ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក គុជ លី ធ្វើ​យុទ្ធនាការ​ទាក់ទាញ​អ្នកគាំទ្រ​បក្ស​សង្គ្រោះ​ជាតិ


លោក គុជ លី អនុប្រធាន និងជាស្ថាបនិកគណបក្សខ្មែរតែមួយ។ (អូន ឆេងប៉រ/VOA)

បើ​តាម​លិខិត​មួយ​ច្បាប់​​របស់​​លោក​ ​គុជ លី​ ​ចេញ​នៅ​ថ្ងៃទី​២៧​ ​ខែ​មីនា​ ​ឆ្នាំ​២០១៨​ ​ផ្ញើ​ជូន​លោក​ ​សម រង្ស៊ី​ ​និង​អ្នកស្រី​ ​មូរ សុខហួរ​ ​បាន​បញ្ជាក់​ថា​ ​លោក​អរគុណ​​លោក​ ​សម រង្ស៊ី​ ​ដោយ​ថា​ ​លោក សម រង្ស៊ី​ ​ចាប់​អារម្មណ៍​លើ​គណបក្ស​ថ្មី​របស់​លោក។

ក្រុមមន្រ្តី ​និង​តំណាង​រាស្រ្ត​គណបក្ស​សង្គ្រោះ​ជាតិ​ព្រមទាំង​អ្នកតាមដាន​ស្ថានការណ៍​នយោបាយ​ បង្ហាញ​មន្ទិល​ពី​ការ​ប្រកាស​របស់​លោក គុជ លី ​ស្ថាបនិក​គណបក្ស​ខ្មែរ​តែ​មួយក្នុងការ​គាំទ្រ​ ​និង​ចូលរួម​ជាមួយ​ចលនា​សង្គ្រោះ​ជាតិ​ដែល​ដឹកនាំ​ដោយ​លោក សម រង្ស៊ី​ហើយសង្ស័យ​ថា​ជា​ល្បិច​ទាក់ទាញ​អ្នកគាំទ្រ​និង​ទាញ​អតីត​បក្ស​ប្រឆាំង​ឱ្យ​មាន​គ្រោះថ្នាក់។

ក្រុម​មន្រ្តី​ជាន់ខ្ពស់​ និង​តំណាង​រាស្រ្ត​មួយ​ចំនួន​របស់​គណបក្ស​សង្គ្រោះជាតិ​ដែល​ត្រូវ​បាន​តុលាការ​កំពូល​រំលាយ​និង​ព្យួរ​សិទ្ធិ​ធ្វើ​នយោបាយ​ ដូចជា​លោក មុត ចន្ថា ​លោក ម៉ៅ មុនីវណ្ណ ​និង​លោក អ៊ូ ច័ន្ទរ័ត្ន ​ជាដើម​សុទ្ធតែ​បាន​បញ្ជាក់​ថា ​មិន​បាន​ស្គាល់​ថា​ លោក គុជ លី ថា​ធ្លាប់​ជា​សមាជិក​ថ្នាក់​ដឹកនាំ​គណបក្ស​សង្គ្រោះ​ជាតិ​នោះ​ទេ។

រូបឯកសារ៖ លោក អ៊ូ ច័ន្ទរ័ត្ន ​តំណាងរាស្រ្ត​គណបក្ស​ប្រឆាំង​មួយ​រូប​ដែល​ត្រូវ​បាន​តុលាការ​ព្យួរ​សិទ្ធិ​នយោបាយ។
រូបឯកសារ៖ លោក អ៊ូ ច័ន្ទរ័ត្ន ​តំណាងរាស្រ្ត​គណបក្ស​ប្រឆាំង​មួយ​រូប​ដែល​ត្រូវ​បាន​តុលាការ​ព្យួរ​សិទ្ធិ​នយោបាយ។

លោក អ៊ូ ច័ន្ទរ័ត្ន ​តំណាងរាស្រ្ត​គណបក្ស​ប្រឆាំង​មួយ​រូប​ដែល​ត្រូវ​បាន​តុលាការ​ព្យួរ​សិទ្ធិ​នយោបាយ​ដែរ​នោះ ប្រាប់ VOA ថា៖

«វា​អាច​មាន​រឿង​ពីរ ទី១​ទាក់ទាញ​ឲ្យ​អ្នក​បោះឆ្នោត អ្នកគាំទ្រ​សង្គ្រោះជាតិ​ហ្នឹង​បោះឆ្នោត​ឲ្យគាត់។ ទី២​អាច​ជា​អន្ទាក់ កាលណា​មាន​អ្នកគាំទ្រ​ចូលរួម ទៅ​តាម​អ្វី​ដែល​គាត់​អំពាវ​នាវ​ហ្នឹង គាំទ្រ​ចលនា​ក្តី ឬក៏​ធ្វើ​សកម្មភាព​ដើម្បី​គាំទ្រ​ចលនា​ក្តី វា​អាច​ជា​អន្ទាក់​របស់​រដ្ឋាភិបាល ព្រោះ​រដ្ឋាភិបាល​លោកបាន​ប្រកាស​ហើយ ថា​លោក​តាមដាន ត្រួត​ពិនិត្យ​ទៅ​ល​សកម្មភាព​ចលនា​សង្គ្រោះ​ជាតិ​ហ្នឹង។ មាន​ទាំង​អាច​នឹង​បង្រ្កាប​សកម្មភាពចលនា​ហ្នឹង​ផង​ក៏​មិន​ដឹង​ដែរ»។

លោក​ច័ន្ទរ័ត្ន​បន្ថែម​ថា​ទង្វើ​របស់​លោក គុជ លី ​នឹង​មិន​អាច​ទាក់ទាញ​ការ​គាំទ្រ​ណាមួយ​ពី​សកម្មជន និង​អ្នកគាំទ្រ​គណបក្ស​សង្គ្រោះជាតិ​បាន​នោះ​ទេ។

បើ​តាម​លិខិត​មួយ​ច្បាប់របស់លោក​ ​គុជ លី​ ​ចេញ​នៅ​ថ្ងៃទី​២៧​ ​ខែ​មីនា​ ​ឆ្នាំ​២០១៨​ ​ផ្ញើ​ជូន​លោក​ ​សម រង្ស៊ី​ ​និង​អ្នកស្រី​ ​មូរ សុខហួរ​ ​បាន​បញ្ជាក់​ថា​ ​លោក​អរគុណលោក​ ​សម រង្ស៊ី​ ​ដោយ​ថា​ ​លោក សម រង្ស៊ី​ ​ចាប់​អារម្មណ៍​លើ​គណបក្ស​ថ្មី​របស់​លោក។​ ​លោក​បន្ថែម​ក្នុង​លិខិត​នោះ​ដោយ​ប្រកាស​គាំទ្រ​ និង​ចូលរួម​យ៉ាង​សកម្ម​ជាមួយ​ចលនា​សង្គ្រោះ​ជាតិ​របស់​លោក​ ​សម រង្ស៊ី។​

លោក​ ​គុជ លី​ ​សរសេរ​ក្នុង​លិខិត​នោះ​ថា៖​

«ខ្ញុំ​បាទ​ ​គុជ លី​ ​សូម​អំពាវនាវដល់​អ្នក​គាំទ្រ​ ​និង​សកម្មជន​អតីតសង្គ្រោះជាតិ​នៅ​ក្នុង​ ​និង​ក្រៅ​ប្រទេស​ ​សូម​អញ្ជើញ​ចូលរួមជាមួយ​គណ​បក្ស​ខ្មែរ​តែមួយដើម្បី​ធ្វើ​បេសកកម្ម​ជា​មួយ​ចលនា​សង្គ្រោះ​ជាតិ​ ​ទាមទារ​ឲ្យ​រដ្ឋាភិបាល​កម្ពុជា​ដឹកនាំដោយ​លោក​ ​ហ៊ុន សែន​ ​ជា​នាយក​រដ្ឋ​មន្រ្តី​នៃ​ព្រះ​រាជាណា​ចក្រ​កម្ពុជាមេត្តា​ដោះស្រាយ​រឿង​ខ្មែរ​ និង​ខ្មែរដោយ​សន្តិវិធី»។​

លោក​ ​គុជ លី​ ​អនុប្រធាន​គណបក្ស​ខ្មែរ​តែមួយ​ ​ប្រាប់​ ​VOA​ ​នា​រសៀល​ថ្ងៃ​ពុធ​នេះ​ថា​ ​ការ​ប្រកាស​ចូលរួម​ ​និង​គាំទ្រ​ចលនា​សង្គ្រោះ​ជាតិ​របស់​លោក​ ​សម រង្ស៊ី​ ​គឺធ្វើឡើង​ដើម្បី​អំពាវនាវ​ឲ្យ​អតីតសកម្ម​ជន​ ​និង​អ្នកគាំទ្រ​គណបក្ស​នេះ​ ​មក​ចូលរួម​ជាមួយ​គណបក្ស​ខ្មែរ​តែមួយ​របស់​លោក​ ​ក្នុង​គោលដៅ​ការពារ​ផល​ប្រយោជន៍​ជាតិ។​ ​លោក​បន្ថែម​ថា​ ​លោក​មិន​បារម្ភ​ពី​ការ​បង្រ្កាប​ណាមួយ​របស់​រដ្ឋា​ភិបាល ដែល​បាន​ហៅ​ចលនា​សង្គ្រោះជាតិ​ថា​ជា​ចលនា​ឧទ្ទាមនោះទេ។​

លោក​បញ្ជាក់​ថា៖​

«បើសិន​ខ្ញុំ​អំពាវ​ឲ្យ​ប្រជាពល​រដ្ឋ​ស្រុកខ្មែរ​ងើបឡើង​បះបោរ​ចូលរួម​ជាមួយ​ចលនា​របស់​លោក​ ​សម រង្ស៊ី​ ​ហ្អា​ហ្នឹង​ខ្ញុំ​ខុសច្បាប់។​ ​តែដែលខ្ញុំ​អំពាវនាវ​នេះ​គឺ​ក្នុង​ន័យ​បង្រួបបង្រួម​ជាតិ​ ​កុំ​ឲ្យ​ម្ង៉ៃៗ​យើង​ខ្មាស​គេ​ណាស់​ ​យើងបើកតែ​ភ្នែកឡើងមើល​ហ្វេសប៊ុក​ ​មើល​ព័ត៌មាន​ ​ឮ​សូរ​តែ​សម្តេច​ហ៊ុន​ សែន​ ​ជេរពួក​ប្រឆាំង​ ​ឮ​តែ​ពួកប្រឆាំង ជេរ​សម្តេច​ហ៊ុនសែន​ ​[...]​ ​អញ្ចឹង​ហើយ​បាន​យើង​បង្កើត​គណបក្ស​ខ្មែរ​តែមួយ​នេះ​ ​គឺ​គោលដៅ​បង្រួប​បង្រួម​ឲ្យ​ខ្មែរ​យើង​ចេះ​សាមគ្គីក្នុង​ន័យ​គណបក្ស​ខ្មែរតែ​មួយហ្នឹងតែ​ម្តង»។​

លោក​ ​គុជ លី​ ​បាន​ពន្យល់​ពី​ការអះអាង​របស់​លោក​ក្នុង​លិខិត​ដែល​ថា​ ​លោក​ ​សម រង្ស៊ី​ ​បាន​ចាប់​អារម្មណ៍លើ​គណបក្ស​ខ្មែរ​តែមួយ​របស់​លោក​យ៉ាង​ដូច្នេះ៖​

«វិទ្យុ​ ​RFI​ ​បាន​សម្ភាសន៍​លោក​ប្រធាន​ ​សម រង្ស៊ី​ ​ទាក់ទង​នឹង​គណបក្ស​ដែល​តូច​កើត​ឡើង​ ​គឺ​គណ​បក្ស​ខ្មែរ​តែមួយ។​ ​គាត់​បាន​ប្រកាស​ថា​គាត់​មិន​បាន​គាំទ្រ​ចលនា​គណបក្ស​ស្អី​ដែល​កើតឡើង​នោះ​ទេ គាត់​គាំទ្រ​អ្នកស្រី​ ​ប៊ូ រចនា​ ​គាត់​មិន​គាំទ្រ​លោក​ ​កែម រិទ្ធីសិត។ អញ្ចឹង​បានន័យ​ថា​លោក​ប្រធាន​ សម រង្សី​ ​គាត់ទទួល​ស្គាល់​ហើយ ព្រោះ​លោកស្រី​ ​ប៊ូ រចនា​ ​គឺជា​ភរិយា​របស់​លោក​ ​កែម ឡី​ ​ហើយ​គណ​បក្ស​នេះ​គឺជា​គណបក្ស​របស់​លោក​ ​កែម ឡី​ ​អញ្ចឹង​លោកប្រធាន​គាត់​មិនហ៊ាន​និយាយ​ការពិត​ទេ តែគាត់​និយាយ​ប្រយោល​ ​គឺ​គាត់​បាន​គាំទ្រ​ពួកខ្ញុំ​បាត់​ទៅ​ហើយ»។

រូបឯកសារ៖ លោក សម រង្ស៊ី អតីត​ប្រធាន​គណបក្ស​សង្គ្រោះ​ជាតិ នៅក្នុង​បន្ទប់​ផ្សាយ​របស់ VOA ក្នុង​រដ្ឋធានី​វ៉ាស៊ីនតោន។
រូបឯកសារ៖ លោក សម រង្ស៊ី អតីត​ប្រធាន​គណបក្ស​សង្គ្រោះ​ជាតិ នៅក្នុង​បន្ទប់​ផ្សាយ​របស់ VOA ក្នុង​រដ្ឋធានី​វ៉ាស៊ីនតោន។

លោក សម រង្ស៊ី ​ប្រាប់ ​VOA ​តាមរយៈ​សារ​អេឡិច​ត្រូនិច​ ឬ​អ៊ីមែល នា​យប់​ថ្ងៃពុធ​ថា លោក គុជ លី និង​គណបក្ស​ខ្មែរ​តែមួយ​ដែល​ទើប​តែ​បង្កើត​ដោយ​លោក គុជ លី និង​លោក កែម រិទ្ធីសិត មិនមាន​ពាក់ព័ន្ធ​ជាមួយ​នឹង​គណបក្ស​សង្គ្រោះជាតិ ឬ​ចលនា​សង្គ្រោះជាតិ​នោះ​ទេ។ ទោះ​យ៉ាង​ណា​លោក​ថា លោក​ស្វាគមន៍​រាល់​ការ​គាំទ្រ​ និង​ចូលរួម​ជា​មួយ​ចលនា​សង្គ្រោះជាតិ​របស់​លោក។

លោក​បញ្ជាក់​ថា «ខ្ញុំ​សូម​ស្វាគមន៍​ការគាំទ្រ​ណាមួយ​ចំពោះ​គណបក្ស​សង្គ្រោះជាតិ និង​ចលនា​សង្គ្រោះ​ជាតិ​ក្នុង​ការតស៊ូ​ឥត​ឈប់​ឈរ​របស់​យើង​ដើម្បីឲ្យ​មាន​ការផ្លាស់ប្តូរ​តាម​បែប​ប្រជាធិបតេយ្យ​ តាមរយៈ​ការបោះឆ្នោត​ដោយ​ពិត​ប្រាកដ​មួយ ដែល​មាន​ការទទួល​ស្គាល់​ជា​លក្ខណៈ​អន្តរជាតិ និង​ដោយ​មានវត្តមានចូលរួម​របស់​គណបក្ស​សង្គ្រោះជាតិ»។

​លោក​ ​គុជ លី​ ​ដែល​ជា​អ្នក​នយោបាយ​ទើប​លេច​មុខ​ថ្មីថ្មោង​ ​អះអាង​ថា​ លោក​ធ្លាប់​ជា​សមាជិក​ ​គណ​បក្សសង្គ្រោះជាតិ​នៅ​ប្រទេស​បារាំង​ ​ក៏​ប៉ុន្តែ​លោកថា លោកបាន​សម្រេច​ចិត្តចាក​ចេញ​ពី​គណ​បក្ស​នេះ​ដោយ​សារមិនពេញ​ចិត្ត​ថ្នាក់​ដឹក​នាំ​គឺ​លោក ​សម រង្ស៊ី។​

លើ​គណនី​ហ្វេសប៊ុក​របស់​លោក គុជ លី ដែល​មាន​ឈ្មោះ​ថា «Kuch Kuch» បាន​បង្ហោះរូប​ថត​ជាច្រើន​សន្លឹក​ដែល​លោក​បាន​ថត​ជាមួយ​លោក សម រង្ស៊ី និង​លោក កឹម សុខា ព្រមទាំង​ជាមួយ​អ្នកគាំទ្រ​គណបក្ស​សង្គ្រោះជាតិ​មួយ​ចំនួន​ទៀត។ ក្នុង​នោះ លោក គុជ លី ក៏​បាន​បង្ហោះ​លិខិត​មួយ​ច្បាប់​ចេញ​កាលពី​ខែឧសភា ឆ្នាំ​២០១៣ ​ស្តីពី​ការ​សម្រេច​តែងតាំង​ថ្នាក់​ដឹកនាំ​គណបក្ស​សង្គ្រោះជាតិ​ប្រចាំ​ប្រទេស​បារាំង ដែល​ចុះ​ហត្ថលេខា​ដោយ លោក កឹម សុខា ជា​ប្រធានស្តីទី​គណបក្ស​នា​ពេល​នោះ។ ក្នុង​លិខិត​នោះ ក៏​ឃើញ​មាន​ឈ្មោះ លោក គុជ លី ជា​សមាជិក​គណបក្ស​សង្គ្រោះជាតិ​ប្រចាំ​ប្រទេស​បារាំង​ផង​ដែរ។

ក្រោយ​គណ​បក្ស​សង្គ្រោះជាតិ​ត្រូវ​បាន​តុលាការ​កំពូល​រំលាយ​ ​ដោយ​ចោទ​ថា​បាន​ឃុបឃិត​ជាមួយ​បរទេស​ រៀបគម្រោង​ផ្តួល​រំលំ​រដ្ឋាភិបាល​កម្ពុជា​ ​លោក​ ​សម រង្ស៊ី​ ​និង​អតីត​តំណាង​រាស្រ្ត​គណបក្ស​ប្រឆាំង​មួយ​ចំនួន​ទៀត​ ​ដែល​កំពុង​ស្ថិត​នៅ​ក្រៅ​ប្រទេស​ ​បាន​ចាប់​ផ្តើម​បង្កើត​ចលនា​សង្រ្គោះ​ជាតិ​ ​ កាល​ពី​ថ្ងៃ​ទី​១២ ​ខែ​មករា​ ឆ្នាំ​២០១៨។​

លោក​ ​សម រង្ស៊ី​ ​អះអាង​ថា​ ​ចលនា​នោះ​បង្កើត​ឡើង​ដើម្បី ទាមទារ​ដោយ​សន្តិវិធី​ឲ្យមានការ​ដោះលែង​លោក កឹម សុខា និង​មន្រ្តី​គណបក្ស​ប្រឆាំង​ផ្សេងទៀត​ដែល​កំពុង​ជាប់​ពន្ធនាគារ​ ​ទាមទារ​ឲ្យ​មាន​ការ​បោះឆ្នោត​ដោយ​ត្រឹមត្រូវ និង​ទាមទារឲ្យ​កម្ពុជា​មាន​លទ្ធិ​ប្រជាធិបតេយ្យ​ ​តាម​រយៈ​ការ​រៀបចំ​បណ្តាញ​របស់​ខ្លួន​នៅ​ទូទាំង​ប្រទេស។​ ​លោក ​សម ​រង្ស៊ី ​បាន​អំពាវនាវ​កុំ​ឲ្យ​ថ្នាក់​ដឹកនាំ​សំខាន់ៗ​របស់​គណបក្ស​សង្រ្គោះ​ជាតិ​ ប្រកាស​ការ​គាំទ្រ​របស់​ខ្លួន​ចំពោះ​ចលនា​នេះ​ជា​សាធារណៈ​ ​ដើម្បី​ធានា​សុវត្ថិភាព​ ​និង​ធានា​ប្រសិទ្ធ​ភាព​ការងារ​របស់​ចលនា​នេះ។​

ក្រោយ​ការ​ប្រកាស​បង្កើត​ចលនា​សង្គ្រោះ​ជាតិ​នេះ​ ​គេ​ឃើញ​មន្រ្តី​ជាន់ខ្ពស់​ដែល​ជា​មេ​ទាហាន ​និង​មេ​នគរ​បាល​ជា​ច្រើន​រូប រួម​មាន​ ​លោក​ ​ទៀ បាញ់​ ​រដ្ឋមន្រ្តី​ក្រសួង​ការពារ​ជាតិ​ ​លោក​ ​ស ខេង​ ​រដ្ឋមន្រ្តី​ក្រសួង​មហាផ្ទៃ​ ​លោក​ ​សៅ សុខា​ ​មេ​បញ្ជាការ​កង​រាជ​អាវុធហត្ថ​លើ​ផ្ទៃ​ប្រទេស​ជាដើម​ ​បាន​ហៅ​ចលនា​នោះ​ថា​ ​ជា​«ភេរវកម្ម»​ ​និង​បានប្តេជ្ញា​បង្រ្កាប​ចលនា​នេះ​ ​មិន​ឲ្យ​កើត​មាន​នៅ​កម្ពុជា​ជា​ដាច់​ខាត។

រូបឯកសារ៖ លោក ​ខៀវ សុភ័គ អ្នកនាំពាក្យ​ក្រសួង​មហាផ្ទៃ​និយាយ​ជាមួយអ្នកសារព័ត៌មាន​នៅ​ថ្ងៃ​ព្រហស្បតិ៍ទី​១១ ខែ​សីហា ឆ្នាំ​២០១៦​ នៅ​រាជធានី​ភ្នំពេញ។ (VOA)
រូបឯកសារ៖ លោក ​ខៀវ សុភ័គ អ្នកនាំពាក្យ​ក្រសួង​មហាផ្ទៃ​និយាយ​ជាមួយអ្នកសារព័ត៌មាន​នៅ​ថ្ងៃ​ព្រហស្បតិ៍ទី​១១ ខែ​សីហា ឆ្នាំ​២០១៦​ នៅ​រាជធានី​ភ្នំពេញ។ (VOA)

លោក​នាយ​ឧត្តម​សេនីយ៍​ ​ខៀវ សុភ័គ​ ​អ្នកនាំពាក្យ​ក្រសួង​មហាផ្ទៃ​លើកឡើងថា​ ​ការ​ប្រកាស​របស់​លោក គុជ លី​ ​ពីការ​គាំទ្រ​ ​និងចូលរួម​ជាមួយ​ចលនា​សង្គ្រោះជាតិ​ គឺ​គ្រាន់តែ​ជា​ការ​ប្រកាស មិនមែន​ជា​សកម្មភាពខុសច្បាប់​ណា​មួយ​នៅ​ឡើយ។​ ​លោក​បន្ថែម​ថា​ក្រសួង​នឹង​ចាត់​វិធាន​ការផ្លូវ​ច្បាប់ ប្រសិន​បើ​មាន​ការ​ធ្វើសកម្មភាព​ពាក់ព័ន្ធនឹង​ចលនា​នោះ​ នៅ​កម្ពុជា។

លោក​មាន​ប្រសាសន៍​ថា៖​

«ប្រកាសគ្រាន់​តែ​ជា​ការ​គាំទ្រ​ទេ​ ​មិនមែន​ជា​សកម្មភាព​ដែលធ្វើ​ឲ្យ​គណ​បក្ស​សង្គ្រោះជាតិ​រស់​រាន​មាន​ជីវិត​ឡើង​វិញ​ទេ។​ ​ខ្ញុំគិតថា​នេះ​ជា​ការ​ប្រកាស​មួយ​ ​ប៉ុន្តែទោះ​ជា​យ៉ាង​ណាក៏​ដោយ សមត្ថកិច្ច​នឹង​បន្ត​ឃ្លាំមើល​សកម្មភាព​ជាក់ស្តែង តើ​សកម្មភាព​ជាក់ស្តែង​ហ្នឹងមា​ន​បំណងនាំមក​ឲ្យ​គណ​បក្ស​សង្គ្រោះជាតិ​រស់​ឡើង​វិញ ឬអត់ ​អាហ្នឹង​ទើប​យើង​ចាត់​វិធានការ។ ក្នុង​ករណី​នេះ យើង​គ្រាន់​ចាត់​ទុក​ថា​ជា​ការ​កត់​សម្គាល់​មួយ​របស់​សមត្ថកិច្ច»។

គណបក្ស​ខ្មែរ​តែ​មួយ​ ​ជា​គណបក្ស​ដែល​បង្កើត​ឡើង​ដោយ​ប្អូនប្រុស​របស់​លោក​ ​កែម ឡី​ ​និង​ត្រូវ​បាន​ប្តូរ​មកពី​ ​គណបក្ស​ ​កែម ឡី​ ​បន្ទាប់​ពី​ក្រសួង​មហាផ្ទៃ​បញ្ជាក់​ថា​ ​ការ​ប្រើ​ឈ្មោះ​បុគ្គល​ ​ធ្វើ​ជា​ឈ្មោះ​គណបក្ស​ ​គឺ​ផ្ទុយ​នឹង​ច្បាប់​ស្តីពី​គណបក្ស​នយោបាយ។​

រូបឯកសារ៖ ភរិយាលោក កែម ឡី អ្នកស្រី ប៊ូ រចនា និងកូនៗ បន្ទាប់ពីបានទៅដល់ប្រទេសអូស្រ្តាលី ក្រោយពីទទួលបានសិទ្ធិជ្រកកោន។ (ទំព័រ​ហ្វេសប៊ុក SK Media Inc.)
រូបឯកសារ៖ ភរិយាលោក កែម ឡី អ្នកស្រី ប៊ូ រចនា និងកូនៗ បន្ទាប់ពីបានទៅដល់ប្រទេសអូស្រ្តាលី ក្រោយពីទទួលបានសិទ្ធិជ្រកកោន។ (ទំព័រ​ហ្វេសប៊ុក SK Media Inc.)

ភរិយា​របស់​លោកបណ្ឌិត​ ​កែម ឡី​ ​គឺ​អ្នកស្រី​ ​ប៊ូ រចនា​ ​ប្រកាស​ពី​ប្រទេស​អូស្រ្តាលី​មក​ថា​ ​អ្នកស្រី​មិន​គាំទ្រ​គណបក្ស​នយោបាយ​ដែលយកឈ្មោះ​ស្វាមី​របស់​អ្នក​ស្រី​មក​ប្រើ​នោះ​ទេ​ ​ហើយ​ថា​ ​ស្វាមី​អ្នកស្រី​មិនធ្លាប់​មាន​បំណង​ណាមួយ​បង្កើត​គណបក្ស​នយោបាយ​នោះ​ដែរ។

លោក​ ​ឯម សុវណ្ណារ៉ា​ ​អ្នកវិភាគ​ និង​ជា​អ្នក​ឃ្លាំមើល​ស្ថាន​ការណ៍​នយោបាយ​នៅ​កម្ពុជា​ ​លើក​ឡើង​ថា ការ​ប្រកាស​របស់​លោក គុជ លី ក្នុងការគាំទ្រ​ចលនា​សង្គ្រោះ​ជាតិ​ដែល​ដឹកនាំ​ដោយ​លោក សម រង្ស៊ី គឺ​គ្រាន់​តែ​ចង់​ទាក់​ទាញ​សំឡេង​ពី​អ្នកគាំទ្រ​គណបក្ស​សង្គ្រោះជាតិ​ដែល​ត្រូវ​បាន​តុលាការ​រំលាយ​ប៉ុណ្ណោះ។ លោក​បន្ថែមថា ការ​ប្រើយុទ្ធវិធី​របស់​លោក គុជ លី បែបនេះ នឹង​មិនអាច​ទទួល​ផល​ណាមួយ​នោះ​ទេ។

លោក​មាន​ប្រសាសន៍​ថា៖ «មាន​យន្តការ នៅ​មាន​សកម្មភាព​ផ្សេងៗ​ដែល​អាច​អូសទាញ ឬ​ក៏​ប្រើប្រាស់​ដើម្បី​ឲ្យ​អ្នក​ចូលរួម​របស់​ចលនា​សង្គ្រោះជាតិ ដើរ​តាម​សង្គ្រោះជាតិ​ហ្នឹង ងាក​មក​គាំទ្រ​ចលនា ឬ​ក៏សកម្មភាព​របស់​គណបក្ស​ខ្មែរ​តែមួយ​បាន ទាល់តែ​មាន​សកម្មភាព​នានា​ដែល​បង្ហាញ​ពី​កិច្ចការ​ដែល​គេ​គាំទ្រ និង​គេ​ពេញចិត្ត។ អញ្ចឹង​គ្រាន់​តែ​ការប្រកាស​មិនអាច​មាន​ឥទ្ធិពល​អ្វី​ខ្លាំង​នៅ​ក្នុង​សង្គម​ទេ ទាំង​នៅ​ក្នុង​សង្គម​នយោបាយ ទាំង​នៅ​ក្នុង​សេរី​ភាព​នៃ​ការ​បង្កើត​គណបក្ស​នយោបាយ ក៏​អត់​ទាន់​មាន​ភាព​រឹងមាំ​សម្រាប់​បក្ស​ហ្នឹង​បាន​ដែរ»។

រូបឯកសារ៖ រូបភាព​បង្ហាញ​ពី​ក្បួន​ដង្ហែ​សព​របស់​អ្នកវិភាគ​ និង​ស្រាវជ្រាវ​សង្គម​លោក កែម ឡី​ នៅ​តាម​បណ្តោយ​មហាវិថី​ព្រះ​មុនីវង្ស ក្នុង​រាជធានីភ្នំពេញ​ នា​ព្រឹក​ថ្ងៃ​អាទិត្យ​ទី​ ២៤ ខែ​កក្កដា ឆ្នាំ​២០១៦។ (VOA)
រូបឯកសារ៖ រូបភាព​បង្ហាញ​ពី​ក្បួន​ដង្ហែ​សព​របស់​អ្នកវិភាគ​ និង​ស្រាវជ្រាវ​សង្គម​លោក កែម ឡី​ នៅ​តាម​បណ្តោយ​មហាវិថី​ព្រះ​មុនីវង្ស ក្នុង​រាជធានីភ្នំពេញ​ នា​ព្រឹក​ថ្ងៃ​អាទិត្យ​ទី​ ២៤ ខែ​កក្កដា ឆ្នាំ​២០១៦។ (VOA)

លោក​ ​កែម ឡី​ អ្នក​សិក្សា​ស្រាវជ្រាវ ​និង​ជា​អ្នក​វិភាគ​សង្គម​ដែល​តែងតែ​រិះគន់​ការ​ដឹកនាំ​រដ្ឋាភិបាល​របស់​លោក​នាយក​រដ្ឋមន្ត្រី​ហ៊ុន សែន​ ​ត្រូវ​បាន​ខ្មាន់​កាំភ្លើង​បាញ់​សម្លាប់​កាល​ពី​ថ្ងៃ​ទី​១០​ ខែ​កក្កដា​ ឆ្នាំ​២០១៦​ ​នៅ​ស្តាម៉ាត​ ស្ថានីយ​ប្រេង​ឥន្ធនៈ​កាល់តិច​ ​បូកគោ​ រាជធានី​ភ្នំពេញ។​ ក្នុង​ពិធី​ដង្ហែ​សព​លោក​បណ្ឌិត​ កែម ឡី​ ​ទៅ​កាន់​ស្រុក​កំណើត​ ​ឯ​ខេត្ត​តាកែវ​ ​គេឃើញ​មានប្រជាពល​រដ្ឋ​ដង្ហែ​រាប់​ម៉ឺន​នាក់​ចូលរួម៕

អត្ថបទ​ទាក់ទង

XS
SM
MD
LG