ញវត្ថុ ឬធនាគារ។
ប្រជាពលរដ្ឋកំពុងបង្កើនការយកកម្ចីថ្មី ដើម្បីទៅសងកម្ចីចាស់។ បើតាមរបាយការណ៍នេះ អ្នកខ្ចីភាគច្រើន មិនបានយល់ដឹងពីដំណើរការផ្លូវច្បាប់ ក្នុងករណីខកខានការបង់សងកម្ចី ឬមិនជឿថា មានការប្រើប្រាស់ដំណើរការផ្លូវច្បាប់។
អង្គការលីកាដូ និងអង្គការសមធម៌កម្ពុជាបានជំរុញដល់វិនិយោគិន អាជ្ញាធរនិងតួអង្គអភិវឌ្ឍន៍នានាត្រូវចាត់វិធានការបន្ទាន់ដើម្បីផ្ដល់ដំណោះស្រាយសម្រាប់អ្នកខ្ចីប្រាក់និងធានាថា ការអនុវត្តបែបកេងប្រវ័ញ្ចទាំងនេះនឹងត្រូវបញ្ឈប់ព្រមទាំងដាក់ចេញនូវវិធានការច្បាប់ការពារអ្នកប្រើប្រាស់ដើម្បីអាចឱ្យយើងធានាបានថា សិទ្ធិមនុស្សជាមូលដ្ឋានរបស់អ្នកខ្ចីប្រាក់ត្រូវបានគោរព។
ប្រធាននាយកដ្ឋានទំនាក់ទំនងនៃសមាគមមីក្រូហិរញ្ញវត្ថុកម្ពុជា និងជាអ្នកនាំពាក្យលោក កាំង តុងងី ប្រាប់វីអូអេនៅថ្ងៃអង្គារនេះថា សមាគមមីក្រូហិរញ្ញវត្ថុកម្ពុជាកំពុងតែពិនិត្យមើលរបាយការណ៍នេះ។ លោកបន្តថា កាលពីពេលកន្លងទៅ ស្ថាប័នមីក្រូហិរញ្ញវត្ថុមួយចំនួនក៏ធ្លាប់ចូលរួមដោះស្រាយបញ្ហាបំណុលដល់ប្រជាពលរដ្ឋដែរ ដើម្បីជួយសម្រាលបន្ទុកបញ្ហាបំណុល ប្រសិនបើពួកគេជួបស្ថានភាពលំបាក។
លោកថ្លែងថា៖ «ក្នុងវិស័យមីក្រូហិរញ្ញវត្ថុមានអតិថិជនប្រមាណជាជាង២លាននាក់ អ៊ីចឹងវាចៀសមិនផុតទេ ដែលយើងមានអតិថិជនមួយចំនួន គាត់មិនមានលទ្ធភាពសង ដែលជារឿយៗដូចជាបញ្ហាគ្រោះថ្នាក់ចៃដន្យ មរណភាព ជំងឺផ្សេងៗដែលតែងតែកើតឡើង។ អ៊ីចឹងក៏មានគ្រឹះស្ថានមួយចំនួនគោរពនូវបំណុលទាំងអស់ហ្នឹង ប៉ុន្តែគ្រាន់តែថា គាត់អត់ផ្សាយជាសាធារណៈទេដោយសារតែវាអាចមានហានិភ័យទៅលើវិន័យច្បាប់ក្នុងព្រះរាជាណាចក្រកម្ពុជា»។
បើតាមអ្នកនាំពាក្យរូបនោះ វិស័យមីក្រូហិរញ្ញវត្ថុកម្ពុជាបានដើរតួនាទីយ៉ាងសំខាន់ក្នុងការលើកកម្ពស់ជីវភាពរបស់ប្រជាជនកម្ពុជា កាត់បន្ថយភាពក្រីក្រ និងជំរុញដល់កំណើនសេដ្ឋកិច្ចជាតិ។
វីអូអេពុំទាន់អាចសុំការអត្ថាធិប្បាយពីអ្នកស្រី ជា សិរី អគ្គទេសាភិបាលធនាគារជាតិនៃកម្ពុជាបាននៅឡើយទេ។
លោក ប៉ែន បូណា អ្នកនាំពាក្យរដ្ឋាភិបាល ប្រាប់វីអូអេនៅថ្ងៃអង្គារថា របាយការណ៍របស់អង្គការសង្គមស៊ីវិលទាំង២បង្ហាញភាពអវិជ្ជមានតែមួយជ្រុងប៉ុណ្ណោះ ដែលមិនឆ្លុះបញ្ចាំងស្ថានការណ៍ទាំងមូលឡើយ។ លោកបន្ថែមថា រដ្ឋាភិបាលកម្ពុជាមានគោលនយោបាយច្បាស់លាស់ក្នុងការលើកកម្ពស់ជីវភាពប្រជាពលរដ្ឋ ក្នុងពេលដែលពិភពលោកកំពុងរងផលប៉ះពាល់ដោយសារវិបត្តិជំងឺកូវីដ១៩ និងសង្រ្គាមនៅអ៊ុយក្រែន។
បើតាមលោក ប៉ែន បូណា រដ្ឋាភិបាលកម្ពុជាក៏បានស្នើឱ្យមានការសម្របសម្រួលរវាងស្ថាប័នមីក្រូហិរញ្ញវត្ថុ និងប្រជាពលរដ្ឋជំពាក់បំណុលផងដែរ ក្នុងពេលកម្ពុជាជួបវិបត្តិជំងឺកូវីដ១៩។
នាយកប្រតិបត្តិនៃអង្គការសមធម៌កម្ពុជា លោក អៀង វុទ្ធី ប្រាប់វីអូអេថា របាយខាងលើបង្ហាញឱ្យឃើញថា ការជំពាក់បំណុលនៅតែបន្តកើតមានឡើង និងជាបញ្ហាមួយគួរឱ្យបារម្ភ។ លោកថា បញ្ហានេះត្រូវមានការយកចិត្តទុកដាក់ពីសំណាក់ភាគីពាក់ព័ន្ធ។ លោកបន្តថា កត្តាចម្បងដែលបង្ខំអ្នកជំពាក់បំណុលឱ្យលក់ដីផ្ទះសម្បែង គឺបណ្តាលមកពីការដាក់ទ្រព្យបញ្ចាំ។
លោកថ្លែងថា៖ «យើងចង់ឃើញថា ប្លង់ទាំងអស់ហ្នឹងត្រូវបានប្រគល់ឱ្យប្រជាពលរដ្ឋវិញ។ ទៅមុខទៅ ការខ្ចីបែបជាលក្ខណៈដាក់ទ្រព្យបញ្ចាំនេះ គួរតែបញ្ឈប់ ដើម្បីការពារទាំងដល់ប្រជាពលរដ្ឋដែលរងការរំលោភបំពាន គឺត្រូវមានគោលនយោបាយទាក់ទងទៅនឹងការការពារអ្នកប្រើប្រាស់។ យើងចង់ឃើញជាគោលនយោបាយមួយយ៉ាងម៉ឺងម៉ាត់សម្រាប់ការអនុវត្តចំពោះមីក្រូហិរញ្ញវត្ថុ និងវិស័យផ្សេងទៀតផងដែរ»។
គួរបញ្ជាក់ថា ទំហំកម្ចីឥណទានខ្នាតតូចជាមធ្យមនៅកម្ពុជាមានចំនួនជាង៤ពាន់ដុល្លារដែលជាចំនួនច្រើនជាងគេនៅក្នុងពិភពលោក៕
